Warning: Undefined array key "frettanr" in /web/akhandadmin/public_html/index.php on line 15
Hörður Flóki tryggði Akureyri sigur á Stjörnunni - Akureyri Handboltafélag
  Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Fyrri leiktímabil

Tímabilið 2009-10

Leikmenn meistarafl. karla
Úrslit leikja
Deild karla




Ljósmyndir frá leiknum     Textalýsing frá leiknum     Tölfræði leiksins 
    Akureyri - Stjarnan  25-24 (13-12)
N1 deild karla
Íþróttahöllin
Fim 12. nóv. 2009 klukkan: 19:00
Dómarar: Anton Gylfi Pálsson og Hlynur Leifsson
Umfjöllun

Flóki fór á kostum í dag



12. nóvember 2009 - Akureyri handboltafélag skrifar

Hörður Flóki tryggði Akureyri sigur á Stjörnunni

Leikurinn byrjaði rólega hjá Akureyri og var jafnræði með liðunum í byrjun leiks. En í stöðunni 5-5 tóku strákarnir góðan kipp, settu fimm mörk í röð og breyttu stöðunni í 10-5. Patrekur Jóhannesson þjálfari Stjörnunnar tók þá leikhlé og virtist það fara vel í hans menn því þeir spiluðu vel síðustu 10 mínútur fyrri hálfleiksins og náðu að minnka forystu Akureyrar niður í eitt mark 13-12 í leikhlé. Leikur Akureyrar á þessum sama kafla einkenndist af örlitlu kæruleysi, því í stað þess að setja í gír og keyra almennilega yfir gestina var eins og menn slökuðu örlítið á og það gengur að sjálfsögðu aldrei upp.

Hörður Flóki var í banastuði í fyrri hálfleik og varði 12 skot, þar af þrjú hraðaupphlaup og eitt víti. Af útileikmönnum voru þeir Jónatan og Oddur öflugir í sókninni og skoruðu þrjú mörk hvor. Varnarleikur liðsins var lengst af ágætur en sóknarleikurinn var akkilesarhæll liðsins í fyrri hálfeik.


Hörður Flóki fór hamförum í markinu

Seinni hálfleikur byrjaði ekki vel hjá Akureyri og Stjarnan komst yfir í fyrsta skipti í langan tíma í stöðunni 15-14. Þá loksins tóku heimamenn við sér og tóku yfirhöndina á ný. Lengst af var Akureyri á bilinu 1-3 mörkum yfir en náði aldrei að hrista baráttuglaða Stjörnumenn frá sér. Flestir héldu þó eflaust að sigurinn væri kominn í höfn þegar Akureyri hafði 25-21 þegar ekki nema 4 mínútur voru til leiksloka og okkar menn einum fleiri. Í hönd fór hins vegar ótrúlegur kafli þar sem hreinlega ekkert gekk upp í sókninni og skyndilega var staðan orðin sú að Stjarnan gat jafnað leikinn með síðustu sókn leiksins. Hörður Flóki kórónaði hins vegar stórkostlegan leik sinn í markinu með því að verja tvö góð skot gestanna á síðustu 10 sekúndum leiksins og tryggði Akureyri gríðarlega dýrmæt 2 stig en lokatölur urðu 25-24.


Oddur Gretarsson skorar úr vinstra horninu

Varnarleikur Akureyrar var góður lengst af og var áðurnefndur Hörður Flóki hreint út sagt frábær og að öðrum ólöstuðum langbesti maður liðsins í leiknum. Sóknarleikurinn var ágætur en fækka verður þeim köflum þar sem liðið dettur niður á óskiljanlega lágt plan eins og til að mynda síðustu fimm mínútur leiksins. Hvað einstaka menn varðar sóknarlega, þá voru Oddur og Jonni drjúgir ásamt því að Hörður Fannar fiskaði fjölmörg víti og var líflegur á línunni.

Mörk Akureyrar: Jónatan 7/3, Heimir 4, Árni 3, Hörður F. 2, Guðmundur 1, Geir 2, Oddur 6.

