Magnaður sigur Akureyrar á FH í þriðja leik - sætaferð á miðvikudaginn - Akureyri Handboltafélag

Warning: Undefined array key "frettanr" in /web/akhandadmin/public_html/index.php on line 15
Magnaður sigur Akureyrar á FH í þriðja leik - sætaferð á miðvikudaginn - Akureyri Handboltafélag


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Fyrri leiktímabil

Tímabilið 2010-11

Leikmenn meistarafl. karla

Ljósmyndir frá leiknum

Myndband frá leiknum

Textalýsing frá leiknum

Tölfræði leiksins

		Akureyri - FH 23-22 (12-13)
		Úrslit N1 deildar karla
		Íþróttahöllin
		Sun 1. maí 2011 klukkan: 16:00
		Dómarar: Ingvar Guðjónsson og Jónas Elíasson. Eftirlit: Guðjón L Sigurðsson

Umfjöllun


Sveinbjörn átti stórleik í dag		1. maí 2011 - Akureyri handboltafélag skrifar Magnaður sigur Akureyrar á FH í þriðja leik - sætaferð á miðvikudaginn Það var allt undir hjá Akureyrarliðinu í dag þegar tekið var á móti FH ingum sem með sigri hefðu tryggt sér Íslandsmeistaratitilinn í dag. Það var greinilegt frá fyrstu mínútu að Akureyrarliðið ætlaði sér sigur í dag. Heimir Örn Árnason gaf tóninn með góðum mörkum úr fyrstu tveim sóknunum og staðan 2-0. Heimir Örn var ekkert að tvínóna við hlutina og skorar fyrsta mark leiksins FH ingar gáfust ekki svo léttilega upp, jöfnuðu leikinn og síðan var jafnt á öllum tölum í fyrri hálfleik, FH ingar reyndar oftast með frumkvæðið og leiddu í hálfleik 12-13. Hjá FH kom Ólafur Gústafsson inná þegar nokkuð var liðið á hálfleikinn og gerði mikinn usla, skoraði fjögur af fimm síðustu mörkum FH liðsins. Hjá Akureyri fór Heimir fyrir sóknarleiknum og skoraði fjögur mikilvæg mörk. FH skoraði fyrsta mark seinni hálfleiks og náði þar með tveggja marka forystu í fyrsta sinn í leiknum en Akureyrarliðið svaraði fyrir sig og jafnaði í 14-14. Halldór Logi Árnason kom inn á línuna og átti flotta innkomu en hann skoraði þrjú mörk af harðfylgi af línunni. Halldór Logi kom sterkur inn á línuna og skorar eitt af þremur mörkum sínum Sveinbjörn Pétursson var í svakalegum ham í seinni hálfleiknum og skellti heldur betur í lás. Það nýttu félagar hans og skoruðu fjögur mörk í röð og staðan orðin 19-16 fyrir Akureyri og útlitið bjart. Sveinbjörn lokar markinu FH liðið var samt ekkert á því að gefast upp og þeir jöfnuðu í 19-19 en Halldór Logi, Bjarni og Heimir sáu til þess að forystan varð aftur þrjú mörk, 22-19 og þann mun náði FH aldrei að vinna upp. Á lokasekúndum leiksins fékk FH þó tækifæri til að jafna en misstu boltann frá sér og Guðmundur Hólmar skoraði í tómt FH markið en raunar aðeins of seint þannig að sigur Akureyrar varð eitt mark, 23-22. Enn einum háspennuleiknum í þessu frábæra einvígi lauk því með baráttu fram á síðustu sekúndu, að þessu sinni féll sigurinn Akureyringum í hag og var svo sannarlega kominn tími til. Sveinbjörn Pétursson átti stórbrotinn leik, sérstaklega í seinni hálfleik og Heimir Örn Árnason sýndi enn og aftur hve gríðarlega mikilvægur leikmaður hann er. Guðmundur Hólmar átti ekki sinn besta leik, sóknarlega en var frábær í vörninni. Liðið allt á hrós skilið fyrir frábæra baráttu allan tímann, sóknarleikurinn var fjölbreyttari og markvissari en oft áður og bara flottur bragur á liðinu. Mörk Akureyrar: Heimir Örn Árnason 7, Bjarni Fritzson 4, Oddur Gretarsson 4 (2 úr vítum), Halldór Logi Árnason 3, Daníel Einarsson 2, Guðlaugur Arnarsson, Hreinn Þór Hauksson og Hörður Fannar Sigþórsson 1 mark hver. Í markinu varði Sveinbjörn Pétursson 21 skot, þar af 1 vítakast. Mörk FH: Ásbjörn Friðriksson 8 (5 úr vítum), Ólafur Guðmundsson 6, Ólafur Gústafsson 5, Atli Rúnar Steinþórsson 2 og Örn Ingi Bjarkason 1. Markverðir FH vörðu samtals 12 skot, Daníel Andrésson 5 og Pálmar Pétursson 7. Hægt er að skoða fleiri myndir Þóris Tryggvasonar hér. Það hefur ýmsum orðið tíðrætt um að FH liðið hefði yfirburði hvað breiddina varðaði og vissulega hefur liðið góðum hópi á að skipa en þó vekur athygli að einungis fimm leikmenn þeirra skora mark í leiknum og þar af þrír þeirra 19 af mörkunum 22. En hjá Akureyri var meiri dreifing þar sem átta leikmenn skora mörkin 23. Nú fá leikmenn smáhvíld en næsti leikur er í Kaplakrika miðvikudaginn 4. maí klukkan 19:30 og nú þarf að fylgja þessum frábæra leik eftir og jafna einvígið þar þannig að við fáum hreinan úrslitaleik hér í Höllinni föstudaginn 6. maí. Þessi vilja örugglega fá fimmta leikinn í Höllina á föstudaginn Sætaferðir í Hafnarfjörðinn á miðvikudaginn Það verður boðið upp á sætaferðir á þann leik. Verið er að vinna í útfærslu og tímasetningu á ferðinni og nánari upplýsingar koma hér á síðuna, fylgist með fréttum hér á síðunni.


