Warning: Undefined array key "frettanr" in /web/akhandadmin/public_html/index.php on line 15
Akureyri á sigurbraut á ný – stórsigur á Gróttu - Akureyri Handboltafélag
  Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Fyrri leiktímabil

Tímabilið 2011-12

Leikmenn meistarafl. karla
Úrslit leikja
Deild karla




Ljósmyndir frá leiknum     Myndband frá leiknum      Textalýsing frá leiknum     Tölfræði leiksins 
    Akureyri - Grótta  39-24 (19-13)
N1 deild karla
Íþróttahöllin
Fim 10. nóvember 2011 klukkan: 19:00
Dómarar: Gísli H. Jóhannsson og Hafsteinn Ingibergsson
Umfjöllun

Það var létt yfir Atla og Stebba G í kvöld



10. nóvember 2011 - Akureyri handboltafélag skrifar

Akureyri á sigurbraut á ný – stórsigur á Gróttu

Það vakti athygli í upphituninni fyrir leikinn að Hörður Fannar Sigþórsson var mættur í Akureyrarbúninginn en fæstir áttu von á honum þetta snemma eftir ristarbrot í fyrsta heimaleiknum gegn FH í haust.

En Hörður var í byrjunarliðinu og strax frá upphafsflauti dómaranna var ljóst að Höddi var ekki mættur upp á punt heldur var hann allt í öllu jafnt í vörn og sókn. Reyndar skein af liðinu að menn ætluðu að berjast af fullum krafti og greinilegt að endurkoma Hödda og Heimis skilaði sér í auknu sjálfstrausti og öryggi.

Akureyri náði yfirhöndinni strax í byrjun, komust í 6-1 og Guðfinnur þjálfari Gróttu tók leikhlé og las hraustlega yfir sínum mönnum. Það hafði greinilega sín áhrif því Gróttumenn minnkuðu muninn í tvö mörk 7-5. En þar með fór Akureyrarliðið í gang aftur og munurinn jókst jafnt og þétt, hálfleikstölur 19-13 fyrir heimamenn.

Leikur liðsins var magnaður, Bjarni Fritzson sýndi allar sínar bestu hliðar, skoraði 8 mörk úr jafnmörgum skotum, Heimir Örn Árnason var sömuleiðis öflugur með 4 mörk. Vörnin var grimm og fyrir aftan hana Sveinbjörn í flottu formi enda kominn í stuttbuxurnar á ný.


Sveinbjörn ver með tilþrifum enda í nýjum búning og kominn í stuttbuxurnar á ný

Akureyri hóf seinni hálfleikinn með miklum látum, skoruðu fyrstu fjögur mörkin og munurinn kominn í tíu mörk, 23-13. Sveinbjörn hélt uppteknum hætti og varði sitt annað vítakast í leiknum og ljóst að Gróttumenn ættu ekki mikla möguleika í heimamenn í þessu stuði.

Munurinn jókst jafnt og þétt og skipti engu máli þó að reynslubotarnir væru teknir útaf, ungu strákarnir skiluðu sínu með ágætum. Í stöðunni 33-20 ákvað Sveinbjörn að rétt væri að hleypa Stefáni Guðnasyni í markið og Stefán þakkað traustið með frábærri innkomu og setti klárlega sitt mark á leikinn. Mestur varð munurinn sautján mörk 38-21 en Gróttumenn minnkuðu muninn í blálokin með tveim síðustu mörkum leiksins og niðurstaðan því fimmtán marka sigur, 39-24.


Gleðin var svo sannarlega við völd hjá stuðningsmönnum í kvöld

Það var létt yfir leikmönnum og áhorfendum í leikslok enda sást það langar leiðir að eftir erfitt meiðslatímabil þá er liðið að skríða saman og að komast í sitt horf sem við þekkjum.


Höddi mætti sterkur til leiks og fékk viðurkenningu frá Norðlenska sem maður liðsins í leiknum

Hörður Fannar Sigþórsson var valinn besti maður liðsins af sérstakri dómnefnd enda átti hann frábæran leik. Sömuleiðis var Bjarni Fritzson frábær í leiknum með tólf mörk úr jafnmörgum skotum, stal fjölmörgum boltum í vörninni og sýndi og sannaði að hann er besti hægri hornamaður í deildinni í dag.