Hörður Flóki var með 25 skot varin. Þar af þrjú víti og þrjú hraðaupphlaup. Stórbrotinn leikur hjá honum.

Jón Stefán Jónsson.

Tengdar fréttir

Jónatan var markhæstur í leiknum

14. nóvember 2009 - Akureyri handboltafélag skrifar

Myndir frá sigurleiknum gegn Stjörnunni

Okkur hefur borist fjöldi ljósmynda frá leik Akureyrar og Stjörnunnar frá því á fimmtudaginn. Áður er búið að birta myndasyrpu úr áhorfendastúkunni og tónlistarmönnunum en nú er komið að myndum Þóris Tryggvasonar af leikvellinum sjálfum.

Smelltu hér til að sjá allar myndirnar.


Framtíðin blasir við strákunum

14. nóvember 2009 - Akureyri handboltafélag skrifar

Gummi og Stebbi spiluðu í höllinni fyrir síðasta leik

Að þessu sinni voru það tveir ungir og frábærir tónlistarmenn sem sáu um tónlistaratriðið fyrir leik Akureyrar og Stjörnunnar. Þeir félagar komu sér fyrir á kaffistofunni í Höllinni með kassagítarana sína og léku og sungu fyrir viðstadda.

Við þökkum þeim kærlega fyrir framlagið.

Þórir Tryggvason myndaði strákana í bak og fyrir og má hér sjá afraksturinn.

Sjá allar myndirnar af Gumma og Stebba.



Áhorfendur bregðast ekki frekar en fyrri daginn

14. nóvember 2009 - Akureyri handboltafélag skrifar

Alltaf fjör í stúkunni á leikjum Akureyrar - myndir

Það var dúndrandi stemming að vanda hjá áhorfendum á leik Akureyrar og Stjörnunnar á fimmtudaginn og ekki spillti stemmingunni að leikurinn varð æsispennandi undir lokin. Þórir Tryggvason ljósmyndari okkar var að sjálfsögðu á staðnum með myndavélina.

Eins og sést var stúkan þéttsetin, Morgunblaðið og Fréttablaðið segja hátt í 1.000 manns og nú þarf bara að fylgja því eftir á morgun, sunnudag þegar Akureyri mætir FH í bikarnum klukkan 16:00.

Sjá allar myndirnar úr stúkunni.



Handboltaleikur á Akureyri er stórhátíð!

12. nóvember 2009 - Akureyri handboltafélag skrifar

Leikurinn í dag - tónlistaratriði fyrir leik og í hálfleik

Eins og ávallt verður ýmislegt í boði í tengslum við heimaleikinn í dag. Tveir af efnilegustu tónlistarmönnum bæjarins sem kalla sig Gummi og Stebbi verða með létta stemmingu í kaffistofu Íþróttahallarinnar síðasta hálftímann fyrir leik og í hálfleik. Þeir hefja hljóðfæraleikinn um klukkan 18:30.

Heitur matur verður sömuleiðis fyrir meðlimi stuðningsmannaklúbbsins fyrir leik og kaffiveitingar í hálfleik.

Sjáumst í Höllinni - leikurinn sjálfur hefst klukkan 19:00 en húsið opnar 18:15!


Stjarnan er sýnd veiði en ekki gefin
Fannar Kristmannsson



9. nóvember 2009 - Akureyri handboltafélag skrifar

Akureyri - Stjarnan á fimmtudag: kynning

Mótherjar Akureyrar á fimmtudaginn eru strákarnir hans Patreks Jóhannessonar úr Stjörnunni. Okkar strákar unnu mikilvægan sigur á Stjörnunni hér í Íþróttahöllinni í fyrrahaust sem markaði upphafið að sigurgöngu liðsins þá. Að sama skapi reyndist Stjarnan okkur erfið á heimavelli sínum og töpuðum við tvívegis fyrir þeim þar í fyrravetur.

