Warning: Undefined array key "frettanr" in /web/akhandadmin/public_html/index.php on line 15
Valsmenn höndluðu pressuna í Höllinni - Akureyri Handboltafélag
  Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Fyrri leiktímabil

Tímabilið 2009-10

Leikmenn meistarafl. karla
Úrslit leikja
Deild karla




Ljósmyndir frá leiknum     Textalýsing frá leiknum     Tölfræði leiksins 
    Akureyri - Valur  25-31 (9-13)
N1 deild 4-liða úrslit
Íþróttahöllin
Lau 24. apríl 2010 klukkan: 20:00
Dómarar: Jónas Elíasson og Ingvar Guðjónsson, eftirlitdómari: Helga Magnúsdóttir
Umfjöllun

Oddur var traustur að vanda

25. apríl 2010 - Akureyri handboltafélag skrifar

Valsmenn höndluðu pressuna í Höllinni

Ekki tókst Akureyrarliðinu ætlunarverk sitt í gærkvöldi, að klára einvígið gegn Val á heimavelli. Við birtum hér umfjöllun Hjalta Þórs Hreinssonar, blaðamanns Visir.is og Fréttablaðsins um leikinn.

Umfjöllun: Valur stóðst áhlaup Akureyrar

Hátíðarhöldunum á Akureyri var slitið af Valsmönnum sem lögðu heimamenn 25-31 í skemmtilegum handboltaleik í Höllinni í kvöld. Staðan í einvígi liðanna er því 1-1 og þau mætast í úrslitaleik um sæti í úrslitum N-1 deildarinnar á mánudag.

Mér var boðin gleðilega hátíð við komu í Höllina en umgjörðin í kringum leikinn var frábær. Akureyringar voru tæplega 1000 í Höllinni, mikil stemning löngu fyrir leik og svo allan leikinn.


Það var magnað að horfa yfir stúkuna í gær
Mynd: Mbl/Þórir Tryggvason

Það var skammarlegt að sjá hversu fáir mættu á fyrri leik liðanna í Vodafone-höllinni en eins og Óskar Bjarni Óskarsson þjálfari Vals sagði eftir leikinn í kvöld: „Þetta er handbolti.“

Og leikurinn var góður. Akureyringar komust í 2-0 og voru með blóð á tönnunum á heimavelli. Vörn þeirra var virkilega föst fyrir strax frá fyrstu sókn og þeim var strax hent útaf, eins og sjö sinnum í viðbót í leiknum. Leikurinn var mjög erfiður að dæma en Akureyringar voru vægast sagt ósáttir við dómgæsluna í leiknum.

Valur barði frá sér og vaknaði eftir nokkrar mínútur, komst í 3-7. Valsvörnin var mjög öflug og Hlynur Morthens góður þar fyrir aftan. Hann varði alls 20 skot í leiknum.

Staðan var 9-11 þegar Akureyri fékk hraðaupphlaup en í því miðju stal Baldvin Þorsteinsson boltanum glæsilega og skoraði fyrir Val. Þetta var lykilatriði rétt fyrir hálfleikinn en í honum var staðan 9-13 fyrir gestina.

Valsmenn bættu í í upphafi seinni hálfleiks. Þeir komust í 13-19 áður en áhlaup Akureyringa hófst. Það endaði með því að staðan var orðin 17-19 þegar þrettán mínútur voru búnar af hálfleiknum. Þá vöknuðu Valsmenn aftur, komust í 17-22 og kláruðu leikinn.

Eftir það var þetta aldrei spurning og sigur Vals öruggur. Lokatölur 25-31.

Akureyringar spiluðu fína vörn og sókn þeirra var ágæt. Þá vantaði að fá nokkrar markvörslur til að fá hraðaupphlaupin sín í gang, markmenn liðsins vörðu þó samtals 15 skot. Óstöðugleiki liðsins sýndi sig og lítið kom frá Jónatan Magnússyni og Árna Þór Sigtryggssyni.

Valsmenn mega vel við una. Akureyringar þeirra Baldvin og Arnór Þór Gunnarsson léku vel og vörn þeirra var lengst af fín. Þá spilaði Hlynur vel eins og áður sagði.

