Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Meistarafl. karla
Næstu leikir
Nýjustu úrslit
Stjarnan-Akureyri 28-23
Þri. 4. apr. 2017
Olís deild karla
ÍBV-Akureyri 22-22
Mið. 29. mar. 2017
Olís deild karla
deildin staðan

Ungmennalið karla
Næstu leikir
Nýjustu úrslit
Stjarnan U-Akureyri U 35-30
Fös. 7. apr. 2017
1. deild karla
Akureyri U-KR 34-30
Fös. 31. mar. 2017
1. deild karla
deildin staðan




    Fréttir                       Þú flettir milli frétta með örvalyklunum eða smellir á bláu örvarnar! 

Leikmenn tímabilsins með viðurkenningar sínar

9. maí 2009 - Akureyri handboltafélag skrifar

Vel lukkað lokahóf 2009 í máli og myndum!

Laugardagskvöldið 25. apríl var haldið lokahóf leiktíðarinnar hjá Akureyri Handboltafélagi. Fyrr um daginn stóð skemmtinefnd liðsins fyrir óvissuferð þar sem leikmenn og nokkrir stuðningsmenn flökkuðu um bæinn og nágrenni. Í ferðinni var mannskapnum skipt í lið og keppt í margvíslegum, hefðbundnum en þó kannski meira óhefðbundnum greinum sem reyndu á fjölbreytilega eiginleika liðsmanna.

Sjálft lokahófið hófst með kvöldverði þar sem borið var fram gómsætt grillkjöt ásamt tilheyrandi meðlæti og luku menn miklu lofsorði á framgöngu Péturs grillmeistara.

Að borðhaldi loknu gerði skemmtinefnd leikmanna grein fyrir úrslitum fjölþrautarinnar úr óvissuferðinni en það var lið Björns Óla, Gústafs Línberg, Hafþórs og Jónatans sem stóð uppi sem sigurvegari og fengu þeir viðurkenningar, bikara og pizzu gjafakort að launum.


Fjölþrautarkapparnir ásamt Þorvaldi sem afhenti verðlaunin

Gestur Einarsson gerði grein fyrir niðurstöðu sérstakrar fimm manna dómnefndar sem var sett á laggirnar til að velja leikmenn leiktíðarinnar. Í nefndinni voru þjálfari liðsins, fulltrúi leikmanna, fulltrúi styrktaraðila og fulltrúi stuðningsmanna. Niðurstöður nefndarinnar voru sem hér segir:

Besti varnarmaður: Hreinn Þór Hauksson
Besti sóknarmaður: Jónatan Þór Magnússon
Besti leikmaður: Hafþór Einarsson
Efnilegasti leikmaður: Oddur Gretarsson


Gestur Einarsson og leikmennirnir með viðurkenningar sínar

Jafnframt var þeim heiðurshjónum Jóni Þengilssyni og Ernu þökkuð ómetanleg störf í vetur og raunar í gegnum tíðina varðandi veitingar og vinnu á hverjum einasta heimaleik, hengt upp auglýsingar og hvaðeina sem á hefur þurft að halda. Í þakklætisskyni var þeim færður GSM sími að gjöf.


Heiðurshjónin Jón og Erna taka við viðurkenningu sinni

Sömuleiðis fékk Jónas yfirdyravörður GSM síma að gjöf en hann hefur staðið vaktina af stakri prýði í gæslu á heimaleikjum í vetur.

Þá voru Hannesi Karlssyni, Hirti Sigurðssyni, Hermanni Haraldssyni og Ómari Guðmundssyni færðar sérstakar þakkir fyrir mikið og gott starf í þágu félagsins. Sömuleiðis fengu Reykjavíkurbílstjórarnir, Ari og Sverrir sérstakar þakkir en þeir hafa tekið á móti liðinu á Reykjavíkurflugvelli í öllum útileikjum og ekið til og frá keppnisstað á alla útileiki.

Gestur Einarsson tilkynnti síðan að í þessum töluðu orðum væri nýr leikmaður Akureyrar Handboltafélags, Guðlaugur Arnarson að undirrita samning um að leika með félaginu næsta tímabil og var þeim tíðindum fagnað gríðarlega.

Sigfús Helgason formaður Þórs ávarpaði samkomuna og færði kveðjur frá þeim Stefáni Gunnlaugssyni formanni KA sem er staddur erlendis.

Rúnar Sigtryggsson, þjálfari þakkaði samstarfið í vetur og í léttu spjalli hans kom fram að nútíma samskiptatækni s.s. Facebook skapaði margvísleg ný tækifæri fyrir þjálfara í störfum sínum.

Kalli, fulltrúi trommusveitarinnar þakkaði fyrir hönd stuðningsmanna samveruna í vetur en gat þess sérstaklega að handknattleiksyfirvöld hefðu komið illilega í bakið á þeim félögum með því að láta leika síðustu umferðina á sunnudegi.


Menn tóku duglega undir fjöldasöng, ekki síst þegar strákarnir í 2. flokki stigu fram og sungu Tunglskinsdansinn með tilþrifum.

Þá var rifjaður upp sögulegur bikarleikur Þórs og KA frá 1998 en dregin var fram sjónvarpsupptaka frá leiknum sem sjónvarpstöðin Aksjón gerði á sínum tíma. Raunar var athyglinni fyrst og fremst beint að síðustu andartökum leiksins og þá sérstaklega viðskiptum Ingólfs Samúelssonar og Halldórs Jóhanns Sigfússonar en segja má að þar hafi allt verið á suðupunkti.

Nú er hægt að skoða þessar dramatísku lokamínútur leiksins á youtoube.com



Þegar líða tók á kvöldið kom enn frekar í ljós að ekki skortir sönghæfileika meðal leikmanna. Fyrstur tróð upp Jónatan Magnússon og flutti Pearl Jam lagið Last Kiss eins og að drekka vatn. Í kjölfarið fylgdu síðan fjölmargir látúnsbarkar og sungu af mikilli list.


Jónatan gerði Pearl Jam lagið Last Kiss að sínu

Það var mál manna að samkoman hefði heppnast einstaklega vel en nú fá menn smáfrí áður en næsta undirbúningstímabil hefst.

Hér er hægt að skoða enn fleiri myndir frá lokahófinu.
Fletta milli frétta Til baka    Senda á Facebook
Umsjón og hönnun: Stefán Jóhannsson og Ágúst Stefánsson