Warning: Undefined array key "frettanr" in /web/akhandadmin/public_html/index.php on line 15
Háspennujafntefli hjá FH og Akureyri - Akureyri Handboltafélag
  Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Fyrri leiktímabil

Tímabilið 2011-12

Leikmenn meistarafl. karla
Úrslit leikja
Deild karla




Ljósmyndir frá leiknum     Textalýsing frá leiknum     Tölfræði leiksins 
    FH - Akureyri  29-29 (14-14)
N1 deild karla
Kaplakriki
Mið 23. nóvember 2011 klukkan: 18:30
Dómarar: Ingvar Guðjónsson og Jónas Elíasson. Eftirlitsmaður Kristján Halldórsson
Umfjöllun

Guðmundur Hólmar, Stefán Guðnason og Bjarni settu heldur betur svip á leikinn





23. nóvember 2011 - Akureyri handboltafélag skrifar

Háspennujafntefli hjá FH og Akureyri

Það var ljóst frá fyrstu mínútu leiksins í kvöld að Akureyri ætlaði að sýna landsmönnum að síðasti leikur liðanna á sama stað var eitthvað sem ekki yrði boðið upp á aftur. Akureyri fór af stað af miklum krafti og virtist ætla að valta yfir heimamenn. Sveinbjörn fór á kostum í markinu og bæði vörn og sóknarleikur til fyrirmyndar.

Hér á eftir fer umfjöllun Snorra Sturlusonar hjá sport.is ásamt myndum sem hann birti á vefnum sport.is.

Akureyringar hófu leikinn í Kaplakrika í kvöld af miklum krafti og höfðu greinilega lært ákveðna lexíu af stóru tapi á þessum sama stað í Eimskipsbikarkeppninni á dögunum. Norðanmenn voru frískir og fjörugir á upphafsmínútunum, keyrðu grimmt í bakið á FH-ingum og nýttu færin sín vel. Vörnin þeirra var í góðum gír og Sveinbjörn í miklum þar fyrir aftan og fyrr en varði höfðu Akureyringar náð fimm marka forystu, fyrst 9-4 og svo 10-5. Þá loksins virtust FH-ingar átta sig á óvenjulegri tímasetningu leiksins, ákváðu að mæta til leiks og létu þá hraustlega til sín taka. Vörnin small í lag og Daníel hreinlega lokaði markinu á löngum köflum, skotvalið varð álitlegra og nýtingin reyndar líka, en á sama tíma féll Akureyringum eldur í ketil. Þeir urðu bráðir, óðagotið mikið og véfengja má ákvarðanatökun á löngum köflum.

Takturinn var FH-inga á þessum kafla og fyrr en varði voru þeir búnir að jafna metin, 11-11, og skömmu síðar voru þeir komnir yfir, 12-11, höfðu þá tekið sprett þar sem þeir skoruðu sjö mörk gegn einu. Lokamínútur fyrri hálfleiksins voru jafnar, Akureyringar ákváðu að bogna en brotna ekki og staðan í hálfleik var jöfn, 14-14. Líklega má færa fyrir því haldbær rök að sú staða hafi verið sanngjörn, Akureyringar voru sterkari framan af fyrri hálfleiknum en FH-ingar réðu ferðinni síðari hlutann.


Hörður Fannar er greinilega að komast á gott skrið eftir meiðslin sem hann hlaut einmitt í leik gegn FH í haust

Sama jafnræðið var með liðunum framan af síðari hálfleiknum og glímutökin voru karlmannleg. Kappar eins og Ólafur Gústafsson og Guðmundur Hólmar Helgason létu talsvert að sér kveða, Andri Berg sýndi margfrægan baráttuvilja og Heimir Örn hjó á hnúta, ekki bara með mörkum heldur með því að spila félaga sína uppi. Þegar síðari hálfleikurinn var hálfnaður var staðan enn jöfn, 22-22, FH-ingar gerðu sig nokkrum sínum líklega til að rífa sig frá gestunum en barátta og vilji Akureyringar var til eftirbreytni, nokkuð sem virst hefur vanta í nokkrum leikja liðsins í vetur, einkum þegar á móti blæs.


Heimir átti magnaðan leik en fékk þrjár brotvísanir í leiknum

FH-ingar náðu tveggja marka forystu í fyrsta sinn í leiknum þegar þeir komust í 26-24 og rúmar tíu mínútur til leiksloka, þá hafði staðið jafnt á öllum tölum síðan í stöðunni 11-11. Akureyringar brugðust við þessari sveiflu með því að skora fjögur næstu mörkin í leiknum og breyta stöðunni í 28-26 sér í vil, ekki síst fyrir tilstilli Stefáns Guðnasonar sem tók sér stöðu á milli stanganna. FH-ingar fundu engar glufur á þessum kafla, en Ólafur Gústafsson braut loksins ísinn tæpum fimm mínútum fyrir leikslok, 27-28.

