
Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Fyrri leiktímabil

Tímabilið 2006-07

Úrslit leikja

Deild karla

Deild kvenna

Leikmenn meistarafl. kvenna

Textalýsing frá leiknum

Tölfræði leiksins

		Akureyri - Fram 33-28 (16-16)
		DHL deild karla
		KA-Heimilið
		16. desember 2006 klukkan: 16:00
		Dómarar: Gísli Hlynur Jóhannsson og Hafsteinn Ingibergsson

Umfjöllun


Akureyri fer inn í jólafríið með sigur		16. desember 2006 - HBH skrifar Akureyri vann Fram (umfjöllun) Það var mér sérstakt ánægjuefni þegar Stefán Árnason bað mig um að skrifa pistil um heimaleik Akureyrar vegna fjarveru sinnar af landinu. Var ég algerlega sannfærður um að nú fengi ég að skrifa sigurpistil, en þeir hafa oftar en ekki verið af skornum skammti sunnan heiðar. Skemmst er frá því að segja að ég varð ekki fyrir vonbrigðum. Leikurinn fór rólega af stað en Hreiðar Levý hóf leikinn í marki Akureyrar, en þeir Andri, Magnús, Höddi, Rúnar, Kuzmin og Goran stóðu vaktina í vörninni fyrir framan hann. Nikolaj kom síðan inní sóknarleikinn á kostnað þjálfarans. Jafnt var á öllum tölum þar til staðan var 5-5, en þó komu þrjú Fram mörk í röð, og staðan var síðarn orðin 6-10 Frömmörum í vil og síðar 8-12. Spilamennska Akureyrar var ákaflega ráðleysisleg á þessum kafla, og fór m.a. leikkafli þar sem við vorum tveimur fleiri, 1-1. Rúnar var kominn inn í sóknarleikinn á þessum tíma í stað Magnúsar sem hafði ekki byrjað leikinn vel. Þjálfarinn átti fína innkoma í þetta skiptið og hefur aldrei spilað sóknarleikinn jafnvel svo undirritaður hefur séð. Hann skipti sér hinsvegar aftur útaf fyrir Magnús eftir um 10 mínútna leik, og endaði Maggi fyrri hálfleikinn á 3 góðum sleggjum í áhlaupi okkar manna, sem varð til þess að hálfleiksstaðan var jöfn, 16-16. Bubbi hafði síðan komið í markið í kringum 20. mínútu, þrátt fyrir að Hreiðar hafði staðið sig ágætlega, en hann var með 8 bolta er honum var skipt útaf. Segja má að Akureyringar hafi verið nokkuð heppnir með hálfleiksstöðuna, en Fram liðið virkaði heilt yfir sterkara. Maður var því ekkert sérstaklega bjartsýnn í upphafi seinni hálfleiks, en Magnús nokkur Stefánsson var ekki lengi að lækna þá svartsýni hjá manni. Hann hóf seinni hálfleikinn á svipuðum nótum og hann endaði þann fyrri, með þrem sleggjum. Bubbi hélt stöðu sinni í markinu og byrjaði seinni hálfleik vel, sérstaklega var skemmtilegt að sjá hann taka fyrsta skot Framliðsins í hálfleiknum með munninn stúfullan af forláta banana sem hann hafði rétt lokið við að troða í sig, enda verður drengurinn seint sakaður um matvendi. Akureyringar spiluðu margfalt betur en Framliðið, sem virkaði hálf vankað og ráðleysislegt. Sérstaklega var hinn lunkni leikstjórnandi Sigfús langt frá sínu besta. Þrátt fyrir þetta tókst Akureyringum ekki að hrista Framliðið af sér, og skrifast það fyrst á fremst á fjölmörg klúður á dauðafærum. Þegar seinni hálfleikur var rúmlega hálfnaður kemst síðan Framliðið yfir, í 24-25. Þá varð hinsvegar mikill viðsnúningur í leiknum og kom þar aðallega tvennt til. Í fyrsta lagi var Hreiðar mættur aftur í markið og sló þar öllu gersamlega í lás, og í öðru lagi var Aigars nokkur Lazdins mættur í sóknarleikinn. Aigars hafði ekkert spilað í leiknum, en líkt og gegn Stjörnunni fyrr í vetur steig hann upp þegar mest á reyndi, og spilaði hreint út sagt frábærlega. Þá var Hörður Fannar ískaldur á vítalínunni með 100% nýtingu, en slíkt er ákaflega mikilvægt á köflum sem þessum. Þetta gerði það einfaldlega að verkum að Akureyri stakk algerlega af, og sigraði af öryggi, 33-28. Athygli vakti gífurlega óíþróttamannsleg framkoma Jóhanns Gunnars Einarssonar leikmanns Frams, en lét sig ítrekað falla í gólfið og tók um andlit sér, þegar öllum mátti vera ljóst að hendur varnarmanna Akureyrar voru hvergi nærri andliti hans. Ljótt var að sjá dómarana falla í gildruna í eitt sinn, en það er alveg á hreinu að slíkir tilburðir eiga heima á stóra sviðinu í Þjóðleikhúsinu, ekki í KA-heimilinu. Að þessu slepptu var um stórkostlega skemmtun að ræða, frábæran handboltaleik og stórgóða jólagjöf til stuðningsmanna liðsins. Ég óska liðinu til hamingju með 3. sætið fyrir jól, og bið leikmenn um að ganga hægt um gleðinnar dyr á jólahófinu nú í kvöld. Maður leiksins: Hreiðar Levý Guðmundsson


