Warning: Undefined array key "frettanr" in /web/akhandadmin/public_html/index.php on line 15
Magnaður sigur Akureyrar á ÍR í kvöld - Akureyri Handboltafélag
  Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Fyrri leiktímabil

Tímabilið 2013-14

Leikmenn meistarafl. karla
Úrslit leikja
Deild karla




Ljósmyndir frá leiknum     Textalýsing frá leiknum     Tölfræði leiksins 
    Akureyri - ÍR  32-30 (16-17)
Olís deild karla
Íþróttahöllin
Fim 21. nóvember 2013 klukkan: 19:00
Dómarar: Gísli H. Jóhannsson og Hafsteinn Ingibergsson
Umfjöllun

Halldór Logi hélt uppi merkinu á línunni í seinni hálfleik

22. nóvember 2013 - Akureyri handboltafélag skrifar

Magnaður sigur Akureyrar á ÍR í kvöld

Það var heldur betur rafmögnuð spenna í Íþróttahöllinni í kvöld þegar Akureyri tók á móti bikarmeisturum ÍR. Akureyrarliðið kom nokkuð breytt til leiks frá síðasta leik, samningi liðsins við Serbann Vladimir Zejek hefur verið sagt upp og því sat Vladi á meðal áhorfenda í stúkunni. Það var hins vegar óvænt útspil að Hreinn Þór Hauksson mætti galvaskur til liðs við strákana en hann hafði tekið sér smá frí frá handboltanum og var ekki væntanlegur fyrr en eftir áramót.
Þar að auki þá var þetta fyrsti heimaleikur þeirra Heimis Árnasonar og Friðriks Svavarssonar á tímabilinu en þeir hafa verið í röðum Hamranna á tímabilinu.

Akureyri hóf leikinn af miklum krafti, spilað hraðan sóknarleik sem bar góðan ávöxt til að byrja með auk þess sem Jovan Kukobat var í miklum ham í markinu. Akureyri hafði frumkvæðið í leiknum og leiddi með tveim mörkum allt upp í 8-6 en þá komu fimm ÍR mörk í röð, þar af þrjú ódýr hraðaupphlaupsmörk og forysta gestanna skyndilega orðin þrjú mörk, 8-11.


Kristján Orri skoraði fyrstu tvö mörk leiksins

En heimamenn brotnuðu ekki við þetta og minnkuðu muninn niður í eitt mark 12-13 og hélst sá munur fram að hálfleik en þá var staðan 16-17 ÍR í vil.

Þrándur Gíslason var öflugur á línnunni, með 4 mörk, Andri Snær og Kristján Orri með 3, Bjarni og Valþór 2, Heimir og Sigþór Árni 1 mark hvor. Í markinu var Jovan kominn með tólf bolta.

Akureyri hóf seinni hálfleikinn með látum, Þrándur Gíslason fékk reyndar sína þriðju brottvísun og þar með útilokun eftir 20 sekúndna leik. Manni færri jöfnuðu heimamenn í 17-17 með stórbrotnu sirkusmarki þeirra Andra Snæs og Bjarna Fritzsonar. Í kjölfarið var jafnt á öllum tölum upp í 21-21 en þá sigu ÍR ingar framúr og náðu þriggja marka forystu, 22-25 og 24-27 þegar tæpar tólf mínútur voru til leiksloka.

Þrándur Gíslason var ekki alveg hættur afskiptum af leiknum þó hann væri kominn upp í stúku heldur reif hann upp stemminguna í húsinu með kröftugum trommuleik svo um munaði.


Þrándur fór á kostum og náði magnaðri stemmingu í stúkunni

Strákarnir tóku vel við sér og jöfnuðu leikinn í 29-29 og aftur í 30-30 þegar sex mínútur voru eftir. Þær voru magnaðar, flott vinnsla í vörninni og Jovan, sem hafði ekki alveg fundið sig í seinni hálfleik hrökk heldur betur í gang og lokaði markinu. Það voru svo Halldór Logi Árnason og Kristján Orri Jóhannsson sem kláruðu leikinn með sitt hvoru markinu þannig hreint magnaður sigur 32-30 skilaði sér í hús og tvö langþráð stig.

