Warning: Undefined array key "frettanr" in /web/akhandadmin/public_html/index.php on line 15
Akureyri áfram á sigurbraut – sex marka sigur á Val - Akureyri Handboltafélag
  Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Fyrri leiktímabil

Tímabilið 2010-11

Leikmenn meistarafl. karla
Úrslit leikja
Deild karla




Textalýsing frá leiknum     Tölfræði leiksins 
    Valur - Akureyri  17-23 (6-8)
N1 deild karla
Vodafone höllin
Fim 4. nóvember 2010 klukkan: 18:30
Dómarar: Anton Gylfi Pálsson og Hlynur Leifsson
Umfjöllun

Sveinbjörn og Bjarni voru drjúgir í kvöld



4. nóvember 2010 - Akureyri handboltafélag skrifar

Akureyri áfram á sigurbraut – sex marka sigur á Val

Það var ekki laust við að væri skrekkur í stuðningsmönnum Akureyrar fyrir leikinn í kvöld, myndu Valsmenn vakna til lífsins eftir skelfilega byrjun eða myndu leikmenn Akureyrar mæta kærulausir í leikinn eftir velgengnina undanfarið! Upphaf leiksins bar þess greinilega merki að taugar leikmanna voru trekktar.

Varnir beggja liða voru fastar fyrir og markverðirnir stóðu fyrir sínu en að sama skapi var sóknarleikur beggja liða varfærnislegur og ekki burðugur. Þannig skoraði Akureyri ekki mark fyrr en eftir 15 mínútur og 30 sekúndur þegar Guðmundur Hólmar minnkaði muninn í 2-1.


Hörður Fannar kominn í gegnum Valsvörnina. Mynd: mbl.is/Ómar

Þar með var ísinn brotinn og segja má að leikurinn hafi loksins byrjað fyrir alvöru. Akureyri jafnaði í 3-3, aftur í 5-5 og með fjórða markinu í röð náði Akureyri tveggja marka forysta 5-7. Hálfleiksstaðan var 6-8 fyrir Akureyri og þarf trúlega að fara marga áratugi aftur í tímann til að sjá jafn lágar tölur í handboltaleik á Íslandi. Já bragðdaufur fyrri hálfleikur en Sveinbjörn Pétursson yfirburðamaður í liðinu með tólf skot varin eða 67% markvörslu.
Frændurnir Guðmundur Hólmar og Geir skoruðu þrjú mörk hvor og Oddur tvö mörk.


Guðmundur Hólmar í færi og Geir fylgist með. Mynd: mbl.is/Ómar

Seinni hálfleikur var heldur fjörugri en reyndar nokkuð sveiflukenndur. Akureyri hóf hann af krafti og náði fimm marka forystu 7-12 og 8-13. Bjarni Fritzson tók mikinn sprett og skoraði til að mynda fjögur mörk í röð en hann hafði hægt um sig í fyrri hálfleiknum.
Valsmenn klóruðu í bakkann og minnkuðu muninn niður í eitt mark 13-14 þegar seinni hálfleikur var nákvæmlega hálfnaður. Þá var Atla Hilmarssyni nóg boðið og tók leikhlé til að stappa stálinu í sína menn.


Atli leggur strákunum lífsreglurnar. Mynd: mbl.is/Ómar

Það hafði sín áhrif og Akureyri tók leikinn aftur í sínar hendur og munurinn jókst jafnt og þétt, fjögur norðanmörk í röð breyttu stöðunni úr 16-18 í 16-22 og lokatölur síðan 17-23.

Þessi leikur fer kannski ekki í sögubækurnar fyrir gæðahandbolta en þó var hann sögulegur fyrir ýmsar sakir. Þetta var jú fyrsti sigur Akureyrar í deildarleik á heimavelli Vals og annað met var slegið í sögu félagsins því aldrei hefur liðið fengið eins fá mörk á sig í deildarleik. Fyrra metið var 18 mörk þegar liðið vann Fram í útileik 18-27 19. nóv 2009.

