Warning: Undefined array key "frettanr" in /web/akhandadmin/public_html/index.php on line 15
Æsileikur í Hafnarfirði - eins marks tap í framlengdum leik - Akureyri Handboltafélag
  Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Fyrri leiktímabil

Tímabilið 2011-12

Leikmenn meistarafl. karla
Úrslit leikja
Deild karla




Tölfræði leiksins 
    FH - Akureyri  26-25 (12-12)
Undanúrslit karla
Kaplakriki
Þri 17. apríl 2012 klukkan: 19:00
Dómarar: Ingvar Guðjónsson og Jónas Elíasson. Eftirlitsmaður: Kjartan Steinbach
Umfjöllun

Bjarni var með stórleik í dag

17. apríl 2012 - Akureyri handboltafélag skrifar

Æsileikur í Hafnarfirði - eins marks tap í framlengdum leik

Viðureign Akureyrar og FH hófst í kvöld með ævintýralegum leik sem hafði allt til að bera sem prýðir góðan handboltaleik. Æsispenna, framlenging og að lokum eins marks sigur sem því miður féll FH-ingum í skaut.

Við birtum hér umfjöllun Siguróla Sigurðssonar sem birtist á Sport.is:

Það voru hafnfirsku meistararnir sem fóru betur af stað í leiknum í kvöld og náðu undirtökunum fljótlega. Þeir voru að fá auðveld mörk á meðan Akureyringar áttu mjög erfitt með að finna glufur á samanlímdri FH vörninni. Það sem slapp í gegn varði hinn ungi Daníel Andrésson. Þegar FH-ingar voru 8-5 yfir misstu Akureyringar tvo menn útaf í kælingu og skoruðu heimamenn þá tvö mörk gegn engu og var útlitið svart fyrir Norðanmenn.


Oddur skorar úr hraðaupphlaupi. Mynd: Þorsteinn Haukur Harðarson

Þá brá Atli Hilmarsson á það ráð að taka leikhlé, sem svona svínvirkaði en Akureyringar skoruðu 6 mörk gegn 1 á næstu mínútum og jöfnuðu metinn 11-11. Hvort liðið fyrir sig skoraði eitt mark til viðbótar áður en Ingvar Guðjónsson og Jónas Elíasson, dómarar leiksins, sendu menn til búningsherbergja.

Fyrri hálfleikurinn var stál í stál, þrátt fyrir að Akureyringum í stúkunni stæði ekki alveg á sama þegar heimamenn komust 5 mörkum yfir. Bergvin Gíslason, ungur hornamaður í liði Akureyrar, breytti hinsvegar gangi leiksins þegar hann fékk tækifærið um miðjan fyrri hálfleikinn og var í aðalhlutverki á þeim tíma sem Akureyringar náðu að jafna.

Liðin skiptust á að skora í upphafi síðari hálfleiks en FH-ingar voru snöggir að ná frumkvæðinu aftur og leiddu gjarnan með 1 marki. Eftir aðeins 6 mínútur í síðari hálfleik kom Stefán Guðnasson í mark Akureyringa en Sveinbjörn Pétursson hafði ekki verið að finna fjölina sína í leiknum. Hann hafði aðeins varið 5 skot á meðan kollegi hans í marki heimamanna hafði varið á annan tug skota. Innkoma Stefáns var stórgóð, en því miður fyrir Akureyringa, náðu þeir ekki að nýta markvörslur hans í sókninni þar sem Daníel Andrésson hafði sett í lás. FH-ingar sigu frammúr, líkt og í fyrri hálfleik og höfðu gott þriggja marka forskot, 20-17, þegar rúmar 8 mínútur voru til leiksloka. Akureyringar voru þó aldrei langt undan. Í stöðunni 21-19 fóru Akureyringar í sókn sem gæti farið í sögubækurnar fyrir lengd.

Með klókindum tókst þeim að skora og minnka muninn í 1 mark. Á þessum tímapunkti voru 3 mínútur til leiksloka og allt gat gerst. Stórskyttan, Ólafur Gústafsson, reif sig upp í næstu sókn FH-inga og jók muninn aftur í 2 mörk. Bjarni Fritzsson skoraði fyrir gestina, með miklum klókindum í næstu sókn og næsta sókn heimamanna fór forgörðum. Akureyringar lögðu því á stað í sókn , þegar tæp mínúta var eftir og gátu jafnað.


