Warning: Undefined array key "frettanr" in /web/akhandadmin/public_html/index.php on line 15 Slæmt tap í fyrsta heimaleik vetrarins - Akureyri Handboltafélag
Dómarar: Gísli Hlynur Jóhannsson og Hafsteinn Ingibergsson
Umfjöllun
Tengdar fréttir
Handboltaleikur á Akureyri er fjölskylduskemmtun
27. október 2009 - Akureyri handboltafélag skrifar
Háskólabandið spilaði í Höllinni - myndir
Líkt og síðasta vetur er boðið upp á ýmiss konar atriði í tengslum við heimaleiki Akureyrar til að auka enn á skemmtunina sem fylgir því að mæta á handboltaleikina. Það voru meðlimir Háskólabandsins sem hófu leikinn á þessari leiktíð og héldu uppi stemmingu á kaffiteríu Íþróttahallarinnar fyrir leikinn gegn FH og einnig í hálfeik. Að þessu sinni kom fram bandarísk gestasöngkona með hljómsveitinni í nokkrum lögum.
Nú er bara spurningin hvaða atriði verður á næsta heimaleik sem verður gegn Stjörnunni fimmtudaginn 12. nóvember næstkomandi?
Þórir Tryggvason, hirðljósmyndari beindi myndavélinni að Háskólabandinu og er hægt að skoða allar myndirnar með því að smella hér.
Stemmingin var ósvikin í stúkunni
26. október 2009 - Akureyri handboltafélag skrifar
Áhorfendur á Akureyri standa undir nafni - myndasyrpa
Það þarf ekki að hafa mörg orð um að handboltaáhorfendur á Akureyri voru sigurvegarar umferðarinnar. Líkt og síðasta vetur var fjölmennt í Höllina og Þórir Tryggvason fangaði stemminguna eins og honum einum er lagið.
23. október 2009 - Akureyri handboltafélag skrifar
Oddur í viðtali: Menn hættu að þora að sækja á markið
Oddur Gretarsson var langbesti maður liðs Akureyrar í leiknum gegn FH í kvöld. Hann skoraði 10 mörk (þar af 4 úr vítum) og olli FH-ingum stöðugum vandræðum.
„Ég er sáttur við minn leik í kvöld en ég hefði frekar viljað skora færri mörk og vinna leikinn ef það hefði verið í boði,“ sagði hornamaðurinn ungi. Hann hélt áfram: „Við vorum alltof ragir og óskynsamir í sóknarleiknum. Það var eins og menn hættu að þora að sækja á markið sem var akkúrat öfugt við það sem við ætluðum okkur fyrir leik. Við spiluðum hræðilega vörn og vorum alltof lengi að koma okkur til baka eftir sóknirnar.“
Eitt stig eftir þrjá leiki hljóta að vera vonbrigði? „Já klárlega eru það vonbrigði við ætluðum okkur að vera með fleiri stig en því má ekki gleyma að við fengum erfitt prógramm til að byrja á, það má svosem deila um hvort það sé gott eða slæmt en þetta er allavega staðan núna. Við ætlum okkur bara að gera betur, rífa okkur upp og vinna Gróttu í næsta leik,“ sagði Oddur ákveðinn að lokum og er óhætt að taka undir orð hans.
Jón Stefán Jónsson
Áhorfendur geta ráðið úrstlitum
22. október 2009 - Akureyri handboltafélag skrifar
Leikur dagsins: Akureyri - FH væntanlega í beinni lýsingu
Leikurinn í dag verður að öllum líkindum í beinni textalýsingu hér á heimasíðunni eins og vant er fyrir þá stuðningsmenn sem ekki komast á leikinn. Það er virkilega auðvelt að fylgjast með leiknum í gegnum Beinu Lýsinguna.
Beina Lýsingin opnast í nýjum glugga sem uppfærist sjálfvirkt á 15 sekúndna fresti. Það er því ekkert mál að fylgjast með. Leikurinn hefst eins og fyrr kom fram klukkan 19:00 og við hvetjum alla til að fylgjast vel með.
Þá hyggst SportTV.is senda út leikinn á netinu og tekst það vonandi betur en síðast. Væntanlega næst útsending þeirra með því að smella hér.
Það er viðbúið að verði þétt setið á stúkunni
20. október 2009 - Akureyri handboltafélag skrifar
Það styttist í fyrsta heimaleikinn - FH á fimmtudag
Nú er loksins komið að því sem menn hafa beðið eftir, fyrsti heimaleikur Akureyrar Handboltafélags verður í Íþróttahöllinni á fimmtudaginn og hefst leikurinn klukkan 19:00. Það var ótrúlega mögnuð stemming á leikjum Akureyrar í fyrravetur svo að athygli vakti um allt land. Við lok Íslandsmótsins síðasta vor voru stuðningsmenn Akureyrar einmitt valdir bestu áhorfendur Íslandsmótsins og félagið fékk viðurkenningu fyrir bestu umgjörð heimaleikjanna.
