Skipsbrot gegn Frömurum sem lönduðu 7. sætinu - Akureyri Handboltafélag

Warning: Undefined array key "frettanr" in /web/akhandadmin/public_html/index.php on line 15
Skipsbrot gegn Frömurum sem lönduðu 7. sætinu - Akureyri Handboltafélag


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Fyrri leiktímabil

Tímabilið 2015-16

Leikmenn meistarafl. karla

Textalýsing frá leiknum

Tölfræði leiksins

		Fram - Akureyri 25-17 (11-9)
		Olís deild karla
		Framhús
		Fim. 31. mar. 2016 klukkan: 19:30
		Dómarar: Gísli Jóhannsson og Svavar Ólafur Pétursson

Umfjöllun


Halldór Logi stóð uppúr í liði Akureyrar sem oft hefur leikið betur		1. apríl 2016 - Akureyri handboltafélag skrifar Skipsbrot gegn Frömurum sem lönduðu 7. sætinu Akureyri mætti í Safamýrina í gær þar sem liðið mætti Fram í hreinum úrslitaleik um 7. sætið í deildinni. Fyrirfram var búist við hörkuleik enda ljóst að liðið sem tapaði myndi þurfa að mæta Haukum í úrslitakeppninni sem hefst 14. apríl. Heimamenn byrjuðu leikinn betur og náðu strax góðu taki á leiknum. Þegar kortér var liðið af leiknum var munurinn orðinn fimm mörk, 8-3, en þá kviknaði betur á leik Akureyrar og var munurinn tvö mörk þegar flautað var til hlés, 11-9. Hreiðar varði vel í markinu og vörnin var góð en sóknarleikurinn var ekki nógu beittur. Ef ekki hefði verið fyrir frábæra frammistöðu Halldórs Loga á línunni þá hefði leikurinn í raun verið búinn í hálfleiknum. Menn gerðu sér vonir um að Akureyri myndi halda áfram sömu siglingunni þegar síðari hálfleikur hófst en Framarar lokuðu vörn sinni betur og refsuðu fyrir flest mistök. Munurinn á liðunum fór mest upp í átta mörk sem var svo einmitt munurinn á liðunum þegar leiknum lauk, 25-17. Leikurinn í raun mikil vonbrigði, það voru ágætir kaflar inn á milli í leiknum en verst fannst manni þó að sá karakter og barátta sem einkennir jafnan Akureyrarliðið hvarf þegar mest á reyndi í síðari hálfleik. Mörk Akureyrar: Halldór Logi Árnason 6, Kristján Orri Jóhannsson 3 (1 víti), Sigþór Árni Heimisson 3, Andri Snær Stefánsson 1, Bergvin Þór Gíslason 1, Brynjar Hólm Grétarsson 1, Friðrik Svavarsson 1 og Hörður Másson 1. Í markinu varði Hreiðar Levý Guðmundsson 13 skot og Tomas Olason sem kom inná í lokin varði 4 skot. Mörk Fram: Óðinn Þór Ríkharðsson 8 (1 úr víti), Garðar B. Sigurjónsson 6 (2 úr vítum), Þorgrímur Smári Ólafsson 5, Stefán Darri Þórsson 3, Arnar Snær Magnússon 1, Arnar Freyr Ársælsson 1 og Sigurður Örn Þorsteinsson 1 mark. Í marki Fram varði Kristófer Fannar Guðmundsson 12 skot. Það er því ljóst að Akureyri fær það erfiða verkefni að mæta nýkrýndum Deildarmeisturum Hauka í 8-liða úrslitum úrslitakeppninnar og er fyrsti leikur liðanna á Ásvöllum þann 14. apríl næstkomandi.


