Warning: Undefined array key "frettanr" in /web/akhandadmin/public_html/index.php on line 15 Sannfærandi sigur Akureyrar í fyrsta leik - Akureyri Handboltafélag
Dómarar: Gísli H. Jóhannsson og Hafsteinn Ingibergsson. Eftirlit Einar Sveinsson
Umfjöllun
Tengdar fréttir
Heimir var nokkuð sáttur með sína menn
27. september 2013 - Akureyri handboltafélag skrifar
Síðbúin viðtöl eftir sigurleikinn á Fram
Þó að nokkuð sé liðið frá leik Akureyrar og Fram í fyrstu umferð Olís-deildarinnar þá ætlum við að viðhalda þeirri venju að safna saman viðtölum við þjálfara og leikmenn úr ýmsum fjölmiðlum. Við byrjum á viðtölum Birgis H. Stefánssonar sem birtust á visir.is:
Valþór Guðrúnarson: Þetta er mjög spennandi tímabil
„Þetta er mjög ljúft,“ sagði Valþór Guðrúnarson besti leikmaður Akureyrar strax eftir leik. „Það er gott að byrja þetta af krafti en þetta var brösug byrjun á þessum leik en heilt yfir þá spiluðum við þetta vel. Þetta er fyrsti leikur eftir frí, menn eru að stilla sig saman og það eru margir nýir en í heild erum við bara helvíti flottir.“ Valþór endaði með átta mörk í þessum leik og virðist vera með stærra hlutverk þetta tímabil en áður. „Já, þetta er mjög spennandi tímabil. Ég er ánægður hvernig ég kem undan vetri og ég ætla mér stóra hluti á þessu tímabili.“
Valþór skorar eitt átta marka sinna í leiknum
Bjarni Fritszon: Vantar ekki efnivið hér á Akureyri
„Flottur sigur,“ sagði Bjarni Fritzson annar þjálfari Akureyrar nokkuð sáttur eftir sigur í fyrsta leik gegn ríkjandi Íslandsmeisturum. „Það er búinn að vera góður stígandi í þessu í sumar. Með nýjum mönnum koma nýir vinklar og ég er mjög sáttur með þessa viðbót sem við fengum.“ Það er nokkuð ljóst að yngri strákar eru að fá stærri hlutverk þetta tímabilið. „Já, eins og við töluðum um í sumar þá vantar ekki efnivið hér á Akureyri. Við erum búnir að vera að vinna stíft í sumar og strákarnir mjög duglegir og hafa náð að bæta sig mikið. Sigþór Heimisson er að koma þarna inn líka og spilaði nánast 80% af leiknum sóknarlega og stóð sig mjög vel líka. Svo kemur Arnþór inn og setur eina sleggju sem og Jón Heiðar fer í gegn. Þetta eru strákar sem hafa verið við hópinn en ekki fengið mikinn tíma.“
Bjarni í átökum á línunni við varnarmenn Fram
Guðlaugur Arnarsson: Ósáttur við sóknarleikinn
„Ég er ósáttur með sóknarleik liðsins í dag,“ sagði Guðlaugur Arnarsson strax eftir leik. „Við töpum þessu fyrst og fremst þar þrátt fyrir mörg barnaleg og léleg mistök varnarlega þá erum við samt að halda haus betur þar.“
„Það kemur ekkert endilega á óvart að tapa leik en ég vonaðist til þess að við færum að mæta grimmari til leiks. Munurinn á þessum liðum er ekki svona mikill að við eigum ekki að geta barist við þá. Við komum ekkert inn í seinni hálfleikinn og missum þetta frá okkur þá, baráttan dottin niður og við komum ekkert til baka eftir það. Það skiptir alltaf máli ef það vantar lykilmenn en þetta er hópurinn sem spilaði í dag og við lögðum upp með það að vinna með þennan hóp.“
Það gekk illa að skora, sérstaklega í fyrri hálfleiknum. „Já, þetta var brösug byrjun og ég get alveg trúað því að menn hafi verið pínu smeykir. Það var ákveðin haustbragur af þessu og það er erfitt fyrir þessa yngri að koma á Akureyri, þetta er góður heimavöllur.“
Guðlaugur hvetur sína menn áfram
Því næst skoðum við viðtöl sem Ólafur Már Þórisson tók og birtust á mbl.is
Heimir Örn: Ég hló bara
„Ég vissi ekki alveg hvar við stóðum en þetta var bara flott. Reykjavíkurmótið hjálpar sunnanliðunum gífurlega og það var smá stress.“ Staðan var 2:2 eftir 20 mínútur, ég hló nú bara þá, var ekkert að pirra mig þá, sagði Heimir Örn Árnason annar þjálfara Akureyrar léttur eftir sigur á Fram 25:18. Þetta var fyrsti leikur liðanna í Olís-deild karla í handknattleik og haustbragurinn í fyrri hálfleik var allsráðandi eins og Heimir benti réttilega á hér að framan.
Heimir vildi ekki gera of mikið úr varnarleiknum sem hann sagði þó hafa verið góðan. „Það má ekki gleyma því að Framarar voru ekki með örvhentan mann í skyttustöðunni hægra megin og það gerir þetta auðveldara. Þegar Gulli [Guðlaugur Arnarsson] endurheimtir Elías Bóasson verður þetta allt annað,“ sagði Heimir Örn vini sínum og þjálfara Fram til varnar enda hlýtt á milli þeirra.