Tengdar fréttir
Hörður Fannar var öruggur á vítalínunni í dag		16. desember 2006 - ÁS skrifar Frábær fimm marka sigur á Fram Akureyri innbyrti dýrmæt stig með sigri á Íslandsmeisturum Fram í KA-heimilinu í dag. Leikurinn var gríðarlega skemmtilegur á að horfa. Í fyrri hálfleik var jafnt á flestum tölum til að byrja með upp í stöðuna 5-5 en þá náði Fram mest fjögurra marka forystu en með magnaðri baráttu náðu okkar menn að jafna leikinn og var staðan jöfn 16-16 í hálfleik. Leikmenn Akureyrar komu af miklum krafti í seinni hálfleikinn og tóku forystuna sem varð mest þrjú mörk þar til kviknaði á Frömurum sem náðu að jafna og komast marki yfir um miðbik seinni hálfleiks. Þá var okkar mönnum hreinlega nóg boðið og skelltu í lás og áttu leikmenn Fram einfaldlega ekki möguleika í seinni hluta hálfleiksins. Með gríðarlegri baráttu í vörninni og frábærri markvörslu náðu okkar menn öruggri forystu sem greinilega átti ekki að láta af hendi og lauk leiknum með frábærum fimm marka sigri 33-28. Allt liðið á hrós skilið fyrir frábæra baráttu og leikgleði sem skein af liðinu í dag. Með þessum sigri sest Akureyri í 3. sæti deildarinnar og mun verða þar um hríð því að næstu leikir í deildinni eru ekki fyrr en 11. febrúar en þá verður 12. umferðin leikin.


Akureyri-Fram klukkan 16:00 í KA-Heimilinu		16. desember 2006 - ÁS skrifar Bein Lýsing: Akureyri - Fram Leikur Akureyrar og Íslandsmeistara Fram í 11. umferð DHL-Deildar karla fer fram í dag í KA-Heimilinu klukkan 16:00. Liðið sem fer með sigur af hólmi í leiknum mun enda í 3. sæti fyrir jól og það væri gott. Heimasíðan býður upp á beina textalýsingu frá leiknum í dag og hvetur alla til að fylgjast vel með gangi mála ef það kemst ekki á leikinn. Mjög auðvelt er að fylgjast með í gegnum Beinu Lýsinguna. Smellið hér til að opna Beina Lýsingu Beina Lýsingin opnast í nýjum glugga sem uppfærist af sjálfu sér á 15 sekúndna fresti. Það er því ekkert mál að fylgjast með. Eins og áður segir þá hefst leikurinn klukkan 16:00 og við hvetjum alla til að fylgjast vel með.


