Warning: Undefined array key "frettanr" in /web/akhandadmin/public_html/index.php on line 15
Flottur sigur á Fram í Safamýrinni - Akureyri Handboltafélag
  Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Fyrri leiktímabil

Tímabilið 2012-13

Leikmenn meistarafl. karla
Úrslit leikja
Deild karla




Ljósmyndir frá leiknum     Tölfræði leiksins 
    Fram - Akureyri  23-28 (11-14)
N1 deild karla
Framhús
Fim 27. september 2012 klukkan: 18:00
Dómarar: Svavar Pétursson og Arnar Sigurjónsson
Umfjöllun

Geir, Oddur og Andri Snær áttu magnaðan leik eins og allt liðið





27. september 2012 - Akureyri handboltafélag skrifar

Flottur sigur á Fram í Safamýrinni

Akureyri gerði góða ferð í Safamýrina í dag sem skilaði tveim stigum í hús. Eftir smá stirðleika á upphafsmínútum leiksins tóku strákarnir öll völd á vellinum og breyttu stöðunni úr 4–4 í 4–9 með frábærum leik. Engu skipti þó að Akureyri væri einum færri í fjórar mínútur á þessum kafla. Þessi munur hélst nánast til loka hálfleiksins en með tveim síðustu mörkum fyrri hálfleiks náðu Framarar að klóra í bakkann þannig að í hálfleik var staðan 11-14 fyrir Akureyri.


Sævar hafði örugga stjórn á mannskapnum. Mynd: visir.is/Vilhelm

Stemmingin í liðinu var hreint til fyrirmyndar og greinilegt að leikmenn gáfu allt í leikinn. Bjarni Fritzson var frábær í sókninni og skoraði 7 mörk í hálfleiknum, þar af 4 úr vítum. Jovan Kukobat fór á kostum í markinu og varði 12 skot í hálfleiknum, þar af eitt vítakast.


Bjarni skorar eitt af sjö mörkum sínum í fyrri hálfleik. Mynd: visir.is/Vilhelm


Jovan Kukobat var hreint frábær í markinu. Mynd: visir.is/Vilhelm

Seinni hálfleikur hófst með norðlenskri flugeldasýningu en þá skoraði Akureyri sex mörk gegn einu marki heimamanna og munurinn orðinn átta mörk 12-20. Frábær vörn og markvarsla ásamt hraðaupphlaupum lögðu grunninn að þessari yfirburðastöðu.

Um miðjan seinni hálfleikinn meiddist Heimir Örn Árnason og kom ekki meira við sögu í leiknum. Skömmu síðar kom leysti Stefán Guðnason Jovan af í markinu og er óhætt að segja að Stefán hafi átt frábæra innkomu eins og honum er lagið.
Það sem eftir lifði leiks má segja að liðið hafi slakað á og aðeins hafi vantað upp á einbeitinguna en öruggur fimm marka sigur staðreynd, lokatölur 23-28.


Geir skoraði fjögur mörk í dag. Mynd: visir.is/Vilhelm


Guðmundur Hólmar stóð fyrir sínu með þrjú mörk. Mynd: visir.is/Vilhelm

Bjarni og Oddur skoruðu fjögur mörk hvor í seinni hálfleik og Andri Snær þrjú. Það er erfitt að taka einhvern einn út úr liðinu því allir voru að skila hreint frábærum leik, til viðbótar við þá sem áður eru nefndir verður að nefna baráttujaxlinn Hrein Hauksson sem átti stórleik í vörninni og drífur félaga sína með.
Það er óhætt að segja að þessi leikur hafi gefið liðinu margt til að byggja á til framtíðar, menn búnir að finna gírinn og komnir með blóð á tennurnar.

Mörk Akureyrar: Bjarni Fritzson 11 (4 úr vítum), Oddur Gretarsson 6, Geir Guðmundsson 4, Andri Snær Stefánsson 3, Guðmundur Hólmar Helgason 3 og Heimir Örn Árnason 1.
Í markinu varði Jovan Kukobat 15 skot, þar af 1 víti og Stefán Guðnason 5.

Mörk Fram: Jón Arnar Jónsson 5, Jóhann Gunnar Einarsson 5 ( 2 úr vítum), Haraldur Þorvarðarson 4, Þorri Björn Gunnarsson 4, Sigurður Eggertsson 3 og Ólafur Magnússon 2.
Í Frammarkinu varði Björn Viðar Björnsson 12 skot og Magnús Erlendsson 6.