Stjörnunni var ekki spáð góðu gengi í vetur en þeir hafa svo sannarlega blásið á allar hrakspárnar. Haukar máttu þakka fyrir eins marks sigur, 16-17 í fyrstu umferð, Stjarnan tók síðan Fram í kennslustund í annarri umferð þar sem þeir völtuðu yfir Fram með ævintýralegum kafla í fyrri hálfleik en leiknum lauk þó með aðeins þriggja marka sigri 28-25
Í þriðju umferð töpuðu þeir fyrir HK 23-21 í jöfnum leik en töpuðu reyndar stórt á heimavelli fyrir Val í síðustu umferð 25-37.

Stjörnuliðið byggir að miklu leiti á ungum og bráðefnilegum heimamönnum en þó eru nokkrir reynsluboltar í liðinu. Þekktastur er markvörðurinn Roland Valur Eradze sem virðist vera í fínu standi um þessar mundir og er þá illviðráðanlegur þegar hann er í ham.
Af útileikmönnum má nefna reynslukögglana Þórólf Nielsen fyrirliða og Vilhjálm Inga Halldórsson. En einnig hafa Jón Arnar Jónsson, Daníel Örn Einarsson og Kristján S. Kristjánsson verið liðinu drjúgir það sem af er.

Í leikmannahópi Stjörnunnar er einn fyrrum leikmaður Akureyrar en það er Fannar Kristmannsson sem lék með 2. flokki Akureyrar síðustu tvö árin.

Hér fer á eftir kynning Ívars Benediktssonar, blaðamanns Morgunblaðsins á liði Stjörnunnar í upphafi leiktímabilsins.

Byggjum á mönnum með félagshjarta
Stjarnan hafnaði í sjöunda og næstneðsta sæti N1-deildar karla í vor. Eftir þrjá hörkuleiki við Aftureldingu tókst Stjörnumönnum að halda sæti sínu í deild þeirra bestu.

„Í vor fór ég vel yfir stöðu mála með formanni meistaraflokksráðs í ljósi þess að margir leikmenn yfirgáfu okkur. Niðurstaðan varð sú að byggja upp nýtt lið á heimamönnum, sýna þolinmæði og fara alls ekki út í það að kaupa til okkar leikmenn frá öðrum liðum. Fyrir vikið er mikið um unga leikmenn í hópnum og fram eftir sumri voru nær eingöngu piltar úr öðrum og þriðja aldursflokki á æfingum. Eftir verslunarmannahelgi bættust aðeins eldri og reyndari menn í æfingahópinn, svo sem Þórólfur Nielsen fyrirliði, Vilhjálmur Ingi Halldórsson og Björn Friðriksson. Björn er gamall Stjörnumaður með stórt hjarta sem mikilvægt er að fá inn í þennan hóp. Síðan er Roland Valur markvörður ennþá með okkur. Hann er í fínu standi.

Tilbúnir að vaða eld og brennistein
Af um 20 manna hópi eru tveir aðkomumenn, aðrir eru uppaldir hjá Stjörnunni. Þetta vona ég að verði okkar styrkur í vetur, að við höfum leikmenn sem vilja vera í Stjörnunni og eru um leið tilbúnir að vaða eld og brennistein fyrir félagið. Svona hópur hefur ekki verið hjá félaginu síðan ég og Siggi Bjarna aðstoðarþjálfari vorum ungir og með hár,“ segir Patrekur sem er við stjórnvölinn hjá Stjörnunni annað keppnistímabilið í röð.

„Við erum með efnilegan hóp ungra leikmanna sem lagt hafa á sig mikla vinnu við æfingar. Ég geri mér grein fyrir því að við eigum ennþá nokkuð í land, það sást meðal annars á Ragnarsmótinu á Selfossi fyrir skömmu og ég fer ekki í grafgötur með að veturinn á eftir að verða okkur erfiður.“

Auk reynslumanna sem fyrr er getið segist Patrekur reikna með að Ragnar Már Helgason bætist í hópinn. „Ég er virkilega ánægður með að hann skyldi taka ákvörðun um að vera áfram með okkur. Hann er ekki uppalinn hjá félaginu en ákvað að vera um kyrrt þrátt fyrir erfiðleika. Ragnar fellur vel inn í liðið,“ segir Patrekur.

