Warning: Undefined array key "frettanr" in /web/akhandadmin/public_html/index.php on line 15
Dramatískur sigur Aftureldingar í gær - Akureyri Handboltafélag
  Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Fyrri leiktímabil

Tímabilið 2015-16

Leikmenn meistarafl. karla
Úrslit leikja
Deild karla




Ljósmyndir frá leiknum     Myndband frá leiknum      Textalýsing frá leiknum     Tölfræði leiksins 
    Akureyri - Afturelding  24-26 (9-14)
Olís deild karla
KA heimilið
Mið. 23. mar. 2016 klukkan: 19:30
Dómarar: Bjarki Bóasson og Gunnar Óli Gústafsson
Umfjöllun

Kristján, Hreiðar og Beggi settu svip á leikinn





24. mars 2016 - Akureyri handboltafélag skrifar

Dramatískur sigur Aftureldingar í gær

Það var spenna í loftinu þegar Akureyri og Afturelding mættust í KA heimilinu í gærkvöldi, Akureyri í harðri baráttu að mjaka sér ofar í deildinni en Afturelding í slag um þriðja sætið í deildinni.
Það voru Mosfellingar sem höndluðu spennuna betur í upphafi og skoruðu fyrstu fimm mörk leiksins. Það var ekki fyrr en eftir níu mínútur sem Akureyri náði að brjóta ísinn þegar Bergvin kom með tvö mörk í röð. Í kjölfarið tókst að minnka muninn niður í tvö mörk 4 – 6 en Aftureldingarmenn gáfu í á ný og héldu fimm marka forskoti út fyrri hálfleikinn.

Gestirnir voru miklu grimmari og ákveðnari í fyrri hálfleiknum og forskot þeirra nokkuð sanngjarnt. Sóknarleikur Akureyrar var hikandi, Kristján Orri var yfirburðarmaður, var kominn með sex mörk í hálfleik og Bergvin Þór Gíslason þrjú, aðrir komust ekki á blað í fyrri hálfleik en staðan var 9-14 í hálfleik.

Það var svo hreinlega algjör viðsnúningur í upphafi seinni hálfleiks. Akureyrarliðið mætti af gríðalegum krafti og skoraði fyrstu sex mörkin og tóku forystuna 15-14. Hreiðar skellti í lás í markinu og baráttan í liðin frábær.
Jafnt var á öllum tölum upp í 19-19 og feiknaleg stemmingin í húsinu.


Sigþór Árni Heimisson setti tvö mörk yfir hávaxna vörn Aftureldingar

En það fór greinilega mikil orka í þennan frábæra kafla hjá Akureyri og Mosfellingar náðu vopnum sínum á ný og sigu fram úr aftur og voru komnir fjórum mörkum yfir, 21 – 25 þegar tæpar fimm mínútur voru til leiksloka.


Andri Snær Stefánsson skoraði þrjú mörk í seinni hálfleiknum

Akureyri gafst þó ekki upp og minnkuðu muninn í eitt mark, 24-25 en komust þó ekki lengra því Árni Bragi Eyjólfsson innsiglaði sigur Aftureldingar með marki úr vítakasti, lokatölur eftir magnaðan leik 24-26.

Mörk Akureyrar: Kristján Orri Jóhannsson 10 (2 úr vítum), Bergvin Þór Gíslason 6, Andri Snær Stefánsson 3, Sigþór Árni Heimisson 3 og Halldór Logi Árnason 2 mörk.
Hreiðar Levý Guðmundsson stóð í markinu lengst af og átti flottan leik, 17 varin skot. Tomas Olason kom í markið í lokin og tók þrjá góða bolta.

Mörk Aftureldingar: Árni Bragi Eyjólfsson 8 (4 úr vítum), Birkir Benediktsson 5, Jóhann Jóhannsson, Mikk Pinnonen og Valdimar Sigurðsson 3 mörk hver, Guðni Kristinsson og Gunnar Kristinn Þórsson 2 mörk hvor.
Davíð Hlíðdal Svansson varði 13 skot, þar af 1 vítakast.

