Magnaður 12 marka sigur á ÍR - Akureyri Handboltafélag

Warning: Undefined array key "frettanr" in /web/akhandadmin/public_html/index.php on line 15
Magnaður 12 marka sigur á ÍR - Akureyri Handboltafélag


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Fyrri leiktímabil

Tímabilið 2015-16

Leikmenn meistarafl. karla

Ljósmyndir frá leiknum

Textalýsing frá leiknum

Tölfræði leiksins

		Akureyri - ÍR 32-20 (15-8)
		Olís deild karla
		KA heimilið
		Fim. 22. okt. 2015 klukkan: 19:00
		Dómarar: Ingvar Guðjónsson og Þorleifur Árni Björnsson

Umfjöllun


Frábær liðssigur, Hörður, Sverre, Ingimundur, Róbert og Brynjar stóðu fyrir sínu		22. október 2015 - Akureyri handboltafélag skrifar Magnaður 12 marka sigur á ÍR Það var ekki laust við að væri spenna í lofti þegar Akureyri tók á móti ÍR í KA heimilinu í kvöld. Bæði lið höfðu býsna óvænt tapað fyrir Gróttu í síðasta leik og nokkuð ljóst að menn ætluðu að bæta fyrir það í kvöld. Akureyrarliðið var greinilega tilbúið í leikinn, Heiðar Þór Aðalsteinsson skoraði fyrstu tvö mörk leiksins á fyrstu mínútunni og gaf tóninn fyrir það sem koma skyldi. Halldór Logi Árnason lét heldur ekki sitt eftir liggja og bætti við næstu tveim mörkum Akureyrar og staðan orðin 4-1. Halldór Logi átti stórbrotinn leik á línunni, sex mörk úr sex skotum ÍR-ingar klóruðu í bakkann með næstu tveim mörkum og Sverre tók leikhlé. Og það er óhætt að segja að það virkaði heldur betur. Hreiðar Levý byrjaði á að verja hraðaupphlaup frá Bjarna Fritzsyni og það kveikti heldur betur í liðinu. Munurinn breyttist snarlega í 8-4 og áfram var haldið með hreint frábærum leik jókst forskotið í 12-6 og með síðasta marki hálfleiksins breytti Kristján Orri stöðunni í 15-8. Lið Akureyrar lék hreint út sagt frábæran fyrri hálfleik sama hvar á var litið, sóknarleikurinn fjölbreyttur, vörnin öflug og Hreiðar Levý stórbrotinn í markinu. Heiðar Þór Aðalsteinsson átti stórleik í sókninni, skoraði sex mörk og mörg þeirra af dýrari gerðinni. Hreiðar með 12 varin skot af 20 sem gerir 60% markvörslu, ekki amaleg frammistaða þar. Hafi staða ÍR-inga verið erfið í hálfleik má segja að Akureyrarliðið hafi gengið frá leiknum á upphafsandartökum seinni hálfleiks. 3-0 kafli á fyrstu tveim mínútunum var meira en ÍR liðið þoldi og tóku þeir snarlega leikhlé. Tíu marka munur 18-8 og útlitið dökkt fyrir gestina. En heimamenn voru ekkert á því að slaka á, munurinn fór í 11 mörk, 20-9 og einungis sex og hálf mínúta liðin af seinni hálfleiknum. Og ekki var allt búið enn, munurinn varð mestur 14 mörk, 31-17 og 32-18 en lokatölur 12 marka sigur 32-20. Leiðindaatvik varð í lok leiksins, Arnar Birkir Hálfdánsson skoraði síðasta mark ÍR inga úr hraðaupphlaupi og veitti Tomasi mikið höfuðhögg í leiðinni þannig að Tomas lá óvígur eftir. Dómarar leiksins kusu reyndar að horfa framhjá atvikinu. Hvort sem atvikið var viljandi eða óviljandi var framganga Arnars Birkis honum til lítils sóma þegar hann neitaði tilmælum eigin þjálfara og liðsmanna að biðja Tomas afsökunar á atvikinu og þar við sat. Tomas staðinn á fætur en menn engan vegin sáttir með að ekkert var dæmt Allir af bekknum tóku þátt í leiknum og það var sama hverjir komu inná allir börðust af krafti enda uppskeran eftir því. Tomas Olason kom í markið og hann hélt svo sannarlega uppi merkinu, varði sex af síðustu níu skotum ÍR inga og mörg hver úr dauðafærum. Brynjar Hólm Grétarsson kom í sóknarleikinn á lokakaflanum og sýndi heldur betur hvers hann er megnugur með þrem glæsimörkum. Þetta var klárlega langbesti leikur liðsins á tímabilinu og með sama krafti og stemmingu þarf ekki að kvíða framhaldinu. Það er hæpið að gera upp á milli manna, Heiðar Þór frábær sérstaklega í fyrri hálfleiknum, Halldór Logi klikkaði ekki á skoti, Bergvin og Sissi með ógrynni stoðsendinga svo eitthvað sé nefnt. Kristján Orri og Hörður létu svo ekki sitt eftir liggja. Skotnýting liðsins var 78%, 32 mörk úr 41 skoti sem er hreint út sagt frábær tölfræði. Bergvin og Sigþór voru drjúgir í markaskorun og stoðsendingum á félaga sína Eins og tölurnar gefa til kynna var varnarleikurinn hreint til fyrirmyndar, ÍR liðið skorar yfirleitt mikið af mörkum en það átti svo sannarlega í erfiðleikum með að rjúfa varnarmúrinn og markverðina þar fyrir aftan. Sóknarnýting ÍR inga var aðeins 28% í leiknum, ekki síst fyrir tilstilli markvarðanna, Hreiðar með 55% og Tomas með 67% sem gerir 57% markvarsla í heildina. Hreiðar Levý var valinn maður Akureyrarliðsins enda frábær leikur hjá honum Mörk Akureyrar: Heiðar Þór Aðalsteinsson 7 (2 víti), Halldór Logi Árnason 6, Kristján Orri Jóhannsson 5, Bergvin Þór Gíslason, Brynjar Hólm Grétarsson, Hörður Másson og Sigþór Árni Heimisson 3 mörk hver, Ingimundur Ingimundarson og Róbert Sigurðarson 1 mark hvor. Hreiðar Levý Guðmundsson varði 21 skot og Tomas Olason 6. Mörk ÍR: Bjarni Fritzson 6, Sturla Ásgeirsson 5, Arnar Birkir Hálfdánsson 4, Aron Örn Ægisson 2, Davíð Georgsson, Ingvar Heiðmann Birgisson og Jón Kristinn Björgvinsson 1 mark hver. Arnór Freyr Stefánsson varði 8 skot og Svavar Már Ólafsson 3 skot. Næsta verkefni Akureyrarliðsins er að taka á móti Gróttu 2 í bikarkeppninni, sá leikur verður á laugardaginn klukkan 18:30 í KA heimilinu. Nú þarf bara að mæta í þann leik af fullum krafti líkt og í dag og að sjálfsögðu áfram í næstu leiki.