Bjarni Fritzson kom sterkur til leiks í seinni hálfleiknum og skoraði sex mörk í honum, Oddur skoraði þrjú mörk og Bergvin Gíslason átti fína innkomu og skoraði tvö mikilvæg mörk. Sveinbjörn átti fínan leik, tók nokkrar afar mikilvægar vörslur, eiginlega má segja að hann hafi endanlega slökkt vonir Valsmanna þegar hann varði með tilþrifum frá Heiðari Þór Aðalsteinssyni í algjöru dauðafæri á línunni.

Mörk Akureyrar: Bjarni Fritzson 6 (1 víti), Oddur Gretarsson 5, Geir Guðmundsson 4, Guðmundur Hólmar Helgason 4, Bergvin Gíslason 2, Heimir Örn Árnason og Hörður Fannar Sigþórsson 1 mark hvor.

Sveinbjörn Pétursson stóð í markinu allan tímann og varði 19 skot og var klárlega maður leiksins hjá okkar mönnum.


Guðmundur Hólmar stöðar Erni Hrafn Arnarsson í leiknum í kvöld
Mynd: mbl.is/Ómar

Hjá Val var Ernir Hrafn Arnarson atkvæðamestur með sex mörk og Valdimar Fannar Þórsson 4. Ingvar Kristinn Guðmundsson markvörður þeirra var þó þeirra besti maður með en 17 skot varin.

Eftir leiki kvöldsins þar sem Fram sigraði FH og HK sigraði Aftureldingu er staðan í deildinni sem hér segir:

Staðan í deildarkeppni karla
Nr. FélagLeikir U J TMörkHlutfallStig-
1. Akureyri5500149 : 1193010:0
2. HK5401167 : 16438:2
3. Fram5302171 : 149226:4
4. FH5302159 : 142176:4
5. Haukar420291 : 101-104:4
6. Afturelding5104130 : 145-152:8
7. Selfoss4103107 : 120-132:6
8. Valur5005124 : 158-340:10

Tengdar fréttir

Bjarna þótti dauf stemmingin í Vodafonehöllinni

4. nóvember 2010 - Akureyri handboltafélag skrifar

Hvað sögðu menn eftir Valsleikinn?

Kristinn Páll Teitsson, blaðamaður á visir.is var á leik Vals og Akureyrar og ræddi við þá Bjarna Fritzson og Valdimar Fannar Þórsson eftir leikinn en báðir voru atkvæðamiklir. Bjarni skoraði 6 mörk fyrir Akureyri og Valdimar 4 fyrir Val.

Bjarni Fritzson: Stemningin var eins og í jarðarför
„Við vorum ekki góðir í fyrri hálfleik en það er gott að ná sigri hér, við vorum mjög lélegir í sókninni og náðum engum hraðaupphlaupum. Vörnin hélt hinsvegar og voru mjög góðir í leiknum. Við hins vegar vorum vissir að við myndum ná að klára þetta ef við næðum nokkrum hraðaupphlaupum sem við náðum,“ sagði Bjarni Fritzson, leikmaður Akureyrar. eftir 23-17 sigur á Val í Vodafone höllinni í kvöld.

„Handbolti rokkar upp og niður, stundum færðu mörg mörk á þig í einu og stundum skorar þú nokkur í einu, við vissum að ef við næðum að koma hraðaupphlaupunum í gang myndum við stinga þá af þegar vörnin var svona sterk“.

Akureyringar eru búnir að vera á góðu flugi og halda toppsæti sínu eftir að hafa sigrað alla leiki sína til þessa.
„Mjög fínt að halda þessu áfram, þótt það séu bara 5 umferðir búnar erum við búnir að vinna slatta af útileikjum og það er mjög gott.“

Þótt Valsmenn hafi verið á botninum fyrir leikinn börðust þeir vel og þurftu Akureyringar að hafa fyrir sigrinum í þessum leik.
„Þeir sýndu góða baráttu þótt það hafi verið erfitt fyrir þá, það er mjög léleg stemming hérna í höllinni og þetta er eins og að koma í jarðarför miðað við það sem áður var þegar maður mætti hér og hér var besta stemmingin. Það getur ekki verið uppörvandi fyrir leikmenn og þjálfara,“ sagði Bjarni.