Markakóngarnir Kristján Orri Jóhannsson og Árni Bragi voru valdir bestu menn sinna liða og fengu glæsilegar matarkörfur frá Norðlenska að launum.


Kristján Orri skoraði 10 mörk og var maður Akureyrarliðsins

Þetta var næstsíðasta umferð Olís deildarinnar og þau tíðindi gerðust á sama tíma að Valur marði eins marks sigur á Fram og þar með er ljóst að leikur Akureyrar og Fram í lokaumferðinni verður hreinn úrslitaleikur um 7. sæti deildarinnar.

Tengdar fréttir

Það var líf og fjör á bekk Akureyrar í leiknum

25. mars 2016 - Akureyri handboltafélag skrifar

Skemmtilegt myndband frá Aftureldingarleiknum

Akureyri tók á móti Aftureldingu í hörkuleik í KA-Heimilinu á miðvikudaginn. Við ákváðum að taka leikinn upp frá mismunandi sjónarhornum og setja saman þetta skemmtilega myndband frá leiknum, góða skemmtun gott fólk!



Andri Snær og Róbert Sigurðarson



24. mars 2016 - Akureyri handboltafélag skrifar

Viðtöl eftir leik Akureyrar og Aftureldingar

Eftir spennuþrunginn seinni hálfleik Akureyrar og Aftureldingar ræddu fréttaritarar mbl.is og visir.is við leikmenn liðanna. Einar Sigtryggsson fréttaritar mbl ræddi við Andra Snæ Stefánsson fyrirliða Akureyrar og Árna Braga Eyjólfsson markakóng Aftureldingar.

Andri Snær: Ég fékk boltann ekki nógu oft

Akureyringar eiga enn möguleika á að ná sjöunda sæti deildarinnar en lokaleikurinn gegn Fram sker úr um það. Í kvöld tapaði liðið sínum þriðja heimaleik í röð er Aftureldingarmenn unnu tveggja marka sigur 26:24.

Akureyringar eiga þó bæði flottan fyrirliða og liðsstjóra en skýringar hvors um sig á tapinu voru æði misjafnar.
Liðsstjórinn, Kristján Blær Sigurðsson, kenndi því um að hann hafi klæðst ólukkans peysu og lið Akureyrar hefði nú tapað þremur leikjum með hann í peysunni. „Ég verð bara í eigin fötum í næsta leik“ sagði Kristján Blær.

Fyrirliðinn, Andri Snær Stefánsson, var með aðrar skýringar. Hann kom sterkur til leiks í seinni hálfleik og gaf tóninn fyrir öfluga byrjum þar sem heimamenn breyttu stöðunni úr 9:14 í 15:14. Það var samt ekki nóg. „Ég ætlaði að breyta leiknum en fékk bara ekki boltann nógu oft“ sagði Andri Snær glettinn.

„Við erum búnir að vera vel inni í síðustu leikjum en ekki náð nógu öflugum sóknarleik til að skila sigrum í hús. Nú er bara að fara í síðasta leikinn gegn Fram og vinna, koma svo vel harðir inn í úrslitakeppnina þar sem allt fer á núllpunkt. Það býr alveg heilmikið í liðinu okkar og vantar lítið uppá til að ná betri úrslitum. Við höldum bara áfram að brosa og hafa gaman. Það er lykillinn að einhverju góðu. Við komum af fullum krafti inn í úrslitakeppnina, hvort sem við mætum Val eða Haukum.“

En hefur Andri Snær ekki áhyggjur af sóknarleik liðsins? ,,Hann er ekki nógu stöðugur og það koma stundum slæmir kaflar eins og í uppafi leiksins í kvöld þar sem þeir komust í 5:0. Það er erfitt að vinna slíkt upp og kostar mikla orku en við hefðum getað gert betur í þessum leik, ekki síst vegna þess að þeir misstu jafn sterkan mann og Þránd (Gíslason Roth) útaf með rautt spjald“ sagði Andri Snær að lokum.