Lokamínúturnar voru hádramatískar, spennan nánast áþreifanleg. Títtnefndur Ólafur Gústafsson jafnaði metin, 29-29, rúmri mínútu fyrir leikslok, síðasta sókn Akureyringa rann út í sandinn þrettán sekúndum fyrir leikslok og Heiðar Þór Aðalsteinsson uppskar rautt spjald fyrir brot fimm sekúndum síðar auk þess sem FH-ingar fengu vítakast. Stefán Guðnason toppaði frábæra innkomu sína með því að verja vítið. Ari Magnús Þorgeirsson FH-ingur gerðist í kjölfarið brotlegur og fékk að líta rauða spjaldið, en sekúndurnar þrjár sem eftir lifðu nægðu ekki stórra verka. Niðurstaðan er jafntefli 29-29 og geta bæði lið unað nokkuð sátt við sitt.

Mörk FH: Þorkell Magnússon 8 (5 úr vítum), Ólafur Gústafsson 8, Andri Berg Haraldsson 6, Ari Magnús Þorgeirsson 3, Sigurður Ágústsson 2, Halldór Guðjónsson 1, Hjalti Þór Pálmason 1.
Varin skot: Daníel Freyr Andrésson 18 þar af 1 vítakast.
Utan vallar: 14.mínútur.

Mörk Akureyrar: Bjarni Fritzson 8 (2 úr vítum), Guðmundur Hólmar Helgason 8, Oddur Gretarsson 5, Hörður Fannar Sigþórsson 4, Heimir Örn Árnason 3, Bergvin Þór Gíslason 1.
Varin skot: Sveinbjörn Pétursson 17, Stefán Guðnason 4 þar af 1 vítakast.
Utan vallar: 14 mínútur.

Sjá umfjöllun Snorra Sturlusonar og myndir á sport.is

Tengdar fréttir

Andri Berg telur mikilvægt að hafa góðar gætur á Heimi Árnasyni



23. nóvember 2011 - Akureyri handboltafélag skrifar

Leikur dagsins: FH - Akureyri í beinni á SportTV.is

Nú styttist í leik dagsins þar sem Akureyri Handboltafélag sækir FH heim í Kaplakrikann. Leikurinn verður í beinni útsendingu á SportTV.is og hefst útsending þeirra klukkan 18:20 en leikurinn sjálfur klukkan 18:30.

Smelltu hér til að horfa á útsendinguna.

Andri Berg Haraldsson, leikmaður FH á von á erfiðum leik en hann er í viðtali við vefinn sport.is í dag.
„Leikurinn leggst bara mjög vel í mig. Það er alltaf gaman að spila á móti utanbæjarmönnum,“ segir Andri Berg við Sport.is í dag.

Andri Berg býst við erfiðum leik: „Já það er klárt. Við unnum þá stórt síðast og þeir vilja örugglega kvitta fyrir það og svo eru þeir náttúrulega líka með hörku lið.“

Leikurinn í dag er mikilvægur fyrir bæði lið og segir Andri mikilvægt að slaka ekki á. „Bæði Akureyri og Valur eru farin að safna stigum svo það má hvergi slaka á. Svo líka til að halda í við Fram og Hauka á toppnum.“

Andri segir að það þurfi að hafa sérstakar gætur á Heimi Erni, skyttunum hjá Akureyri og hornamönnum þeirra:

„Þeir hafa marga góða leikmenn og líklega eitt sterkasta byrjunarlið í deildinni. Heimir Örn er að mínu mati þeirra besti maður, frábær í vörn og sókn og gerir aðra leikmenn betri í kringum sig. Skytturnar þeirra, Geir og Guðmundur, eru einnig gríðarlega öflugir og þá þarf að taka föstum tökum. Hornmennirnir þeirra, Oddur og Bjarni, eru virkilega góðir og sérstaklega eru þeir öflugir hraðaupphlaupsmenn. Svo er varnarleikur þeirra mjög öflugur og eru þeir góðir í notfæra sér það með hraðaupphlaupum,“ sagði Andri að lokum við Sport.is.


Enn einn stórleikur þessara liða í uppsiglingu

21. nóvember 2011 - Akureyri handboltafélag skrifar

Útileikur á miðvikudag gegn FH – í beinni á SportTV

Það verður brugðið út af vananum þessa vikuna og leikið á miðvikudag þegar Akureyri Handboltafélag heldur öðru sinni í Hafnarfjörðinn og leikur við Íslandsmeistarana í FH. Það þarf ekki að hafa mörg orð um síðustu viðureign liðanna, í bikarnum og ekki spurning að Akureyrarliðið ætlar að kvitta fyrir þann leik.

Verkefnið er vissulega erfitt enda FH með hörkulið og ljóst að okkar menn verða að leggja sig alla í verkefnið. FH liðið hefur tapað tveim leikjum það sem af er N1 deildarinnar, báðum gegn Fram og einnig gerði liðið jafntefli við HK.

Leikurinn hefst klukkan 18:30 á miðvikudaginn og mikilvægt að stuðningsmenn á höfuðborgarsvæðinu mæti öflugir til leiks, líkt og leikmennirnir því hvert stig er dýrmætt þessa stundina.

Fyrir þá sem verða hér fyrir norðan er rétt að benda á að SportTV.is ætlar að sýna leikinn í beinni útsendingu, nánar um það þegar nær dregur.

Til baka    Senda á Facebook

Umsjón og hönnun: Stefán Jóhannsson og Ágúst Stefánsson