Warning: Undefined array key "frettanr" in /web/akhandadmin/public_html/index.php on line 15
Tap gegn Haukum í hörkuleik - Akureyri Handboltafélag
  Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Fyrri leiktímabil

Tímabilið 2008-09

Leikmenn meistarafl. karla
Úrslit leikja
Deild karla
Textalýsing frá leiknum     Tölfræði leiksins 
    Akureyri - Haukar  23-28 (11-13)
N1 deild karla
Íþróttahöllin
13. mars 2009 klukkan: 18:00
Dómarar: Hafsteinn Ingimarsson og Gísli Jóhannsson
Umfjöllun

Hreinn og Brynjar áttu góðan leik gegn Haukum



14. mars 2009 - Akureyri handboltafélag skrifar

Tap gegn Haukum í hörkuleik

Topplið Hauka kom í heimsókn til Akureyrar í gær en þeir eru á góðri leið með að tryggja sér deildarmeistaratitilinn á meðan Akureyri þurfti að knýja fram sigur til að eiga möguleika á sæti í úrslitakeppninni. Leikurinn fór fjörlega af stað, Akureyri skoraði fyrstu tvö mörkin en Haukar náðu að jafna í 2-2. Næstu fimm mínútur voru hreint út sagt ævintýralegar og klárlega einhver besti leikkafli sem Akureyri hefur sýnt í vetur en þá skoraði liðið fimm mörk í röð og staðan orðin 7-2. Eins og tölurnar bera með sér var varnarleikurinn til fyrirmyndar og boltinn vannst af Haukum trekk í trekk og mörkin komu í öllum regnbogans litum.

Aron þjálfari Hauka tók leikhlé, greinilega ekki sáttur með framgöngu sinna manna. Svo virtist sem dómarar leiksins þeir Hafsteinn Ingimarsson og Gísli Jóhannsson hafi ekki heldur verið sáttir með stöðu Hauka því skömmu seinna fengu Haukar víti og jafnframt vísuðu þeir Jónatan af leikvelli og nokkrum sekúndum síðar vísuðu þeir Andra Snæ útaf sömuleiðis og Akureyringar því tveim leikmönnum færri um stund.

Haukarnir nýttu liðsmuninn og náðu að minnka muninn í tvö mörk 7-5 en Brynjar Þór Hreinsson jók muninn aftur í þrjú mörk með frábæru marki úr vinstra horninu. Á næstu mínútum fékk Akureyri kjörið tækifæri til að stinga Haukana af á ný þegar liðið fékk tvö vítaköst með stuttu millibili en Jónatan lét Birki Ívar verja það fyrra og vippaði síðan yfir hann í seinna vítinu en því miður hafnaði boltinn í þverslánni.

Haukar náðu í kjölfarið að jafna í 9-9 og náðu síðan frumkvæðinu í leiknum og fóru með tveggja marka forystu 11-13 til leikhlés.

Liðið lék frábærlega fyrstu sextán mínúturnar en missti dampinn seinni hluta hálfleiksins. Liðið fékk þrjú vítaköst í hálfleiknum og klúðruðust þau öll, Jónatan fyrstu tveim og Birkir Ívar varði þriðja vítið frá Árna Sigtryggssyni en slíkt geta menn ekki leyft sér gegn jafnsterku liðið og Haukarnir eru.

Mörk Akureyrar í fyrri hálfleik: Andri Snær og Árni 3 hvor, Brynjar og Hreinn 2 mörk hvor, Goran 1 mark. Markvarslan var ekki mikil, Hafþór stóð vaktina fyrstu tuttugu mínúturnar en Hörður Flóki tók þá við.

Strax á upphafsmínútum seinni hálfleiks sást greinilega að dómararnir báru ótakmarkaða virðingu fyrir Haukaliðinu sem fékk á tíðum aukaköst án nokkurrar ástæðu meðan ítrekað var ekkert dæmt á augljós brot hinu megin á vellinum. Steininn tók úr eftir tæplega fimm mínútna leik þegar Hörður Fannar var rekinn útaf er hann vann boltann í vörninni og þegar Hörður Flóki gerði réttilega athugasemd var honum umsvifalaust vísað af leikvelli og Haukar því aftur tveimur fleiri á vellinum.

Í kjölfarið náðu Haukarnir fjögurra marka forystu sem hélst næstu mínútur. Þegar seinni hálfleikur var rúmlega hálfnaður varð darraðardans á vítalínunni. Goran tók vítakast sem hafnaði í stöng en náði sjálfur frákastinu en skaut þá í þverslána. Skömmu síðar fór á svipaða lund nema að í það skiptið skoraði Goran eftir að hafa náð frákastinu.