Tengdar fréttir
Hreiðar var í landsliðsham í kvöld		23. október 2015 - Akureyri handboltafélag skrifar Viðtöl eftir stórsigurinn á ÍR Það eru komin í hús viðtöl blaðamanna mbl.is og visir.is eftir stórsigur Akureyrar á ÍR. Einar Sigtryggsson blaðamaður mbl ræddi við landsliðsmarkvörðinn Hreiðar Levý Guðmundsson og Einar Hólmgeirsson aðstoðarþjálfara ÍR liðsins. Hreiðar Levý: Fengum blóðbragðið Hreiðar Levý Guðmundsson er uppalinn í KR en hann skapaði sér nafn sem toppklassa markvörður í liði ÍR. Þar var hann í fjögur ár en nú er hann lykilleikmaður Akureyringa. Hreiðar er einn af silfurdrengjunum og hann er aftur kominn í landsliðshópinn eftir að hafa glímt við meiðsli undanfarin ár. Hreiðar var besti maður vallarins í kvöld þegar Akureyri kjöldró lið ÍR í Olís-deild karla. Varði hann 17 skot, oft með ótrúlegum tilburðum gegn manni sem var í algjöru dauðafæri. Það var nauðsynlegt að heyra aðeins í Hreiðari eftir leik. „Ég var vel gíraður í leikinn eins og allir í liðinu. Það var mikið undir en það að hafa verið kallaður í landsliðið á ný gaf mér extra búst, ekki bara í leikinn heldur í allt. Það gekk flest upp frá fyrstu mínútu, ég tók nokkur opin færi og það var mikilvægt að verja líka frá skyttunum og draga úr þeim tennurnar. Þær voru með góða skotprósentu fyrir leik og ég var örlítið smeykur út af því. Vörnin var bara mögnuð og við fengum blóðbragðið og gengum á lagið. Við urðum að vinna til að vera með í pakkanum en það er ekki nóg að spila vel endrum og sinnum. Við þurfum að halda stöðugleika og mæta eins í alla leiki. Við eigum bikarleik á laugardag og svo er deildarleikur gegn Val. Þar verðum við að mæta með sömu ákefð, annars fer illa. Við verðum að bæta við stigafjöldann“ sagði Hreiðar Levý. Hreiðar horfir eftir þessum bolta í stöngina Athygli vakti um miðjan seinni hálfleikinn að Hreiðar varð alveg brjálaður út í samherja sína þegar þeir virtust ætla að slaka á klónni. „Ég tók smá pirringskast. Mér fannst varnarleikurinn vera að detta aðeins niður. Ég vildi að við héldum áfram og keyrðum á fullu út leikinn. Strákarnir voru ekkert sáttir við mig en mér fannst þeir bæta í.“ Varðandi landsliðið sagði Hreiðar „Það er mót í Noregi á döfinni og ég stefni á að standa mig og komast með þangað. Maður verður bara að sýna sig í næstu leikjum.“ Það eru góð lokaorð og fyrir lið Akureyrar er algjört lykilatriði að strákurinn standi við stóru orðin. Einar Hólmgeirsson: Hörkuvinna framundan ÍR-ingar fengu slæman skell í kvöld þegar liðið tapaði 32:20 gegn Akureyri í KA-heimilinu. Liðið hefur tapað sex leikjum í röð og það er um nóg að hugsa hjá þjálfurum liðsins. Einar Hólmgeirsson er annar þeirra og hann virðist vera búinn að fá nóg af slöku gengi. „Þetta var slæmt í kvöld, svipað og á móti Haukum þar sem við missum móðinn. Við byrjuðum leikinn hræðilega, misstum fjóra bolta og þeir voru 2:0 áður en mínúta var liðin. Menn gerðu mörg barnaleg mistök og það á ekki að gerast í meistaraflokki. Þetta var hálfgert kjaftæði,“ sagði Einar við mbl.is eftir leikinn. „Hreiðar Levý tók einhver tíu dauðafæri frá okkur en við vorum búnir að hamra á því við strákana okkar að hann skoðar myndbönd og veit hvar