Næsti leikur Akureyrar er heimaleikur gegn spútnik liði ÍR og verður hann í Íþróttahöllinni fimmtudaginn 4. október klukkan 19:00.

Tengdar fréttir

Bjarni býsna sáttur með sína menn í dag

28. september 2012 - Akureyri handboltafélag skrifar

Hvað sögðu menn eftir Fram leikinn?

Eitthvað er komið inn af viðtölum eftir leik Fram og Akureyrar þar sem Akureyri vann góðan sigur á heimamönnum. Byrjum á viðtölum sem Kristinn Páll Teitsson, blaðamaður Vísir.is tók við Bjarna Fritzson, Odd Gretarsson og Daða Hafþórsson í leikslok:

Bjarni: Vorum harðákveðnir að mæta á fullu gasi

„Þetta var frábært, við leiddum allan fyrri hálfleikinn og lítum bara ágætlega út. Við litum vel út bróðurpart leiksins í dag fyrir utan síðasta korterið,“ sagði Bjarni Fritzsson, annar þjálfara Akureyrar og leikmaður liðsins eftir leikinn.

Akureyringar stungu Framara af á stuttum kafla í fyrri hálfleik þrátt fyrir að vera um tíma tveimur mönnum færri þegar á því stóð.
„Það var auðvitað algjör snilld, fullt að gerast í vörninni og menn alveg á fullu í vörninni. Menn rosalega þéttir, það var alveg æðislegt.“

Bjarni var ánægður með viðbrögð sinna manna í upphafi seinni hálfleiks.
„Við vorum alveg harðákveðnir á því að mæta á fullu gasi, við erum í mjög góðu standi líkamlega eins og sást og menn eiga ekkert að vera þreyttir. Við vorum ákveðnir að mæta agressívir í vörninni og keyra á þá á fullu.
Við erum með breiðan hóp og róterum vel, við treystum öllum sem eru á bekknum til að koma inná og skila góðu dagsstarfi.“

Akureyringar eru með þrjú stig eftir tvo leiki og virðast vera á góðri leið í upphafi móts.
„Leikurinn á móti FH var ekkert sérstakur fannst mér. Mér fannst við spila vel í 45 mínútur hér í dag og það er fínt að vera kominn með þrjú stig eftir þessa leiki,“ sagði Bjarni.

Oddur: Þvílík stemming í liðinu í dag

„Þetta var gríðarlega sterkt, við ætluðum að gera betur en á mánudaginn þegar okkur fannst eitthvað stemmingsleysi í liðinu,“ sagði Oddur Grétarsson, leikmaður Akureyrar eftir leikinn.

„Mér fannst okkur takast það fullkomnlega, það var þvílík stemming í liðinu og á bekknum og við skiluðum tveim stigum á erfiðum útivelli.“

Gestirnir náðu góðum kafla um miðjan fyrri hálfleikinn sem þeir héldu út leikinn.
„Við spiluðum góða vörn, 3-2-1 vörnin var að smella betur en í seinasta leik. Hún skilar sér vel í hraðaupphlaupum fyrir mig og Bjarna og mér fannst bara allt virka vel í dag, markvarslan, vörnin og hraðaupphlaupin.
Þetta datt í smá rugl í lokin, þeir ná að koma þessu í fimm mörk og við missum Heimi útaf en við héldum áfram og náðum að klára þetta, mér fannst allir skila sínu hlutverki vel í dag,“ sagði Oddur.

Daði: Mikið af einbeitingarskorti

„Við misstum hausinn og vorum óskynsamir á tímabili, við gerðum sömu mistökin trekk í trekk og mikið um einbeitingarskort,“ sagði Daði Hafþórsson, aðstoðarþjálfari Fram eftir leikinn.

Gestirnir keyrðu á Framara í seinni hálfleik og komust í 8 marka forskot fljótlega í seinni hálfleik.
„Menn höfðu greinilega ekki karakter, vilja né þor til að koma inn í seinni hálfleik og taka á þessu. Við erum þremur undir í hálfleik og höfum alla burði til að gera þetta að leik en mætum hauslausir í seinni hálfleikinn og eftir það eigum við einfaldlega ekki möguleika,“ sagði Daði ómyrkur í máli.