Kristinn Páll Teitsson ræddi sömuleiðis við Valdimar Fannar Þórsson leikmann Vals eftir leikinn:

Valdimar Fannar Þórsson: Við gátum eitthvað í þessum leik
„Við erum búnir að fá á okkur allt of mörg mörk í hverjum leik og við erum því ánægðir með hvernig vörnin okkar spilaði. Við héldum þeim lengi vel niðri og þeir voru alltaf í vandræðum í sóknarleiknum sínum, við bara náðum ekki að refsa þeim með hraðaupphlaupum. Þar liggur sigurinn,“ sagði Valdimar Þórsson leikmaður Vals eftir 23-17 tap gegn Akureyri í Vodafone höllinni.

„Boltinn datt oft með þeim en það gerist, við vorum hinsvegar óskynsamir síðustu mínúturnar og það telur.
Þótt þeir séu á toppnum finnst mér ekki mikill munur á sætum 1-4, við eigum FH næst sem var spáð titlinum þannig við þurfum að halda áfram þessum góða varnarleik og bæta sóknarleikinn. Við tökum margt úr þessum leik, við gátum eitthvað í þessum leik annað en oft áður og það er mjög jákvætt.“


Valsmenn sem lentu í 2. sæti í fyrra eru með mjög breyttan leikmannahóp en Valdimar hefur trú á verkefninu.
„Þetta hlýtur að fara að detta inn,“ sagði Valdimar.

Blaðamaður mbl.is ræddi við Sveinbjörn Pétursson eftir leikinn

Sveinbjörn: Hugsa ekkert um landsliðið
„Ég hélt að þessi leikur ætlaði í sögubækurnar fyrir fæst mörk skoruð, enda var staðan bara 8:6 eftir fyrri hálfleik og 0:0 fyrstu níu mínúturnar,“ sagði Sveinbjörn Pétursson sem átti góðan leik í marki Akureyrar þegar liðið vann Val í kvöld, 23:17.

„Við vissum að Valsmenn kæmu grimmir til leiks og þeir hafa greinilega nýtt landsleikjahléið vel. Þetta var allt annað lið en það sem tapaði gegn Fram í síðustu umferð. Þetta var mjög erfið fæðing hjá okkur en þegar við komumst fram úr náðum við að gefa í. Þeir gáfust samt ekki upp og ég er virkilega ánægður með þessi tvö stig,“ sagði Sveinbjörn.

Sveinbjörn hefur staðið sig vel í marki Akureyrar á leiktíðinni og í sjónvarpsþætti á RÚV fyrir skömmu nefndi Óskar Bjarni Óskarsson aðstoðarlandsliðsþjálfari hann sem einn af þeim sem koma til greina fyrir landsliðið, en markverðir landsliðsins náðu sér alls ekki á strik í leikjunum tveimur í síðustu viku. Sveinbjörn segist þó ekki velta möguleikum sínum á að spila fyrir landsliðið mikið fyrir sér.

„Í rauninni hugsa ég ekkert um það. Ég vil bara segja að Björgvin Páll Gústavsson er búinn að vera frábær fyrir landsliðið. Hann átti tvo slæma leiki en hvað er hann búinn að eiga marga góða leiki fyrir liðið síðustu tvö ár? Mér finnst skrýtið að fara að dæma hann eftir þetta og ég er viss um að hann mætir grimmur í næsta leik. Ég einbeiti mér bara að Akureyri og minni frammistöðu, og ef eitthvað gerist þá bara gerist það,“ sagði Sveinbjörn.

Í Fréttablaðinu ræddi Kristinn Páll Teitsson við miskáta þjálfara liðanna eftir leikinn.

