Warning: Undefined array key "frettanr" in /web/akhandadmin/public_html/index.php on line 15
Hádramatískt jafntefli á Selfossi - Akureyri Handboltafélag
  Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Fyrri leiktímabil

Tímabilið 2010-11

Leikmenn meistarafl. karla
Úrslit leikja
Deild karla




Tölfræði leiksins 
    Selfoss - Akureyri  31-31 (11-15)
N1 deild karla
Selfoss
Fim 17. mars 2011 klukkan: 18:30
Dómarar: Ingvar Guðjónsson og Jónas Elíasson. Eftirlitsdómari: Kristján Halldórsson
Umfjöllun

Bjarni Fritzson lét heldur betur að sér kveða í kvöld





17. mars 2011 - Akureyri handboltafélag skrifar

Hádramatískt jafntefli á Selfossi

Selfoss og Akureyri gerðu hádramatískt 31-31 jafntefli í N1-deild karla á Selfossi í kvöld. Akureyringar höfðu leikinn í hendi sér en köstuðu honum frá sér á síðustu 10 mínútum leiksins eftir að hafa verið fjórum mörkum yfir í hálfleik 11-15. Allt sauð upp úr á lokasekúndunni þegar mark var dæmt af Selfyssingum sem hefði tryggt þeim sigur.

Við birtum hér á eftir umfjöllun Guðmundar Egils Gunnarssonar sem birtist á sport.is í kvöld.

Selfyssingar eru í mikilli baráttu við Aftureldingu um áframhaldandi sæti sitt í deildinni. Þeir gerðu sér lítið fyrir og lögðu HK af velli í Kópavoginum og voru því til alls líklegir.

Akureyringar byrjuðu leikinn í kvöld mun betur heldur en Selfyssingar sem virtust kærulausir í upphafi leiks. Toppliðið var ekki lengi að ganga á lagið og náði upp 6 marka forystu, 4-10, þegar um 14 mínútur voru liðnar af leiknum. Þá kom upp mjög skringileg staða en Selfyssingar fengu þrjár brottvísanir á innan við einnar mínútu kafla og léku þremur leikmönnum færri. Á einhvern ótrúlegan hátt náðu þeir að vinna þann kafla 2-0 sem gaf þeim byr undir báða vængi. Leikurinn snérist algjörlega í höndum Akureyringa við þetta og tókst Selfyssingum með miklu harðfylgi að minnka muninn í eitt mark, 10-11, þegar 6 mínútur voru eftir af fyrri hálfleiknum. Dómararnir Ingvar og Jónas voru í stóru hlutverki í fyrri hálfleiknum og litu margir vafasamir dómar dagsins ljós á báða bóga. Akureyringar náðu að slá á skelfilegan kafla af sinni hálfu og náðu að auka muninn aftur í fjögur mörk fyrir hálfleik, 11-15.

Andrius Zigelis var atkvæðamestur heimamanna með 5 mörk í fyrri hálfleiknum og Sebastian Alexandersson spilandi þjálfari Selfyssinga varði 10 skot í fyrri hálfleiknum og hélt heimamönnum á floti oft á tíðum. Bjarni Frizson gerði hvorki meira né minna en 8 mörk í hálfleiknum, þar af fjögur af vítalínunni og Sveinbjörn Pétursson varði 10 skot.