Tengdar fréttir
Sveinbjörn varði 617 skot tímabilið 2010-2011		18. nóvember 2015 - Akureyri handboltafélag skrifar Þegar Bubbi varði tvisvar með höfðinu gegn FH Akureyri tekur á móti FH á morgun í KA-Heimilinu klukkan 19:00. Af því tilefni ætlum við að rifja upp skemmtileg tilþrif úr fyrri viðureign liðanna. Markvörðurinn knái hann Sveinbjörn Pétursson fór á kostum í þriðja leik Akureyrar og FH í úrslitum Íslandsmótsins árið 2011 þegar Akureyri sigraði 23-22. Sveinbjörn varði 21 skot (51% varsla) og þar af tvö með höfðinu. Kappinn er hinsvegar ákaflega harður af sér og lét það ekki á sig fá og kláraði leikinn af krafti og lék lykilhlutverk í sigrinum góða.


Sveinbjörn og Heimir áttu stórbrotinn leik		2. maí 2011 - Akureyri handboltafélag skrifar Viðtöl eftir þriðja leik Akureyrar og FH Hér höfum við safnað saman nokkrum viðtölum við leikmenn og þjálfara eftir þriðja leik Akureyrar og FH í úrslitaeinvíginu. Það er Andri Yrkill Valsson á Morgunblaðinu sem á fyrsta skammtinn að þessu sinni: Guðlaugur Arnarsson: Vildum þetta alveg ógurlega mikið „Þetta var alveg eins og fyrstu tveir leikirnir eru búnir að vera, stál í stál allan tímann, en núna féll þetta okkar megin í lokin,“ sagði varnarjaxlinn Guðlaugur Arnarsson í liði Akureyrar, eftir sigurinn á FH í þriðja leiknum í úrslitaeinvíginu um Íslandsmeistaratitilinn, 23:22. Guðlaugur var undir handleiðslu nuddara þegar blaðamaður spjallaði við hann eftir leik. „Þetta er bara endalaus barátta og ekkert annað. Viljinn spilaði sterkt inn hjá okkur, við vildum þetta alveg ógurlega mikið. Við höfum tapað síðustu tveimur leikjum mjög naumlega og það vantaði ekki viljann hjá okkur þar, en við vildum þetta alveg ógurlega í þetta skiptið. Það er þungu fargi af okkur létt og við munum fagna í kvöld en mætum alveg brjálaðir í Krikann á miðvikudaginn. Það var frábær stemning fyrir sunnan í síðasta leik og ég skora á alla að mæta.“ Gulli fagnar dýrmætum sigri í leikslok Spurður hvort hann hefði meiðst eitthvað að ráði fyrst verið væri að hlúa að honum neitaði hann því hlæjandi á meðan nuddarinn skaut á hann fyrir kerlingavæl. Guðlaugur segir að liðsmenn Akureyrar hafi fulla trú á að ná góðum úrslitum í næsta leik sem fer fram næstkomandi miðvikudag í Kaplakrika. „Það verður rosalega erfiður leikur fyrir sunnan, alveg eins og þetta er búið að vera. Það er ekkert hægt að segja til um hvernig fer, þetta er bara stöngin út, stöngin inn. Við ætlum að koma hérna aftur á föstudaginn og spila fyrir fullu húsi, það kemur ekkert annað til greina,“ sagði Guðlaugur Arnarsson, leikmaður Akureyrar. Heimir Örn Árnason: Frábært einvígi Það er rosalega lítið sem munar á þessum liðum; spurning um stöngin inn eða stöngin út, sagði Heimir Örn Árnason, fyrirliði Akureyrar, eftir að liðið sigraði FH í þriðja úrslitaleik liðanna um Íslandsmeistaratitilinn í handbolta á Akureyri í dag. Sjá vídeóviðtal. Heimir í góðum fíling með sínum mönnum Baldvin Þorsteinsson: Lélegur sóknarleikur „Lélegur sóknarleikur fór alveg með okkur í þessum leik,“ sagði Baldvin Þorsteinsson, leikmaður FH. „Vörnin var fín en sóknarnýtingin var léleg á móti. Við komum vel stemmdir til leiks, andinn var góður í hópnum og ekkert stress. En eins og hefur oft komið fram áður eru liðin alveg hrikalega jöfn, við höfum unnið tvisvar mjög naumlega og þeir gerðu það sama í þessum leik. Það er því ekki hægt að segja að eitthvað hafi farið úrskeiðis hjá okkur, liðin eru bara svo jöfn að þetta hlaut að falla einhvern tímann með þeim.