Mestur varð munurinn fimm mörk 18-23 þegar tólf mínútur voru til leiksloka en þá sneru leikmenn Akureyrar heldur betur við blaðinu. Hörður Flóki skellti í lás og varði allt sem kom á markið, Haukar náðu einungis að skora úr vítakasti og á þessum kafla skoruðu heimamenn fimm mörk gegn einu og munurinn einungis eitt mark 23-24, rúmlega þrjár mínútur til leiksloka og allt að verða vitlaust í húsinu.

Í þessari stöðu fengu Haukarnir eitt útsöluvítakastið í viðbót og má segja að það hafi gert út af við vonir Akureyringa en Haukarnir voru öryggið uppmálað á lokakaflanum og skoruðu síðustu fjögur mörk leiksins sem lauk 23-38.

Með þessum ósigri slökknaði endanlega vonin um sæti í úrslitakeppninni og nú þarf bara að sækja að minnsta kosti tvö stig úr síðustu tveim leikjum til að halda Stjörnunni örugglega fyrir neðan sig í lokin.

Hér hefur nokkuð verið gert úr hlut slakra dómara leiksins en þeim verður ekki einum kennt um hvernig fór. Það var dýrt að misnota fjögur vítaköst í leiknum og líkast því að liðsmenn hefðu ekki trú á að þeir gætu unnið leikinn. Þá var markvarslan í heildina ekki nægilega góð, þrátt fyrir að Hörður Flóki hafi átt snilldarkafla undir lok leiksins.

Mörk Akureyrar: Árni 5 mörk, Andri Snær, Goran og Hreinn 4 mörk hver, Brynjar 3 mörk, Jónatan 2 mörk og Hörður Fannar 1 mark.

Rúnar Sigtryggsson þjálfari var í banni og gat því hvorki leikið né stjórnað liðinu að þessu sinni. Hreinn Hauksson átti stórleik í dag, feykilega öflugur í vörninni og skoraði fjögur mörk af harðfylgi. Einnig kom Brynjar Þór Hreinsson sterkur til leiks jafnt í vörn og sókn.

Leikurinn var í beinni lýsingu hér á síðunni og þar er hægt að sjá nákvæmlega gang leiksins.

Nú verður liðið að nýta tímann fram að næstu leikjum til að greina hvað þarf til að enda tímabilið með stæl, næsti leikur er útileikur gegn Val 29. mars og lokaleikurinn er heimaleikur gegn Fram sunnudaginn 5. apríl.

Tengdar fréttir

Lýsing í dag

13. mars 2009 - Akureyri handboltafélag skrifar

Leikur dagsins: Akureyri - Haukar í beinni textalýsingu

Leikurinn í dag verður að sjálfsögðu í beinni textalýsingu hér á heimasíðunni eins og vant er fyrir þá stuðningsmenn sem ekki komast á leikinn. Það er virkilega auðvelt að fylgjast með leiknum í gegnum Beinu Lýsinguna.

Smellið hér til að opna Beina Lýsingu

Beina Lýsingin opnast í nýjum glugga sem uppfærist sjálfvirkt á 15 sekúndna fresti. Það er því ekkert mál að fylgjast með. Leikurinn hefst eins og fyrr kom fram klukkan 19:00 og við hvetjum alla til að fylgjast vel með.


Barnakarlarnir í Akureyrarliðinu munu berjast eins og ljón gegn Haukunum





13. mars 2009 - Akureyri handboltafélag skrifar

Leikur dagsins klukkan 18:00: Akureyri - Haukar barátta á öllum vígstöðvum

Það verður boðið upp á það besta í íslenskum handbolta á fjölum Íþróttahallarinnar í dag þegar Akureyri tekur á móti toppliði Hauka í næstsíðasta heimaleik okkar í N1 deildinni að þessu sinni. Áður en lengra er haldið er rétt að ítreka það enn einu sinni að leikurinn hefst klukkan 18:00 en sú meinlega villa er í auglýsingu í Vikudegi sem kom út í gær að leikurinn sé klukkan 19:00.

Leikmenn Akureyrar hafa sigrað öll lið N1 deildarinnar á þessu leiktímabili nema Hauka og því er það ekkert launungarmál að það er takmark leikmanna að bæta úr því í dag. Haukarnir hafa farið á kostum upp á síðkastið og ekki tapað deildarleik síðan í byrjun nóvember þannig að það ljóst er að þeir eru með gríðarlega sterkt lið.