Bjarni Fritzson skorar eitt af tólf mörkum sínum í leiknum

Allt liðið á hrós skilið fyrir flotta frammistöðu, búið er að nefna markverðina og Heimi, Geir Guðmundsson skoraði fimm mörk úr þrumuskotum og Heiðar Þór Aðalsteinsson minnti rækilega á sig í vinstra horninu svo nokkrir séu nefndir.


Heiðar Þór skoraði fjögur góð mörk úr vinstra horninu

Mörk Akureyrar: Bjarni Fritzson 12 (3 úr vítum), Geir Guðmundsson 5, Guðmundur Hólmar Helgason 4, Heiðar Þór Aðalsteinsson 4, Heimir Örn Árnason 4, Hörður Fannar Sigþórsson 4, Oddur Gretarsson 3, Bergvin Gíslason 2 og Guðlaugur Arnarsson 1.
Varin skot: Sveinbjörn Pétursson 17 (þar af 2 víti) og Stefán Guðnason 7.

Mörk Gróttu: Jóhann Gísli Jóhannesson 5, Hjálmar Þór Árnason 5, Benedikt Reynir Kristinsson 4, Ágúst Birgisson 3, Friðgeir Elí Jónasson 2 (1 víti), Þórir Jökull Finnbogason 2 (bæði úr vítum), Kristján Orri Jóhannsson 1 og Þráinn Orri Jónsson 1.
Varin skot: Lárus Helgi Ólafsson 9, Magnús Guðbjörn Sigmundsson 2.

Næsta verkefni er ekkert smáverkefni, bikarleikur gegn Íslandsmeisturum FH í Hafnarfirði á sunnudaginn. Það er einfaldlega skyldumæting hjá öllum stuðningsmönnum liðsins á suðvesturhorninur til að styðja við strákana en leikurinn verður jafnframt í beinni útsendingu hjá RÚV.

Myndirnar eru að vanda frá Þóri Tryggvasyni, Smelltu hér til að skoða allar myndirnar frá leiknum.

Tengdar fréttir

Hörður Fannar mættur til leiks á ný

11. nóvember 2011 - Akureyri handboltafélag skrifar

Hvað sögðu menn eftir leik Akureyrar og Gróttu?

Við tínum hér saman ummæli leikmanna og þjálfara eftir leik gærdagsins sem við höfum fundið á hinum ýmsu miðlum. Hér er rætt við Hörð Fannar Sigþórsson, Atla Hilmarsson og Guðfinn Kristmundsson þjálfara Gróttu.

Byrjum á Herði Fannari í viðtali við Andra Yrkil Valsson:

Hörður Fannar: Reyndi að hugsa jákvætt

„Ég byrjaði tímabilið þokkalega að eigin mati en var svolítið vonsvikinn fyrstu dagana eftir að ég brotnaði. En ég reyndi að hugsa bara jákvætt, ég reyndi að æfa á annan hátt í staðinn og er bara hér um bil nýbyrjaður að hlaupa aftur og djöflast með á æfingum. Við vissum að það var ekkert gefið fyrir þennan leik.

Grótta hefur staðið mörgum liðum í deildinni undanfarið svo við komum vel einbeittir til leiks. En við náðum upp mjög góðri spilamennsku og höfðum fulla trú á sjálfum okkur frá upphafi. Það er einnig jákvætt að við héldum dampi út allan leikinn og slökuðum ekkert á, enda skilaði það okkur þessum sannfærandi sigri,“ sagði Hörður Fannar.


Hörður Fannar gekk vasklega fram í vörn og sókn í leiknum

Hörður Fannar: Sáttur með mína innkomu

„Ég er alveg þreyttur en ég held að ég hafi getað hlaupið meira en Heimir í síðasta leik, hann sprakk eftir fimm mínútur en ég náði átta,“ sagði Hörður Fannar Sigþórsson brosmildur eftir leik í viðtali við Birgi H. Stefánsson blaðamann visir.is en Hörður Fannar var að enda við að spila sinn fyrsta leik eftir meiðsli og átti frábæra innkomu og var m.a. valinn maður leiksins.