Bjarni Fritzson var FH-ingum erfiður. Mynd: Þorsteinn Haukur Harðarson

Oddur Gretarsson fiskaði víti sem Bjarni Fritzsson skoraði úr, og FH-ingar misstu einnig mann af velli. Þegar 10 sekúndur voru eftir tók Kristján Arason leikhlé og setti upp í síðustu sókn FH-inga. FH-ingar reyndu að spila Ólaf Gústafsson frían, en hann uppskar aðeins aukakast eftir að leiknum lauk og fór það forgörðum. Því þurfti að framlengja um 2×5 mínútur. Enn og aftur sannaði seigla Akureyringa sig, en það skal engin afskrifa þá í erfiðri stöðu. FH-ingar höfðu leitt mest allann leikinn og voru hálfgerðir klaufar að klára þetta ekki í venjulegum leiktíma.

Akureyringar hófu leikinn í framlengingunni, einum fleiri en það stóð ekki lengi. Eftir að fyrsta sókn Akureyringa hafði farið forgörðum fékk varnartröllið Hörður Fannar Sigþórsson tveggja mínútna brottvísun, sem gerði það að verkum að FH-ingar voru einum fleiri 1 og 1/2 mínútu í fyrri hálfleik framlengingarinnar. Þetta nýttu FH-ingar sér ágætlega og höfðu eins marks forystu eftir fyrri hálfleik framlengingarinnar.

Heimamenn hófu leik í síðari hálfleiknum og var greinilegt á leik beggja liða að mikið var í húfi. Sveinbjörn Pétursson var kominn aftur í mark Akureyringa og stimplaði hann sig inn með látum þegar hann varði tvívegis frá FH-ingum, úr opnum færum. En í hinu markinu var einnig Daníel Andrésson, sem varði gífurlega mikilvægt skot frá Oddi Gretarssyni úr opnu færi þegar gestirnir hefðu getað komist yfir 25-26. Nú voru áhorfendur risnir úr sætum og spennustigið hátt. Það var síðan Atli Rúnar Steinþórsson sem kom heimamönnum yfir þegar rúm mínúta var til leiksloka og áhorfendur í Kaplakrika ærðust. Þetta reyndist síðasta mark leiksins og fóru heimamenn með nauman sigur, 26-25, að hólmi.

Eins og nánast var vitað fyrirfram í kvöld var það vörn og markvarsla sem að skipti sköpum og þar stóðu FH-ingar örlítið framar Norðanmönnum í kvöld. Daníel Andrésson átti mjög góðan leik í marki þeirra, á meðan Sveinbjörn var ekki að finna sig í hinu markinu. Eins og Heimir Örn, fyrirliði Akureyringar, sagði í viðtali við Sport.is fyrr í dag verður þetta spurning um dagsform í þessu einvígi, og þar höfðu Hafnfirðingar betur í kvöld. Það verður ekki komist að því að nefna í þessari umfjöllun hversu fáir sáu sér fært um að mæta í Krikann í kvöld, en töluvert pláss var á bekkjunum í kvöld. Það er vonandi að þessi frábæri leikur verði til þess að fleiri mæti á næsta leik.

Mörk Akureyrar: Bjarni Fritzson 12 (6 úr vítum), Geir Guðmundsson 3, Heimir Örn Árnason 3, Bergvin Gíslason 2, Guðmundur Hólmar Helgason 2, Oddur Gretarsson 2 og Hörður Fannar Sigþórsson 1.

Sveinbjörn Pétursson varði 7 skot og Stefán Guðnason 6.

Mörk FH: Ragnar Jóhannsson 7, Örn Ingi Bjarkason 6, Ólafur Gústafsson 5, Andri Berg Haraldsson 3, Baldvin Þorsteinsson 2, Sigurður Ágústsson 1, Hjalti Þór Pálmason 1 (1 úr víti), Ari Magnús Þorgeirsson 1 mark.
Daníel Freyr Andrésson varði 15 skot.

Tengdar fréttir

Atli þarf að kynda upp í mönnum fyrir föstudaginn

18. apríl 2012 - Akureyri handboltafélag skrifar

Viðtöl eftir leik FH og Akureyrar

Þá er fyrsta leik Akureyrar og FH lokið og vægast sagt varð þetta einn af mögnuðustu leikjum tímabilsins. Óhætt er að segja að Akureyrarliðið eigi töluvert mikið inni fyrir næsta leik því að margir leikmanna liðsins náðu ekki að sýna sinn besta leik og nú þarf einfaldlega að ná öllum á flug fyrir næsta leik. Sá leikur verður í Íþróttahöllinni á Akureyri næstkomandi föstudag og hefst klukkan 20:00.

En lítum hér á nokkur viðtöl sem hafa birst í fjölmiðlum nú strax eftir leik. Byrjum á mbl.is þar sem Ívar Benediktsson ræddi við þjálfarana Atla Hilmarsson og Einar Andra Einarsson:

Atli Hilmarsson: Svona verður þetta

Atli Hilmarsson, þjálfari Akureyrar, sagði að eitt og annað mætti bæta í leik liðsins fyrir næstu viðureign við FH í undanúrslitum N1-deildar karla í handknattleik, en Akureyri tapaði, 26:25, í framlengdum leik í Kaplakrika í kvöld í fyrstu viðureign liðanna.