Andri Snær með eitt af þrem mörkum sínum í leiknum

Árni Bragi: Héldum stemningunni niðri

Árni Bragi Eyjólfsson, leikmaður Aftureldingar, gat staðið keikur eftir leik Akureyrar og Aftureldingar í kvöld. Árni Bragi átti afskaplega flottan leik, skoraði átta mörk og tryggði sínu liði sigur með marki úr víti á síðustu mínútunni. Afturelding vann 26:24 á erfiðum heimavelli Akureyringa og var piltur ánægður með það.

„Þetta er einn af skemmtilegustu leikjum vetrarins, það er klárt. Hér er erfitt að spila og oft skapast mikil stemning sem fleytir Akureyringum langt. Við náðum að halda henni niðri með því að keyra á þá og ná undirtökunum strax. Þetta var harður leikur og við vorum ansi mikið útaf en það skilaði sér því baráttan í liðinu gerði gæfumuninn í leiknum.“

Afturelding var 14:9 yfir í hálfleik en það forskot fór á fyrstu sjö mínútum seinni hálfleiks. Hvað var í gangi á þeim kafla? „Þeir voru bara grimmari, náðu nokkrum mörkum og fengu þá húsið með sér. Sem betur fer komumst við fljótt aftur yfir og drápum aðeins niður andrúmsloftið.“ Í þeim töluðum orðum brast á söngur inni í búningsklefa Aftureldingar og lagavalið ekki af verri endanum: Would I Lie To You? með Charles & Eddie. Önnur lið ættu kannski að bæta því á lagalistann sinn.

En að næstu skrefum. „Við erum hæstánægðir með stöðuna eftir kvöldið í kvöld. Það er öruggt að við verðum á heimavelli í úrslitakeppninni og það var í raun eina markmiðið okkar fyrir mót. Við sáum það í fyrra að heimavöllurinn skipti miklu máli. Nú viljum við bara fara áfram og helst alla leið í úrslit. Við náðum þangað í fyrra og var það mikið ævintýri. Þó þarf að klára síðasta leikinn gegn ÍBV og hann sker úr um hvort liðið verður í 3. sæti“ sagði Árni Bragi að lokum en í byrjun viðtalsins sagðist hann vera Akureyringur en það ætti nú ekkert að koma fram, svona í ljósi úrslitanna.


Árni Bragi Eyjólfsson var valinn besti leikmaður Aftureldingar



Stefán Guðnason stóð vaktina fyrir visir.is á leiknum og hann ræddi við Róbert Sigurðarson, leikmann Akureyrar og Mosfellingana Þránd Gíslason og Davíð Svansson.

Róbert: Fundum okkur illa

Róbert Sigurðsson sem spilar í hjarta varnar Akureyrar ásamt Ingimundi Ingimundarsyni var daufur þegar blaðamaður Vísis náði af honum eftir leik.
„Við áttum von á þeim í baráttuhug þannig að þeir komu okkur ekki á óvart. Hins vegar vorum við einhvernvegin bara skrefi á eftir allan fyrri hálfleikinn. Við náum að vinna okkur aðeins inn í leikinn en einhvernvegin finnum ekki taktinn.“

Í síðari hálfleik mættu Akureyringar mun grimmari til leiks og ná að jafna og komast yfir en þá var eins og tankurinn væri tómur.
„Við ræddum það í hálfleik að gera sömu hluti og við vorum að gera nema bara að gera þá mun betur og það tókst. Við vorum frábærir hérna í síðari hálfleik en síðan var eins og þreytan færi að segja til sín. Förum að standa flatir á Birki til dæmis sem þakkaði pent fyrir sig og skoraði þrjú mörk í röð. Það er óásættanlegt af okkar hálfu.“

Framhaldið hjá Akureyri er nokkuð óljóst ennþá, sigur í síðasta leik getur með réttum úrslitum fært þá ofar í töflunni.
„Við þurfum bara að sleikja sárin núna og gefa allt í síðasta leikinn og vona að sigur þar fleyti okkur aðeins upp”.