Margir stíga fyrstu skrefin
„Það stíga margir leikmanna okkar sín fyrstu skref í vetur, það er alveg ljóst þótt við séum sannarlega með nokkra reynslumenn í hópnum,“ segir Patrekur og bætir við að það sé að mörgu leyti skemmtilegra og meira krefjandi að þjálfa hóp af þessu tagi. „Nú hefur maður tækifæri til þess að móta ákveðinn hóp, setja mark sitt á hann í stað þess að þjálfa og leiðbeina mönnum sem hafa þroskast sem handknattleiksmenn.“

Töpum ekki fyrirfram
Við gerum okkur grein fyrir að veturinn verður erfiður en við treystum þessum hópi til þess að standa sig. Það er fjarri okkur að tapa einhverjum leik fyrirfram,“ segir keppnismaðurinn Patrekur sem lagt hefur skóna á hilluna og reiknar ekki með að spila í vetur.
„Ég reikna með að Stjörnuliðið í vetur verði ungt, ferskt og baráttuglatt. Þar liggi okkar styrkur og með því náum við betur til bæjarbúa. Um leið vona ég að „superstar“, stuðningsmannahópur Stjörnunnar, styðji jafn myndarlega við bakið á okkur í vetur og hann hefur gert í fótboltanum í sumar,“ segir Patrekur Jóhannesson, þjálfari Stjörnunnar.

Ungum mönnum hent í djúpu laugina
Karlalið Stjörnunnar í Garðabæ hefur nær alla tíð staðið í skugganum af kvennaliði félagsins í handknattleik. Stjarnan hefur lengi verið í hópi fremstu liða landsins í handknattleik karla en aldrei náð að brjóta ísinn og komast alla leið - verða Íslandsmeistari, eins og kvennaliðinu hefur margoft tekist. Stjarnan hefur fjórum sinnum náð að vinna bikarkeppnina í karlaflokki, síðast tvö ár í röð árin 2006 og 2007. Á þeim tíma gerðu menn sér vonir um að upp væri að koma lið hjá félaginu sem gæti tryggt því fyrsta Íslandsmeistaratitilinn í karlaflokki. Sú varð alls ekki raunin og segja má að á síðustu leiktíð hafi þessar vonir hrunið nærri því á einni nóttu á sama tíma og Ísland sigldi inn í bankakreppu og fjármálahrun. Þar með hrundi reksturinn endanlega í fangið á fámennri stjórn deildarinnar. Samningum við leikmenn liðsins var sagt upp. Fljótlega lögðu nokkrir þeirra á flótta og í vor flúðu enn fleiri af hólmi þar sem ljóst að var að þeir yrðu að leika handknattleik fyrir Stjörnuna upp á vatn og brauð vildu þeir halda iðju sinni áfram í Garðabæ.

Fyrir félag sem hafði byggt upp drjúgan hluta leikmannahóps síns á „aðkeyptu vinnuafli“ var þetta mikið áfall. Botninn virtist detta úr liðinu sem þó rétt slapp við fall úr N1-deildinni eftir að hafa lent í kröppum þriggja leikja dansi við fyrstudeildarlið Aftureldingar um keppnisrétt í N1-deildinni.

Eftir „flóttann“ á síðasta vetri og í vor, sem m.a. er rakinn hér á síðunni, ákváðu Stjörnumenn að herða upp hugann og treysta á þá ungu menn sem deildin hefur alið upp á síðustu árum. Það er vel og verður gaman að fylgjast með framgöngu Stjörnunnar á komandi vetri. Búast má við að leikmenn eigi eftir að fá margar dýfur og eiga erfitt uppdráttar. En að baki þessum unga hópi standa í brúnni reynslumennirnir Patrekur Jóhannesson og Sigurður Bjarnason. Þeir eru eldri en tvævetur í handknattleiknum. Nú reynir á þá að miðla úr brunni reynslunnar til kynslóðarinnar sem nú hefur verið hent út í djúpu laugina.