Bestu áhorfendur Íslands klikka ekki
Við ætlum að sjálfsögðu ekki að slá slöku við í vetur og í sameiningu gerum við hvern heimaleik að veislu fyrir stuðningsmenn handboltans á Akureyri. Líkt og í fyrra er gert ráð fyrir tónlistaratriðum bæði fyrir leik og í hálfleik og á fimmtudaginn er það Háskólabandið sem ríður á vaðið með nokkra sígilda gullaldarslagara.
Háskólabandið í Höllinni í fyrra
Meðlimum stuðningsmannaklúbbsins er boðið upp á heita máltíð fyrir leik og kaffiveitingar í hálfleik. Að leik loknum koma leikmenn og þjálfari og rabba við stuðningsmenn um leikinn og næra sig á þeim veitingum sem eftir eru. Undanfarna daga hefur verið í gangi sala stuðningsmannaskírteina og verður einnig hægt að kaupa þau við innganginn á fimmtudaginn. Verð skírteinanna er það sama og í fyrra, 15.000 krónur og innifela aðgang að öllum heimaleikjum N1 deildarinnar, veitingar fyrir leik og í leikhléi svo og ýmiss fríðindi sem verða betur kynnt síðar.
Kræsingar á borðum í stuðningsmannaherberginu
Við munum halda í þá hefð að yngstu iðkendur KA og Þór munu skiptast á að vera fánaberar og ganga inn á leikvöllinn með leikmönnum í upphafi leiks.
Krakkarnir standa sig með prýði við fánaburðinn
Einnig munu leikmenn KA og Þór skiptast á þeim ábyrgðarstöðum að manna kústana. Eins og menn vita þá leika þeir stundum stórt hlutverk í hita leiksins.
Farið yfir helstu vinnureglur um skúringar
Verið er að leggja lokahönd á kynningarblað Akureyrar Handboltafélags og verður það væntanlega komið úr prentun fyrir fimmtudaginn.
En aðeins um leikinn sjálfan, Akureyri og FH hafa mæst fjórum sinnum á undirbúningstímabilinu og því trúlega fátt sem leikmennirnir vita ekki hver um annan. Í byrjun september kom FH í heimsókn norður og léku liðin tvo æfingaleiki en Akureyri sigraði í þeim báðum. Liðin léku síðan til úrslita nokkru síðar á Ragnarsmótinu á Selfossi en þar fór FH með sigur. Fjórða viðureignin var síðan á Hafnarfjarðarmótinu þar sem Akureyri sigraði í hörkuleik.
En nú er sem sé komið að alvörunni og óhætt að segja að leikurinn sé einn af úrslitaleikjum mótsins. FH sýndi mátt sinn í síðustu viku er þeir unnu stórsigur á Val en Íslandsmeistarar Hauka máttu þakka fyrir að ná stigi gegn Akureyri á heimavelli sínum.
Það er ánægjuleg staðreynd að allir leikmenn Akureyrar Handboltafélags eru uppaldir hér norðanlands hjá Akureyrarliðunum KA og Þór auk þess sem nýjasti leikmaðurinn, Guðlaugur Arnarsson steig sín fyrstu handboltaskref hjá Völsungi á Húsavík, norðlenskara getur það varla orðið. Það verður gaman að sjá þá Heimi Örn Árnason og Guðlaug Arnarsson leika listir sínar sem heimamenn á fjölum Íþróttahallarinnar.
Í þeim tveim leikjum sem búnir eru náðist ekki að stilla upp sterkasta liðinu vegna veikinda og meiðsla. Hörður Fannar og Guðlaugur misstu af Haukaleiknum vegna veikinda og Jónatan af Valsleiknum vegna meiðsla. Væntanlega verða þeir allir klárir á fimmtudaginn. Auk þess sem kornungir og öflugir nýliðar hafa staðið sig með sóma í leikjum haustsins.
FH ingar eru engin lömb að leika við að mati Árna Stefánssonar
19. október 2009 - Akureyri handboltafélag skrifar
Árni Stefánsson um næstu andstæðinga Akureyrar
Það er engum blöðum um það að frétta að á fimmtudaginn verður einn stærsti leikur tímabilsins þegar lið FH kemur í heimsókn. FH eru með gríðarlega öflugt lið og er spáð öðru sætinu á Íslandsmótinu og sýndu það í síðustu umferð að sú spá var engin tilviljun þegar þeir rúlluðu yfir bikarmeistara Vals.
Til að bregða ljósi á lið FH skulum við líta á hvað Árni Stefánsson, sérfræðingur um karlaboltann segir um liðið í nýútkomnu kynningarriti N1-deildarinnar.
