Warning: Undefined array key "frettanr" in /web/akhandadmin/public_html/index.php on line 15
Rándýrt stig gegn Haukum í Hafnarfirðinum - Akureyri Handboltafélag
  Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Fyrri leiktímabil

Tímabilið 2013-14

Leikmenn meistarafl. karla
Úrslit leikja
Deild karla




Ljósmyndir frá leiknum     Textalýsing frá leiknum     Tölfræði leiksins 
    Haukar - Akureyri  21-21 (11-10)
Olís deild karla
Schenkerhöllin
Fim 10. apríl 2014 klukkan: 19:30
Dómarar: Anton Gylfi Pálsson og Jónas Elíasson. Eftirlitsmaður Guðjón L. Sigurðsson
Umfjöllun

Jovan var með stórleik í markinu í kvöld

10. apríl 2014 - Akureyri handboltafélag skrifar

Rándýrt stig gegn Haukum í Hafnarfirðinum

Það er óhætt að segja að það hafi verið rafmagnað andrúmsloft í Schenkerhöllinni í Hafnarfirði í kvöld þegar Akureyri sótti Haukana heim. Bæði lið spiluðu sterkan varnarleik í upphafi auk þess sem Jovan Kukobat fór á kostum í Akureyrarmarkinu. Það liðu rúmlega átta mínútur þar til Kristján Orri Jóhannsson braut ísinn og kom Akureyri yfir með fyrsta marki leiksins.
Sóknarleikur Akureyrarliðsins fór af stað í kjölfarið og eftir fimmtán mínútna leik var staðan 2-5 Akureyri í vil. Vörnin áfram sterk og Jovan traustur í markinu, kominn með sex varin skot á þessum tímapunkti.

En Haukarnir náðu að jafna í 6-6 og í framhaldinu var jafnræði með liðunum en Haukar skoruðu síðasta mark fyrri hálfleiksins og leiddu með einu marki, 11-10 í hálfleik. Bjarni Fritzson fór fyrir sóknarleiknum eins og oft áður og skoraði sex mörk í hálfleiknum, þar af þrjú úr vítaköstum.


Bjarni sækir að Haukamarkinu. Mynd: visir.is

Haukar skoruðu einnig fyrsta mark seinni hálfleiks en næstu tvö mörk voru eign Akureyrar og þar með orðið jafnt á ný, 12-12 og skömmu síðar einnig 13-13. Í kjölfarið virtust Haukar vera að taka leikinn í sínar hendur og náðu þriggja marka forskoti á næstu tíu mínútum, 18-15 og 19-16 þegar tíu mínútur voru til leiksloka.

Akureyrarliðið var þó engan vegin hætt, Jovan lokaði markinu og með mögnuðum kafla jafnaði Akureyri leikinn í 20-20. Jón Heiðar Sigurðsson bætti um betur þegar hann prjónaði sig í gegnum Haukavörnina og kom Akureyri yfir, 20-21 og þrjár mínútur eftir af leiknum.
Spennan var gríðarleg, Jovan varði vel, meðal annars dauðafæri af línunni. Sóknarleikurinn hikstaði aðeins, boltinn tapaðist tvívegis og sjö sekúndum fyrir leikslok náðu Haukar að jafna leikinn eftir langa sókn. Lokatölur 21-21 og það stig dugði Haukum til að innbyrða deildarmeistaratitilinn.

Stigið er ekki síður mikilvægt fyrir Akureyri því þrátt fyrir að ÍR næði að sigra Fram í kvöld er ennþá von fyrir Akureyri að komast úr 7. sætinu á mánudagskvöldið. Til þess þarf að sigra HK hér á heimavelli og á sama tíma þarf FH að sigra ÍR. Það lið sem sigrar í þeim leik endar í úrslitakeppninni ef Fram tapar gegn Val.

En aftur að leik kvöldsins, þá var það frábær varnarleikur og markvarsla sem öðru fremur skilaði þessu stigi. Sóknarleikurinn var köflóttur, skyttan Valþór Guðrúnarson var ekki með í kvöld vegna axlarmeiðsla og verður ekki meira með á tímabilinu. Bjarni dró vagninn í fyrri hálfleik en fékk ekki mikið svigrúm í þeim seinni. Aðrir leikmenn tóku sig þá til sem skilaði fínum mörkum úr hornunum og af línu. Sigþór Árni Heimisson og Jón Heiðar Sigurðsson skiluðu svo flottum mörkum á lokakaflanum.