Atli Hilmarsson: Vissi að þetta myndi koma
„Að skora ekki fyrr en fyrri hálfleikur er hálfnaður er náttúrulega skelfilegt en vörnin var að halda og hélt hún okkur inni í leiknum. Við vorum bara 2-0 undir og á meðan vörnin gekk svona vel þá hafði ég ekki miklar áhyggjur. Ég vissi að þetta myndi koma en ég var óánægður að við skyldum ekki nýta okkur hraðaupphlaup fyrst vörnin hélt svona vel,“ sagði Atli Hilmarsson þjálfari Akureyrar.

„Við vissum að Valsmenn myndu koma brjálaðir í þennan leik. Við vorum búnir að vera á ágætis flugi fram að landsliðspásunni og maður var ekki viss hvernig við yrðum stemmdir,“ sagði Atli sem var kátari en Júlíus Jónasson, þjálfari Vals.

Júlíus Jónasson: Það styttist í fyrsta sigurinn hjá okkur
„Maður hélt um tíma að þetta færi 3-3. Það var lítið skorað í fyrri hálfleik og bæði liðin að spila mjög öflugan varnarleik. Ég er mjög ánægður með varnarleik liðsins,“ sagði Júlíus.

„Við misstum hins vegar einbeitingu á nokkrum köflum sem reyndist dýrt fyrir okkur. Það hendir líka oft lið sem eru á góðu flugi að hlutir virðast detta fyrir þau lið og mér fannst við lenda oft í því. Sóknarfráköstin voru oft að detta vel fyrir þá. Við höfum hins vegar trú á því að þetta fari að detta fyrir okkur og það styttist alltaf í fyrsta sigurinn hjá okkur.“


Það reynir á reynsluboltann Heimi Árnason í dag

4. nóvember 2010 - Akureyri handboltafélag skrifar

Leikur dagsins: Valur - Akureyri í beinni textalýsingu

Okkar menn mæta Valsmönnum í Vodafone höllinni í dag eftir nokkurt hlé í N1 deildinni. Leikurinn verður í beinni textalýsingu hér á heimasíðunni eins og vant er fyrir þá stuðningsmenn sem ekki komast á leikinn. Það er virkilega auðvelt að fylgjast með leiknum í gegnum Beinu Lýsinguna.

Smellið hér til að opna Beina Lýsingu

Beina Lýsingin opnast í nýjum glugga sem uppfærist sjálfvirkt á 15 sekúndna fresti. Það er því ekkert mál að fylgjast með. Leikurinn hefst klukkan 18:30 og við hvetjum alla til að fylgjast vel með.


Það er kominn tími á að vinna sigur á Valsmönnum á útivelli í deildarkeppninni

4. nóvember 2010 - Akureyri handboltafélag skrifar

Mótherjar okkar í dag: Valur

Það er ekkert smálið sem Akureyri mætir í Vodafone höllinni í dag. Valur hefur orðið Íslandsmeistari oftar en nokkurt annað lið, 21 sinni og síðast árið 2007. Þrátt fyrir að byrjunin á ár hafi verið undir væntingum þá er sigurhefðin mikil hjá Valsliðinu og þrátt fyrir mannabreytingar frá síðasta ári þá er hörkumannskapur þar til staðar og bara tímaspursmál hvenær liðið byrjar að bíta frá sér.

Eins og staðan er í dag þá er ljóst að öll lið munu leggja allt í sölurnar til að velta toppliði Akureyrar af stalli og trúlegt að Valsmenn leggi því allt í sölurnar og koma sjálfum sér þar með á sigurbrautina.

Reynsluboltinn, Júlíus Jónasson tók við Valsliðinu fyrir tímabilið og með honum er annar reynslubolti, Heimir Ríkarðsson.


Þjálfararnir Heimir og Júlíus á Opna Norðlenska mótinu hér í haust

Sagan
Allt frá stofnun hefur Akureyri gengið afleitlega gegn Val á útivelli í deildarkeppninni, Valur hefur einfaldlega sigrað í öllum leikjunum. Akureyri sýndi þó í vor að Vodafonehöllin er ekki óvinnandi vígi því liðið sigraði Val í fyrsta leik liðanna í úrslitakeppninni í fyrra og tapaði síðan seinni leiknum eftir framlengingu.
Það er því ljóst að Akureyri verður að mæta af fullum krafti í leikinn ef ekki á illa að fara.

