Warning: Undefined array key "frettanr" in /web/akhandadmin/public_html/index.php on line 15 FH hafði betur í dramatískum bikarslag - Akureyri Handboltafélag
Dómarar: Arnar Sigurjónsson og Svavar Ólafur Pétursson, Eftirlit Kristján Halldórsson
Umfjöllun
Tengdar fréttir
Sverre ræddi við blaðamann visir.is
6. desember 2016 - Akureyri handboltafélag skrifar
Viðtöl eftir bikarleikinn gegn FH
Eftir hamaganginn í leik Akureyrar og FH í gærkvöldi höfum við fundið þrjú viðtöl, Arnar Geir Halldórsson á visir.is ræddi við þjálfarana Sverre Andreas Jakobsson og Halldór Jóhann Sigfússon en báðir voru þokkalega sáttir í leikslok.
Sverre: Fullt af bikarævintýrum á Akureyri í vetur
Sverre Jakobsson, þjálfari Akureyrar, bar höfuðið hátt þrátt fyrir tapið og kvaðst stoltur af frammistöðu síns liðs í kvöld. „Þetta var svekkjandi. Ég er svekktur með fyrri hálfleikinn. Það vantaði uppá að gera það sem við ætluðum okkur. Við náum að koma öflugir til baka í seinni og erum í raun bara óheppnir í lokin. Við fengum tækifæri til að jafna en áttum kannski að nýta það betur. Ég er ánægður með frammistöðuna og að koma svona til baka en við gerðum okkur bara erfitt fyrir með spilamennskunni í fyrri hálfleik,“ segir Sverre.
Þegar fimmtán mínútur lifðu leiks leit ekkert út fyrir að Akureyri ætti einhvern möguleika á úrslitum en öflug endurkoma skilaði því að þeir áttu möguleika á að jafna undir lokin. Hvers vegna byrjuðu þeir ekki fyrr? „Ég veit það ekki. Kannski er það bara af því að við höfum alltaf trú á því að við getum komið til baka. Við trúum, treystum, viljum og ætlum og svo bara smellur það hjá okkur. Það sýnir bara karakterinn í liðinu. Það er auðvitað svekkjandi en ég ætla ekkert að dvelja lengur við þetta. Stöðu okkar vegna í deildinni munum við spila fullt af fleiri bikarleikjum í vetur, það verða því fullt af bikarævintýrum á Akureyri í vetur,“ sagði Sverre, léttur.
Sverre ræðir við sína menn í seinni hálfleiknum
Akureyri tefldi fram mjög ungu liði í dag vegna meiðsla reyndari leikmann en Sverre lítur á það jákvæða við meiðslavandræði liðsins. Hann segir ekki von á lykilmönnum úr meiðslum á næstunni. „Nei, nei það er lítið að frétta af því. Við höfum stóran hóp af strákum sem hafa verið í kringum okkur og ekki. Þeir fá bara sénsinn og það er gaman að geta veitt þeim þetta tækifæri. Þeir græða helling á þessu og sumir af þeim sáu til þess að við komum næstum því til baka hérna í kvöld. Ég er mjög ánægður með þeirra frammistöðu,“ segir Sverre.
Halldór Jóhann: Hefði viljað vinna á öruggari hátt
Halldór Jóhann Sigfússon, þjálfari FH, var sigurreifur eftir leik en viðurkenndi að hann hefði viljað klára leikinn fyrr í ljósi stöðunnar um miðbik síðari hálfleiks. „Ég er virkilega ánægður með sigurinn og að við skulum hafa haldið þetta út en við gerðum okkur þetta virkilega erfitt fyrir. Við lentum í mótlæti í síðari hálfleik og þeir setja mikla pressu á okkur. Við klikkum svolítið og förum að gera mistök. Það tilheyrir því að vera með ungt lið. Ég hefði viljað vinna þetta á öruggari hátt en við tökum þetta og erum komnir áfram í næstu umferð sem er mikið gleðiefni. Það er hluti af okkar áformum að fara alla leið í bikarnum,“ segir Halldór Jóhann.
Halldór undirbýr lið sitt gegn lokasókn Akureyringa
En hvernig útskýrir hann spilamennsku síns liðs á lokamínútunum? „Arnar (Þór Fylkisson, markvörður Akureyrar) kom inn í markið og við förum að skjóta í hann. Við tókum slæmar ákvarðanir og það er svo stutt á milli í þessu. Við erum á erfiðum útivelli og áhorfendur setja mikla pressu á útiliðið. Þetta er bara hluti af þessu og hluti af lærdómi fyrir mína leikmenn. Akureyrarliðið er þannig lið að það gefst aldrei upp, sérstaklega á heimavelli.“
Halldór Jóhann þekkir KA-heimilið betur en margir aðrir enda lék hann um árabil fyrir KA við góðan orðstír. Hann hvetur leikmenn sína til að læra af þeirri frábæru reynslu sem það er að spila í KA-heimilinu. „Ég held að það sé erfitt fyrir öll útilið að koma hingað og spila. Þetta er frábært hús og hefur mikla sál. Þetta hús hefur aukamörk og aukavarnir sem maður á inni þegar maður spilar hérna á heimavelli, ég þekki það vel sjálfur. Þetta er gríðarlegur skóli fyrir mína leikmenn. Það eru ekkert margir svona leikir á ári, fyrr en þú ert kominn í úrslitakeppnina; þar sem er svona mikil pressa frá áhorfendum og það er gaman að koma í svona hús að spila. Þetta á í raun að ýta undir getuna hjá hverjum manni.“
Einar Sigtryggsson blaðamaður mbl.is ræddi við Óðinn Þór Ríkharðsson, leikmann FH en Óðinn var mjög atkvæðamikill í leiknum.