“ Baldvin segir að auðvelt verði að horfa framhjá þessum leik og hefja undirbúning fyrir þann næsta sem fer fram á miðvikudaginn. „Þýðir ekkert að dvelja við þetta tap, nú tekur bara næsti leikur við. Það þarf bara að gera sig kláran fyrir þá baráttu og svo sjáum við til á miðvikudaginn hvernig fer,“ sagði Baldvin Þorsteinsson. Baldvin brýst í gegnum vörnina Næst kíkjum við í Vikudag þar sem Þröstur Ernir Viðarsson ræðir við Atla Hilmarsson, Heimi Örn og Ásbjörn Friðriksson: Atli Hilmarsson: Erum tilbúnir í fimm leiki Þungu fargi var létt af Atla Hilmarssyni þjálfara Akureyrar eftir eins marks sigur liðsins gegn FH á heimavelli í dag, 23:22, í þriðja leik liðanna í úrslitum Íslandsmóts karla í handknattleik. Akureyringar sáu til þess að enginn bikar fór á loft í dag og er staðan í einvíginu 2:1 fyrir FH. Frábær stemmning var í Höllinni en alls voru áhorfendur 1058 talsins. „Þessir leikir eru mjög stressandi og þetta sýnir bara hversu lítill munur er á liðinum. Það mátt lítið útaf bregða en við erum á lífi í þessari baráttu og erum tilbúnir í þessa fimm leiki sem þarf,“ sagði Atli. „Það er auðvitað léttir að vera kominn með sigur. Við vorum svolítið ósáttir að fá ekkert út úr fyrstu tveimur leikjunum, það féll ekkert með okkur í þeim leikjum. Við bættum varnarleikinn í seinni hálfleik hjá okkur í dag og Sveinbjörn (Pétursson) kom líka sterkur inn í markið og þá fengum við hraðaupphlaupsmörk sem eru gulls í gildi. Við erum vel á lífi í þessu og mér finnst vera stígandi í okkar leik og við eigum nóg eftir. Við ætlum klárlega að mæta hér í Höllina aftur á föstudaginn. Það var frábær stuðningur sem við fengum hér í dag og vonandi fáum við góðan stuðning í Kaplakrika á miðvikudaginn,“ sagði Atli. Atli þakkar áhorfendum stuðninginn Heimir Örn Árnason: Ætla mæta aftur í Höllina á föstudaginn Heimir Örn Árnason fyrirliði Akureyrar var að vonum kampakátur eftir sigurinn. Heimir skaut framhjá úr upplögðu færi á lokasekúndunum í öðrum leiknum í Kaplakrika, en svaraði því með stjörnuleik í Höllinni í dag. „Þetta var alveg fáránlega stressandi þarna í lokin. Ég veit ekki hvað ég hefði gert ef við hefðum klúðrað þessu í lokin. Ég hefði örugglega snappað þannig að það var eins gott að við kláruðum þetta. Það hefði verið niðurlæging að tapa þessu einvígi 0:3 og hefði ekki verið sanngjarnt,“ sagði Heimir, sem var markahæstur í liði Akureyrar í dag með 7 mörk. „Ég var svo brjálaður eftir leik númer tvö að ég er ennþá að jafna mig. Þetta var eina leiðin til þess að svara þessu klúðri. Við erum vel á lífi og ég er handviss um það leikurinn á miðvikudaginn verður svipað spennandi og vonandi dettur þetta aftur okkar megin. Þetta er svo gaman maður að ég ætla mæta aftur í Höllina á föstudaginn,“ sagði Heimir. Ásbjörn Friðriksson: nýr leikur á miðvikudaginn Ásbjörn Friðriksson í liði FH var ekki jafn upplitsdjarfur er Vikudagur hitti hann eftir leik. „Við vorum nálægt því að tryggja okkar framlengingu og þar af leiðandi tíu mínútur í viðbót og aldrei vita hvað hefði gerst þar. Okkur tókst það ekki þannig að það er bara nýr leikur á miðvikudaginn,“ sagði Ásbjörn. Leikir liðanna hafa verið frábær skemmtun fyrir áhorfendur og góð auglýsing fyrir íslenskan handbolta. „Þetta eru áþekk lið. Bæði lið eru að spila góðan varnarleik og leggja sig 100 prósent fram. Við lögðum okkur vel fram í dag en það voru nokkur smáatriði í okkar leik sem við þurfum að fara yfir fyrir næsta leik. Vonandi náum við því fram þá.