Allt liðið á hrós skilið fyrir mikla baráttu og það leyndi sér ekki að menn höfðu gaman að hlutunum og með því fylgdi stemming sem skilaði sér svo sannarlega. Andri Snær fór á kostum í vinstra horninu með fimm mörk úr fimm skotum auk þess að leggja upp tvö sirkusmörk. Gunnar Þórsson kom í hornið undir lokin og bætti við tveim góðum mörkum. Valþór Guðrúnarson var áræðinn í skyttunni og var valinn maður leiksins hjá Akureyri. Kristján Orri var að vanda með fínan leik í hægra horninu auk þess sem hann klippti Björgin Hólmgeirsson nánast út úr sóknarleik ÍR inga. Bjarni Fritzson var öflugur í seinni hálfleiknum eftir að hafa ekki látið fara mikið fyrir sér í þeim fyrri.
Vörnin var lengst af mjög góð og greinilegt að innkoma þeirra Heimis og Hreins skilar miklu öryggi í liðið.


Heimir og Hreinn létu ekki sitt eftir liggja í varnarleiknum

Mörk Akureyrar: Valþór Guðrúnarson 6 (2 úr vítum), Andri Snær Stefánsson 5, Bjarni Fritzson 5 (2 úr vítum), Kristján Orri Jóhannsson 5, Þrándur Gíslason 4, Halldór Logi Árnason 3, Gunnar Þórsson 2, Heimir Örn Árnason og Sigþór Árni Heimisson 1 mark hvor.
Í markinu átti Jovan Kukobat frábæran fyrri hálfleik og tók síðan magnaðan kipp á lokamínútunum með samtals 16 varin skot, þar af eitt vítakast. Tomas Olason kom í markið um tíma í seinni hálfleik en náði ekki að verja.

Hjá ÍR voru Arnar Birkir Hálfdánson og Guðni Már Kristinsson markahæstir með 7 mörk hvor. Sturla Ásgeirsson 5, Jón Heiðar Gunnarsson 4, Björgvin Þór Hólmgeirsson og Sigurjón Björnsson 3 mörk hvor og Kristinn Björgúlfsson 1 mark.
Í markinu varði Arnór Freyr 7 skot og Kristófer 5 skot.


Valþór tekur við matarkörfu sem leikmaður Akureyrar í kvöld


Tengdar fréttir

Það var gott hljóð í Heimi í leikslok

23. nóvember 2013 - Akureyri handboltafélag skrifar

Viðtöl eftir leik Akureyrar og ÍR

Nokkur viðtöl hafa séð dagsins ljós eftir sigurleik Akureyrar á ÍR á dögunum. Við byrjum á að kíkja á visir.is þar sem Birgir H. Stefánsson ræddi við Heimi Örn, Þránd og Bjarka þjálfara ÍR í leikslok.

Heimir Örn: Núna er hann alskeggjaður og flottur eins og skógarhöggsmaður

„Þetta var smá eins og í síðasta leik á móti Fram en við erum að skána mikið. Við erum að þjösnast áfram og halda í við liðin, núna gekk lokakaflinn fullkomlega upp sem gekk ekki síðast. Þetta var erfitt, Guðni og Arnar Birkir voru heitir og erfiðir enda búið að drulla nokkuð yfir þá hjá ÍR-handbolti og þeir svöruðu því vel,“ sagði Heimir Örn Árnason, þjálfari Akureyrar eftir sigurinn á ÍR í kvöld.


Heimir

Hreinn Þór Hauksson kemur aftur og dettur beint inn í liðið, hann virkaði mikilvægur hér í dag.
„Já, hann var æðislegur. Við vorum einmitt að tala um það hér áðan hvað þetta var ofboðslega gaman núna síðustu tíu, erum búnir að spila saman í einhver átta eða níu ár en núna er hann alskeggjaður og flottur eins og skógarhöggsmaður. En hann virðist vera einn af þeim sem spilar best þegar hann er að æfa lítið, sem er nokkuð einkennilegt.“

Þetta voru afar mikilvæg stig og þið aftur komnir rétt við þennan pakka sem er á toppnum.
„Já, ef við tökum tvö til fjögur stig í síðustu tveimur leikjum þá erum við ekkert of langt frá þessu, fáum Begga inn og ætli ég haldi ekki áfram ef ég verð ágætur í skrokknum. Það er að koma andi í liðið, síðustu tveir leikir hafa verið æðislega skemmtilegir,“ sagði Heimir.

