Warning: Undefined array key "frettanr" in /web/akhandadmin/public_html/index.php on line 15
Flottur sigur á Akureyrar á FH og staða liðsins vænleg - Akureyri Handboltafélag
  Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Fyrri leiktímabil

Tímabilið 2009-10

Leikmenn meistarafl. karla
Úrslit leikja
Deild karla




Ljósmyndir frá leiknum     Textalýsing frá leiknum     Tölfræði leiksins 
    Akureyri - FH  33-30 (18-12)
N1 deild karla
Íþróttahöllin
Fim 18. mars 2010 klukkan: 19:00
Dómarar: Anton Gylfi Pálsson og Hlynur Leifsson
Umfjöllun

Árni, Heimir og Flóki voru fremstir meðal jafningja í leiknum





19. mars 2010 - Akureyri handboltafélag skrifar

Flottur sigur á Akureyrar á FH og staða liðsins vænleg

Það var ljóst frá fyrstu mínútu leiksins að leikmenn Akureyrar komu feiknalega baráttuglaðir til leiks og að ekki átti að láta FH liðið fara enn eina ferðina með öll stigin úr Höllinni. Akureyri tók öll völd á vellinum, Heimir Örn Árnason fór á kostum og raðaði inn mörkum á meðan Hörður Flóki lokaði markinu á bak við trausta vörn. Eftir rúmlega sex mínútna leik var staðan orðin 5-1 Akureyri í vil.

FH lagaði stöðuna lítillega en Akureyri gaf engin færi á sér og í stöðunni 12-9 komu þrjú mörk heimamanna í röð og staðan orðin harla vænleg 15-9. Jónatan jók muninn í 18-11 en Ólafur Guðmundsson átti síðasta orðið fyrir FH í fyrri hálfleik þannig að hálfleiksstaðan var 18-12 Akureyri í vil.

Það verður að segjast eins og er að fyrri hálfleikurinn var einhver sá alflottasti sem Akureyrarliðið hefur sýnt í langan tíma. Sóknarleikurinn hraður og skemmtilegur, vörnin var gríðarlega sterk og fyrir aftan hana átti Hörður Flóki stórleik.
Nánast öll mörk FH komu úr vítaköstum eða hraðaupphlaupum sem segir nokkuð um styrkleika Akureyrarvarnarinnar.

FH sýndu það í upphafi seinni hálfleiks að þeir gefast ekki upp þó á móti blási, þeir skoruðu fimm fyrstu mörk hálfleiksins og forskot Akureyrar komið niður í eitt mark. Hér munaði ekki síst um að Pálmar Pétursson markvörður FH fór að verja eins og berserkur eftir arfaslaka frammistöðu í fyrri hálfleik.
Eftir átta mínútna leik náði FH að jafna leikinn í 20-20 og fór virkilega að fara um fjölmarga áhorfendur sem fylltu stúkuna. En Akureyrarliðið gafst ekki upp og með frábærum stuðningi áhorfenda hélt liðið frumkvæðinu þó að FH næði oftast að jafna.

Í stöðunni 27-27 sýndi Akureyrarliðið styrkleika sinn og seig fram úr. Árni Sigtryggsson átti hreint út sagt magnaðan lokakafla og skoraði glæsimörk auk þess sem Hörður Flóki varði hvað eftir annað afar mikilvæga bolta. Leiknum lauk síðan með góðum þriggja marka sigri 33-30 og styrkti liðið enn frekar stöðu sína í 2. sæti deildarinnar.
Eftir frábærann leik í fyrri hálfleik kom bakslag í upphafi þess seinni en liðið sýndi magnaðan karakter og stóðst áhlaupið og kláraði leikinn með sóma.

Mörk Akureyrar: Árni Sigtryggsson 9, Heimir Örn Árnason 8, Guðmundur Hólmar Helgason 5, Oddur Gretarsson 5 (1 úr víti), Jónatan Magnússon 3, Hörður Fannar Sigþórsson 2 og Andri Snær Stefánsson 1.
Hörður Flóki var flottur í markinu með 21 skot varið, þar af 1 vítakast. Hafþór Einarsson kom inná til að reyna við vítakast og munaði minnstu að það heppnaðist.

Lið Akureyrar var klassa betra en FH liðið í dag, sérstaklega í fyrri hálfleik. FH skoraði flest af sínum mörkum úr vítaköstum og hraðaupphlaupum þar sem Bjarni Fritzson var gríðarsterkur en þegar liðið stillti upp í hefðbundinn sóknarleik var það í töluverðum erfiðleikum.

Þar sem Fram vann HK í kvöld hefur Akureyri nú þriggja stiga forskot á HK og FH eins og hér má sjá.

