Dómarar: Gísli Hlynur Jóhannsson og Hafsteinn Ingibergsson
Umfjöllun
Tengdar fréttir
Sveinbjörn var gríðarlega mikilvægur í leiknum
2. mars 2012 - Akureyri handboltafélag skrifar
Hvað sögðu menn eftir leikinn gegn Aftureldingu?
Við höfum fundið nokkur viðtöl við leikmenn og þjálfara eftir leik Akureyrar og Aftureldingar frá því í gær. Hér er um að ræða viðtöl Stefáns Stefánssonar á Morgunblaðinu svo og vídeóviðtöl Siguróla Sigurðssonar á sport.is við þjálfarana. Byrjum á viðtölum Morgunblaðsins:
Sveinbjörn Pétursson: Þetta er allt í kollinum
„Vissulega spáir maður í hvernig mótherjar skjóta, það er hluti af ferlinu að kíkja á það og skoða hvar þeir hafa verið að skjóta á mann í gegnum tíðina svo þetta var því allt í kollinum á manni og ég hitti á góðan dag í dag,“ sagði Sveinbjörn Pétursson, markvörður Akureyringa, sem öðrum fremur lagði grunn að 28:23 sigri á Aftureldingu að Varmá í gærkvöldi.
Þó að hann hafi „aðeins“ varið 15 skot voru þau flest úr opnum færum þegar Mosfellingar voru að reyna komast inn í leikinn (aðrar heimildir segja reyndar að Sveinbjörn hafi varið 19 skot.
„Við unnum vel fyrir sigrinum, þetta var að vísu ekki fallegt á köflum en við vissum að Aftureldingarmenn berjast eins og ljón, eins og í síðasta leik þegar FH var heppið að vinna þá. Við vissum því að við værum að fara í barning hérna í kvöld og vorum tilbúnir fyrir það svo við stóðum uppi sem sigurvegarar,“ bætti Sveinbjörn við.
Ásgeir Jónsson: Það dugar ekkert hálfkák gegn Aftureldingu
„Ég er ánægður með að hafa komið hingað að spila, frekar en eitthvað annað og það var ánægjulegt og huggulegt af Mosfellingum að gefa mér blóm,“ sagði Ásgeir Jónsson Akureyringur eftir 23:28 sigur á Aftureldingu í Mosfellsbænum. Ásgeir lék einmitt með Aftureldingu á síðasta tímabili og lék í kvöld í fyrsta sinn gegn sínum fyrri félögum en Einar Scheving aðstoðarmaður Aftureldingar færði honum blómvönd í hálfleik. Honum var sitt fyrra lið hugleikið.
„Leikurinn var erfiður, ég veit vel að Afturelding er gott lið með mikið af fínum handboltamönnum en það vantar oft herslumuninn þrátt fyrir að liðið hætti aldrei og berjist fyrir sínu svo það þarf virkilega góðan leik til að vinna þetta lið og dugar ekkert hálfkák. Þeir voru okkur virkilega erfiðir í dag og í raun ekki fyrr en síðustu tíu mínúturnar sem við fengum hraðaupphlaupin og auðveldu mörkin, sem við vorum að leita að allan leikinn enda þá voru Mosfellingar farnir að taka áhættu til að komast inn í leikinn, sem gekk ekki.“
Guðlaugur Arnarsson: Barningur eins og alltaf
„Tvö góð stig,“ sagði Guðlaugur Arnarsson, varnarjaxl að norðan, eftir leikinn. „Þetta var samt barningur eins og alltaf hérna í Mosfellsbænum því þeir kunna að berjast þar og taka vel á því. Við vissum að Afturelding væri hörkugott lið, sem hefði bætt sig mikið og bara spurning um hvenær þeir færu taka stig svo við bjuggum okkur undir alvöruleik, sem var reyndin. Við erum með augun á úrslitakeppninni og til að komast í hana þurfum við að vinna leiki en það er mikil barátta milli sex eða sjö liða á toppnum.“
Atli Hilmarsson: Máttu ekki vinna þennan leik, bara næsta
„Við þurftum að hafa mikið fyrir þessum leik gegn góðu liði sem tapaði naumlega fyrir FH í síðasta leik,“ sagði Atli Hilmarsson, þjálfari Akureyrar, eftir 23:28 sigur í Mosfellsbænum í kvöld. „Mér finnst Afturelding hafa verið að bæta sig og er að nálgast sigur en við ætluðum ekki að verða fyrir því í dag, frekar að liðið vinni næsta leik og ég óska þeim alls hins besta. Liðið hefur verið svo nálægt því að undanförnu, það vantar bara herslumuninn svo það verður að mæta í svona leik af fullum krafti.“
Heimir Örn Árnason náði bara að spila framan af og þá tók Oddur Gretarsson við stöðu leikstjórnanda. „Ég þurfti aðeins að breyta til þegar Heimir Örn fór út af en Oddur hefur spilað á miðjunni í síðustu tveimur leikjum en leikur okkar riðlaðist ekki. Varnarleikurinn var síðan betri í seinni hálfleik svo Afturelding þurfti að taka erfið skot eftir að hafa fengið opin skot fyrir hlé,“ bætti Atli við.
