Warning: Undefined array key "frettanr" in /web/akhandadmin/public_html/index.php on line 15
Tap gegn FH en frábær stemming í Höllinni - myndir - Akureyri Handboltafélag
  Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Fyrri leiktímabil

Tímabilið 2008-09

Leikmenn meistarafl. karla
Úrslit leikja
Deild karla




Ljósmyndir frá leiknum     Textalýsing frá leiknum     Tölfræði leiksins 
    Akureyri - FH  26-31 (14-13)
N1 deild karla
Íþróttahöllin
18. september 2008 klukkan: 19:30
Dómarar: Anton Gylfi Pálsson og Arnar Sigurbjörnsson
Umfjöllun

Andri Snær fékk nokkrum sinnum að kenna á FH vörninni









20. september 2008 - Akureyri handboltafélag skrifar

Tap gegn FH en frábær stemming í Höllinni - myndir

Það var mikil tilhlökkun í Íþróttahöllinni á fimmtudagskvöldið þegar N1-deildin byrjaði með leik Akureyrar og FH, full stúka af áhorfendum og rafmögnuð stemming í húsinu. Það virtist þó í fyrstu að leikmenn Akureyrar tryðu ekki fyllilega sínum eigin augum því að á upphafsmínútum leiksins gekk lítið upp hjá liðinu og sprækir FH-ingar nýttu sér það til hins ítrasta og náðu fjögurra marka forystu 1-5 og síðar 3-7.

Þar með hrökk Akureyri í gírinn og með fínum leik náði liðið að jafna í 9-9 og stemmingin meðal áhorfenda mögnuð. Það sem eftir lifði fyrri hálfleiks var jafnt á öllum tölum en Jónatan Magnússon kórónaði frábæran leik sinn með því að koma liðinu yfir í 14-13 með síðasta skoti hálfleiksins. Jónatan skoraði þar með sitt áttunda mark, Árni Sigtryggsson skoraði þrjú, Andri Snær og Hörður Fannar sitt markið hvor.

Hafþór stóð í markinu og tók nokkra mikilvæga bolta.

Í seinni hálfleik hélt barningurinn áfram, jafnt á flestum tölum en Akureyri ávallt með frumkvæðið. Akureyri náði tveggja marka forystu 19-17 og aftur í 22-20 og 24-22 og virtist líklegt til að gera út um leikinn en tókst aldrei þrátt fyrir upplögð færi að ná þriggja marka forystunni. Þess í stað náðu FH-ingar ávallt að jafna leikinn, síðast í 26-26 þegar fimm mínútur voru eftir.

Þessar síðustu fimm mínútur reyndust afdrifaríkar, Daníel Andrésson markvörður FH skellti í lás og varði nokkrum sinnum meistaralega á meðan FH sóknin skoraði úr öllum sínum sóknum og því varð niðurstaðan fimm marka sigur FH 26-31.

Það var svekkjandi að fá ekkert út úr þessum leik en slakar upphafsmínútur og lokamínútur gerðu vonir Akureyrar um sigur í leiknum að engu. Liðið sýndi hinsvegar fínan leik lengst af og greinilegt að það má vænta mikils af liðinu. Jónatan var yfirburðamaður í leiknum, Árni Sigtryggsson átti fínan leik og þrátt fyrir að glíma við axlareymsli náði hann nokkrum dúndurskotum á markið.

Mörk Akureyrar: Jónatan 13 (7 úr vítum), Árni 6, Andri Snær, Hörður Fannar og Rúnar 2 mörk hver og Þorvaldur 1 mark.
Hafþór Einarsson stóð í markinu mestallan leikinn og varði 13 skot, Jesper Sjøgren kom aðeins inná en náði ekki að verja.

Í liði FH var Ólafur Andrés Guðmundsson atkvæðamestur með 9 mörk en okkar gamli félagi Ásbjörn Friðriksson skoraði 4.

Nú þarf liðið bara að leggjast í að greina hvað fór úrskeiðis í upphafi og lok leiks og þá þurfa menn engu að kvíða í næstu leikjum sem eru útileikur gegn Haukum 27. september og síðan heimaleikur gegn Stjörnunni 2. október.

Árni Sigtryggsson var að vonum svekktur í leikslok eins og kemur fram í viðtali hans við blaðamann Vikudags: "Þetta voru gríðarleg vonbrigði í kvöld það er óhætt að segja það. Það sem klikkar hjá okkur er augljóslega það að við skorum ekki mark síðustu sex mínútur leiksins. Stemmningin var frábær og þess vegna var alveg hundfúlt að tapa þessu, við ætluðum að vinna til að fá þetta fólk aftur í Höllina. Ég vona að fólk gefi okkur annað tækifæri, við svíkjum það ekki þá. Þetta var mikil skemmtun og mikilvægt fyrir okkur að fá svona góðan stuðning og mér þykir mjög leitt hvernig þetta fór."