Róbert leggur Halldóri Loga lið í varnarbaráttunni

Þrándur: Vorum gríðarlega fastir fyrir

Þrándur Gíslason Roth var öllu kunnugur hér í dag, spilaði síðustu tvö leiktímabil í búningi Akureyrar og gekk það vasklega fram gegn sínum gömlu félögum að hann fékk að horfa á síðustu 20 mínúturnar úr stúkunni.
„Við komum inn í þennan leik með það hugarfar að vera fastir fyrir og láta Akureyringa hafa fyrir öllu sem þeir gera. Við vissum alveg að þeir myndu taka hart á okkur, enda er ég aumur út um allan skrokkinn eftir þessa baráttu.“

Þrándur fékk eins og áður segir þrisvar sinnum tvær mínútur í leiknum og þurfti því að húka upp í stúku síðustu 20 mínúturnar.
„Það var greinilegt að dómararnir ætluðu ekki að missa leikinn út í einhverja vitleysu og settu hálfgerða körfuboltalínu á dómgæsluna, mér fannst ég fara út af fyrir hluti sem Diddi var t.d. ekki að fara út af fyrir. Hins vegar er hann kannski búinn að vinna sér inn þá virðingu með sínum ferli, ég þarf bara að fara að koma mér upp fleiri verðlaunapeningum. Nenni ekki að hanga upp í stúku mikið meira. Sérstaklega í dag, þá var eins og það hefði kviknað í öllu fólkinu eftir að ég fór út af. Miklu meiri stemming í húsinu og virkilega gaman, hefði viljað fá að vera inn á vellinum þá.“

Með sigrinum hér fyrir norðan tryggðu Aftureldingar strákarnir sig í 4. sætinu en með sigri gegn ÍBV í næstu umferð geta þeir klórað sig upp í 3. sætið.
„Það kemur ekkert annað til greina en að mæta brjálaðir í þann leik og klára hann og koma á góðu skriði inn í úrslitakeppnina.“


Andri Snær vísar Þrándi Gíslasyni af velli. Þriðja brottvísun Þrándar í leiknum

Davíð: Fann mig ekki framan af

Davíð Hlíðdal Svansson átti magnaða innkomu í mark gestanna á ögurstundu og varði hvert skotið á fætur öðru og átti stóran þátt í því að snúa leiknum Mosfellingum í hag.
„Ég átti erfitt framan af. Fannst ég hægur og ekki í takt við leikinn. Fékk síðan aðeins að pústa og horfa á leikinn frá hliðarlínunni. Þegar ég kem síðan inn á fæ ég auðveldan bolta á mig og þá fauk sjálfstraustið upp og svo fór sem fór. Þetta var bara geðveikt.“

Davíð lætur sér ekki nægja að spila með meistaraflokki karla heldur þjálfar hann einnig kvennaliðið Aftureldingar.
„Það hefur gengið nokkuð vel að samræma þetta tvennt, HSÍ var mér einkar gott í byrjun vetrar. Hins vegar hefur RÚV farið illa með mig þegar leikir hafa verið færðir en það hefur sloppið til hingað til.“ Sagði Davíð og hló.