En nánar um Valsliðið. Margir öflugir leikmenn yfirgáfu liðið í sumar. Arnór Þór Gunnarsson og Fannar Þór Friðgeirsson fóru í atvinnumennsku til Þýskalands, Elvar Friðriksson leikur í Danmörku og Ingvar Árnason í Noregi. Þá er Sigfús Páll Sigfússon (Siffi) er farinn í sitt gamla lið Fram, Sigurður Eggertsson fór til Gróttu og þeir Sigfús Sigurðsson og Gunnar Ingi Jóhannsson eru hættir.

En Valsmenn hafa líka fengið til sín öfluga leikmenn. Þar skal fyrstan telja enn besta leikmann N1 deildarinnar síðastliðin ár, Valdimar Þórsson sem lék síðast með HK, landsliðsmaðurinn Sturla Ásgeirsson sneri heim eftir sex ára atvinnumennsku í Danmörku og Þýskalandi og gekk í raðir Valsmanna við heimkomuna. Okkar fyrrum félagi Heiðar Þór Aðalsteinsson leikur í Valsbúningnum í vetur og sömuleiðis er Anton Rúnarsson kominn til Vals á ný eftir að hafa verið lánsmaður hjá Akureyri í hitteðfyrra og Gróttu síðastliðinn vetur.


Valdimar, Heiðar Þór og Anton

Þá fengu Valsmenn erlenda skyttu, Alexandr Jedic rétt í upphafi móts. Þá eru þar fyrir hörkunaglar eins skyttan Ernir Hrafn Arnarsson og línumennirnir Orri Freyr Gíslason og Gunnar Harðarson að ógleymdum markverðinum Hlyni Morthens. Hlynur hefur reyndar verið fjarri góðu gamni vegna meiðsla það sem af er mótinu.

Eftir fjórar umferðir N1 deildarinnar hafa öflugustu markaskorar Valsliðsins verið: Anton Rúnarsson (21 mark), Finnur Ingi Stefánsson og Sturla Ásgeirsson (15 mörk), Valdimar Fannar Þórsson (13 mörk) og Jón Björgvin Pétursson (12 mörk).

Leikmannahópurinn
Hlynur Morthens, 30 ára - markvörður
Friðrik Þór Sigmarsson, 21 árs - markvörður
Ingvar Guðmundsson, 22 ára - markvörður
Atli Már Báruson, 19 ára - línumaður
Hjálmar Þór Arnarson, 21 árs - línumaður
Ragnar Ægisson, 29 ára - línumaður
Gunnar Harðarson, 24 ára - línumaður
Magnús Hrafn Hafliðason, 21 árs - línumaður
Orri Freyr Gíslason, 22 ára - línumaður
Jón Björgvin Pétursson, 28 ára - hornamaður
Sturla Ásgeirsson, 30 ára - hornamaður
Heiðar Þór Aðalsteinsson, 22 ára - hornamaður
Arnar Guðmundsson, 19 ára - skytta
Ernir Hrafn Arnarson, 24 ára - skytta
Styrmir Sigurðsson, 23 ára - skytta
Einar Örn Guðmundsson, 26 ára - skytta
Ólafur Einar Ómarsson, 19 ára - skytta
Valdimar Fannar Þórsson, 30 ára - skytta
Anton Rúnarsson, 22 ára - miðjumaður
Aron Heiðar Guðmundsson, 19 ára - miðjumaður
Alexandr Jedic – skytta (samkvæmt heimasíðu Vals er hann fæddur 1910)
Finnur Ingi Stefánsson, 30 ára – hornamaður.

Það skyldi því enginn vanmeta Valsliðið, það hefur aldrei verið auðvelt að sækja stig að Hlíðarenda. En það væri ekki leiðinlegt að brjóta nú blað í sögunni og sigra loksins deildarleik á heimavelli Vals.

Til baka    Senda á Facebook

Umsjón og hönnun: Stefán Jóhannsson og Ágúst Stefánsson