Tengdar fréttir

Jónatan leikstjórnandi úrvalsliðsins

22. september 2008 - Akureyri handboltafélag skrifar

Jónatan og Akureyrskir áhorfendur í úrvalsliði 1. umferðar

Vefsíðan www.handbolti.is birti í dag val sitt á úrvalsliði 1. umferðar N1 deildar karla sem leikin var í síðustu viku. Fyrirliði Akureyrar, Jónatan Magnússon var valinn besti miðjumaðurinn og er hann vel að því kominn enda sýndi hann stórbrotinn leik á fimmtudaginn. Þá voru magnaðir stuðningsmenn Akureyrar liðsins valdir áhorfendur umferðarinnar, til hamingju allir með það.

Hér fer á eftir heildarlistinn yfir úrvalslið umferðarinnar.

Úrvalslið fyrstu umferðar í N1 deild karla að mati www.handbolti.is er eftirfarandi:
Markvörður: Birkir Ívar Guðmundsson, Haukar.
Vinstra horn: Baldvin Þorsteinsson, Valur.
Vinstri skytta: Ólafur Guðmundsson, FH.
Miðja: Jónatan Magnússon, Akureyri.
Hægri skytta: Rúnar Kárason, Fram.
Hægra horn: Elías Már Halldórsson, Haukar.
Lína: Kári Kristján Kristjánsson, Haukar.
Leikmaður umferðarinnar: Birkir Ívar Guðmundsson, Haukar.



Þjálfari: Elvar Erlingsson, FH.
Lið umferðarinnar: FH.
Áhorfendur umferðarinnar: Akureyri.
Besta umgjörð umferðarinnar: HK.

Sjá fréttina á www.handbolti.is.


Matti trommari Háskólabandsins lék á alls oddi í Höllinni

22. september 2008 - Akureyri handboltafélag skrifar

Háskólabandið hitaði upp fyrir fyrsta leikinn - myndir

Í vetur er ætlunin að bjóða upp á ýmiss konar uppákomur í tengslum við heimaleiki Akureyrar til að auka enn á skemmtunina sem fylgir því að mæta á leikina. Háskólabandið reið á vaðið og hélt uppi dúndrandi stemmingu á kaffiteríu Íþróttahallarinnar fyrir leikinn gegn FH. Hljómsveitin er skipuð starfsmönnum Háskólans á Akureyri með góðri tengingu við starfsmenn Verkmenntaskólans en Árni Jóhannsson, bassaleikari kemur þaðan.

Hljómsveitin spilaði meðal annars nokkur lög af diski sínum, Vettvangur draumanna, sem kom út síðastliðið haust auk annarra stuðlaga.

Áheyrendur gerðu góðan róm að þessu framtaki og nú er bara spurningin hvaða tónlistaratriði verður á næsta heimaleik sem verður gegn Stjörnunni fimmtudaginn 2. október næstkomandi?

Þórir Tryggvason hirðljósmyndarin okkar sendi nokkrar myndir af Háskólabandinu í aksjón og er hægt að skoða allar myndirnar með því að smella hér.


Það var frábært að horfa yfir áhorfendastúkuna á fimmtudaginn

21. september 2008 - Akureyri handboltafélag skrifar

Akureyri: Bestu stuðningsmenn á landinu!

Stuðningsmenn Akureyrarliðsins eru svo sannarlega sigurvegarar fyrstu umferðar N1 deildarinnar í handbolta. Það voru margir svartsýnir á að næðist að skapa stemmingu í Höllinni en það var nú öðru nær.

Áhorfendur á leik Akureyrar og FH voru mun fleiri á pöllunum heldur en í leikjum Vals og Víkings eða Hauka og Stjörnunnar og létu vel í sér heyra. Þó að úrslit leiksins væru mönnum vonbrigði þá eru stuðningsmenn liðsins staðráðnir í að mæta tvíefldir til næsta leiks eins og kemur ljóslega fram í kveðju frá Gunnari Níelssyni, einum magnaðasta stuðningsmanni landsins.

Sælir - þið getið borið höfuðið hátt! Heyrði í mörgum óbreyttum áhorfendum eftir leik sem allir sögðu það sama eða "Frábær umgjörð". Þið hafið á stuttum tíma náð að snúa fjölda fólks á sveif með ykkur, það hélt ég að væri ekki hægt.

Við látum hér fljóta með nokkrar myndir af áhorfendaskaranum á fimmtudagskvöldið.







