Warning: Undefined array key "frettanr" in /web/akhandadmin/public_html/index.php on line 15
Umfjöllun um „Hafnarfjarðarránið“ - Akureyri Handboltafélag
  Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Fyrri leiktímabil

Tímabilið 2007-08

Leikmenn meistarafl. karla
Úrslit leikja
Deild karla
Deild kvenna
Leikmenn meistarafl. kvenna
Textalýsing frá leiknum     Tölfræði leiksins 
    Haukar - Akureyri  25-25 (13-12)
N1 deild karla
Ásvellir
24. nóvember 2007 klukkan: 17:00
Dómarar: Magnús Björnsson og Ómar Ingi Sverrisson
Umfjöllun

Ásbjörn kom mjög sterkur inn gegn Haukum



25. nóvember 2007 - Akureyri handboltafélag skrifar

Umfjöllun um „Hafnarfjarðarránið“

Það var sannkölluð dramatík undir lok leiks Hauka og Akureyrar á Ásvöllum í gær og ekki á hverjum degi sem menn fara þaðan hundóánægðir með jafntefli eins og raun bar vitni. Akureyri lék, eins og í síðasta leik, án þeirra línu- og varnarjaxlanna Þorvaldar og Harðar Fannars sem voru forfallaðir. Í þeirra stað léku Björn Óli og Eiríkur Jónasson á línunni.

Leikurinn var jafn í upphafi en í stöðunni 5-5 náðu Haukar þriggja marka forystu 8-5 en náðu þó ekki að hrista okkar menn af sér sem voru ekkert á því að gefast upp og hleyptu Haukunum ekkert frá sér og með hraðaupphlaupsmarki á síðustu sekúndum hálfleiksins minnkuðu þeir muninn í 13-12 sem var hálfleiksstaðan.

Um miðbik hálfleiksins varð Akureyri fyrir því áfalli að missa stórskyttuna Magnús Stefánsson í meiðsli. Í vörninni fór Magnús út í Arnar Jón Agnarsson og stöðvaði hann, Arnar virtist klemma Magnús sem skall harkalega á bakið og Arnar Jón hlunkaðist síðan ofan á hann og strax ljóst að Magnús hafði meiðst illa enda Arnar Jón engin léttavara. Við þetta hljóp Herði Flóka kapp í kinn, hljóp út úr teignum og vandaði Arnari Jóni ekki kveðjurnar. Flóka var umsvifalaust vísað af leikvelli í tvær mínútur. Magnús var hins vegar borinn í sjúkrabörum af leikvelli og áfram á sjúkrahús og kom ekki meira við sögu í leiknum.

Það er ekki hægt annað en að hrósa strákunum fyrir baráttuna, þó svo að Haukar hefðu frumkvæðið seinni hluta hálfleiksins þá var ljóst að allt gæti gerst í síðari hálfleiknum. Jónatan jafnaði leikinn úr vítakasti strax á upphafsmínútunni og síðan tók við barningur þar sem jafnt var á flestum tölum upp í stöðuna 17-17. Þá náðu Haukar þriggja marka forystu 20-17 og fór heldur að fara um stuðningsmenn Akureyrar sem voru þó nokkrir á staðnum, þar bar mest á strákum úr 6. og 4. flokki KA sem voru að spila fyrir sunnan um helgina og létu vel í sér heyra.

Hér skelltu Akureyringar heldur betur í lás, vörnin var eins og klettur og Flóki lokaði markinu, í kjölfarið skoruðu okkar menn næstu fimm mörk og breyttu stöðunni í 20-22. Nikolaj Jankovic skoraði m.a. tvö mörk úr hraðaupphlaupum á þessum kafla. Það sem eftir lifði leiks hélt Akureyri frumkvæðinu þó svo að Haukar næðu þrívegis að jafna, síðast í stöðuna 25-25 þegar 18 sekúndur voru eftir.

Þessar lokasekúndur urðu heldur betur dramatískar, rétt áður en flautað var til leiksloka fintaði Jónatan sig í gegnum vörn Hauka og skoraði að því er virtist fullkomlega löglegt mark sem hefði að sjálfsögu tryggt Akureyri sigurinn. Dómarar leiksins dæmdu hins vegar markið ógilt þar sem brotið hefði verið á Jónatan. Ef svo hefði verið þá hefði það brot ekki getað þýtt annað en vítakast en þess í stað var dæmt aukakast og leiktíminn útrunninn. Rúnar Sigtryggsson tók aukakastið sem hafnaði í varnarvegg Haukanna sem sluppu þar með skrekkinn.

Leikmenn Akureyrar voru að sjálfsögðu hundsvekktir með þessi endalok og létu dómara leiksins heldur betur heyra það. Nokkrir leikmenn Akureyrar hreinlega hraunuðu yfir dómara leiksins en dómararnir gerðu ekki neitt. Ef þeir hefðu verið alveg vissir í að þeir hefðu dæmt rétt hefðu þeir hæglega getað lyft rauðum spjöldum en það var alveg eins og þeir vissu að þeir hefðu dæmt rangt og leyfðu því leikmönnunum að hrauna yfir sig.