Andri Snær og Gunnar Þórsson fastir fyrir í vörninni. Mynd: visir.is


Kristján Orri og Halldór Logi gefa ekki færi á sér. Mynd: visir.is

Mörk Akureyrar: Bjarni Fritzson 8 (4 úr vítum), Kristján Orri Jóhannsson 4, Þrándur Gíslason 4, Andri Snær Stefánsson 2, Halldór Logi Árnason, Jón Heiðar Sigurðsson og Sigþór Árni Heimisson 1 mark hver.
Jovan Kukobat stóð í markinu allan tímann, átti sennilega einn sinn besta leik með félaginu og varði 18 skot.

Mörk Hauka: Elías Már Halldórsson 4, Tjörvi Þorgeirsson 4, Þórður Rafn Guðmundsson 3, Árni Steinn Steinþórsson 3, Sigurbergur Sveinsson 3 (2 úr vítum), Brynjólfur Snær Brynjólfsson, Einar Pétur Pétursson, Jón Þorbjörn Jóhannsson og Þröstur Þráinsson 1 mark hver.
Markverðir Hauka þeir Giedrius Morkunas og Einar Ólafur Vilmundarson áttu ekki góðan dag og vörðu 2 skot hvor.

Tengdar fréttir

Kristján átti flottan leik gegn Haukunum



11. apríl 2014 - Akureyri handboltafélag skrifar

Hvernig var hljóðið í mönnum eftir Haukaleikinn?

Það var mikið um að vera á öllum vígstöðvum íþróttafréttaritara í gærkvöldi en einhver viðtöl eru komin fram sem við skulum kíkja á. Byrjum á viðtölum Guðmundar Marinós Ingvarssonar, sem birtust á visir.is en hann ræðir við Heimi Örn Árnason og tvo leikmenn Hauka, þá Elías Má Halldórsson og Árna Stein Steinþórsson:

Heimir Örn: Frábær vörn í síðustu leikjum

„Við spiluðum það góða vörn að þetta leit mjög ljótt út fyrir þá, það er ekki spurning,“ sagði Heimir Örn Árnason þjálfari Akureyrar eftir leikinn í kvöld.

„Sóknarleikurinn okkar var erfiður. Við erum búnir að missa marga menn út en ég var mjög ánægður með lokakaflann hjá t.d. Sissa (Sigþóri Heimissyni) og Jóni Heiðari (Sigurðssyni). Þeir stigu flott upp.
Varnarleikurinn var frábær allan tímann og menn börðust eins og ljón.

Það er hræðilegt að klára ekki þennan leik. Við vorum með þetta í höndunum í lokin en stigið var mikilvægt. Við erum búnir að spila svona vörn í síðustu þremur, fjórum leikjum fyrir utan þennan bíbb hálfleik gegn Fram,“ sagði Heimir en Akureyri þarf að vinna HK í síðustu umferðinni á mánudag og treysta á að FH leggi ÍR að velli á sama tíma til að forðast umspil um sæti í deildinni á næsta tímabili.

„HK er sýnd veiði en ekki gefin og hefur spilað vel í síðustu leikjum en ef menn mæta klárir þá eigum við að klára svoleiðis leik.
„Það verður fullur fókus fyrir þann leik á mánudaginn og svo treystum við á okkar menn í Hafnarfirðinum að spila eins og menn. Þá náum við vonandi ÍR-ingum.

Það er hrikalega gott að ná þremur stigum úr Hafnarfirðinum í þessum tveimur skemmtilegu bílferðum. Þá erum við hrikalega sáttir. Ég er greinilega svona góður bílstjóri, er búinn að keyra fram og til baka.

Við vissum að Haukar myndu mæta af fullum krafti. Þeir eru alltaf sterkir varnarlega en detta niður á lágt plan sóknarlega. Við vissum það.

Serbneski markmaðurinn okkar var flottur (Jovan Kukobat). Hann varði eins og skepna. Ekta Serbi að verja aðeins í lokin. Ég er mjög ánægður með hann. Hann er búinn að vera mjög góður í allan vetur,“ sagði Heimir.