Drögum lærdóm af þessum leik og bætum okkur

20. september 2008 - Akureyri handboltafélag skrifar

Rúnar í viðtali: Frábærir áhorfendur á Akureyri

Bræðurnir Rúnar og Árni Sigtryggssynir, leikmenn Akureyrar, léku á fimmtudaginn í fyrsta skipti saman er Akureyri tók á móti FH í N1 deild karla. Að því tilefni var Rúnar í léttu spjalli við vefsíðuna handbolti.is.

Voru það ekki mikil vonbrigði að tapa gegn FH á fimmtudaginn eftir að hafa haft frumkvæðið stóran hluta leiksins?
Jú, þetta fór ekki alveg samkvæmt áætlun.

Hvað gerist þarna á síðustu mínútum leiksins?
Til einföldunar má segja að við höfum farið á taugum. Mjög slæmur leikkafli þar sem við skorum ekki neitt síðustu 5 mín. og þeir skora úr öllum sínum sóknum eða 0 - 6

Nú lékuð þið bræður í fyrsta skipti saman, hvernig tilfinning var það?
Það var fínt, en eigum við ekki að segja að fall sé fararheill.

Hefði ekki verið skemmtilegra að fá sigur í fyrsta leik ykkar bræðra saman?
Jú, auðvitað vill maður vinna. En ef við drögum lærdóm af þessum leik og bætum okkur, þá kemur að því að við sigrum.

Nú var frábær mæting á leikinn í gær er það ekki, er þetta það sem koma skal fyrir Norðan í vetur?
Það var ótrúleg mæting. Íþróttahöllin tekur 670 manns í sæti og var nánast fullsetin enda á milli, eitt og eitt sæti á stangli var autt. Aðstandendur liðsins sköpuðu flotta stemmingu í kringum leikin, það var hljómsveit fyrir leik og V.I.P. plássið í Höllinni fyrir stuðningsmannaklúbbinn er orðið of lítið eftir 1. leik. Enda eru vonbrigðin í liðinu gríðarleg með að hafa ekki sigrað með þennan stuðning. Við vitum sem er að með sigri í gær hefðum við fengið allt þetta fólk aftur á næsta leik og einhverja í viðbót. En vonandi gefa Akureyringar okkur annan séns.

Sjá www.handbolti.is


Allir klárir í slaginn í dag

18. september 2008 - Akureyri handboltafélag skrifar

Akureyri - FH: leikurinn í beinni textalýsingu

Í dag koma leikmenn FH í heimsókn í Íþróttahöllina og munu örugglega veita okkar strákum harða keppni. Leikurinn hefst klukkan 19:30 og að sjálfsögðu er skyldumæting á leikinn.

Við ætlum að vera með beina lýsingu frá leiknum hér á síðunni fyrir þá sem ekki komast á leikinn og hefst hún rétt fyrir leik.

Það er virkilega auðvelt að fylgjast með leiknum í gegnum Beinu Lýsinguna.

Smellið hér til að opna Beina Lýsingu

Beina Lýsingin opnast í nýjum glugga sem uppfærist af sjálfu sér á 15 sekúndna fresti. Það er því ekkert mál að fylgjast með. Leikurinn hefst eins og fyrr kom fram klukkan 19:30 og við hvetjum alla til að fylgjast vel með.


Frábær stemming fyrir leikinn í kvöld

18. september 2008 - Akureyri handboltafélag skrifar

Akureyri - FH: Fyrst og fremst tilhlökkun í gangi

Rúnar Sigtryggsson, þjálfari Akureyrar, er hér í spjalli við vefinn handbolti.is um leikinn í kvöld gegn FH og það jákvæða og ferska starf sem nú er unnið í kringum m.a. stuðningsmenn fyrir Norðan.

Nú er ykkar fyrsti heimaleikur í kvöld, býstu við góðri stemmingu í Höllinni?
Já, ég á von á að það verði góðmennt í kvöld.

Verður þú með númer í kvöld?
13

Hvernig líst þér á að spila með litla bróður?
Frábært, ég er búinn að bíða eftir þessu lengi og þetta er endapunkturinn á ferilinn.

Er þetta ekki ykkar fyrsti leikur saman?
Já.

Hvað hafið þið Norðanmenn verið að gera til að fá fólk til að koma á leikina í vetur?
Það er búið að stofna stuðningsmannaklúbb. Síðan fá allir iðkenndur yngri flokka í handboltanum á Akureyri svarta boli í samstarfi við Kaupþing, en bolirnir verða tilbúnir fyrir næsta heimaleik. Ætlunin er að færa liðið nær yngri iðkenndunum og fá þá á alla leiki vetrarins og mynda svartan her á heimaleikjunum. Svo erum við t.d. með húsband sem mun spila í kringum leikinn í kvöld og svo erum við með ýmislegt á prjónunum.