Það eru skiptar skoðanir sem eðlilegt er eftir svona baráttuleik. Dómarar leiksins, Ingvar Guðjónsson og Jónas Elíasson voru ekki í öfundsverðu hlutverki. Þeir gerðu hvað þeir gátu til að halda spennustiginu niðri en dæmdu nokkrum sinnum furðulega. Akureyringum fannst mikið á þá halla og þeir kvörtuðu mikið yfir leikaraskap Valsmanna.

Þrátt fyrir að dómararnir hafi ekki átt sinn besta dag verður ekki litið framhjá því að Valsmenn voru einfaldlega betri aðilinn í leiknum og áttu sigurinn skilinn.

Mörk Akureyrar (skot): Oddur Grétarsson 8/4 (10/5), Heimir Þór Árnason 7/1 (10/1), Hörður Fannar Sigþórsson 4 (6), Guðmundur Hólmar Helgason 3 (10), Hreinn Þór Hauksson 1 (2), Geir Guðmundsson 1 (2), Jónatan Þór Magnússon 1 (5), Árni Sigtryggsson 0 (5),

Varin skot: Hörður Flóki Ólafsson 8 (23) 35%, Hafþór Einarsson 6 (22) 27%.
Hraðaupphlaup: 9 (Heimir 4, Oddur 3, Hörður, Hreinn)
Fiskuð víti: 5 (Hörður 2, Heimir 2, Jónatan)
Utan vallar: 16 mín.

Mörk Vals (skot) : Arnór Þór Gunnarsson 9/4 (12), Fannar Þór Friðgeirsson 9/1 (15), Sigurður Eggertsson 5 (12), Baldvin Þorsteinsson 4 (8), Elvar Friðriksson 2 (3), Ingvar Árnason 1 (3), Jón Björgvin Pétursson 1 (1), Sigfús Páll Sigfússon 0 (4).

Varin skot: Hlynur Morthens 20 (43) 47%, Ingvar Guðmundsson 0 (2) 0%.
Hraðaupphlaup: 8 (Baldvin 3, Arnór 2, Jón, Ingvar, Fannar.)
Fiskuð víti: 5 (Sigfús Páll 2, Sigurður, Arnór, Fannar)
Utan vallar: 12 mín.

Skoða myndasyrpu Þóris Tryggvasonar á mbl.is.

Tengdar fréttir

Strákarnir lofa hörkuleik á mánudagskvöldið





25. apríl 2010 - Akureyri handboltafélag skrifar

Akureyri – Valur: viðtöl eftir leikinn í gær

Andri Yrkill Valsson blaðamaður Morgunblaðsins ræddi við leikmenn eftir slaginn í gærkvöldi. Skoðum fyrst hvað Heimir Örn Árnason hafði að segja:

„Við vorum alls ekki nægilega klókir“


„ Við vorum alls ekki nægilega klókir. Þegar við leikmenn í gærkvöldi vorum með fullskipað lið þá náðum við alltaf að komast inn í leikinn, en svo létum við reka okkur útaf og það var of dýrt,“ sagði Heimir Örn Árnason, leikmaður Akureyrar eftir 31:25 tap liðsins gegn Val í undanúrslitum N1-deildar karla í kvöld. Staðan er jöfn 1:1 og úrslitin ráðast í oddaleik á mánudag á heimavelli Vals.

„Valsmenn eru engir nýgræðingar. Þær vældu alveg frá fyrstu mínútu og græddu vel á því. Við fengum alveg fáránlega margar brottvísanir og við vorum oft miklir klaufar. Oddaleikurinn verður mjög jafn, við unnum þá örugglega síðast og þeir unnu okkur örugglega núna, svo það er kominn tími á jafnan leik.“

Oddur Gretarsson ræddi einnig við Andra Yrkil

„Þetta er engan veginn búið“

„Þetta er engan veginn búið,“ sagði Oddur Gretarsson, leikmaður Akureyrar, en hann fór fyrir sínum mönnum og skoraði 8 mörk. Hann var ósáttur við hversu margar brottvísanir lið hans fékk í leiknum.