Heimir hvetur sína menn áfram í leiknum í gær. Mynd: visir.is

Elías: Lélegur leikur af okkar hálfu

„Fyrst þessi leikur þurfti að vera svona var ágætt að tryggja þetta með svona marki en þessi leikur var alls ekki nógu góður, það verður að viðurkennast,“ sagði Elías Már Halldórsson sem tryggði Haukum deildarmeistaratitilinn með síðasta marki leiksins í kvöld.

„Við æfðum mjög vel vikunni og það var hrikalega gott tempó þannig að þetta kom mér mjög á óvart. Við létum hann verja svaðalega frá okkur í byrjun og vorum í vandræðum með að koma okkur í færi.

Þetta var ströggl allan tímann og Akureyri að berjast fyrir lífi sínu í deildinni. Þetta var bara lélegur leikur af okkar hálfu.

Varnarleikurinn hjá Akureyri var góður á meðan sóknin hjá okkur var léleg. Það er hættulegt í þessari deild. Við náðum aldrei takti,“ sagði Elías en samt voru Haukar í góðri stöðu þegar tíu mínútur voru eftir af leiknum.

„Það er týpískt fyrir þennan leik. Svo missum við það út úr höndunum og þegar maður er að spila illa þá á maður ekkert gott skilið. Við náðum samt að snúa þessu okkur í vil og klára þetta með jafntefli.

Mér fannst við spila á löngum köflum ágætis vörn en fáum fáa bolta varða og erum í vandræðum í sókninni. Við fáum eiginlega engin hraðaupphlaup og það er ekki góð uppskrift að sigri.

Við þurfum að spila betur en þetta. Við erum ekkert það góðir að við getum komið 40% og unnið leikina þannig. Það er ekki hægt. Við þurfum að spila á 100 ef við ætlum að klára þessa leiki,“ sagði Elías Már.


Elías már sækir að Þrándi í Akureyrarvörninni. Mynd: visir.is

Árni Steinn: Súrsæt tilfinning

„Þetta var athyglisvert. Það var hálfgerð deyfð yfir þessu sem er ótrúlegt í hálfgerðum úrslitaleik fyrir okkur,“ sagði Árni Steinn Steinþórsson hægri skytta Hauka.

„Við settum þetta upp sem úrslitaleik en náðum samt aldrei að kreista út þessa baráttu og kraft sem hefur einkennt okkur í vetur, sérstaklega sóknarlega.

Við vorum hægir og ragir og þetta var alls ekki nógu gott fyrir framan allt þetta fólk. Þetta er súrsæt tilfinning. En við tókum deildarmeistaratitilinn. Nú er bara einn titill eftir,“ sagði Árni Steinn en Haukar hafa landa öllum titlunum sem í boði hafa verið til þessa í vetur.

Haukar mæta ÍBV í lokaumferðinni á mánudagskvöldið og segir Árni Steinn það geta verið hættulegt að koma inn í þann leik með hálfum huga þó að engu sé að keppa.

„Þetta er skrýtinn leikur fyrir bæði lið en ef þú ert eitthvað að passa þig þá eru meiri líkur á að þú meiðist. Við verðum að mæta 100% í leikinn eins og hvern annan og þó úrslitin séu ekki aðalatriðið þá er mikilvægt að koma af skriði inn í úrslitakeppnina.


Árni Steinn búinn að missa Sigþór Árna Heimisson fram hjá sér. Mynd: visir.is

Á mbl.is ræddi Ívar Benediktsson við Kristján Orra Jóhannsson svo og við Haukamennina Patrek Jóhannesson og Árna Stein. Viðtölin við þá Haukamennina snúa reyndar lítið um leikinn heldur meira um deildarmeistaratitilinn og væntanlega úrslitakeppni.

Kristján: Eigum ennþá möguleika

Kristján Orri Jóhannsson, hornamaður Akureyrar, sagði stigið sem fékkst út úr leiknum við Hauka í Olís-deildinni í kvöld, nýtast liði sínu vel. Það héldi enn í vonina um að forðast umspilið og ná sjötta sætinu.