Staðan í deildarkeppni karla eftir 16 umferðir:
Nr. FélagLeikir U J TMörkHlutfallStig-
1. Haukar161222408 : 3773126:6
2. Akureyri161024437 : 4013622:10
3. HK16916434 : 4112319:13
4. FH16916453 : 4262719:13
5. Valur16826395 : 3771818:14
6. Fram164111412 : 447-359:23
7. Grótta164012395 : 432-378:24
8. Stjarnan163112365 : 428-637:25


Næsti leikur liðsins er svo á sunnudaginn þegar strákarnir fara suður á Seltjarnarnes og glíma við Gróttu en sá leikur verður sýndur í sjónvarpinu og hefst klukkan 16:00 á sunnudaginn. Gróttuliðið er óútreiknanlegt og ljóst að Akureyrarliðið þarf að hafa töluvert fyrir hlutunum á sunnudaginn. Þannig máttu Haukar þakka fyrir að ná stigum út úr heimaleik sínum gegn Gróttunni í kvöld þar sem Haukar unnu eins marks sigur með lokamarki leiksins.

Fimmtudaginn 25. mars koma Framarar í heimsókn í Höllina og verður það örugglega hörkuleikur en Fram hefur heldur betur bitið frá sér upp á síðkastið. Í síðustu þrem leikjum hafa þeir unnið HK, FH og Val, alla leikina með einu marki og eru skyndilega komnir úr fallsætinu.

Tengdar fréttir

Menn skemmtu sér konunglega á leiknum

20. mars 2010 - Akureyri handboltafélag skrifar

Bestu stuðningsmenn Íslands - myndir

Enn einu sinni kom í ljós hversu frábærir stuðningsmenn Akureyrar Handboltafélags eru en þeir voru hreint út sagt magnaðir á leiknum gegn FH. Stemmingin var ósvikin frá upphafi og þegar FH hafði unnið sig inn í leikinn í seinni hálfleik tvíefldust áhorfendur og studdu kröftuglega við bakið á sínum mönnum.

Þórir Tryggvason ljósmyndari sendi okkur helling af myndum sem flestar sýna fjörið á bekkjunum.


Stemmingin var rafmögnuð í stúkunni


Stuðningsmenn sem aldrei bregðast


Björgvin kom sínum stuðningi vel til skila

Smelltu hér til að sjá allar myndir Þóris frá leiknum.



Leikurinn fer að hefjast

18. mars 2010 - Akureyri handboltafélag skrifar

Leikur dagsins í beinni textalýsingu

Þrátt fyrir beina útsendingu SportTV.is frá leiknum hafa borist fjölmargar beiðnir um textalýsngu einnig þannig að við verðum við því hér með.

Þú smellir hér til að fá textalýsinguna upp.


SportTV.is gerir það ekki endasleppt - bein útsending frá leiknum

18. mars 2010 - Akureyri handboltafélag skrifar

Leikur dagsins: Akureyri – FH í beinni á SportTV.is

Stórleikur 16. umferðar N1 deildarinnar er klárlega á Akureyri í kvöld þegar FH kemur í heimsókn í Höllina. Það hefur vonandi ekki farið fram hjá neinum að KEA býður öllum frítt á leikinn og kunnum við þeim að sjálfsögðu bestu þakkir fyrir. Það má búast við fjölmenni og dúndurstemmingu í Höllinni enda er þetta einn af úrslitaleikjunum í toppbaráttunni.

Fyrir þá sem ekki komast í Höllina getum við bent á að SportTV.is verður á staðnum með sinn búnað og ætlar að sýna leikinn beint á netinu. Leikurinn hefst klukkan 19:00 og má gera ráð fyrir að útsendingin á SportTV.is hefjist nokkrum mínútum áður.

Til að horfa á útsendingu SportTV.is skaltu smella hér!

Að sjálfsögðu eru hefðbundnar veitingar fyrir leik og í hálfleik fyrir meðlimi stuðningsmannaklúbbsins.

Eins og kemur fram hér annarsstaðar á síðunni þá verður ekki af áður auglýstum tónleikum Stórsveitar Tónlistarskólans í dag en þess í stað er ætlunin að bregða upp sýnishornum frá tónleikum hljómsveitarinnar Lynyrd Skynyrd.

Síðan er rétt að vekja athygli á því að Ríkissjónvarpið verður með leik Gróttu og Akureyrar í beinni útsendingu klukkan 16:00 á sunnudaginn. Þessu ber að sjálfsögðu að fagna en þess má geta að RUV hefur ekki sýnt beint frá leik Akureyrar síðan 18. október 2008.