„Við fengum of mikið af óþarfa brottvísunum og þess vegna náðum við ekki að fylgja eftir þegar við náðum góðum köflum í leiknum. Við vorum líka óheppnir þar sem við misstum boltann oft af algjörum klaufaskap og það datt ekkert með okkur. Við þurftum að elta þá allan leikinn og það var bara of erfitt. En við ætlum að klára þetta í oddaleiknum, það er engin spurning.“


Andri Yrkill ræddi einnig við nokkra leikmenn Vals sem voru að sjálfsögðu brosmildir eftir leikinn.
„Þetta var alveg ekta leikur á milli þessara liða,“ sagði Arnór Þór Gunnarsson, leikmaður Vals, en hann skoraði níu mörk í undanúrslita leiknum gegn Akureyri í N1-deild karla í kvöld.

„ Baráttan var í fyrirrúmi, menn slógust og þetta er bara gaman. Við komum alveg brjálaðir til leiks eftir að hafa spilað mjög illa í síðasta leik og við ætluðum okkur ekkert nema sigur. Valsarar mega svo sannarlega fjölmenna á næsta leik þar sem við munum spila mikið betur en í síðasta heimaleik.“

Fannar Þór Friðgeirsson var sammála liðsfélaga sínum, en hann skoraði einnig níu mörk í leiknum. „Þetta var skemmtilegur leikur, harkan var mikil og stemningin ennþá meiri. Við vorum hundfúlir eftir síðasta leik þar sem við spiluðum mjög illa og við sögðum að við gætum ekki gert verr en það. Við ætluðum að tryggja okkur oddaleik, það tókst og nú ætlum við alla leið í úrslitin.“

„Við sýndum mikinn karakter. Ef við ætlum okkur að verða meistarar þá verðum við að spila alla leiki á þennan hátt,“ sagði Sigfús Sigurðsson, leikmaður Vals eftir 31:25 sigur liðsins gegn Akureyri í undanúrslitum N1-deildar karla í handknattleik í kvöld.
Hann sagði baráttuna sem einkenndi leikinn gera handboltann enn skemmtilegri. „Það er alltaf gaman að koma hingað norður að spila. Baráttan er í fyrirrúmi, við lemjum hvorn annan á línunni svo þetta er bara gaman. Svona á handbolti að vera, þetta er ekki eintómt flæði fram og til baka. Í svona leikum er það baráttan um að komast í úrslitin sem ræður. Liðið sem hefur meiri vilja, er þéttari og spila af meiri liðsheild vinnur, og það vorum við í dag.“


Jónatan Magnússon var í viðtali hjá Hjalta Þór Hreinssyni á Fréttablaðinu og var ósáttur við framgöngu dómaranna í leiknum:

Liðin eiga að vera á núlli hjá dómurunum þegar leikurinn byrjar

Jónatan Magnússon, fyrirliði Akureyrar, var ómyrkur í máli eftir tapið gegn Val í kvöld. Hann gagnrýnir dómara leiksins harkalega.

Akureyringar fengu átta brottvísanir í leiknum og Valsmenn sex. Leikurinn var mjög harður og spennustigið hátt.

„Þegar dómarar segja við okkur eftir leikinn að við höfum ekki verið að spila handbolta í fyrri hálfleik, hvað segir það? Það er í fyrsta lagi rangt, eina rauða spjaldið fengu Valsmenn. Þetta er lýsandi dæmi um að þeir mæta inn með fyrirfram ákveðnar hugmyndir.

„Liðin eiga að vera á núlli þegar leikurinn byrjar. Núna eru þeir búnir að smitast af umræðunni að við spilum fast og þetta erbara lýsandi dæmi fyrir þá. Við spiluðum fast, allt í góðu með það, og þeir reka útaf í fyrstu sókn. Það er í fyrsta sinn í vetur sem það gerist.