"Þetta er voðalega einfalt. Ég fer þarna í gegn og skora. Hann hefði getað dæmt víti eða mark en dæmir aukakast í staðinn, sem er út úr kortinu," sagði Jónatan eftir leikinn við blaðamann Fréttablaðsins og Rúnar hafði þetta að segja við Fréttablaðið: "Þetta er svona þegar topplið mætir botnliði, meira má ég ekki segja." Rúnar að sjálfsögðu ósáttur en er hér væntnlega að vitna í áminningu sem hann fékk fyrr í haust frá aganefnd HSÍ fyrir ummæli sín varðandi dómgæsluna í fyrri leik liðanna.

Hvað um það þá er greinilegt að liðið er á fínu róli um þessar mundir, þessi leikur og reyndar líka síðasti leikur gegn HK sýna að liðið er til alls líklegt og rétt að enda pistilinn á kveðju sem barst til síðunnar eftir leikinn.

”Ég vissi að þetta mundi koma nú liggur þetta bara upp á við, tökum Val á fimmtudaginn ekki spurning áfram strákar”

Tengdar fréttir

Magnús enn fyrir sunnan en er þó á batavegi

25. nóvember 2007 - Akureyri handboltafélag skrifar

Magnús trúlega sloppið við bakmeiðsl

Eins og við greindum frá í gær var Magnús Stefánsson fluttur á sjúkrahús þegar u.þ.b. 13 mínútur voru liðnar af leiknum við Hauka. Magnús fékk mikið högg á bakið og lá óvígur eftir. Magnús hefur verið í rannsókn á Landspítalanum en þær fréttir voru að berast af Magnúsi að svo virðist sem bakið hafi sloppið og sé í lagi en hann sé þó enn til skoðunar á spítalanum.

Við sendum Magnúsi bestu kveðjur og vonumst til að hann losni sem fyrst út og að hann nái sér sem fyrst.


Mark Jonna sem hefði tryggt Akureyri sigurinn var ekki dæmt gilt

24. nóvember 2007 - Akureyri handboltafélag skrifar

Akureyri rænt sigri gegn Haukum

Haukar náðu jafntefli gegn frísku liði Akureyrar nú rétt í þessu en leiknum sem fór fram á heimavelli Hauka á Ásvöllum lauk 25-25. Jónatan Magnússon skoraði, að því er virtist fullkomlega löglegt mark á lokasekúndu leiksins en dómararnir dæmdu það ekki gilt en aukakast í staðinn.

Haukar leiddu lengst af en Akureyri náði forystunni þegar rúmar sjö mínútur voru eftir af leiknum en Haukar jöfnuðu tvívegis í lokin.

Nánar verður fjallað um leikinn síðar, en áhugasamir geta kíkt á beina lýsingu leiksins hér á síðunni.


Haukar eru viðfangsefni liðsins í dag



24. nóvember 2007 - Akureyri handboltafélag skrifar

Leikur dagsins er gegn Haukum kl. 17:00

Það verður ekki ráðist á garðinn þar sem hann er lægstur í dag þegar Akureyri heimsækir sterkt lið Hauka á Ásvöllum klukkan 17:00. Haukar sitja sem stendur í toppsæti N1-deildarinnar og hafa oftar en ekki reynst erfiðir heim að sækja.

Vitað er að Hörður Fannar hefur ekki jafnað sig af veikindum sínum og verður því ekki með í dag en hins vegar hefur Þorvaldur Þorvaldsson, sem missti af síðasta leik vegna nefbrots æft með liðinu í vikunni og því hugsanlegt að hann taki þátt í leiknum.

Við vonumst til að geta boðið upp á beina textalýsingu frá leiknum í dag og njótum þar liðsinnis stráka úr 4. flokki KA sem eru einmitt að spila á Ásvöllum í dag. Við hvetjum alla stuðningsmenn liðsins sem eru staddir á höfuðborgarsvæðinu til að drífa sig á leikinn og styðja okkar menn. Aðrir geta þá fylgst með beinu lýsingunni hér á síðunni.

Það er virkilega auðvelt að fylgjast með leiknum í gegnum Beinu Lýsinguna.

Smellið hér til að opna Beina Lýsingu

Beina Lýsingin opnast í nýjum glugga sem uppfærist af sjálfu sér á 15 sekúndna fresti. Það er því ekkert mál að fylgjast með. Leikurinn hefst eins og fyrr kom fram klukkan 17:00 og við hvetjum alla til að fylgjast vel með.

Til baka    Senda á Facebook

Umsjón og hönnun: Stefán Jóhannsson og Ágúst Stefánsson