Leikurinn var í töluvert miklu jafnvægi framan af síðari hálfleiknum og skiptust liðin á að skora og hélst munurinn þrjú mörk allt fram yfir miðjan síðari hálfleikinn þegar Akureyringar náðu um tíma fjögurra marka forskoti. Bæði lið dreifðu álaginu á leikmenn sína vel. Serbinn Milan Ivancev kom inn á og stóð sig mjög vel og skoraði nokkur fín mörk. Bergvin Þór og Halldór Logi komu inn á hjá Akureyringum og lék Oddur í vinstri skyttunni. Selfyssingar reyndu hvað þeir gátu til að brúa þriggja marka forystu Akureyringa með dyggum stuðningi áhorfenda sem fjölmenntu á pallana. Þeim tókst að minnka muninn niður í eitt mark, 27-28, fjórum mínútum fyrir leikslok og hleyptu gríðarlegri spennu í leikinn. Atli Hilmarsson, þjálfari Akureyringa, tók þá leikhlé til þess að endurskipuleggja leik sinna manna sem hafði dalað eftir því sem leið á síðari hálfleikinn. Selfyssingar fengu hvert vítakastið á fætur öðru og jafnaði Ragnar Jóhannsson stórskytta leikinn í 29-29 og fór þakið við það af húsinu. Selfyssingar komust yfir þegar 20 sekúndur voru eftir af leiknum og stefndi í stórkostlegan heimasigur en Oddur Gretarsson jafnaði leikinn 10 sekúndum fyrir leikslok. Sveinbjörn Pétursson hafði farið útaf til að fá aukamann inn á í sóknina og skoraði Selfoss mark á lokasekúndu leiksins en dómarar leiksins töldu miðjuna ekki rétt tekna og því slapp Akureyri með skrekkinn.

Akureyringar voru klaufar að taka ekki bæði stigin úr leiknum í kvöld en mega teljast stálheppnir að hafa yfir höfuð fengið annað stigið. Selfyssingar hafa sýnt frábært viðmót í síðustu leikjum og ljóst að liðið ætlar að selja sig mjög dýrt til að halda sæti sínu í deildinni á næstu leiktíð. Guðjón Finnur Drengsson og Ragnar Jóhannsson voru forystuhestarnir í sóknarleik heimamanna og þá sérstaklega í síðari hálfleiknum þar sem þeir voru arkitektarnir af flestum sóknum liðsins. Bjarni Fritzson var markahæstur gestanna en hann skoraði hvorki meira né minna en 12 mörk í leiknum. Sveinbjörn Pétursson stóð að vanda fyrir sínu og varði 21 skot þar af 2 víti.

Mörk Selfoss: Ragnar Jóhannsson 7, Guðjón Finnur Drengsson 6, Andrius Zigelis 5, Atli Kristinsson 3, Guðni Ingvarsson 3, Einar Héðinsson 2, Milan Ivancev 2, Gunnar Ingi Jónsson 2, Helgi Héðinsson 1.
Varin skot: Sebastian Alexandersson 11, Birkir Fannar Bragason 4.
Utan vallar: 8 mínútur

Mörk Akureyrar: Bjarni Fritzson 12/4, Oddur Gretarsson 6, Heimir Örn Árnason 6, Hörður Fannar Sigþórsson 3, Guðmundur Hólmar Helgason 2, Halldór Logi Árnason 1, Daníel Örn Einarsson 1.
Varin skot: Sveinbjörn Pétursson 21/2
Utan vallar: 12 mínútur

Dómarar: Jónas Elíasson og Ingvar Guðjónsson – Slakir

Staðan í deildinni eftir leiki kvöldsins
Nr. FélagLeikir U J TMörkHlutfallStig-
1. Akureyri171322492 : 4444828:6
2. FH171115498 : 4465223:11
3. Haukar17836446 : 438819:15
4. Fram17917533 : 5042919:15
5. HK17908505 : 515-1018:16
6. Valur177010447 : 470-2314:20
7. Afturelding174013429 : 476-478:26
8. Selfoss172312478 : 535-577:27

Tengdar fréttir

Þetta stig getur reynst dýrmætt

17. mars 2011 - Akureyri handboltafélag skrifar

Hvað sögðu menn eftir leikinn á Selfossi?

Við byrjum að tína saman viðtöl við leikmenn og þjálfara liðanna til að fá þeirra sjónarhorn á leikinn. Guðmundur Karl, blaðamaður mbl.is náði tali af Bjarna Fritzsyni:

Bjarni Fritzson: Vörnin rosalega léleg

„Við áttum að klára þennan leik en sóknarleikurinn riðlaðist hjá okkur í seinni hálfleik og hugarfarið var ekki nógu gott hjá okkur,“ sagði Bjarni Fritzson, sem skoraði tólf mörk fyrir Akureyri í 31-31 jafnteflinu á Selfossi í kvöld.