Spurður út í nýja leikmenn Akureyrar var Heimir ánægður með framlag þeirra og hvað þeir hafa fram að færa. „Vladimir Zejak var mjög góður í vörninni. Gunnar [Malmquist Þórsson] var á 130 prósent hraða eins og alltaf. Hann fékk rautt spjald í fyrsta leik og þar með er það frá. Kristján Orri Jóhannsson var svo frábær í seinni hálfleik eins og hann er búinn að sýna í allt sumar.“
Guðlaugur: Munurinn ekki svona mikill
„Ég er ósáttur við sóknarleik liðsins í dag, við töpum þessu fyrst og fremst þar, sagði nýr þjálfari Íslandsmeistara Fram,“ Guðlaugur Arnarsson eftir 7 marka tap fyrir Akureyri 25:18 í fyrsta leik þeirra í Olís-deild karla í handknattleik.
Spurður hvort leikur liðsins, sem er mikið breytt frá síðustu leiktíð hefði komið á óvart sagði Guðlaugur; „Það kemur svo sem ekkert á óvart að tapa leik en ég vonaðist til að við myndum koma grimmari til leiks. Munurinn á þessum liðum er ekki svona mikill. Við misstum dampinn í síðari hálfleik og þá hættum við að berjast fyrir hlutunum, misstum þetta frá okkur og komum ekki til baka eftir það.“
Guðlaugur sagði spána rökrétta miðað við hvað liðið er búið að missa marga leikmenn. „Það er hinsvegar okkar að afsanna hana,“ bætti hann svo við. Guðlaugur var að koma til baka á gamlar slóðir en hann endaði langan feril sinn með Akureyri. „Það var svolítið sérstakt að koma til baka á sinn gamla heimavöll en það var bara gaman. Ég heilsa allavega ekki svona mörgum í öllum íþróttahúsum.“
Videóviðtöl
Að lokum fáum við þrjú vídeóviðtöl af sport.is sem Siguróli Sigurðsson tók við þá Heimi Örn, Hrein Hauksson og Guðlaug Arnarsson.
Heimir Örn Árnason
Hreinn Þór Hauksson
Guðlaugur Arnarsson
Nú þurfa allir að leggjast á eitt
17. september 2013 - Akureyri handboltafélag skrifar
Handboltinn byrjar fyrir alvöru á fimmtudaginn
Loksins er komið að leikdegi í úrvalsdeild hjá meistaraflokki karla. Deildin hefur fengið nýtt nafn, heitir að þessu sinni Olís-deildin. Fyrstu mótherjar Akureyrar eru engir aðrir en Íslandsmeistarar Fram. Leikmenn ætla svo sannarlega að sýna að þeir séu tilbúnir í slaginn og vonast að sjálfsögðu til að fá fulla höll í fyrsta leik.
Við minnum á hversu frábær skemmtun það er að koma á alvöru handboltaleik. Líkt og í fyrra verður opið gæsluherbergi fyrir yngstu börnin þar sem þau geta leikið sér í ýmsum boltaleikjum.
Happadrætti Heppinn áhorfandi vinnur sér inn 20.000 gjafabréf til dekkjakaupa hjá Brimborg. Sem kemur sér vel nú á haustmánuðum en hjá Brimborg fást einmitt gæðadekk frá Nokian.
Höllin verður opnuð klukkan 18:15 og þá er kjörið fyrir þá sem vilja versla Stuðningsmannaskírteini að koma tímanlega og ganga frá kaupum á skírteini. Að sjálfsögðu verður svo gómsætur kvöldverður í boði í stuðningsmannaherberginu fyrir korthafa.
En aðeins um mótherjana Framara: Þeir stóðu uppi sem Íslandsmeistarar síðasta vor eftir magnað einvígi við Hauka. Síðan hafa orðið miklar mannabreytingar hjá liðinu. Þar skal fyrst nefna að þjálfarinn, Einar Jónsson tók við þjálfun kvennaliðs í Noregi en það er enginn aukvisi sem tók við starfinu, enginn annar en varnarsérfræðingurinn Guðlaugur Arnarsson, leikmaður Akureyrar mörg undanfarin ár.
Sigurður Gleðigjafi Eggertsson lagði skóna á hilluna í vor og sömuleiðis skyttan Jóhann Gunnar Einarsson. Markvörðurinn Magnús Gunnar Erlendsson er kominn til Víkinga, varnartröllið Ægir Hrafn Jónsson gekk í raðir Valsara, línumaðurinn Haraldur Þorvarðarson fór í KR, skyttan Róbert Aron Hostert leikur nú með ÍBV, svo að helstu nöfnin séu nefnd.
Á móti hafa Framarar fengið markvörðinn Stephen Nielsen frá HK Malmö og Svein Þorgeirsson frá Haukum. Í Fram liðinu eru tveir fyrrum Akureyringar, Ólafur Jóhann Magnússon hefur blómstrað í hægra horninu og Hákon Stefánsson (frá Fagraskógi) er sömuleiðis í leikmannahópnum. Aðrir reynsluboltar í Framliðinu eru t.d. leikstjórnandinn knái, Sigfús Páll Sigfússon eða Siffi eins og hann er jafnan kallaður, hornamaðurinn Stefán Baldvin Stefánsson og Stefán Darri Þórsson.
Það þarf ekki að hafa mörg orð um að bæði lið ætla að byrja mótið af krafti og sækja sigur í Höllina. Við hvetjum stuðningsmenn Akureyrar til að mæta tímanlega og sýna að það er ekki að ástæðulausu að þeir hafa undanfarin ár verið útnefndir bestu stuðningsmenn landsins. Áfram Akureyri. Miðaverð er óbreytt frá því á fyrra, 1.500 krónur fyrir fullorðna en 500 krónur fyrir yngri.
Úrvalsdeild karla
Senda skilaboð
Vefur KA
Vefur Þór
Fréttaleit
Ljósmyndir frá leiknum
Myndband frá leiknum 
Textalýsing frá leiknum
Tölfræði leiksins 
Senda á Facebook