Leikmannahópur Stjörnunnar
Björn Friðriksson 27 ára línumaður
Daníel Örn Einarsson 21 árs hægri hornamaður
Eyþór Már Magnússon 19 ára skytta vinstra megin
Guðmundur S. Guðmundsson 23 ára skytta hægra megin
Gunnar Örn Arnarson 18 ára vinstri hornamaður
Gunnar Gylfason 20 ára skytta hægra megin
Hafþór Helgason 19 ára línumaður
Jón Arnar Jónsson 19 ára leikstjórnandi
Kristján Svan Kristjánsson 27 ára vinstri hornamaður
Ragnar Már Helgason 29 ára skytta h. megin/v. hornamaður
Roland Valur Eradze 38 ára markvörður
Sigurður Helgason 19 ára hægri hornamaður
Svavar Már Ólafsson 18 ára markvörður
Sverrir Eyjólfsson 18 ára línumaður
Tandri Már Konráðsson 19 ára línumaður
Viktor Alex Ragnarsson 21 árs markvörður
Vilhjálmur Ingi Halldórsson 27 ára skytta v. megin/miðjumaður
Víglundur Jarl Þórsson 17 ára leikstjórnandi
Þorgils Orri Jónsson 22 ára markvörður
Þórólfur Nielsen 28 ára leikstjórnandi

Breytingar á liðskipan
Stjörnuliðið hefur gengið í gegnum miklar mannabreytingar á þessu ári. Nokkrir leikmenn yfirgáfu herbúðir liðsins snemma á þessu ári og fleiri hafa fylgt í þeirra fótspor í sumar. Enginn hefur gengið til liðs við Stjörnuna frá síðustu leiktíð. Félagið hyggst byggja á ungum leikmönnum sem aldir eru upp hjá félaginu.

Björgvin Hólmgeirsson kvaddi herbúðir Stjörnunnar í vor og gekk til liðs við Íslandsmeistara Hauka.

Varnarmaðurinn sterki, Fannar Örn Þorbjörnsson ákvað í lok leiktíðar í vor að leggja skóna á hilluna, að minnsta kosti um tíma. Fannar var næstmarkahæstur hjá Stjörnunni í fyrra með 60 mörk í úrvalsdeildinni en Vilhjálmur Ingi Halldórsson skoraði mest fyrir liðið, 87 mörk.

Annar sterkur varnarmaður, Jón Heiðar Gunnarsson, hætti að leika með Stjörnunni í vor. Hann gekk yfir í raðir FH-inga. Guðni Már Kristinsson fór á ný yfir til FH-inga eftir að hafa verið lánaður til Stjörnunnar á síðasta keppnistímabili.

Hrafn Ingvarsson hélt aftur upp í Mosfellsbæ til liðs við uppeldisfélag sitt, Aftureldingu. Bjarni Aron Þórðarson fór einnig til Aftureldingar í sumar en hann var lánsmaður hjá Mosfellingum á síðustu leiktíð en gekk tímabundið í raðir Stjörnunnar á ný þegar lánasamningur Stjörnunnar og Aftureldingar rann út.

Ólafur Víðir Ólafsson kom ekkert við sögu hjá Stjörnunni í fyrra vegna meiðsla. Hann skipti yfir til uppeldisfélags síns, HK, í sumar.

Ólafur Sigurjónsson ákvað að ganga til liðs við Val í sumar eftir skamma viðdvöl hjá Stjörnunni.

Sömu sögu er að segja að Gunnari Inga Jóhannssyni. Hann söðlaði um í sumar og gekk til liðs við bikarmeistara Vals.

Sigurður Bjarnason, fyrrverandi landsliðsmaður í handknattleik og leikmaður og þjálfari Stjörnunnar, er aðstoðarmaður Patreks Jóhannessonar þjálfara.

Til baka    Senda á Facebook

Umsjón og hönnun: Stefán Jóhannsson og Ágúst Stefánsson