Tengdar fréttir
Sverre var ekki sáttur en Guðlaugur öllu hressari eftir leikinn		1. apríl 2016 - Akureyri handboltafélag skrifar Viðtöl eftir leik gærdagsins gegn Fram Við höfum fundið viðtöl við þjálfara Akureyrar og Fram á þremur miðlum, visir.mbl. fimmeinn.is og á RUV.is. Öll eiga þau það sameiginlegt að ræða bara við þjálfara liðanna, Sverre Andreas Jakobsson og Guðlaug Arnarsson þjálfara Fram. Byrjum á Smára Jökli Jónssyni, fréttamanni visir.is. Sverre: Gríðarleg vonbrigði að tapa síðasta leik deildarinnar með átta mörkum Sverre Jakobsson, þjálfari Akureyrar, var vonsvikinn eftir tapið gegn Fram í kvöld og sagði leik sinna manna gríðarlega mikil vonbrigði. „Þetta eru bara vonbrigði, gríðarleg vonbrigði. Við vorum seinir í gang en spilum okkur ágætlega inn í leikinn og mér leist mjög vel á seinni hálfleikinn. En við vorum eftir á í öllum aðgerðum í seinni hálfleik og það vantaði að heimfæra það sem við ætluðum að gera inn á völlinn og þeir nýttu sér það. Flottur sigur fyrir Framara,“ sagði hundsvekktur þjálfari Akureyringa í samtali við Vísi eftir leik. „Það voru allir einbeittir fyrir seinni hálfleik og við sáum ákveðin tækifæri. Við fengum fínan meðbyr með okkur en svo voru þeir bara betri en við. Ég veit ekki með þennan frasa um að þeir hafi viljað þetta meira, en hann á kannski bara við í dag,“ sagði Sverre og bætti við: „Þeir voru betri í öllum aðgerðum og þetta eru gríðarleg vonbrigði að tapa síðasta leik deildarinnar með átta mörkum. Mér finnst það bara lélegt. Ábyrgðin er að sjálfsögðu mín en strákarnir verða líka að taka til sín heilmikið“. Akureyri mun mæta deildarmeisturum Hauka í 8-liða úrslitum en Haukarnir unnu deildina með töluverðum yfirburðum. „Við höfum núna tvær vikur og maður fer aðeins að marinera þetta núna. Það þarf að laga ýmislegt og vinna vel í þennan tíma sem við höfum. Við þurfum að spila mikla betur en við gerðum í dag. Haukarnir unnu deildina og eru með besta liðið. En það er alltaf möguleiki og við erum á leið í orrustu þar sem þarf að vinna tvo leiki og við ætlum heldur betur að selja okkur dýrt,“ sagði Sverre að lokum. Guðlaugur: Það er fínt að mæta Val „Nei, við erum ekki búnir að gleyma neinu. Ég er gríðarlega ánægður með að vinna góðan sigur“, sagði Guðlaugur Arnarsson þjálfari Framara, aðspurður hvort þeir bláklæddu væru nokkuð búnir að gleyma því hvernig fagna ætti sigri. „Akureyri hefur verið að spila vel undanfarið og við vinnum sannfærandi. Við erum yfir allan leikinn og að spila mjög vel, sem er jákvætt“. Guðlaugur sagði liðsheildina hafa tryggt sigur liðsins í kvöld. „Ég er er ánægður með heildina, með holninguna á liðinu. Vörn, markvarsla og sókn sem var skipulögð og öguð. Ég er ánægður með mannskapinn og liðsheildina“ sagði Guðlaugur. Eftir sigurinn í kvöld er ljóst að Fram mætir Val í 8-liða úrslitum deildarinnar. „Það leggst vel í mig að mæta Val. Öll liðin í deildinni eru erfið og þessir leikir í 8-liða úrslitum verða erfiðir fyrir alla. Það er fínt að mæta Val, Reyjavíkurslagur, og þetta hafa verið hörkuleikir í vetur. Það verður gaman að mæta þeim,“ sagði Guðlaugur. Guðlaugur sagðist búast við fleiri áhorfendum á leikina í úrslitakeppnina en það var fremur fámennt á pöllunum í Safamýrinni í kvöld. „Við Safamýrarfólk mætum í úrslitakeppnina. Það var góðmennt í kvöld og gaman að sjá marga í húsinu þó það hefðu mátt vera fleiri. Við munum sjá fleiri í úrslitakeppninni“. Þá færum við okkur yfir á vefinn fimmeinn.is þar sem Jóhann Ingi Hafþórsson ræddi við þjálfarana: Sverre: Karakterslaust og lélegt Sverre Jakobsson, þjálfari Akureyri, var að vonum hundfúll eftir slæmt tap gegn Fram í síðustu umferð deildarkeppninar í Olís deild karla í dag. Framarar voru yfir frá fyrstu mínútu og unnu að lokum 25-17 sigur sem var ekki í mikilli hættu. „Það vantaði karakter og að menn væru tilbúnir í að taka á skarið, það vantaði mjög mikið, því miður.“ Sverre var sérstaklega fúll með seinni hálfleik sinna manna. „Staðan í hálfleik var allt í lagi. Við vorum seinir af stað en svo fannst mér við vera að komast í okkar gír en seinni hálfleikur, það var sama hvað, það var ekkert að ganga.“ „Í seinni hálfleik var þetta karakterslaust og lélegt.“ Viðtalið má sjá í heild sinni hér að neðan. Guðlaugur: Komnir úr skelinni og byrjaðir að blómstra Guðlaugar Arnarson, þjálfari Fram var ansi kátur eftir góðan 25-17 sigur á Akureyri í dag. Þetta var þeirra fyrsti sigur síðan 10.desember og sagði Guðlaugur tilfinninguna vera mjög góða. „Hún er virkilega góð, þetta var virkilega góður sigur, ég er mjög ánægður með mína menn í dag.“ Fram var yfir allan leikinn og var forystan aldrei í alvöru hættu. „Þeir voru aðeins að bíta í hælana okkar í fyrri hálfleik en það var ekkert sem var að ógna okkur.“ Gulli segir þetta vera getuna sem er búin að vera til staðar allan tíman þrátt fyrir slæmt gengi eftir áramót. „Að mínu mati já, núna erum við komnir út úr skelinni og byrjaðir að blómstra.“ Viðtalið má sjá í heild sinni hér að neðan. Að endingu er hér viðtal RÚV við þjálfarana, fyrst Sverre en Guðlaugur kemur í kjölfarið. Viðtalið birtust á ruv.is í gærkvöldi: Sverre: Fannst þetta virkilega lélegt „Þetta eru mikil vonbrigði. Mér fannst þetta virkilega lélegt,“ sagði Sverre Jakobsson, þjálfari Akureyrar eftir tap gegn Fram í Olís-deild karla í kvöld. Úrslitin þýða að Akureyringar hafna í áttunda sæti deildarinnar og mæta Haukum í 8-liða úrslitum um Íslandsmeistaratitilinn í handbolta. „Það vantaði líf, karakter og að menn tækju af skarið. Þetta var líflaust og ekki við,“ bætti Sverre við. Guðlaugur Arnarsson, þjálfari Fram, var öllu kátari í leikslok enda fyrsti sigur Fram á árinu staðreynd. „Ég er gríðarlega stoltur af mínum mönnum. Þetta hefur verið brekka hjá okkur eftir áramót. Margir leikir hafa tapast tæpt og aðrir illa en við höfum haldið áfram.“ Nánar er rætt við Sverre og Guðlaug í myndbandinu hér að neðan.


