Víkingar - sýnd veiði en ekki gefin

Andstæðingar okkar á fimmtudaginn, Víkingar eru með mjög sterkt lið og hafa í raun verið mjög óheppnir í vetur að hafa ekki landað nema einu stigi. Það er mikil seigla í liðinu og þar eru menn ekkert að gefast upp. Síðasti leikur Víkinga fyrir jól var gegn Fram sem mátti þakka fyrir að fara með eins marks sigur í leiknum þannig að það getur ekkert lið bókað sigur fyrirfram gegn Víkingum. Akureyri sótti Víkinga heim 18. október og var sá leikur sýndur í sjónvarpinu. Þrátt fyrir að Akureyri ynni þar fimm marka sigur 23-28 var leikurinn lengst af í jafnvægi og ekki fyrr en undir lokin sem Akureyri náði afgerandi forystu.

Þjálfari Víkinga er enginn annar en línujaxlinn Róbert Sighvatsson sem gerði garðinn frægan með landsliði Íslands, markmannsþjálfari Víkinga er annar reynslubolti Guðmundur Hrafnkelsson.



Síðan er aldrei að vita nema hinn síungi og stórhættulegi Bjarki Sigurðsson mæti með þeim á fimmtudaginn en hann dró skóna fram fyrir áramótin og hefur leikið nokkra leiki með Víkingum.

Langatkvæðamestur Víkinga hefur verið skyttan Sverrir Hermannsson en hann var einmitt valinn í 2012 landslið Íslands nú á dögunum. Þá hafa skytturnar Sveinn Þorgeirsson og Davíð Georgsson verið drjúgir svo og hornamaðurinn Hreiðar Haraldsson.


Markvörður Víkinga, Björn Viðar Björnsson reyndist okkur verulega erfiður þegar liðin mættust í október þannig að Akureyri þarf að taka á öllu sínu á fimmtudaginn.


Leikmenn Akureyrar hafa æft vel í þessu langa hléi sem verið hefur á deildinni og koma vel stefndir í leikinn, staðráðnir í að sýna áhorfendum hvað í þeim býr. Árni Sigtryggsson kemur aftur inn í liðið en hann missti af tveim síðustu leikjunum þar sem hann fór í skurðaðgerð á öxl en hann er allur að koma til og verður fróðlegt að sjá í hvernig standi hann er. Að öðru leiti er mannskapurinn í fínu standi, allir heilir heilsu og klárir í slaginn.


Frá fyrri leik liðanna, Árni Sigtryggsson sendir eitraða sendingu á Atla Ævar

Eins og áður hefur komið fram verður glæsilegt tónlistaratriði í boði fyrir leik og í hálfleik en það Stórsveit Tónlistarskóla Akureyrar sem ætlar að troða upp. KEA sýnir mikinn höfðingsskap með því að bjóða öllum sem vettlingi geta valdið á leikinn og því vonumst við til að troðfylla Höllina þannig að sú frábæra stemming sem ríkti á leikjunum fyrir áramót haldi áfram.