“ FH fær annað tækifæri til þess að tryggja sér Íslandsmeistaratitilinn í fjórða leiknum á miðvikudaginn og það á heimavelli í Kaplakrika. „Fyrst við fengum tækifæri til þess að klára þetta í dag að þá reyndum við það að sjálfsögðu en svo bara reynum við á miðvikudaginn aftur. Stuðningsmennirnir okkar hefðu sennilega viljað fagna titlinum í dag en þeir fá hins vegar einn heimaleik í viðbót og vonandi náum við að fylla kofann í næsta leik og fá álíka skemmtun og í síðasta heimaleik hjá okkur,“ sagði Ásbjörn. Ásbjörn er alltaf hættulegur Að lokum er það Hjalti Þór Hreinsson á visir.is og Fréttablaðinu sem hefur orðið: Atli Hilmarsson: Það er enn líf í okkur Mikið hefur verið rætt um breiddina í liði Akureyrar, margir telja hana of litla, en Atli Hilmarsson gefur því langt nef. Maður eins og Halldór Logi Árnason hafi komið inn og staðið sig vel, Halldór skoraði þrjú mikilvæg mörk í gær úr þremur skotum. Hjá FH voru þrír menn sem skoruðu 19 af 22 mörkum. Ásbjörn og Ólafur Guðmundsson skoruðu samtals 14 mörk en þeir skutu líka 32 sinnum að markinu. Markvarsla liðsins var svo alls ekki nógu góð. Atli náði þeim magnaða árangri árið 2002 að stýra KA til Íslandsmeistaratitilsins eftir að hafa lent 2-0 undir í einvígi, þá við Val. Hann segir að samanburður við slíkt sé afstæður en hann sér ýmislegt sameiginlegt með því einvígi og nú. „Til dæmis er stígandi í okkar leik, við vorum betri í þessum leik en þeim fyrsta, sem er jákvætt. Við vorum alveg ákveðnir í því að láta þá ekki lyfta bikarnum hérna, ég lenti í því með KA gegn Haukum einu sinni og það var ömurlegt. En eins og 2002 þá vitum við að þetta er hægt, við getum orðið meistarar, og það er hugarfarið sem við tókum inn í leikinn,“ sagði Atli. „Það er enn líf í okkur. Þetta var þvílík barátta og jafn leikur, eins og hinir tveir. Vörnin okkar var betri í seinni hálfleik, þá gekk betur að ganga út í þá og brjóta á þeim, en Sveinbjörn var alveg frábær líka,“ sagði Atli. Guðlaugur: Sveinbjörn var frábær Guðlaugur Arnarsson var sem klettur í vörn Akureyrar í dag er liðið vann FH 23-22 í æsispennandi leik. Akureyri er 2-1 undir í einvíginu en lék betur í dag en í hinum tveimur leikjunum. Guðlaugur í myndbandsviðtali. Heimir og Baldvin: Ræðst á lokaskotinu Æskufélagarnir Heimir Örn Árnason og Baldvin Þorsteinsson skiptust á léttum skotum eftir sigur Akureyrar á FH í dag, 23-22. Heimir segir að úrslitin í einvíginu ráðist ekki fyrr en á lokaskoti þess, á föstudaginn. „Þetta hafa verið hnífjafnir leikir og þetta verður þannig áfram. Þetta ræðst síðan bara á lokaskotinu,“ sagði Heimir fyrirliði Akureyrar sem er staðráðinn í að spila fimm leiki og taka titilinn á heimavelli á föstudaginn. Baldvin var eðlilega ekki jafn kátur en býst við hörkuleik á miðvikudaginn. Myndbandsviðtal við þá félaga. Pálmar Pétursson: Datt þeirra megin í dag Húsvíkingurinn Pálmar Pétursson var eðlilega hundsvekktur með tapið gegn Akureyri í dag. FH fór tómhent heim að norðan eftir 23-22 sigur Deildarmeistaranna í einvíginu um Íslandsmeistaratitilinn. Pálmar varði ágætlega í markinu en kollegi hans í rammanum hinumegin gerði gæfumuninn fyrir Akureyringa. Myndbandsviðtal við Pálmar. Pálmar í deildarleik liðanna í febrúar