„Við þurfum að vinna HK í lokaumferðinni og treysta á að FH vinni ÍR á sama tíma. Þá náum við sjötta sætinu,“ sagði Kristján Orri sem Akureyri hefur betur í innbyrðisleikjum við ÍR verði liðin jöfn að stigum eftir lokaumferðina sem fram fer á mánudagskvöldið.
Nánar er rætt við Kristján Orra á meðfylgjandi myndskeiði.

Patrekur: Stór áfangi í höfn

Patrekur Jóhannesson, þjálfari Hauka, var að vonum glaðbeittur eftir að liðið tók við deildarmeistarabikarnum í Olís-deild karla í handknattleik á heimavelli í kvöld eftir að lið hans gerði jafntefli við Akureyri, 21:21.

„Það er klárlega stór áfangi í höfn. Þetta er bikarinn sem við höfum verið að vinna fyrir allan veturinn," sagði Patrekur en þetta er í fyrsta skipti sem hann vinnur þennan titil sem þjálfari og sá fjórði sem lið hans fagnar á leiktíðinni en áður hafa Haukar unnið Hafnarfjarðarmótið, deildarbikarinn og bikarmeistaratitilinn. „Nú er stefnan tekin á að þann stóra í stærstu bikarkeppninni,“ sagði Patrekur en nánar er rætt við hann á meðfylgjandi myndskeiði.

Árni: Tókum stigið og titilinn

„Þetta er erfiðasti titilinn að vinna því til þess að vinna hann þarf að sýna mikinn stöðugleika og hann höfum við sýnt í vetur,“ segir Árni Steinn Steinþórsson, leikmaður Hauka eftir að liðið varð deildarmeistari í Olís-deildinni í kvöld að loknu jafntefli, 21:21, á móti Akureyri á Ásvöllum.

„Við tókum stigið og titilinn, það skiptir mestu máli,“ segi Árni Steinn og viðurkenndi að leikurinn hafi ekki verið góður af hálfu Hauka og hreint kraftaverk að liði skyldi ná öðru stiginu eftir að hafa nærri því misst leikinn úr höndum sér á síðustu mínútunum.
Nánar er rætt við Árna Stein á meðfylgjandi myndskeiði.



Haukar eru erfiðir á heimavelli



10. apríl 2014 - Akureyri handboltafélag skrifar

Leikur dagsins: Haukar – Akureyri í beinni á RÚV




Næstsíðasta umferð Olís-deildar karla verður spiluð í kvöld en þá fara samtímis fram fjórir leikir og verður flautað til leiks klukkan 19:30. Augu stuðningsmanna Akureyrar beinast að sjálfsögðu að leiknum í Scenkerhöllinni þar sem okkar menn heimsækja ofurlið Hauka. Það má reyndar gera ráð fyrir að flestir áhorfendur fylgist með þeim leik þar sem hann er í beinni útsendingu á Íþróttarás RÚV.

Smelltu hér til að fylgjast með útsendingunni.

Eins og komið hefur fram hér á heimasíðunni þá hefur leikurinn mikla þýðingu fyrir bæði liðin, Akureyri hefur full not af báðum stigunum í botnbaráttunni á meðan Haukar þurfa bara eitt stig úr leiknum til að tryggja sé deildarmeistaratitilinn.

Það verður örugglega mikil spenna í Safamýrinni þar sem Fram tekur á móti ÍR. Fram vantar tvö stig til að gulltryggja þátttöku sína í úrslitakeppninni og gera væntanlega allt hvað þeir geta til að krækja í þau stig í kvöld. Að sama skapi eru ÍR ingar í sömu stöðu og Akureyri, að berjast fyrir því að forðast 7. sætið í deildinni þannig að þeir munu án efa berjast til síðasta manns í þeim leik.

FH fær botnlið HK í heimsókn og verða að teljast sigurstranglegri aðilinn í þeim leik, þó að ekkert sé útilokað í þeim efnum. Eins og menn muna þá gerðu liðin jafntefli í fyrstu umferð Olís-deildarinnar. FH-ingar vonast eflaust til að Fram misstígi sig gegn ÍR og haldi þannig opnum möguleika FH-inga til að komast í úrslitakeppnina, en þá þurfa þeir líka að vinna HK í kvöld.