Sverrir Hermannsson: Sveinbjörn drap okkur alveg
„Við spiluðum vel en Sveinbjörn var okkur erfiður,“ sagði Sverrir Hermannsson úr Aftureldingu eftir leikinn. „Við ætluðum bara að spila að okkar hætti en fórum auðvitað yfir sóknarleik Akureyringa og vorum viðbúnir enda spiluðum við flottan varnarleik og sóknarleikurinn var líka flottur en Sveinbjörn í markinu hjá þeim gerði út um leikinn með því að verja í dauðafærum, það drap okkur alveg fyrir utan hörmulega byrjun. Það er erfitt að byrja leikinn með því að lenda fjórum mörkum undir og þurfa síðan að elta allan leikinn. Ég er því sáttur við fyrri hálfleikinn þegar okkur tókst að opna vörn Akureyringa og ég bjóst við að við myndum ná lengra en Akureyringar voru bara sterkari en við í seinni hálfleik.“
Jóhann Jóhannsson: Erfitt að elta
„Ég veit ekki hvað fór með þetta hjá okkur, það er auðvitað hrikalega erfitt að elta gegn liði eins og Akureyri svo þetta var grátlegt,“ sagði Jóhann Jóhannsson, leikstjórnandi Aftureldingar, sem skoraði 5 mörk. Baráttuhugurinn var þó í lagi.
„Við erum svolítið í því að lenda undir í byrjun og elta síðan mótherjana allan leikinn, höfum reyndar bætt okkur í því upp á síðkastið en nú kom það aftur. Við vinnum næsta leik. Okkur hungrar alltaf mikið í sigur en ég held það sé ljóst að við lendum í sjöunda sætinu og förum í umspil. Við verðum öflugir þar, höfum verið í því áður og mér finnst við á mikilli uppleið, æfðum vel um áramótin og erum að styrkja okkur.“ Það má alveg taka undir það, Afturelding er alveg að ná að gera sig gildandi í deildinni. Liðið þarf að brjóta ísinn en getur þá ekki leyft sér að nota fyrstu mínúturnar í að finna taktinn í rólegheitunum.
Jóhann sækir að Bergvin Gíslasyni. Mynd: mbl.is/Golli
Reynir Þór: Klikkuðum á dauðafærum frá fyrstu mínútu til síðustu
„Við klikkuðum í dauðafærum frá fyrstu mínútu og út allan leikinn“, sagði Reynir Þór Reynisson, þjálfari Aftureldingar, eftir 23:28 tap fyrir Akureyri í Mosfellsbænum í kvöld þegar leikið var í N1-deild karla í handknattleik.