FH verður í vetur með bráðskemmtilegt lið sem er líklegt til þess að ná árangri. FH lék góðan handbolta lengstum á síðasta tímabili en botninn datt úr leik liðsins og það endaði í fimmta sæti. Það vakti þó verðskuldaða athygli fyrir mjög hraðan og skemmtilegan leik. Stjarna liðsins frá síðasta tímabili, Aron Pálmarsson, er farinn í atvinnumennsku til Kiel en í hans stað hefur liðið fengið markvörðinn Pálmar Pétursson, varnarjaxlinn Sigurgeir Árna Ægisson og línumanninn Jón Heiðar Gunnarsson. Auk þess er liðið búið að endurheimta Ólaf Guðmundsson, en hann var meiddur seinni hluta síðasta tímabils, og Ólaf Gústafsson sem var meiddur allt síðasta tímabil. FH verður í toppbaráttunni allt til enda en skortir líklega reynslu til að klára dæmið.
Styrkleikar Helsti styrkleiki FH í vetur verður án efa mjög hraður og fjölbreyttur sóknarleikur. Liðið er með unga og fljóta leikmenn sem nýtast vel í hraðaupphlaupum og hröðum sóknum. Þeir munu alltaf keyra í bakið á andstæðingum sínum og reyna þannig að fá auðveld mörk. Þeir eru með góðar skyttur þar sem Ólafur Guðmundsson og Ólafur Gústafsson eru og fjölhæfa leikmenn á borð við Bjarna Fritzson, Ásbjörn Friðriksson og Örn Inga Bjarkason þannig að í leikjum FH verður mikill hraði og fullt af mörkum. Með tilkomu Sigurgeirs Árna verður varnarleikurinn líka betri og það kemur til með að skila fleiri hraðaupphlaupum.
Veikleikar Helsti veikleiki FH í vetur gæti orðið reynsluleysi. Liðið hefur á að skipa góðum leikmönnum en þeir eru ekki með neina leikmenn sem hafa reynslu af toppbaráttu í efstu deild. Það gæti vegið þungt ef um harða og jafna baráttu verður að ræða. Það mun því mikið mæða á nýjum þjálfara liðsins Einari Andra Einarssyni og gömlu jöxlunum Guðjóni Árnasyni og Bergsveini Bergsveinssyni að hjálpa liðinu í toppbaráttunni.
Lykilmaður Ólafur Guðmundsson verður lykilmaður hjá FH í vetur. Hann er einn alefnilegasti leikmaður sem komið hefur fram hér á landi síðustu ár, gríðarlega öflug skytta og það sem er ekki síður mikilvægt fyrir FH er að hann mjög góður varnarmaður. Hávaxinn leikmaður sem getur leikið fyrir framan vörnina og truflað leik andstæðinganna verulega. Sigurgeir verður hjartað í vörninni og Pálmar á eftir að reynast drjúgur í markinu og svo má ekki gleyma Bjarna Fritzsyni sem gæti verið maðurinn til að draga vagninn þegar á þarf að halda.
Þjálfarinn segir... FH kom upp í N1-deild karla á síðasta tímabili og olli miklum usla í toppbaráttunni framan af. Einar Andri Einarsson, sem tók við þjálfun liðsins að aflokinni síðustu leiktíð, ætlar að byggja á þeim árangri í vetur. „Við viljum halda áfram því uppbyggingarstarfi sem hefur átt sér stað hér í Kaplakrika síðustu ár. Við náðum fimmta sætinu í fyrra og við ætlum bara að bæta okkar leik og fara ofar. Við ætlum okkur í úrslitakeppnina.“
Það gæti þó reynst erfitt verk þar sem burðarás þeirra og einn alefnilegasti leikmaður okkar Íslendinga, Aron Pálmarsson, hvarf á brott eftir tímabilið til þess að leika með þýsku meisturunum í Kiel. Einar hefur unnið að því hörðum höndum á undirbúningstímabilinu að stilla saman strengi leikmanna eftir brotthvarf hans. „Margir ungir leikmenn byrjuðu að spila fyrir okkur á síðasta tímabili og fengu talsverða ábyrgð. Nú eru þeir allir árinu eldri og reyndari. Við erum að smíða nýtt lið samt sem áður, við erum að fá Ólaf Guðmundsson og Ólaf Gústafsson báða tilbaka úr meiðslum og svo erum við með fleiri stráka sem við erum að smíða í kringum. Það er mikið verk framundan, við erum langt frá því að vera rútínerað lið enn sem komið er.“
Einn af þeim nýju leikmönnum sem FH fékk til liðs við sig fyrir veturinn er markvörðurinn Pálmar Pétursson sem kom frá Val og líst Einari mjög vel á piltinn. „Hann hefur spilað mjög vel á undirbúningstímabilinu, hann hefur æft vel og er bara mjög einbeittur og góður strákur,“ sagði Einar sem er að þjálfa sitt fyrsta tímabil í efstu deild, en hann stjórnaði FH eitt tímabil í fyrstu deild fyrir þremur árum.
Úrvalsdeild karla
Senda skilaboð
Vefur KA
Vefur Þór
Fréttaleit
Ljósmyndir frá leiknum
Textalýsing frá leiknum
Tölfræði leiksins 
Senda á Facebook