„Við skorum nokkur mörk og lögum aðeins stöðuna fyrir hálfleikinn en spiluðum ekki vel, við vorum bara mjög slakir.“

Jafnræði var með liðunum fyrstu mínútur leiksins en eftir það tóku gestirnir við sér.
„Staðan var 1-1 mjög lengi og við fengum fín færi en skotin vildu ekki inn. Menn höfðu kannski ekki sjálfstraustið til að klára færin sem við fengum en það hlýtur að detta einhvertímann," sagði Daði eftir leikinn.

Þá skiptum við yfir á Morgunblaðið þar sem Sindri Sverrisson blaðamaður ræðir við Bjarna Fritzson og Einar Jónsson þjálfara Fram:

Bjarni: Reyni að aðskilja mig frá þjálfuninni

„Við vorum betri allan leikinn, það var alveg skýrt,“ sagði Bjarni Fritzson annar af spilandi þjálfurum Akureyrar sem skoraði 11 mörk í öruggum sigri á Fram í kvöld, 28:23, í N1-deild karla í handknattleik.
Akureyri komst í 20:12 í seinni hálfleiknum og sigurinn var aldrei í neinni hættu.
„Ég beið eftir því að við næðum að stinga þá af, fannst við hafa burði til þess, og við náðum því í seinni hálfleiknum sem skóp í raun þennan sigur. Það var rosalega erfitt fyrir þá að fara að brúa eitthvað átta marka bil jafnvel þó að við slökuðum allt of mikið á í seinni hálfleiknum,“ sagði Bjarni.

Ungu strákarnir fóru að taka heimskulegar ákvarðanir
„Ég var mjög óánægður með það hvað ungu strákarnir fóru þá að taka heimskulegar ákvarðanir. Þeir héldu að við værum bara búnir að vinna og ætluðu að fara að setja mörkin sjálfir. Ég þoli það ekki. Við spilum bara sem lið og þegar við gerum það þá erum við mjög góðir. Ef við spilum upp á „egóið“ lendum við í vandræðum,“ bætti Bjarni við.

Heimir Örn Árnason fór meiddur af velli í seinni hálfleiknum og óvíst hve hann verður lengi frá en hann átti mjög góðan leik fyrir gestina.
„Við erum rosalega ánægðir með leikmannahópinn og eins og sjá má eru menn í rosalega góðu standi líkamlega. Heimir slasaðist núna en annars erum við nánast alveg meiðslalausir. Við erum mjög ánægðir með strákana alla og treystum þeim vel,“ sagði Bjarni sem gat verið ánægður með serbneska markvörðinn Jovan Kukobat sem varði 12 skot í fyrri hálfleik og fjögur til viðbótar í þeim seinni áður en Stefán Guðnason leysti hann af hólmi.

Jovan gerði það sem við vitum að hann getur
„Jovan var góður fyrstu 35 mínúturnar og gerði bara það sem við vitum að hann getur. Kannski var eitthvað stress í honum í fyrsta leik en ég hef engar áhyggjur af honum. Stebbi er líka búinn að æfa vel og er gríðarlega mikilvægur líka,“ sagði Bjarni sem er að venjast nýju hlutverki sem spilandi þjálfari ásamt Heimi.
„Þetta er ekki alveg það sama en ég er að reyna að aðskilja mig frá þjálfuninni í leikjum eins og ég get. Ég er stjórnsamur í eðli mínu þannig að ég skipti mér ekkert meira af núna en áður, og held því bara áfram. En ég treysti Sævari Árnasyni fullkomlega til að stýra þessu. Við erum vel undirbúnir fyrir þá mótherja sem við mætum þannig að það er ólíklegt að það komi upp stöður þar sem maður þarf að hugsa um eitthvað annað en að skila sínu,“ sagði Bjarni.

Einar Jónsson: Sýnist allir vera voðalega sáttir

Vonleysið lak nánast af Einari Jónssyni þjálfara Framara eftir tapið gegn Akureyri í Safamýrinni í kvöld, 28:23, í N1-deild karla í handknattleik. Þeir höfðu áður tapað fyrir Haukum með miklum mun, 31:24, í fyrsta leik tímabilsins.