Davíð Svansson með augun á þessum bolta



Vinningshafar voru dregnir út í gær



24. mars 2016 - Akureyri handboltafélag skrifar

Vinningshafar í Orkulyklahappdrættinu

Í hálfleik í gær var dregið í Orkulyklahappdrættinu en allir sem hafa virkjað Orkulykil Akureyrar voru sjálfkrafa þátttakendur í happdrættinu. Heppnir vinningshafar eru sem hér segir:
  • 10.000 króna eldsneytisinneign hjá Orkunni:
    Inga Hrönn Einarsdóttir
  • Keppnistreyja Akureyrar Handboltafélags:
    Birgir Arnór (Sigurdís Björg Jónasdóttir)
  • Gisting á Storm Hótel Reykjavík með morgunverði fyrir tvo
    Bjarni Bjarnason
  • 5.000 krónu inneign hjá Greifanum
    Gunnar Ernir Birgisson
  • Hádegisverður fyrir tvo á veitingastaðnum Múlaberg
    Friðrik Svavarsson


Við óskum þeim til hamingju með vinningana, Orkan er þegar búin að leggja inneignina inn á lykilinn hjá Ingu Hrönn.

Við bendum þeim sem ekki voru á leiknum í gær að hafa samband við Hlyn Jóhannsson í síma 858 0444 til að nálgast vinninga sína.


Fulltrúi Bjarna Bjarnasonar tók við vinningi hans


Gunnar Ernir Birgisson tekur við sínum vinningi



Það verður hörkuleikur gegn Aftureldingu á miðvikudaginn

22. mars 2016 - Akureyri handboltafélag skrifar

Heimaleikur gegn Aftureldingu á miðvikudaginn

Það er að koma að lokum Olís deildarkeppninnar hjá karlaliðunum en næstsíðasta umferðin verður spiluð á miðvikudagskvöldið. Þrátt fyrir að ljóst sé að Haukar séu deildarmeistarar og að Víkingar og ÍR falli þá er heilmikil barátta um sæti 3 til 8 í deildinni og þar með hvaða lið mætast í átta liða úrslitunum.

Akureyri tekur á móti Aftureldingu á miðvikudaginn en það er skilyrði að allir leikir umferðarinnar fari fram á sama tíma og því verður flautað til leiks klukkan 19:30.

Liðin mættust einnig hér á Akureyri í mögnuðum leik þann 12. nóvember þar sem Akureyri vann góðan fimm marka sigur, 25-20.

Afturelding sótti nýjan leikmann í landsleikjahléinu í janúar þar sem þeir fengu Mikk Pinnonen frá Eistlandi og hefur hann farið á kostum með liðinu jafnt sem skytta og leikstjórnandi. Mikk hefur skorað 43 mörk í sjö leikjum eða rúmlega sex mörk að meðaltali í leik. Tveir leikmenn fóru hins vegar frá Aftureldingu, línumaðurinn Ágúst Birgisson fór til FH og leikstjórnandinn Bjarki Lárusson fór til Fjölnis.

Síðustu leikir Aftureldingar hafa verið miklir baráttuleikir, þeir töpuðu í síðustu umferð fyrir FH 23:25, þar á undan sóttu þeir eins marks sigur á ÍR í Austurbergi, 24:25 þar sem okkar fyrrum samherjar Þrándur Gíslason og Gunnar Þórsson áttu stórleik.


Þrándur og Gunnar hugsi í fyrri leik liðanna hér í vetur

Orkulyklahappdrættið – veglegir vinningar

Allir sem hafa virkjað Akureyrarlykil Orkunnar eru þátttakendur í glæsilegu happdrætti en í hálfleik á miðvikudaginn verður einmitt dregið og tilkynnt um vinningshafa í happdrættinu.
Vinningar í happdrættinu eru:
  • 10.000 króna eldsneytisinneign hjá Orkunni
  • Keppnistreyja Akureyrar Handboltafélags
  • Gisting á Storm Hótel Reykjavík með morgunverði fyrir tvo
  • 5.000 krónu inneign hjá Greifanum
  • Hádegisverður fyrir tvo á veitingastaðnum Múlaberg

Það er því engin spurning fyrir þá sem ekki hafa enn náð sér í Orkulykil Akureyrar að ná sér í einn slíkan og virkja hann nú þegar!


Til baka    Senda á Facebook

Umsjón og hönnun: Stefán Jóhannsson og Ágúst Stefánsson