Óðinn Þór: Vanir að spila í svona spennu
FH-ingurinn svali, Óðinn Þór Ríkharðsson, fór mikinn í fyrri hálfleiknum í kvöld þegar FH sótti Akureyri heim í 16 liða úrslitum Coca-Cola bikars karla. Hann hreinlega sveif fram völlin í hraðaupphlaupunum og raðaði inn mörkum. FH vann leikinn en tæpt var það. Eitt mark skildi í lokin og heimamenn á Akureyri fengu síðustu sóknina. Vörðu FH-ingar lokaskot norðanmanna og fögnuður þeirra var innilegur í framhaldinu. Óðinn Þór var gripinn í viðtal eftir leik. „Þetta var bara enn einn spennuleikurinn hjá okkur. Við erum orðnir vanir svona leikjum og viljum hafa þetta svona. Það er langskemmtilegast. Það er best að vinna þetta svona. Við vorum hérna fyrir mánuði og spiluðum svipaðan leik sem við misstum niður í jafntefli. Það kom ekki til greina að slíkt myndi gerast aftur. Við stóðum þessa lokavörn og vorum mjög þéttir. Þeir fundu enga glufu.“
Óðinn Þór virðist finna sig vel í KA-heimilinu og skorar hann mikið í leikjunum gegn Akureyri. „Já, mér gengur vel hérna. Vörnin og markvarslan voru að skila nokkrum hraðaupphlaupum og ég kláraði þau bara. Ágúst Elí finnur mig alltaf þegar hann grýtir boltanum fram.“
Óðinn Þór með eitt af fjölmörgum hraðaupphlaupsmörkum sínum í fyrri hálfleiknum
En fór ekkert um Óðin þarna í lokin þegar Akureyringar voru við það að ná FH-ingum? „Nei. Við erum orðnir mjög vanir að spila í svona spennu og erum farnir að klára leikina, langflesta alla vega. Við erum bara orðnir mjög flottir og erum á skriði. Við ætlum bara að halda því.“
Nú var reynsluboltinn Ásbjörn Friðriksson settur inn á undir restina og hann var næstum búinn að klára leikinn en klúðraði skotinu sínu. Var ekki tóm vitleysa að henda honum inn á? „Ási er bara svona leikmaður sem getur klárað en það gekk ekki í dag og við þurftum bara að standa síðustu vörnina í staðinn. Við erum drullusáttir og þetta var bara geggjað,“ sagði Óðinn léttur.
Tekst Sverre að hafa betur gegn Dóra Fúsa?
5. desember 2016 - Akureyri handboltafélag skrifar
Akureyri - FH í beinni útsendingu
Í kvöld klukkan 19:00 hefst Bikarslagur Akureyrar og FH í KA-Heimilinu en í húfi er sæti í 8-liða úrslitum Coca-Cola Bikarsins. Að sjálfsögðu hvetjum við alla sem geta til að mæta og styðja strákana til sigurs enda liðið á miklu skriði að undanförnu.
En fyrir ykkur sem ekki komist á völlinn þá bjóðum við upp á beina útsendingu frá leiknum þannig að það er um að gera að fylgjast vel með gangi mála:
5. desember 2016 - Akureyri handboltafélag skrifar
Leikur dagsins: Bikarslagur gegn FH
Akureyri tekur á móti FH í 16-liða úrslitum Coca Cola bikar karla klukkan 19:00 í kvöld. Það þarf ekki að segja margt um hvað er undir í bikarleikjum, leikið er til þrautar og liðið sem tapar er einfaldlega úr leik.
Liðin mættust í KA heimilinu 27. október og úr varð einn af háspennuleikjum tímabilsins sem endaði með jafntefli, 24-24. Sá leikur varð vendipunktur á gengi Akureyrarliðsins sem hefur ekki tapað leik síðan.
Í fyrrgreindum leik voru þeir Óðinn Þór Ríkharðsson og Einar Rafn Eiðsson atkvæðamestir FH-inga með 8 og 6 mörk auk þess sem markvörðurinn Ágúst Elí Björgvinsson átti magnaðan leik. Það er reyndar í takt við sögu FH liðsins í deildarkeppninni en þar eru þeir félagar langmarkahæstir, Óðinn Þór með 92 mörk og Einar Rafn með 88.
Bæði Akureyri og FH sátu hjá í 32 liða úrslitunum þannig að þetta er fyrsti leikur liðanna í bikarkeppninni að þessu sinni og næsta víst að hvorugt liðið hefur áhuga á að detta út í kvöld. Það kæmi því ekki á óvart að það yrði spennuþrungið loftið í KA heimilinu, það hefur verið einkennismerki Akureyrarliðsins að bjóða upp á rafmagnaða spennu allt til enda. Við hvetjum alla stuðningsmenn til að fjölmenna á leikinn og verða þátttakendur í fjörinu. Það er rétt að ítreka að Gullkortin 2016-2017 gilda á leikinn.
Úrvalsdeild karla
Senda skilaboð
Vefur KA
Vefur Þór
Fréttaleit
Ljósmyndir frá leiknum
Myndband frá leiknum 
Tölfræði leiksins 
Senda á Facebook