Þrándur: Varð að halda áfram þótt að ég væri utan vallar

„Við skuldum okkur sjálfum og stuðningsmönnum, sérstaklega stuðningsmönnum. Við erum að taka loksins tvö stig hér heima síðan í fyrsta leik á móti Fram. Við töpuðum síðasta leik og verðskulduðum meira þar þannig að það kom ekki annað til greina en að leggja allt í sölurnar og það hafðist. Ég átti ágætis fyrri hálfleik," sagði Þrándur Gíslason, leikmaður Akureyrar.

Seinni hálfleikurinn var nokkuð stuttur hjá þér, færð rautt eftir aðeins tuttugu sekúndur og endar svo upp í stúku með trommu á lofti.
„Já, þar sem maður var að drulla á sig svona þá var ekki annað í stöðunni. Það er lítið sem maður getur gert en einhvern veginn verður maður að halda áfram þótt að maður sé utan vallar," sagði Þrándur.

Það virðist vera stígandi í þínum leik.
„Já, þetta er aðeins að koma. Ég er búinn að vera þungur á mér, fór full geyst í lyftingarnar í sumar og hef verið að vinna í því að létta mig. Að sama skapi höfum við verið að breyta leikskipulagi og það hentar mér betur. Þetta er allt að koma, margir nýir og ungir en við finnum að þetta er að hafast.“


Þrándur skoraði fjögur mörk í fyrri hálfleiknum

Bjarki Sig: Töpum þessu bara á eigin aumingjaskap

„Það var varnarleikur og markvarsla,“ sagði Bjarki Sigurðsson, þjálfari ÍR, strax eftir leik aðspurður um það hvað það var sem skildi liðin að í leiknum.

„Svo að markmenn fúnkeri þá þarf vörnin fyrir framan að vera góð. Hún kom inn á milli í lagi en þess á milli alveg út á túni. Við skorum fullt af mörkum og það er ekki vandamálið en varnarleikurinn okkar er mikið áhyggjuefni. Við erum að spila hálfgerða fimm-einn vörn sem á að fúnkera ef menn spila á fullu gasi og fyrir hvorn annan.

Við erum að láta teyma okkur í rugl, út úr svæðum og í vandræði sem olli því að við vorum meira eða minna útaf síðustu tíu mínúturnar. Sumt var réttilega dæmt og annað ekki, í heildina var þetta bara allt í lagi hjá dómaraparinu. Við töpum þessu bara á eigin aumingjaskap.
„Þetta er í þriðja eða fjórða sinn sem okkur er stútað í seinni hálfleiknum og það er áhyggjuefni. Það vantar einstakling sem vill taka af skarið og vera leiðtogi í liðinu, við erum með fullt af aðilum til þess en þeir þurfa að stíga fram og svo vinna eftir því. Nú þurfum við bara að setjast niður og greina okkar leik niður í frumeindir," sagði Bjarki.


Bjarki var ekki alltaf sáttur í leiknum

Ólafur Már Þórissona blaðamaður Morgunblaðisins spjallaði sömuleiðis við Heimi Örn og einnig Arnar Birkir Hálfdánsson leikmann ÍR.

Heimir: Gaman að heyra Hrein tuða eitthvað

„Þetta er búið að vera erfitt og jafnframt að finna formúluna á rétta liðinu,“ sagði Heimir um undanfarna leiki. Spurður hvort það hefði einhverju máli skipt hvernig þeir unnu leikinn sagði hann; „Nei ekki nokkru, við gerðum fullt af hundlélegum mistökum í vörn. Ég og margir aðrir vorum eins og sauðir þegar þeir voru að leysa inn á línuna. En mér er alveg nákvæmlega sama núna. Svipaða sögu er að segja af leiknum gegn Fram. Við vorum óheppnir með að vinna ekki þar og ég veit að Gulli [Guðlaugur Arnarsson þjálfari Fram] var mjög ánægður með að vinna þann leik.“

Tíðindi kvöldsins fyrir Akureyri var eflaust endurkoma Hreins Þór Haukssonar sem hafði tekið sér frí vegna persónulegra ástæðna. Hann kom hinsvegar endurnærður til baka og það hafði sín áhrif og þar var þjálfarinn ekki undanskilinn. „Hreinsi kom sterkur inn maður, glæsilegur og ferskur. Það er hrikalega gott að fá hann inn og alltaf gaman að heyra röddina hans svona tuðandi eitthvað!"