Atli sagði jákvætt að sínir menn hafi rifið sig upp og jafnað leikinn fyrir hálfleik eftir að hafa lent fimm mörk undir, 11:6, eftir 20 mínútur. Hann sagði kannski helst vonbrigði hvað illa hafi gengið að nýta stöðuna þegar Akureyri var manni yfir í upphafi framlengingar.

Leikurinn hafi hinsvegar verið jafn og spennandi eins og vænta hafi mátt. Spurður hvort áhorfendur á leiknum í kvöld hafi fundið reykinn af réttunum, leikurinn hafi verið eins vænta megi af þeim næstu þá sagðist Atli reikna með því.

Einar Andri: Erfitt að spila gegn Akureyri

Einar Andri Einarsson, þjálfari FH, sagði mikilvægt að halda frumkvæði á heimavelli í úrslitarimmunni við Akureyri og því hafi naumur sigur liðsins verið mikilvægur í kvöld, 26:25, í Kaplakrika.
Einar sagði Akureyrarliðið aldrei gefast upp og því væri afar erfitt að spila gegn því.
FH-liðið byrjaði leikinn betur í kvöld og komst í 11:6, eftir 20 mínútur en tapaði forskotinu niður fyrir hálfleik. Einar Andri sagði að Akureyringar hafi breytt vörn sinn þegar það var komið fimm mörkum undir. Þá hafi FH-liðið hörfað til baka og þá hafi forskotið verið fljótt að fara.
Einar sagðist ánægður með vörn og markvörslu FH-liðsins en eitt og annað hafi betur mátt fara í sóknarleiknum.



Á vísi.is ræddi Stefán Árni Pálsson sömuleiðis við þjálfarana svo og Örn Inga Bjarkason leikmann FH.

Atli: Áttum fínan möguleika í framlengingunni

„Ég er bara hundsvekktur,“ sagði Atli Hilmarsson, þjálfari Akureyrar, eftir tapið í kvöld.

„Þetta var bara jafn leikur og verður án efa frábært einvígi. Við lendum fimm mörkum undir í fyrri hálfleiknum og ég var rosalega ánægður með hvað strákarnir komu snöggt til baka.

Við áttum fínan séns í framlengingunni þegar við vorum einum fleiri en náðum að klúðra því. Ég er ánægður með karakterinn í liðinu en við gáfumst aldrei upp í kvöld.“

Einar Andri: Frábær auglýsing fyrir handboltann

„Þetta var frábær handboltaleikur eins og alltaf þegar þessi lið mætast og góð auglýsing fyrir íþróttina,“ sagði Einar Andri Einarsson, annar þjálfari FH, eftir sigurinn í kvöld.

„Ég er mjög ánægður með sigurinn, einnig er ég gríðarlega ánægður með stemmninguna í húsinu. Leikurinn var sveiflukenndur en við komust oft yfir en þeir komu alltaf til baka, þetta var bara stál í stál á tímabili.

Bæði lið þurftu að hafa mikið fyrir öllum sínum aðgerðum og menn börðust gríðarlega. Þetta er samt rétt að byrja og langt frá því að vera komið hjá okkur. Við ætlum okkur líka að vinna næst leik og komast í lykilstöðu.“

Örn Ingi: Þetta eru skemmtilegustu sigrarnir

„Þetta var gífurlega gaman,“ sagði Örn Ingi Bjarkason, leikmaður FH, eftir sigurinn.

„Það gefur manni mikið sjálfstraust að vinna svona leik eftir framlengingu og gott veganesti í næsta leik. Við byrjuðum gífurlega vel og vorum í hörkustuði lengst framan af en síðan komast þeir einhvernvegin á sporið og ná að saxa á okkur með hraðaupphlaupum. Við hleyptum þeim aldrei framúr okkur og héldum bara í okkar leik, að lokum uppskárum við sigur.

Þetta er bara rétt að byrja en það væri frábært að komast í 2-0 í einvíginu eftir næsta leik og það er það sem við ætlum að gera.“


Örn Ingi sækir að Heimi Erni í leiknum. Mynd: Óskar Andri/visir.is



Það verður gríðarleg barátta í Kaplakrikanum í kvöld

17. apríl 2012 - Akureyri handboltafélag skrifar

Leikur dagsins: FH - Akureyri í beinni á SportTV.is

Það er runninn upp leikdagur og það enginn venjulegur leikdagur. Fyrsti leikur undanúrslitaeinvígis Akureyrar og FH hefst klukkan 19:00 í kvöld, næsti leikur verður síðan hér í Íþróttahöllinni á föstudaginn klukkan 20:00.