Vörnin stendur fyrir sínu		15. desember 2006 - ÁS skrifar 1 dagur í leik: Akureyri - Fram. Fögnum jólum með sigri! Á morgun leikur Akureyri, sem kunnugt er, við Fram en leikurinn verður sá síðasti á þessu ári. Eftir leikinn verður tæplega tveggja mánaða frí í deildinni og því leikurinn jafnvel enn mikilvægari en áður. Afar leiðinlegt yrði að fara í svona frí með tap á bakinu en með sigri á morgun fara menn jákvæðir og ánægðir í jólafrí. Með sigri fer Akureyri í 3. sæti deildarinnar og væri það ansi góður árangur hjá liði sem varð til nú í sumar. Boðsmiðum á leikinn verður dreift í verslunum Nettó á Glerártorgi og Bónus milli klukkan 16:00 og 17:00 í dag þannig að það er um að gera að drífa sig á leikinn enda langt í næsta leik - það er einfaldlega skyldumæting! Auk þess skal minnt á að heimasíðan býður upp á beina textalýsingu af leiknum. Mætum öll og styðjum Akureyri gegn Fram en við töpum sko ekki þrisvar fyrir þeim á stuttum tíma!

Nú þarf að hefna fyrir síðustu tvær viðureignir

14. desember 2006 - ÁS skrifar

2 dagar í leikinn við Fram

Á laugardaginn koma Íslandsmeistarar Fram norður og leika við lið Akureyrar Handboltafélags. Leikurinn er liður í 11. umferð DHL-Deildarinnar og er gríðarlega mikilvægur fyrir bæði lið ef þau ætla að halda sér í toppbaráttunni. Það lið sem sigrar í leiknum sest í 3. sæti deildarinnar.

Fram var spáð 2. sæti í deildinni fyrir tímabilið og eftir frekar dapra byrjun hrökk liðið heldur betur í gírinn en hafa svo tapað tveim síðustu deildarleikjum.

Tímabilið til þessa
Hér eru öll úrslit Fram í keppnum hér á landi. Fram tók einnig þátt í Meistaradeild Evrópu og náði að sýna flotta spilamennsku þar á köflum en því miður náðu þeir ekki að hala inn stigi á þessari sterkustu deild í heimi.

Keppni	Heimalið	Gestir	Úrslit
DHL-Deild	Fram	HK	29 : 32
DHL-Deild	Haukar	Fram	31 : 28
DHL-Deild	Fram	Stjarnan	31 : 20
DHL-Deild	ÍR	Fram	29 : 40
DHL-Deild	Fram	Fylkir	34 : 29
DHL-Deild	Valur	Fram	30 : 25
DHL-Deild	Fram	Akureyri	32 : 29
DHL-Deild	HK	Fram	22 : 22
DHL-Deild	Fram	Haukar	29 : 30
DHL-Deild	Stjarnan	Fram	26 : 30
SS-Bikar	Akureyri	Fram	30 : 31
SS-Bikar	Fram	Fylkir	34 : 31
Meistarar Meistaranna	Fram	Stjarnan	25 : 29

Spilamennska Fram
Íslandsmeistarar Fram leika hraðan bolta og geta kaffært lið ef þeir komast í gírinn. Aðall Framliðsins hefur verið sóknarleikurinn og verður fróðlegt að fylgjast með hvernig varnarveggur Akureyrar tekur á þeim í leikum á laugardaginn.