„Við náðum upp hörku varnarleik og vorum að vinna boltann hvað eftir annað í þessum leik. Nú förum við að einbeita okkur að bikarleiknum á sunnudaginn á móti FH, verðum bara að taka einn leik í einu. Það kemur ekkert annað en sigur til greina þar enda nánast komnir með fullmannað lið aftur. “

Þröstur Ernir Viðarsson blaðamaður Vikudags og sport.is ræddi við Atla Hilmarsson:

Atli: Þetta er eitthvað til þess að byggja ofan á

Atli Hilmarsson þjálfari Akureyrar var að vonum ánægður með að landa loksins sigri í N1-deildinni í handknattleik er Akureyri burstaði Gróttu í kvöld með 15 marka mun, 39-24, í Höllinni á Akureyri.

„Þetta var mjög mikilvægt og gaman að sína svona góðan leik eins og við gerðum í kvöld,“ sagði Atli. Akureyrarliðið sýndi sparihliðarnar í kvöld og minnti spilamennskan á hvernig liðið spilaði síðasta vetur. Markvarsla, vörn og hraðaupphlaup einkenndu spilamennsku liðsins í kvöld. „Loksins náðum við þessu fram sem við erum bestir í. Þetta er klárlega eitthvað til að byggja á í framhaldinu og núna horfum við á bikarleikinn á sunnudaginn gegn FH. Það verður gríðarlega erfitt verkefni en þessi sigur er gott veganesti í þann leik,“ sagði Atli brosmildur eftir leik.


Atli fylgist ánægður með sínum mönnum

Hér er einnig hægt að horfa á vídeóviðtal við Atla sem birtist á Sport.is.

Guðfinnur Kristmannsson þjálfari Gróttu var ekki eins kátur með sína menn eins og fram kemur hér á eftir, fyrst ræðir hann við Birgi H. Stefánsson blaðamann visir.is:

Guðfinnur: Hreinasta hörmung

„Við byrjuðum illa, köstum allt of mikið af boltum í hendurnar á þeim og gefum þeim auðveld mörk sem má alls ekki og við vorum búnir að tala um. Við spilum illa sóknarlega og erum ekki að gera það sem var upp á lagt. Varnarleikurinn var allt í lagi þegar við náðum að komast í vörn en við töpum allt of mikið af auðveldum boltum,“ sagði Guðfinnur Arnar Kristmannsson þjálfari Gróttu sem var mjög skiljanlega allt annað en sáttur með leik sinna manna í kvöld.

„Við höfum verið að spila mikið betur, þetta var okkar langlélegasti leikur. Að sama skapi hafa Akureyringar hugsanlega ekkert spilað betur enda á leið upp en við gerðum þá líka ansi góða með því að gefa þeim auðveld mörk. Núna er það bara bikarinn á mánudag á móti Aftureldinu og hætta að hugsa um deild, við erum í öllum keppnum til að vera með og stefnum á sigur. Við getum ekkert hlaupið í burtu frá þessu, við erum komnir á stóra sviðið og verðum bara að standa okkur.“


Guðfinnur átti eitthvað vantalað við dómara leiksins

Guðfinnur Kristmannsson þjálfari Gróttu var furðuhress í viðtali við Þröst Erni Viðarsson blaðamann Vikudags og sport.is eftir leik miðað við flenginguna sem hans menn fengu í kvöld, en var skiljanlega ósáttur við leik sinna manna. „Ég veit ekki hvað maður getur sagt eftir svona leik. Við vorum bara ömurlegir. Ég veit ekki hvort þetta var einbeitningarleysi eða hvað en hugarfarið var ekki til staðar. Við erum búnir að fara yfir þessi mál hvað eftir annað en það gerist ekkert. Við verðum samt bara að halda áfram og rífa okkur upp fyrir bikarleikinn á mánudaginn,“ sagði Guðfinnur eftir leik.

Videóviðtal við Guðfinn er einnig inni á sport.is.


Heimir og Daníel komnir á kreik á ný



10. nóvember 2011 - Akureyri handboltafélag skrifar

Leikur dagsins Akureyri – Grótta í textalýsingu

Það er runninn upp leikdagur í handboltanum og það enginn venjulegur leikdagur. Heimaleikur gegn Gróttu og það sem meira er þá verður þetta væntanlega fyrsti heimaleikur tímabilsins hjá Heimi Erni Árnasyni og Daníel Einarssyni en báðir eru komnir til baka eftir löng meiðsli.
Grunur leikur á að Heimir ætli sér jafnframt að skora sitt fyrsta deildarmark á tímabilinu og skulum við vona að það gangi eftir.
Gróttu liðið hefur staðið sig vel á tímabilinu þó að stigin séu ekki mörg en þeir hafa veitt mikla mótspyrnu í öllum leikjum og enginn skyldi bóka auðveldan sigur á móti þeim.
Leikurinn hefst klukkan 19:00 í dag og við vonumst eftir dyggum stuðningi áhorfenda.