Tekst Gulla að leggja sitt gamla lið?		31. mars 2016 - Akureyri handboltafélag skrifar Leikur dagsins: Barist við Fram um 7. sætið Akureyri leikur í dag, fimmtudag, lokaleik sinn í Olís-deild karla þegar liðið sækir Framara heim klukkan 19:30. Liðið sem fer með sigur af hólmi tryggir sér 7. sætið í deildinni og mun mæta Val í úrslitakeppninni. Liðið sem tapar hinsvegar endar í 8. sætinu og mun mæta nýkrýndum Deildarmeisturum Hauka. Eins og kom fram á síðunni hjá okkur í gær vann Akureyri fyrri leik liðanna fyrir norðan 31:24 en leiknum í Safamýrinni lauk með jafntefli 26:26 og sjá má myndbrot úr honum hér að neðan. Við verðum að sjálfsögðu með beina textalýsingu frá leiknum fyrir þá sem ekki komast í Safamýrina en við hvetjum að sjálfsögðu alla til að mæta á leikinn og styðja strákana í þessum mikilvæga leik, áfram Akureyri! Guðlaugur Arnarsson þjálfar Fram en hann lék eins og flestum ætti að vera kunnugt með Akureyri og varð Deildarmeistari með liðinu árið 2011. Hér má sjá myndband þar sem hann skorar tvö lagleg mörk einmitt gegn Fram hér um árið.


Trúlega vilja bæði lið forða sér frá 8. sætinu		30. mars 2016 - Akureyri handboltafélag skrifar Útileikur gegn Fram á fimmtudaginn Þá er komið að síðasta deildarleiknum á tímabilinu. Akureyri sækir Framara heim á fimmtudaginn en liðið sem sigrar tekur 7. sætið og myndi þá mæta Val í úrslitakeppninni. Við hvetjum alla sem geta til að mæta í Safamýrina á fimmtudaginn og styðja okkar lið til sigurs, við ætlum okkur 7. sætið! Liðin hafa mæst tvisvar í vetur, Akureyri vann fyrri leikinn hér fyrir norðan 31:24 en leiknum í Safamýrinni lauk með jafntefli 26:26. Leikurinn verður að sjálfsögðu í beinni textalýsingu hér á heimasíðunni. Guðlaugur Arnarson þjálfari Fram messaði yfir sínum mönnum þegar liðin mættust hér fyrir norðan

Til baka Senda á Facebook

Umsjón og hönnun: Stefán Jóhannsson og Ágúst Stefánsson

web statistics