Árangur Fram á síðustu leiktíð
Fram varð Íslandsmeistari á síðustu leiktíð eftir að hafa endað með jafnmörg stig og Haukar, Framarar höfðu hinsvegar betur á innbyrðisviðureignum.
Í SS-Bikarnum tapaði liðið gegn Haukum í undanúrslitum.
Liðið tapaði svo í undanúrslitum Deildarbikarsins gegn Fylki, 0-2.

Helstu leikmenn liðsins
Sigfús Páll Sigfússon er leikstjórnandi Framara og er hann einn öflugasti sóknarmaður landsins. Siffi skorar kannski ekkert alltof mörg mörk sjálfur en það eru ansi fá mörk sem Fram skorar sem Siffi á ekki part í. Til að leggja Íslandsmeistara Fram á morgun þarf að stöðva Siffa.

Jóhann Gunnar Einarsson er skytta í liði Fram og hefur hann blómstrað á tímabilinu sem og í fyrra. Í Meistaradeild Evrópu skoraði hann grimmt og stórlið eins og Gummersbach og Celje Pivovarna Lasko áttu í miklum erfiðleikum með að stöðva hann.

Hornamenn liðsins eru mjög öflugir og eru Stefán Stefánsson, Þorri Gunnarsson og Hjörtur Hinriksson gríðarlega öflugir hornamenn sem fá yfirleitt mörg færi í leik og nýta þau mjög vel.

Björgvin Páll Gústavsson gekk í raðir Fram fyrir tímabilið og hefur verið að verja mjög vel í flestum leikjum en aðeins dottið niður í öðrum leikjum. Það er mjög mikilvægt fyrir Akureyri Handboltafélag að Björgvin fari ekki í ham.

Sergiy Serenko spilar stórt hlutverk í liði Fram en þessi öfluga skytta skýtur verulega fast og getur verið erfitt að stöðva hann. Hann þarf sín skref áður en hann fer í loftið en það er ekki nóg að mæta honum þar sem hann býr yfir fínum fintum og getur einnig farið í gegn.

Guðmundur Þórður Guðmundsson þjálfari liðsins er að gera mjög góða hluti með liðið og hefur hann sýnt bæði með Fram og með Íslenska landsliðinu á sínum tíma að hann er frábær þjálfari.

Akureyri - Fram, KA-heimilið 16. desember klukkan 16:00

Heimasíðan hvetur alla til að mæta á leikinn eða fylgjast með Beinni Lýsingu af leiknum.


Tekst Rúnari og hans mönnum að leggja Fram í þriðju tilraun?		11. desember 2006 - ÁS skrifar Akureyri tekur á móti Fram á laugardaginn Síðasti leikur Akureyrar fyrir áramót sem er gegn Fram verður í KA-Heimilinu á laugardaginn 16. desember. Leikurinn átti upphaflega að vera á sunnudaginn en allir leikirnir í 11. umferð DHL-Deildar voru færðir yfir á laugardag. Heimasíðan hvetur fólk til að hafa leikinn í huga þessa vikuna og mæta svo á leikinn á laugardaginn. Þetta verður þriðji leikur liðanna á rétt rúmlega 20 dögum, Framarar hafa unnið báða leikina til þessa en Akureyri hefur verið að bæta leik sinn mikið upp á síðkastið og hef ég fulla trú á því að liðið leggji Framara að velli á laugardaginn. Akureyri - Fram, KA-Heimilið 16. desember klukkan 16:00

Til baka Senda á Facebook

Umsjón og hönnun: Stefán Jóhannsson og Ágúst Stefánsson

Akureyri vann Fram (umfjöllun)

Frábær fimm marka sigur á Fram

Bein Lýsing: Akureyri - Fram

1 dagur í leik: Akureyri - Fram. Fögnum jólum með sigri!

2 dagar í leikinn við Fram

Akureyri tekur á móti Fram á laugardaginn