Þessi slæma byrjun kemur Einari ekki á óvart.
„Nei, ekki neitt. Þetta eru tvö frábær lið og við erum ekki betri en þetta. Ég held að við höfum bara verið að spila samkvæmt getu í kvöld. Mér sýnist að allir séu bara voða sáttir við þetta. Það er voðalega erfitt að ráða í hlutina. Þetta er mjög sérstakt allt saman ef ég segi eins og er,“ sagði Einar, en er hann sjálfur sáttur við frammistöðu Framara?

„Maður verður bara að fylgja hópnum. Þetta var bara flott hjá okkur. Við verðum bara að halda áfram, og svo sjáum við hvað framtíðin ber í skauti sér,“ sagði Einar sem taldi ekki þörf á því að fá fleiri leikmenn til liðsins í sumar í stað þeirra sem fóru.

„Nei, við styrktum liðið bara með ungum og flottum strákum sem margir eru að koma vel út. Það er gleðilegt. Ég er þannig séð ánægður með leikmannahópinn,“ sagði Einar sem vildi annars lítið tjá sig um ástandið í Safamýrinni sem virðist ekki gott.

Vídeóviðtöl

Á Sport.is tók Siguróli Magnússon viðtöl við þjálfarana Bjarna Fritzson og Einar Jónsson sem virtist ekki sérstaklega stemmdur eftir leikinn.







Við fögnum tilvist SportTV.is á dögum sem þessum

27. september 2012 - Akureyri handboltafélag skrifar

Leikur dagsins: Fram – Akureyri sýndur á SportTV.is

Akureyrarstrákarnir halda suður á bóginn í dag og mæta Fram á heimavelli þeirra í Safamýrinni. Líkt og allir útileikir okkar í vetur þá byrjar leikurinn klukkan 18:00. Þetta er hálftíma fyrr en síðasta vetur og er leikjum okkar flýtt til að liðið nái í áætlunarflug norður án þess að grípa þurfi til seinkana.

Eins og leikurinn gegn FH spilaðist er ljóst að Akureyrarliðið á heilmikið inni og það vita strákarnir manna best sjálfir og ætla örugglega að leggja allt í sölurnar í þessum leik.

Þjálfari Fram er líkt og í fyrravetur Einar Jónsson.
Fram liðið hefur á að skipa mörgum sterkum leikmönnum og nægir þar að nefna markvörðinn Magnús Gunnar Erlendsson, skytturnar Jóhann Gunnar Einarsson og Róbert Aron Hostert, alltmuligt manninn Sigurð Eggertsson og línujaxlana Ægi Hrafn Jónsson og Harald Þorvarðarson svo nokkur gamalkunnug nöfn séu talin.

Þá fengu Framarar góðan liðsstyrk frá Akureyri sem er hornaðurinn Ólafur Jóhann Mangússon, einn af Íslandsmeisturum okkar úr 2. flokki síðastliðið vor. Ólafur lék mjög vel með Fram í fyrstu umferðinni og skoraði 4 mörk gegn Haukum.


Ólafur skorar gegn Fram í úrslitaleik 2. flokks síðasta vor

Fram liðið hefur séð af nokkrum öflugum leikmönnum frá því í fyrra, þar má nefna Ingimund Ingimundarson, Einar Rafn Eiðsson, Arnar Birki Hálfdánsson, Jóhann Karl Reynisson, Sebastian Alexandersson auk þess sem Halldór Jóhann Sigfússon lagði skóna á hilluna og hefur snúið sér að þjálfun á kvennaliði Fram. Auk Ólafs hefur Fram fengið til sín Þorra Björn Gunnarsson og endurheimt markvörðinn Björn Viðar Björnsson. Þá eiga Framarar marga unga og efnilega stráka sem einmitt léku úrslitaleikinn í 2. flokki gegn Akureyri í vor.

Það stefnir allt í hörkuleik í dag og til allrar hamingju fyrir okkur norðanmenn þá verður leikurinn sýndur beint á SportTV.is eftir allt saman. Búið var að taka hann af dagskránni en sem betur fer var sú ákvörðun endurskoðuð. Við hvetjum alla þá sem mögulega geta að mæta í Framheimilið og styðja strákana duglega á meðan aðrir þakka fyrir þjónustu SportTV.

Til baka    Senda á Facebook

Umsjón og hönnun: Stefán Jóhannsson og Ágúst Stefánsson