Í Vikudegi í dag er stutt viðtal við Heimi Örn Árnason um einvígið: „Þetta verður gríðarlega barátta. Ég á marga góða félaga í FH og veit jafnvel og þeir að þetta verður 50-50 rimma,“ segir Heimir Örn. „Ég ætla að vona að þetta verði jafn skemmtilegt í Kaplakrika og í fyrra. Það var frábær umgjörð en þessi tvö lið eiga langbestu umgjörðina á heimavelli þegar þau taka sig til,“ segir hann. FH og Akureyri mættust í úrslitum í fyrra og þar hafði FH betur, 3-1. „Við eigum harma að hefna og ætlum okkur áfram. Ég tel að það séu helmingslíkur á að það takist.“

Í sama streng tekur Bjarni Fritzson: „Ég er gríðarlega spenntur og reikna með frábæru einvígi,“ segir Bjarni. „Þetta eru hnífjöfn lið og ég held að þetta fari í fimmta leik og að það muni einu marki á liðunum í þeim leik. Svo jafnt verður þetta. Auðvitað hefði maður viljað hafa heimaleikjaréttinn. Við eigum frábæra stuðningsmenn en við verðum að taka einn leik á útivelli og það er bara verkefni fyrir okkur að vinna,“ sagði Bjarni Fritzson.

SportTV.is sýnir leikinn beint
Samkvæmt upplýsingum á vef SportTV ætla þeir að sýna leikinn beint á vefnum, og munum við gera okkar besta til að láta útsendingu þeirra birtast hér á síðunni.

Einnig er hægt að smella hér til að fara á síðu SportTV.is.


Það verður hart barist í viðureigninni

17. apríl 2012 - Akureyri handboltafélag skrifar

Viðtöl við Bjarna og Ólaf Gústafsson um viðureignina

Í dag er fyrsti leikur Akureyrar og FH í undanúrslitakeppninni og er leikið í Hafnarfirði. Morgunblaðið ræddi við leikmennina Bjarna Fritzson og Ólaf Gústafsson um einvígi liðanna og birtum við þau hér að neðan.

Bjarni: Verður æðislegt einvígi

Bjarni Fritzson leikmaður Akureyrar - handboltafélags hlakkar til rimmunnar við FH í undanúrslitum Íslandsmótsins sem hefst í Kaplakrika í kvöld.

„Þetta verður æðislegt einvígi,“ sagði hann við Fréttavef Morgunblaðsins á Akureyri í morgun. Bjarni segir liðin mjög jöfn að getu og bardaginn geti því endað með sigri hvors liðsins sem er. Akureyringar séu hins vegar staðráðnir í að hefna ófaranna frá því í fyrra, þegar þeir töpuðu fyrir FH-ingum í úrslitum Íslandsmótsins.

Hér er hægt að sjá viðtalið við Bjarna:


Ólafur Gústafsson: Gefum allt til að komast í úrslit

Ólafur Gústafsson, rétthenta skyttan í liði FH, á von á hörkuleikjum gegn Akureyringum í undanúrslitum Íslandsmótsins í handknattleik en fyrsta viðureign liðanna fer fram í Kaplakrika í kvöld og hefst klukkan 19.

FH og Akureyri léku til úrslita um Íslandsmeistaratitilinn í fyrra og Ólafur sagði við mbl.is að úrslit í leikjum liðanna undanfarið hefðu alltaf ráðist á síðustu fimm mínútunum, nema þegar þeir fengu skell á Akureyri núna undir lok Íslandsmótsins.

Ólafur sagði að heimavallarrétturinn skipti miklu máli að sínu mati. „Við erum sterkir á heimavelli og ef um oddaleik verður að ræða, verður gott að hafa hann í Kaplakrika.“

Um andstæðingana frá Akureyri sagði Ólafur að Akureyringar væru með góðan markvörð og skæðir í hraðaupphlaupum, og þeir spiluðu mikið útfrá því.

Hann sagði að FH hefði nýtt vel það hlé sem var að Íslandsmótinu loknu, liðið hefði spilað fína æfingaleiki og þeir sem hefðu verið meiddir fengu tíma til að ná sér. Enda væru allir heilir þegar kæmi að svona mikilvægum leikjum og þeir FH-ingar væru tilbúnir að gefa allt til þess að komast í úrslitin um Íslandsmeistaratitilinn.


Til baka    Senda á Facebook

Umsjón og hönnun: Stefán Jóhannsson og Ágúst Stefánsson