Nú eruð þið með stuðningsklúbb sem þið m.a. bjóðið upp á súpu fyrir leik, er þetta nokkuð öflugur hópur af fólki í klúbbnum?
Það var byrjað að selja í klúbbinn fyrir 9 dögum og það voru komnir yfir 100 manns í klúbbinn í gærkvöldi (miðvikudagskvöld). Ásamt matnum, þá er ætlunin að vera með leiki í boði úr Evrópuhandboltanum eða síðasta útileik á breiðtjaldi. Þjálfari mund c.a. 15 mín. Fyrir leik tala við klúbbinn um komandi leik og í hálfleik mun aðstoðarmaður koma snöggt upp og halda stutta tölu þar sem farið verður yfir fyrri hálfleikinn og hvað verður gert í seinni hálfleiknum, áður en hann fer inn í klefa. Þannig að klúbbmeðlimir verða „nær" leiknum en ella. Einnig munu leikmenn koma í klúbbinn strax að leik loknum og ræða leikinn. Svo verður ýmislegt annað gert, sem gerir það vonandi enn meira spennandi að vera í Stuðningsmannaklúbbi AHF.

Er góð stemming fyrir handboltanum á Akureyri um þessar mundir?
Já, eins og um allt land. Fólk í kringum liðið hefur verið mjög jákvætt við leikmenn og aðstandendur liðsins nú á síðustu vikum og sýnt okkur stuðning, sem ekki hefur verið kannski verið mikið af fyrstu 2 ár félagsins. Fólk er að átta sig á því að þetta er lið bæjarins og er hætt að flokka liðið niður í fortíðareiningar eða eftir persónum, enda á liðið að vera sterkara en einstaklingarnir. En núna eru einhvernveginn allir til í verkefnið þó að fyrirfram sé vitað að þetta verður erfið brekka, þá eru allir af vilja gerðir til þess að taka á því og klífa fjallið.

Ertu bjartur fyrir ykkar hönd fyrir vetrinum?
Það er fyrst og fremst tilhlökkun í gangi. Við erum e.t.v. ekki með sömu nöfn og önnur lið í sínum 14 manna hópum, en það er betra að hafa 7 leikmenn sem vilja en 14 sem þurfa. Árangur okkar mun ráðast af okkur sjálfum og hvernig við umgöngumst mótbyr og meðbyr.

Viðtalið er fengið af handbolti.is.


Látum ekki okkar eftir liggja og fyllum Íþróttahöllina

16. september 2008 - Akureyri handboltafélag skrifar

Tveir dagar í fyrsta leik - tökum á því með strákunum

Það styttist stöðugt biðin eftir að flautað verður til fyrsta leiks Akureyrar Handboltafélags en skemmtunin byrjar á fimmtudaginn 18. september. Leikurinn sjálfur hefst klukkan 19:30 en við hvetjum alla til að fjölmenna í Íþróttahöllina og mæta tímanlega.

Háskólabandið, sem er hljómsveit starfsmanna Háskólans á Akureyri ætlar að leggja sitt af mörkum og spila í anddyri Hallarinnar, hita mannskapinn upp fyrir leikinn þannig að menn komi tilbúnir í stúkuna og láti vel í sér heyra.

Verið er að dreifa aðgöngumiðum á leikinn til iðkenda handbolta í yngri flokkum KA og Þór og viljum við hvetja foreldra til að fylgja krökkunum á leikinn þannig að þeir upplifi skemmtunina af því að vera þátttakendur í handbolta. "Handbolti með fullu húsi af áhorfendum á að vera sýning sem engin vill missa af!" svo vitnað sé í þjálfara liðsins. Þá er þetta upplagt tækifæri fyrir bæjarbúa að koma og sjá þær umbætur sem orðið hafa á Íþróttahöllinni við það að komið er nýtt og glæsilegt parketgólf á salinn.

Fyrir þá sem þegar hafa skráð sig í stuðningsmannaklúbb Akureyrar bendum við á að í stuðningsmannaherberginu verður léttur matur í boði frá klukkan 19:00 og að sjálfsögðu geta allir sem mæta tímanlega gengið í klúbbinn á staðnum.


Háskólabandið er þannig skipað: Árni Jóhannsson bassi; Stefán Jóhannsson rafgítar, söngur og raddir; Solveig Hrafnsdóttir söngur; Matthías Henriksen trommur og slagverk; Birgir Guðmundsson kassagítar, söngur og raddir.


Til baka    Senda á Facebook

Umsjón og hönnun: Stefán Jóhannsson og Ágúst Stefánsson