„Vörnin var rosalega léleg hjá okkur en sóknarleikurinn þokkalegur. Það vantaði samt að fleiri hefðu tekið af skarið í sókninni. En kannski verður þetta stig bara geðveikt mikilvægt í lokin og þá getum við verið ánægðir,“ sagði Bjarni í samtali við mbl.is eftir leik.

„Við misstum Gumma [Guðmund Hólmar] meiddan út snemma í seinni hálfleik og við það riðlast sóknarleikurinn. Þetta var vandræðalegt á köflum en við náðum engum hraðaupphlaupum í seinni hálfleik og vorum latir að hlaupa til baka,“ sagði Bjarni ennfremur.


Bjarni átti stórleik í kvöld

Guðmundur Egill Gunnarsson, blaðamaður sport.is ræddi við þjálfara liðanna:

Atli Hilmarsson: Megum þakka fyrir stig í lokin

Atli Hilmarsson, þjálfari Akureyringa, var að vonum ekki ánægður með að liðið sitt skyldi missa niður fimm marka forystu á útivelli gegn Selfyssingum í kvöld.

„Við köstum þessu frá okkur en megum þakka fyrir að fá stig í lokin. Við fórum að spila mjög illa, klikkuðum úr dauðafærum og varnarleikurinn gekk ekki upp eins og í fyrri hálfleik og því fór sem fór.“

Akureyringar eru þrátt fyrir tapið í kvöld enn í toppsæti deildarinnar og í bílstjórasætinu í baráttunni um deildarmeistaratitilinn.

„Við þurfum að vinna tvo leiki og reyna að taka deildarmeistaratitilinn. Síðan er það bara úrslitakeppni og spilin verða stokkuð upp á nýtt. Það er hinsvegar mjög mikilvægt fyrir okkur að fá heimaleikjaréttinn og til þess þurfum við að vinna tvo leiki í viðbót og auðvitað er stefnan sett á það.“

Gríðarlega góð stemning myndaðist í íþróttahúsinu á Selfossi í kvöld en umdeilt atvik átti sér stað á lokaandartökum leiksins þegar Selfyssingar skoruðu í autt mark Akureyringa en dómarar leiksins dæmdu markið ekki gilt því ekki var búið að flauta miðju.

„Það var mjög góð stemning hér í kvöld og Selfoss-liðið gafst aldrei upp og voru einfaldlega að berjast fyrir lífinu sínu og uppskáru eftir því. Dómarinn vill meina að hann hafi ekki verið búinn að flauta og það verður bara að taka því. Hann var ekki búinn að flauta miðjuna á og það var skýringin sem ég fékk frá dómurunum og það verður bara að taka henni.“

Sebastian Alexandersson: Við höfum hjartað

Sebastian Alexandersson var ánægður með að Selfoss hafi náð í stig úr leiknum í dag en fannst sínir menn reknir útaf fyrir litlar sakir í fyrri hálfleik.
„Mér fannst við ekkert svo skelfilegir í byrjunar. Við vorum einfaldlega týndir útaf fyrir brot sem áttu sér stað allan leikinn. Línan hjá dómurunum breyttist hinsvegar eftir því sem leið á leikinn.“

Selfyssingar hafa verið á mikilli siglingu undanfarið og ætla að selja sig mjög dýrt til að halda sæti sínu í deildinni. Sebastian segir liðið sitt hafa það sem til þarf til að halda sér í deildinni.

„Við erum búnir að vera að gera þetta í allan vetur. Við höfum alltaf komið til baka alveg sama við hvern við höfum spilað og það hafa öll lið í deildinni sýnt okkur þá virðingu að vanmeta okkur ekki. Ég er ánægður með mitt lið, við höfum karakter og við höfum hjartað. Sumir segja að þetta hafi ekki fallið með okkur en ég er ósammála. Við erum ekki búnir að tapa í síðustu þremur leikjum, höfum tekið fjögur stig af sex mögulegum sem mér finnst við hefðum átt að taka en svona er sportið.