Heimir játaði því eðlilega að gengið í undanförnum leikjum hefði náð til þeirra þjálfaranna. „Auðvitað fer maður í sjálfskoðun eins og leikmenn. Kannski er maður að gera eitthvað vitlaust. Ég veit að það voru margir sem voru að drulla yfir mann fyrir að byrja aftur að spila. Mér er alveg sama um það. Fólk er alltaf með skoðanir en veit þó ekkert hvað er að gerast innan herbúða þess.
Við unnum og mér fannst ég bara spila ágætlega, það sama gerði Hreinsi. Mér finnst bara að fólk ætti að styðja við liðið frekar en að drulla yfir það,“ sagði Heimir alvörugefinn. Hann bætti þó við að stuðningurinn í kvöld hefði verið frábær af pöllunum.


Heimir íhugar stöðuna af hliðarlínunni

Arnar Birkir: Ég hélt að við myndum vinna

„Ég er svakalega ósáttur með að við skyldum ekki vinna þennan leik,“ sagði Arnar Birkir Hálfdánsson næst markahæsti maður ÍR sem tapaði fyrir Akureyri 32:30 nyrðra.

Arnar gekk vasklega fram gegn vörn Akureyrar sem ákvað að taka Björgvin Þór Hólmgeirsson úr umferð, lungann úr leiknum. Það nýtti hann sér ásamt Guðna Má Kristinssyni og skoruðu þeir félagar saman helming marka ÍR-inga. Það dugði þó ekki til þar sem vörnin gaf eftir á síðustu mínútunum og heimamenn gengu á lagið.
„Við náðum bara ekki að klára þá, það er málið,“ sagði Arnar. Spurður hvers vegna sagði Arnar; „Ég veit það ekki, ég bara skil það ekki hvernig við misstum þetta niður. Við hefðum getað komist í fjögur mörk þarna á tímabili í seinni hálfleik en í staðinn minnka þeir þetta í tvö. Það var slæmur tímapunktur.“

Arnar vildi alls ekki meina að það væri krísa í Breiðholti en þetta var þriðji tapleikurinn í röð. „Menn þurfa einfaldlega að líta hver og einn í eigin barm og laga það sem er að.“
Spurður hvort gerðar hafi verið einhverjar breytingar fyrir þennan leik eftir tvö töp í röð sagði Arnar; „Nei alls ekki, engar stórar breytingar. Ég hélt bara að við myndum vinna þennan leik. Mér datt ekki annað í hug.“


Arnar Birkir í hrömmunum á Andra Snæ og alskeggjuðum Hreini

Á vefnum Norðursport fundum við þetta viðtal Jóns Stefáns Jónssonar við Andra Snæ Stefánsson.

Andri Snær: Litríkari persónuleika hef ég ekki kynnst

„Við höfum svo sannarlega beðið lengri eftir þessum sigri. Þetta hefur verið skrautlegt tímabil hingað til. Við höfum verið í tómu basli og fengið nokkra skelli hérna heima svo við skulduðum fólki sigur í svona háspennu leik,“ sagði yfir sig ánægður leikmaður Akureyrar, Andri Snær Stefánsson eftir sigur liðs hans á ÍR í kvöld.

Hann viðurkennir að hafa verið orðinn stressaður þegar Akureyri var þremur mörkum undir og skammt til leiksloka. „Jú auðvitað fór maður eitthvað að hugsa, sérstaklega af því vorum að fá á okkur aulaleg mörk. Maður vissi það hins vegar að við þyrftum bara að skrúfa fyrir hægri vænginn hjá þeim og þá myndi þetta koma. Jovan tók mjög mikilvæga í bolta í lokin sem hjálpaði okkur gríðarlega.“

Hvað breyttist í ykkar leik síðustu mínuturnar sem varð þess valdandi að leikurinn snérist svona gjörsamlega við?
„Fyrst og fremst fórum við að spila betri vörn og fengum við það sjálstraust sem auðveldaði okkur svo aftur að skora mörk. Svo höfðum við allan tímann fulla trú á þessu og það var ofboðslega dýrmætt. Þetta féll okkar megin í dag.“