Það verða Lynyrd Skynyrd sem hlaupa í skarðið fyrir Stórsveitina í dag

18. mars 2010 - Akureyri handboltafélag skrifar

Forföll hjá Stórsveit Tónlistarskólans á Akureyri

Eins og búið var að auglýsa rækilega ætlaði Stórsveit Tónlistarskólans á Akureyri að halda tónleika fyrir áhorfendur á leik Akureyrar og FH í dag. Af óviðráðanlegum ástæðum þarf hljómsveitin að boða forföll og því getur ekki orðið af því að þessu sinni.

Þess í stað verður varpað upp sýnishornum frá tónleikum hinnar frábæru hljómsveitar Lynyrd Skynyrd. Flestir ættu að þekkja hið sígilda lag þeirra Sweet Home Alabama sem verður klárlega tekið í kvöld.

Þrátt fyrir ýmiss skakkaföll í gegnum tíðina þá er hljómsveitin enn í fullu fjöri og hélt eftirminnilega tónleika í London þann 6. mars síðastliðinn og geta menn hér séð stemminguna þegar sveitin tekur sitt þekktasta lag.





Frábært framtak KEA manna

16. mars 2010 - Akureyri handboltafélag skrifar

KEA býður öllum handboltaáhugamönnum á FH leikinn!

Það fer ekki á milli mála að leikur Akureyrar og FH á fimmtudaginn er einn af stærstu leikjum tímabilsins enda mikið í húfi fyrir bæði lið. KEA hefur ákveðið að bjóða öllum frítt á leikinn þannig að nú er kjörið tækifæri fyrir alla áhugamenn að drífa sig í Höllina og styðja við bakið á sínum mönnum.

FH hefur reynst Akureyri afar erfiðir hér á okkar heimavelli þannig að það er fullur hugur í Akureyrarstrákum að snúa nú við taflinu með dyggum stuðningi áhorfenda.

Í forföllum Stórsveitar Tónlistarskólans á Akureyri verður varpað upp sýnishornum frá tónleikum suðurríkjasveitarinnar Lynyrd Skynyrd fyrir leik og í hálfleik.

Taktu því frá fimmtudaginn, leikurinn hefst klukkan 19:00 og rétt að mæta tímanlega, það verður áreiðanlega hvert sæti í Höllinni setið, þökkum KEA fyrir framtakið.



FH hefur ekki tapað stigi í Höllinni undanfarin tvö ár

15. mars 2010 - Akureyri handboltafélag skrifar

Risaleikur gegn FH og Stórsveitin í Höllinni á fimmtudaginn

Það verður svo sannarlega fjör í Íþróttahöllinni á fimmtudaginn þegar Akureyri og FH mætast í toppbaráttunni í N1 deild karla. Akureyri er í 2. sæti deildarinnar með 20 stig en FH er einungis einu stigi á eftir þannig að það er mikið í húfi í þessum leik.

FH hefur leikið Akureyri grátt þegar liðin hafa mæst hér á Akureyri síðastliðin tvö tímabil. Tveir deildarleikir og einn bikarleikur þar sem FH hefur farið með sigur af hólmi í þeim öllum. Það er því sannarlega kominn tími á að Akureyri reki Hafnarfjarðargýluna úr Höllinni í eitt skipti fyrir öll.

Akureyri vann sannfærandi sigur á Stjörnunni í síðasta leik og hefur verið á góðri siglingu í síðustu leikjum. Leikmenn hafa sýnt fína baráttu, kraft og sigurstemmingu í síðustu leikjum sem er að sjálfsögðu miklu skemmtilegri heldur hitt.

FH ingar eru svo sannarlega með frábært lið eins og við höfum fengið að kynnast í vetur og gerðu sér lítið fyrir og lögðu nýkrýnda bikarmeistara Hauka að velli á sannfærandi hátt í síðustu umferð.

Við eigum von á glæsilegum gestum í Höllina á fimmtudaginn en Stórsveit Tónlistarskólans á Akureyri ætlar að spila fyrir leik og í hálfleik undir stjórn Alberto Carmona.


Alberto Carmona flottur við stjórnvölinn


Hljómsveitin fór á kostum í Höllinni í fyrravetur

Hljómsveitin kom einnig fram í tengslum við leik í fyrravetur og var hreint út sagt frábær.

Stuðningsmenn geta því farið að hlakka til fimmtudagsins, glæsilegir tónleikar og rafmagnaður handboltaleikur, það verður ekki betra!

Nánari upplýsingar um starfsemi Tónlistarskólans á Akureyri á heimasíðu skólans http://tonak.is




Til baka    Senda á Facebook

Umsjón og hönnun: Stefán Jóhannsson og Ágúst Stefánsson