Eftir því sem okkar heimildir herma þá hafa aðeins tvö lið í heiminum unnið Hauka á þessu ári en það eru stórliðin Nordhorn og Akureyri Handboltafélag. Nordhorn vann Haukana í Evrópukeppni félagsliða og Akureyri vann þá í æfingaleik um miðjan janúar þannig að þeir eru augljóslega ekki ósigrandi.

Það þarf vart að kynna leikmenn Hauka fyrir handboltaáhugamönnum en í vetur hefur skyttan unga Sigurbergur Sveinsson verið illviðráðanlegur og er langmarkhæstur þeirra með 119 mörk í deildinni þrátt fyrir að hafa tekið út eins leiks bann.

Línumaðurinn eitilharði Kári Kristján Kristjánsson er með 66 mörk og fast á hæla hans Andri Stefan Guðrúnarson með 62 mörk. Þar á eftir koma hornamennirnir Elías Már Halldórsson og Einar Örn Jónsson með 55 og 52 mörk og hinn eitraði Freyr Brynjarsson með 48 mörk.


Andri Snær stöðvar Frey Brynjarsson leikmann Hauka í leiknum í nóvember

Raunar er hægt að telja þannig áfram, Gísli Jón, Gunnar Berg, Arnar Pétursson og Arnar Jón eru allt jaxlar sem aldrei má líta af og því ljóst að Haukaliðið er ekki árennilegt.

Markverðir Haukanna eru ekki af lakari sortinni, þeir Birkir Ívar Guðmundsson sem hefur farið á kostum í síðustu leikjum og Gísli Guðmundsson sem gerir ekki síður tilkall til byrjunarsætis í liðinu.

Akureyri stillir að sjálfsögðu upp sínu sterkasta liði gegn Haukunum en þess ber þó að geta að Rúnar Sigtryggsson verður fjarri góðu gamni þar sem hann tekur út leikbann vegna rauða spjaldsins sem hann fékk í síðasta leik. Hörður Fannar kemur inn aftur eftir örstutt fæðingarorlof.

Þegar liðin mættust í höllinni í nóvember mættu vel yfir 1.000 áhorfendur og væri ekki amalegt að fá annan eins fjölda í dag til að hjálpa strákunum yfir hjallann en stuðningur áhorfenda skiptir gríðarlegu máli eins og sást berlega á lokamínútum síðasta heimaleiks þegar liðið vann upp þriggja marka forskot HK og gott betur þannig að í lokin mátti HK þakka fyrir að ná jafntefli.

Leikurinn skiptir bæði lið miklu máli, Haukar eru í baráttu við Val um deildarmeistaratitilinn og Akureyri þarf sigur til að eiga möguleika á sæti í úrslitakeppninni og þarf líka tvö stig til að hrista Stjörnuna endanlega af sér í neðri hlutanum.

Þess vegna þurfa allir að leggjast á árarnar og drífa fólk með sér á leikinn og enn einu sinni að minna á óvenjulegan leiktíma klukkan 18:00 því við vitum að margir reikna með því að leikurinn sé á hefðbundnum tíma, það er óþarfi að láta þá grípa í tómt, látum fréttina berast um bæinn – Áfram Akureyri!



Einn stærsti leikur tímabilsins þegar Haukar koma í heimsókn

11. mars 2009 - Akureyri handboltafélag skrifar

Akureyri mætir Haukum í Íþróttahöllinni á föstudaginn

Næsti leikur Akureyrar er á föstudaginn þegar topplið deildarinnar Haukar koma í heimsókn. Haukarnir hafa reynst okkur erfiðir í vetur og eru eina liðið sem Akureyri hefur ekki sigrað það sem af er tímabilinu. Eftir súrt tap gegn Stjörnunni á mánudaginn eru strákarnir staðráðnir í að leggja allt í sölurnar og sýna að þeir standi jafnfætis öllum liðum á landinu.

Að þessu sinni er leikið á óvenjulegum tíma, klukkan 18:00 á föstudag og er brýnt að koma þeim skilaboðum til allra stuðningsmanna því margir halda örugglega að um hefðbundinn leiktíma sé að ræða.

Við eigum eftir að fjalla betur um leikinn hér á síðunni þegar nær dregur en þetta er næstsíðasti heimaleikur Akureyrar í deildinni að þessu sinni og nú þurfa allir að fjölmenna og styðja við bakið á strákunum og knýja fram sigur!

Til baka    Senda á Facebook

Umsjón og hönnun: Stefán Jóhannsson og Ágúst Stefánsson