En hvað fannst þér um stuðningsmann númer eitt í stúkunni?
„Þrándur er einstakur maður, litríkari persónuleika hef ég ekki kynnst og hann held ég að hafi svitnað helmingi meira en leikmennirnir á vellinum við að lemja trommuna af þessum krafti. Hann stóð sig mjög vel og náði svo sannarlega fólkinu með sér. Þetta var snilld.“


Andri Snær og Þrándur fögnuðu innilega í leikslok



ÍR hampaði bikarmeistaratitlinum í fyrra

19. nóvember 2013 - Akureyri handboltafélag skrifar

Gríðarlega mikilvægur heimaleikur á fimmtudaginn



Það er komið að heimaleik í Olís-deildinni, loksins segja margir enda hefur Akureyri aðeins leikið þrjá heimaleiki það sem af er tímabilinu. Að þessu sinni eru það ríkjandi bikarmeistarar ÍR sem koma í heimsókn og engin hætta á öðru en að þeir mæti dýrvitlausir til leiks.
Líkt og flest liðin í deildinni hefur leikur ÍR verið upp og ofan, þeir hafa átt frábæra leiki en einnig dottið niður þess á milli, fjórir sigurleikir og fjórir tapleikir. ÍR tapaði í síðustu umferð fyrir ÍBV og þar á undan töpuðu þeir fyrir Fram.

Akureyri hefur átt í vissum erfiðleikum í deildinni en í síðustu umferð spilaði liðið fanta vel á útivelli gegn Fram og var virkilega ósanngjarnt að fá ekki stig út úr þeim leik sem Fram vann með einu marki.

Akureyri og ÍR mættust í 2. umferð Olís-deildarinnar í Austurbergi og það var hörkuleikur þar sem lengst af var algjört jafnræði með liðunum en á lokakafla leiksins sigu ÍR ingar fram úr og unnu fjögurra marka sigur. ÍR-ingar geta ekki síst þakkað Kristófer markverði sigurinn en hann gjörsamlega lokaði markinu á síðustu mínútum leiksins.

Þegar litið er á tölfræði ÍR liðsins það sem af er deildarinnar sést að tveir útileikmenn bera liðið uppi, hornamaðurinn, Sturla Ásgeirsson hefur skorað 57 mörk og stórskyttan Björgvin Hólmgeirsson 56 stykki. Það hefur sýnt sig að þegar þessir leikmenn fá að leika lausum hala þá er voðinn vís þannig að það er augljóst að leita þarf allra leiða til að halda aftur af þeim.
Næstu þrír markaskorara ÍR eru línumaðurinn, Jón Heiðar Gunnarsson með 25 mörk og Arnar Birkir Hálfdánsson 23 mörk og Guðni Már Kristinsson 20 mörk.

Markvarslan hefur verið einn af lykilpóstum ÍR liðsins en Kristófer Fannar Guðmundsson hefur verið mjög öruggur í markinu. Arnór Freyr Stefánsson sneri heim í ÍR liðið eftir að hafa verið með HK síðustu ár og komið sterkur inn þá sjaldan sem Kristófer þarf aðstoð.


Björgvin og Bjarni eru lykilmenn sinna liða

Hjá Akureyri hafa verið nokkrar breytingar á mannskapnum upp á síðkastið. Ein mikilvægasta breytingin er að þjálfarinn Heimir Örn Árnason er kominn í leikmannahópinn á ný og átti magnaðan leik gegn Fram í síðustu umferð. Þá er línumaðurinn Friðrik Svavarsson kominn inn í hópinn aftur eftir að hafa leikið með 1. deildarliði Hamranna í haust.

Nú þýðir ekkert annað en að bretta upp ermarnar og berjast til sigurs frá fyrstu mínútu og allt til enda með fulla trú á verkefninu, þá fylgir líka með gleðin og ánægjan sem skiptir öllu máli og smitar frá sér til áhorfenda sem örugglega láta þá ekki sitt eftir liggja.


Til baka    Senda á Facebook

Umsjón og hönnun: Stefán Jóhannsson og Ágúst Stefánsson