Í fyrri parti mótsins vorum við ekki í þeirri stöðu að eiga séns á að vinna leiki en um leið og við eigum séns þá tökum við stigin. Eitt stig í dag var betra en ekkert en við áttum að vinna í dag en svo geta Akureyringar líka sagt að þeir hafi verið fimm mörkum yfir og tíu mínútur eftir þannig en ég er ósammála. Leikurinn þróaðist þannig að við gátum unnið hann en það gerðist ekki, jafnteflið gegn Haukum var mikið sárara en þetta.“

Mjög umdeilt atvik átti sér stað í lok leiksins þegar Akureyringar höfðu skipt markmanni sínum útaf til að vera með fleiri menn í sókninni. Oddur Gretarsson jafnaði leikinn og Selfyssingar fóru í hraða miðju og skoruðu í autt markið en dómarar leiksins vildu meina að miðjan hefði ekki verið tekin rétt við mikla óánægju áhorfenda á Selfossi.

„Dómarinn hefur sína samvisku og hann er harður á því að hann hafi ekki stigið á línuna. Ég held að það hafi munað svona feti, ég veit að þetta skiptir máli og reglur eru reglur en hversu margar hraðar miður hafa verið teknar í vetur án þess að menn hafi stigið akkúrat á línuna. Það hefði þurft gríðarlegt hugrekki til að flauta þetta mark og dómarinn er sannfærður um að hann hafi gert rétt og ég verð bara að treysta honum.“

Guðmundur Karl, blaðamaður mbl.is talaði einnig við þjálfarana eftir leikinn:

Atli Hilmarsson: Hentum sigrinum frá okkur

„Við vorum komnir með unninn leik en á einhvern óskiljanlegan hátt slökuðum við á í lokin. Við klúðruðum þessu sjálfir og ekkert annað. Selfyssingar höfðu alltaf trú á að þeir gætu fengið eitthvað út úr leiknum og þeir verðskulduðu stigið. Í heildina spiluðum við ágætlega en misnotuðum góð færi í lokin og fengum mörg hraðaupphlaup á okkur í kjölfarið,“ sagði Atli.

Sebastian Alexandersson: Virkilega stoltur af mínu liði

„Við lentum í miklu mótlæti í fyrri hálfleik og náum að lifa af sex marka mun á móti besta liði landsins. Við unnum seinni hálfleikinn með fjórum mörkum og vorum í dauðafæri að klára leikinn. Þetta var bara „deja vu“ frá síðasta heimaleik á móti Haukum,“ sagði Sebastian Alexandersson, þjálfari Selfoss, í samtali við Morgunblaðið eftir leik.

„Nú erum við búnir að henda frá okkur tveimur stigum fyrst á móti Íslandsmeisturunum og núna á móti verðandi deildarmeisturum. Við erum bara mættir og ég vona að það sé ekki of seint en ég er virkilega stoltur af mínu liði í kvöld,“ sagði Sebastian einnig.


Atli fer með sína menn austur fyrir fjall

17. mars 2011 - Akureyri handboltafélag skrifar

Leikur dagsins: Selfoss – Akureyri – útvarpslýsing

Þá byrjar ballið aftur og Akureyrarliðið heldur á Selfoss í dag. Leikurinn hefst klukkan 18:30 og skömmu áður hefst útvarpslýsing Adda Gunn og verður hægt að fylgjast með henni hér á síðunni.

Við vitum ekki annað en að allir leikmenn séu klárir í slaginn nema hvað Geir Guðmundsson og Hreinn Hauksson hafa verið úr leik og engin breyting á því í dag.

Ef útsendingin hljómar ekki nú þegar í tölvunni skaltu að sjálfsögðu passa að hafa kveikt á hátölurunum, ef það er ekki nóg skalt prófa að smella á linkinn í glugganum hér að ofan.

Ef spilarinn opnast ekki beint þarf hugsanlega að samþykkja að keyra viðbótarforrit sem boðið er upp á.

Einnig er hægt að fara á heimasíðu þeirra sem er http://963.is/ og smella síðan á myndina efst á síðunni til að hlusta.