Allt að fara af stað		1. maí 2011 - Akureyri handboltafélag skrifar Leikur dagsins: Bein textalýsing Nú er komið í ljós að við getum verið með textalýsingu frá leiknum. Smelltu hér til að fylgjast með.


Gulli skoraði tvö í síðasta leik, hvað gerir hann í dag?		1. maí 2011 - Akureyri handboltafélag skrifar Leikur dagsins: Troðfyllum Höllina og gefum allt í leikinn Nú er ljóst að ekkert nema sigur kemur til greina í leik Akureyrar og FH í dag. Það er einfaldlega ekki í boði að láta FH-inga lyfta bikarnum hér á okkar heimavelli. Við þurfum ekki að hafa mörg orð um mikilvægi þess að troðfylla Höllina og berjast til síðasta manns. Leikirnir tveir sem búnir eru hafa verið algjörlega stál í stál og í raun hefði hvort liðið sem var getað gengið af velli sem sigurvegari. Við höfum áður bent á stöðuna sem var uppi í einvígi KA og Vals frá 2002 og nú er hreinlega ekkert annað í stöðunni en að endurtaka leikinn frá vorinu 2002 en til þess þurfa allir að leggjast á eitt. Frá fyrsta leik liðanna í úrslitarimmunni Leikurinn hefst klukkan 16:00 í dag og húsið opnað klukkan 15:00. Leikurinn er að sjálfsögðu í beinni útsendingu RÚV en vegna sérstakra aðstæðna verður ekki bein textalýsing frá honum hér á heimasíðunni í dag.

Til baka Senda á Facebook

Umsjón og hönnun: Stefán Jóhannsson og Ágúst Stefánsson

web statistics