Og af hverju? Af því þeir hafa hlustað á umræðuna eftir leiki, hlustað á Óskar (Bjarna Óskarsson, þjálfara Vals,innsk), þar sem hann er að tala um alla 50/50 dóma sem við fáum, segir hann, af því við erum á heimavelli.

Ég tek samt ekkert af Völsurum, þeir voru að spila betur en við. Við áttum í vandræðum með að skora.

En þetta finnst mér vera algjör skandall, að liðin séu ekki á núlli þegar leikurinn byrjar.“

En hvað um spilamennsku liðsins? „Hún var klárlega ekki góð. Við vorum bara slakir. Það voru alltof margir í liðinu sem voru lélegir. Þetta er í fyrsta skipti í vetur sem við fáum ekki þá markvörslu sem við erum vanir. Það var vinnsla í vörninni og hún var það besta af þessu þremur, markvörslu vörn og sókn.

„Við grófum okkur smá holu og það er ekki alltaf hægt að reikna með að við komumst upp úr henni. Við settum pressu á þá, en þá komu að sjálfsögðu tvær mínútur. Við fengum of margar slíkar á okkur.“


Jónatan leiðir sína menn til leiks í dag



24. apríl 2010 - Akureyri handboltafélag skrifar

Leikur dagsins: Akureyri -Valur í Höllinni klukkan 20:00

Eftir nokkra bið er runninn upp leikdagur og það enginn venjulegur leikdagur! Í fyrsta skipti í mörg ár fá Akureyringar heimaleik í úrslitakeppninni og ekki að efa að margir stuðningsmenn eru að upplifa gamlar og notalegar minningar frá fyrri árum. Hinir sem yngri eru fá hinsvegar kærkomið tækifæri til að sannreyna allar sögusagnirnar um stemminguna sem fylgir úrslitakeppninni.

Leikurinn hefst sem kunnugt er klukkan 20:00 í kvöld en húsið verður opnað klukkutíma áður eða klukkan 19:00. Meiningin er að gera úr þessu skemmtilega kvöldstund. Boðið verður upp á grillaðar pylsur og safa á meðan að birgðir endast. Einnig verður í boði andlitsmálun fyrir áhugasama o.fl. Fyrst og fremst verður þó frábær handboltaleikur þar sem ekkert verður gefið eftir. Akureyri hefur engan áhuga á að fara aðra ferð í Valsheimilið heldur klára viðureignina í dag á meðan að Valur berst fyrir lífi sínu í dag.

Stuðningsmannakortin og ársmiðar gilda ekki á þennan leik, fremur en aðra í úrslitakeppninni. Allir þurfa því að greiða aðgangseyri, fullorðnir greiða 1.000 krónur en fimmtán ára og yngri greiða 300 krónur. Stuðningsmannaherbergið verður þó að sjálfsögðu opið og þar verða kaffiveitingar í boði.

Strákarnir vita að það er aðeins leikhlé í rimmunni gegn Val en þeir eru staðráðnir í að berjast til síðasta manns á meðan þeir standa í lappirnar, nefbrot og aðrar barsmíðar herða þá bara í baráttunni.

Við skorum á alla stuðningsmenn að láta ekki sitt eftir liggja og troðfyllum Höllina!

Forðumst biðraðir
Þar sem búast má við mikilli örtröð á leikinn er fólk hvatt til að hafa með sér aðgangseyrinn í reiðufé, það mun flýta afgreiðslu verulega þó að sjálfsögðu verði posar til staðar.

Leikurinn í beinni textalýsingu
Fyrir þá sem ekki eiga heimangengt á leikinn skal bent á að við verðum að vanda með textalýsingu frá leiknum hér á síðunni. Beina lýsingin opnast í sérstökum glugga sem uppfærist á 20 sekúndna fresti.
Smelltu hér til að fylgjast með textalýsingunni.

Leikurinn í beinni á SportTV.is
Einnig skal bent á að SportTV.is ætlar að sýna leikinn beint á netinu. Til að fylgjast með lýsingu þeirra skaltu smella hér.


Til baka    Senda á Facebook

Umsjón og hönnun: Stefán Jóhannsson og Ágúst Stefánsson