Smelltu hér til að fylgjast með beinni textalýsingu frá leiknum.

Það er svo stutt í næsta leik hjá Akureyri Handboltafélagi því að á sunnudaginn fer liðið til Hafnarfjarðar og leikur við FH í 16-liða úrslitum Eimskipsbikarsins. Sá leikur hefst klukkan 15:45 og verður í beinni útsendingu á RÚV.
Jafnframt er rétt að benda á að það er mikið um að vera á laugardaginn í handboltanum hér á Akureyri. 2. flokkur Akureyrar mætir Stjörnunni í Íþróttahöllinni klukkan 12:30.
Strax þar á eftir eða klukkan 14:00 leika í Íþróttahöllinni 3. flokkur KA gegn Stjörnunni og klukkan 16:00 er leikur í N1 deild kvenna þar sem KA/Þór mætir Stjörnunni í KA heimilinu.
Sem sagt mikið um að vera í handboltaheiminum á Akureyri þessa dagana.


Fyrsti heimaleikurinn hjá Heimi í vetur

7. nóvember 2011 - Akureyri handboltafélag skrifar

Mikilvægur heimaleikur gegn Gróttu á fimmtudaginn

Eftir smá hlé hefst N1 deild karla aftur á fimmtudaginn en þá verður 7. umferð deildarinnar leikin. Að þessu sinni er komið að heimaleik hjá Akureyri og gestirnir koma af Seltjarnarnesinu, nýliðar Gróttu.
Þó að Grótta hafi ekki náð nema einu stigi það sem af er þá hafa þeir svo sannarlega veitt hinum liðunum verðuga keppni þannig að þeir eru sýnd veiði en ekki gefin. Grótta vann 1. deildina nokkuð sannfærandi í fyrravetur en hafa reyndar misst nokkra öfluga leikmenn frá því í fyrra. Sigurður Eggertsson og Ægir Hrafn Jónsson gengu til liðs við Fram og Hjalti Pálmason leikur nú með FH.

Grótta fékk nýjan þjálfara, reynsluboltann Guðfinn Kristmannsson og meðal nýrra leikmanna má nefna Benedikt Kristinsson hornamann sem kom frá FH auk þess sem nokkrir ÍR-ingar gengu til liðs við Gróttu fyrir tímabilið.

Grótta hefur í sínum herbúðum tvo magnað markmenn, reynsluboltann Magnús Sigmundsson og Lárus Ólafsson sem hefur leikið gríðarlega vel í vetur. Helstu markaskorarar þeirra eru Þorgrímur Smári Ólafsson, Jóhann Gísli Jóhannesson og Árni Benedikt Árnason sem allir hafa skorað yfir 20 mörk það sem af er.


Árni, Jóhann og Magnús Sigmundsson

Grótta stríddi Fram liðinu all hressilega í síðustu umferð, stóð vel í HK í Kópavoginum og ekki má gleyma því að þeir gerðu jafntefli við Val í fyrstu umferð deildarinnar. Það er allavega ljóst að enginn má vanmeta Gróttuliðið.

Það er jákvætt fyrir Akureyrarliðið að menn eru að byrja að tínast inn af meiðslalistanum illræmda. Heimir Örn Árnason og Daníel Einarsson léku báðir með í síðasta leik og við verðum að vona að Heimir hafi nýtt hléið núna til að endurheimta sitt fyrra form.

Allavega þá er kærkominn heimaleikur á fimmtudaginn og brýnt að snúa við gengi liðsins og komast á sigurbraut á ný, enn sem fyrr treystum við á að öflugustu stuðningsmenn landsins leggi sitt af mörkum og fjölmenni í Íþróttahöllina. Leikurinn hefst klukkan 19:00 á fimmtudaginnn.


Til baka    Senda á Facebook

Umsjón og hönnun: Stefán Jóhannsson og Ágúst Stefánsson