„Fyrri hálfleikur var vel spilaður hjá okkur, fyrir utan færin en í seinni hálfleik fannst mér við missa móðinn þegar við höldum áfram að klikka og Sveinbjörn lokar markinu. Ef við hefðum bara nýtt helminginn af þessu opnum færum hefði leikurinn verið allt öðruvísi. Við sköpuðum okkur færi góðan hluta af leiknum en ef við nýtum þau ekki vinnum við ekki leikinn.“ Afturelding er í 7. sæti deildarinnar og má vel sjá að liðið hefur bætt sig, gerði jafntefli við Fram fyrir stuttu og tapaði með einu marki fyrir FH í síðasta leik. „Mér finnst þetta vera að koma hjá okkur smátt og smátt, við mjökumst áfram og Akureyri þurfti að hafa fyrir sigrinum og liðin fá ekkert gefins á móti okkur.“
Viðtöl af sport.is
Loks sjáum við viðtöl Siguróla Sigurðssonar (fyrrum leikmann Akureyrar> við þjálfara liðanna en þau eru fengin frá sport.is.
Það má ekkert út af bregða í Mosfellsbænum
29. febrúar 2012 - Akureyri handboltafélag skrifar
Mikilvægur útileikur á fimmtudaginn gegn Aftureldingu
Eftir enn eitt hléið á N1 deildinni verður þráðurinn tekinn upp á ný á fimmtudaginn þegar 16. umferð deildarinnar hefst með þremur leikjum. Akureyri leikur þá sinn þriðja útileik í röð, að þessu sinni liggur leiðin í Mosfellsbæ þar sem leikið verður gegn heimamönnum í Aftureldingu.
Staðan í efri hluta deildarinnar er svo jöfn að óhætt er að fullyrða að hver einasti leikur til loka deildarinnar er hreinn úrslitaleikur um að verða í hópi fjögurra efstu liða. Leikurinn gegn Aftureldingu er einn af þessum stórhættulegu leikjum sem þarf að taka grafalvarlega. Akureyri lenti í basli í síðasta leik gegn Gróttu á meðan Afturelding var í raun óheppið að sækja ekki stig í 26-25 tapi gegn FH í Hafnarfirðinum.
Aftureldingarliðið hefur eflst mjög í síðustu leikjum en í þarsíðustu umferð gerðu þeir jafntefli gegn Fram 23 – 23 þannig að það er fullkomnlega ljóst að hér er svo sannarlega lið sem þarf að bera fulla virðingu fyrir. Reynir Þór Reynisson tók við þjálfun liðsins í vetur og er greinilega að gera góða hluti. Markaskorunin dreifist mjög hjá Aftureldingu en Sverrir Hermannsson, Hilmar Stefánsson, Böðvar Páll Ásgeirsson og Jóhann Jóhannsson eru markahæstir með 44 til 57 mörk í deildinni til þessa.
Þá leikur markvörðurinn, Hafþór Einarsson sem kunnug er með liðinu en auk hans er í markinu Davíð Hlíðdal Svansson sem hefur sýnt frábæran leik upp á síðkastið, varði t.d. þrjú vítaköst á móti FH í síðasta leik.
Úrvalsdeild karla
Senda skilaboð
Vefur KA
Vefur Þór
Fréttaleit
Tölfræði leiksins 
„Ég er ánægður með að hafa komið hingað að spila, frekar en eitthvað annað og það var ánægjulegt og huggulegt af Mosfellingum að gefa mér blóm,“ sagði Ásgeir Jónsson Akureyringur eftir 23:28 sigur á Aftureldingu í Mosfellsbænum.
„Tvö góð stig,“ sagði Guðlaugur Arnarsson, varnarjaxl að norðan, eftir leikinn. „Þetta var samt barningur eins og alltaf hérna í Mosfellsbænum því þeir kunna að berjast þar og taka vel á því. Við vissum að Afturelding væri hörkugott lið, sem hefði bætt sig mikið og bara spurning um hvenær þeir færu taka stig svo við bjuggum okkur undir alvöruleik, sem var reyndin. Við erum með augun á úrslitakeppninni og til að komast í hana þurfum við að vinna leiki en það er mikil barátta milli sex eða sjö liða á toppnum.“
Senda á Facebook