Útvarp Suðurland og Addi Gunn klikka ekki frekar en fyrri daginn

16. mars 2011 - Akureyri handboltafélag skrifar

Selfoss - Akureyri á fimmtudaginn, bein útvarpslýsing

Á morgun, fimmtudag rúllar N1 deild karla af stað á ný eftir landsleikjahlé. Akureyri sækir Selfyssinga heim og þarf ekki að hafa mörg orð um mikilvægi leiksins fyrir bæði liðin. Þó staða Akureyrar sé vænleg á toppi deildarinnar þá mega menn ekkert misstíga sig og munu leikmenn að sjálfsögðu mæta af fullum krafti til leiks og ætla sér ekkert annað en sigur í leiknum.

Þó að Selfyssingar sitji í neðsta sæti deildarinnar þá halda þeir enn í vonina um áframhaldandi veru í N1-deild karla á næsta tímabili eftir góða ferð í Kópavoginn í síðustu umferð þar sem þeir unnu sannfærandi sigur á HK, 24-27 eftir að hafa haft fjögurra marka forustu í hálfleik.

Í næstu umferð þar á undan áttu þeir heimaleik gegn Haukum sem tókst með herkjum að krækja í jafntefli á lokasekúndum leiksins. Að sögn fjölmiðla var það reyndar með aðstoð frá dómurum leiksins sem færðu Haukum boltann á silfurfati á lokaandartökunum.

Sebastian Alexandersson, þjálfari Selfoss stóð í markinu hjá þeim gegn HK og varði eins og berserkur eða 19 skot en í sóknarleiknum var það Guðjón Drengsson sem fór fyrir sínum mönnum með 10 mörk. Annar af nýju útlendingunum þeirra, Milan Ivancev gerði sjö mörk og stórskyttan Ragnar Jóhannsson markahæsti maður deildarinnar gerði 6 mörk.

Það er því alveg ljóst að Selfyssingar eru á fljúgandi siglingu þessa dagana og Akureyri þarf að ná toppleik til að knýja fram hagstæð úrslit úr leiknum.

Líkt og þegar liðin mættust þann 10. febrúar síðastliðinn þá verður útvarp Suðurlands FM96.3 með beina útvarpslýsingu frá leiknum og þar er það enginn annar en Arnar Gunnarsson, Addi Maze sem verður við hljóðnemann. Eins og þeir vita sem fylgdust með lýsingunni síðast þá er Addi engum líkur og kryddar lýsinguna með kjarnyrtum lýsingarorðum. Leikurinn hefst klukkan 18:30 og útsendingin væntanlega rétt áður.

Ef útsendingin hljómar ekki nú þegar í tölvunni skaltu að sjálfsögðu passa að hafa kveikt á hátölurunum, ef það er ekki nóg skalt prófa að smella á linkinn í glugganum hér að ofan.

Ef spilarinn opnast ekki beint þarf hugsanlega að samþykkja að keyra viðbótarforrit sem boðið er upp á.

Einnig er hægt að fara á heimasíðu þeirra sem er http://963.is/ og smella síðan á myndina efst á síðunni til að hlusta.

Arnar, Addi Gunn eða Addi Maze eins og við könnumst best við hann er að sjálfsögðu Akureyringum að góðu kunnur en hann lék hér bæði með Þór og raunar einnig með KA á árum áður en hefur undanfarin ár leikið með Selfyssingum og þjálfað með góðum árangri.

Hér eru tvær myndir sem við fundum af Adda. Á þeirri eldri sem er frá 1999 er Arnar með viðurkenningu sem hann hlaut sem handknattleiksmaður Þórs árið 1999.
Hin myndin sýnir þá félaga Arnar (í Akureyrarbúning) og Hafþór Einarsson í góðu yfirlæti í Laugardalshöllinni að fylgjast með bikarúrslitaleik Akureyrar og Vals. Það er nokkuð ljóst með hvoru liðinu þeir standa.

Til baka    Senda á Facebook

Umsjón og hönnun: Stefán Jóhannsson og Ágúst Stefánsson