Síðasti leikur umferðarinnar er í Eyjum þar sem ÍBV tekur á móti Val. Bæði lið eru örugg í úrslitakeppnina en leikurinn getur hugsanlega haft áhrif á röð liðanna í deildinni. Ef Akureyri vinnur Hauka þá verður ÍBV að vinna þennan leik til að eiga von um að verða deildarmeistarar. Valsmenn eru fyrir leikinn í 3. sæti deildarinnar en ef þeir tapa leiknum og Fram vinnur leikinn gegn ÍR verður hreinn úrslitaleikur um 3. sætið á milli Vals og Fram í lokaumferðinni.

Það er því mikið í húfi á öllum vígstöðvum og ljóst að ekkert verður gefið eftir í leikjum kvöldsins.


Ekki á hverjum degi sem Akureyri kemst í sjónvarpið

8. apríl 2014 - Akureyri handboltafélag skrifar

Sjónvarpsleikur á fimmtudaginn gegn Haukum

Leikur Hauka og Akureyrar á fimmtudaginn verður í beinni útsendingu á RÚV Íþróttir. Útsendingin hefst klukkan 19:15 en leikurinn sjálfur klukkan 19:30.
Smelltu hér til að fylgjast með útsendingunni.

Haukar hafa verið erfiðir heim að sækja í vetur og einungis tapað þar einu stigi en það var jafnteflisleikur gegn Val.

Haukar eru í dauðafæri með að tryggja sér deildarmeistaratitilinn, stig úr leiknum á fimmtudaginn tryggir þeim titilinn og ekki ólíklegt að Haukarnir stefni á að lyfta bikarnum í beinni útsendingu sjónvarpsins.
Að sama skapi hefur Akureyrarliðið einnig góð not fyrir stig úr leiknum, og helst bæði stigin en þau myndu nýtast liðinu vel í baráttunni um að losna við umspil um fall úr deildinni.

En aðeins um Haukaliðið sem tvímælalaust er með langöflugasta leikmannahópinn í vetur. Skyttan Sigurbergur Sveinsson er þeirra markahæstur með 100 mörk, landsliðsmaðurinn Árni Steinn Steinþórsson er næstur með 85 mörk, hinn baneitraði Elías Már Halldórsson með 73 mörk og línumaðurinn stóri og stæðilegi Jón Þorbjörn Jóhannsson með 53, Þórður Rafn Guðmundsson sem aðallega leikur í vinstra horninu kemur næstur með 48 mörk.
Markvarslan hefur yfirleitt verið í góðu lagi en þar fer fremstur Giedrius Morkunas.

Í síðasta leik gegn Val sem endaði með þriggja marka sigri Hauka, 30-33 var Elías Már Halldórsson atkvæðamestur með 9 mörk , Sigurbergur Sveinsson með 6, Einar Pétur Pétursson 6 og Jón Þorbjörn Jóhannsson 5.
Þar á undan sigruðu þeir ÍR með fjórum mörkum, 26-22. Þar var Þórður Rafn Guðmundsson markahæstur með 6 mörk, Sigurbergur Sveinsson merð 5 og Elías Már Halldórsson 4.

Síðast þegar Akureyri og Haukar mættust í Schenkerhöll þeirra Haukamanna var jafnræði með liðunum í upphafi, jafnt á flestum tölum upp í 8-8 en þegar leið á leikinn tóku Haukarnir hann í sínar hendur, fengu ótal hraðaupphlaup sem skiluðu þeim öruggri forystu og loks sex marka sigri 26-20.

En sá leikur er að baki og allt getur gerst, ef menn koma til leiks jafn vel stemmdir og í síðustu ferð í Hafnarfjörðinn gegn FH er aldrei að vita hvað gerist. Allavega hvetjum við alla stuðningsmenn á suðvesturhorninu til að flykkjast á leikinn og komast í sjónvarpið. Þeir sem heima sitja þurfa bara að stilla á íþróttarás RÚV til að fylgjast með á fimmtudaginn.


Bjarni Fritzson skoraði 8 mörk gegn Haukum fyrr í vetur. Myndir: Vísir/Valli


Kristján Orri átti fínan leik þegar liðin mættust síðast


Jovan Kukobat kunni vel við sig í Schenkerhöllinni í vetur


Til baka    Senda á Facebook

Umsjón og hönnun: Stefán Jóhannsson og Ágúst Stefánsson