leikmenn skjóta. Svo byrjuðum við seinni hálfleikinn ömurlega og leikurinn var bara búinn. Mér finnst tólf mörk allt of mikill munur því liðin eru með svipaðan mannskap. Akureyringarnir voru hins vegar mun betri og áttu skilið að vinna. Frammistaða okkar er kannski dæmigert fyrir lið í mótbyr. Það gengur ekkert upp. Einar Hólmgeirsson áhyggjufullur fyrir hönd ÍR-inga Ég lenti í þessu sem leikmaður en er að upplifa svona í fyrsta skipti sem þjálfari. Strákarnir eru góðir í handbolta og frábærir í alla staði en við þurfum að vera samstilltir og rétt innstilltir. Það er bikarleikur um helgina en næsta fimmtudag er leikur gegn Aftureldingu í deildinni. Það er hörkuvinna framundan hjá okkur þjálfurunum og leikmönnum. Það er lítið varið í þetta ef ekki er eitthvað til að inna í. Maður verður að taka því slæma eins og því góða.“ sagði Einar, greinilega hvergi banginn. Það er svo enginn annar en handboltaþjálfarinn Stefán Guðnason og fyrrum markvörður Akureyrarliðsins sem stýrði pennanum hjá visir.is að þessu sinni. Stefán ræddi sömuleiðis við Hreiðar Leví og síðan við Bjarna Fritzson, þjálfara ÍR liðsins. Hreiðar Levý: Ég er orðinn 90% Hreiðar Levý Guðmundsson, sem nú á dögunum var valinn í landsliðið að nýju eftir erfið meiðsli, var hress þegar blaðamaður Vísis náði af honum eftir leik. „Þetta var frábær leikur hjá okkur. Sóknarlega vorum við virkilega flottir, grimmir sóknarlega og óragir að fara í færin. Þegar við finnum taktinn erum við virkilega flottir, jafnframt getum við dottið í það að vera fjandi lélegir þess á milli. Það má segja að þegar það smellur hjá okkur þá smellur það alla leið. Í þessum sigurleikjum okkar höfum við átt frábæra leiki en í tapleikjunum erum við virkilega slakir. Við erum svona allt eða ekkert lið í augnablikinu. Nú þurfum við að fara að koma stöðugleika í okkar leik, þá eru okkur allir vegir færir,“ sagði Hreiðar Levý Guðmundsson, markvörður Akureyrar sem var öðrum fremur maður leiksins í kvöld. Hreiðar sem átti stórleik í marki Akureyrar endaði með 21 skot varið sem gera 55% markvörslu hann vildi þó ekki meina að hann hefði mætt með hausinn eitthvað extra hátt uppi eftir landsliðsvalið. „Ég mætti bara virkilega gíraður í þennan leik. Jú auðvitað hafði það jákvæð áhrif að fá þessa viðurkenningu að komast aftur í landsliðið en það munar mestu að ég er að verða kominn í almennilegt form og orðinn nokkurn veginn góður af þessum meiðslum,“ sagði Hreiðar. Sturla skaut yfir Hreiðar og markið í þessu víti Hreiðar átti eins og áður segir algjöran stjörnuleik hérna í kvöld og lagði grunninn að sigri heimamanna með frábærri markvörslu heilt yfir í leiknum. „Þetta var flottur leikur en ég á samt helling inni, ég er ekki orðinn alveg 100% en þetta er allt að koma. Formið orðið gott og löppin fín, eigum við ekki að segja að ég sé orðinn um það bil 90%,“ sagði Hreiðar. Akureyri fær stutta hvíld því strax á laugardaginn eiga þeir leik við lið Gróttu2 í bikarnum. „Það er skammt á milli leikja hjá okkur núna, fáum Gróttu2 í heimsókn á laugardaginn. Ég veit nú ekki mikið um þetta lið en strákarnir af Nesinu eru alltaf erfiðir viðureignar. Við megum alla vegna ekki við neinu vanmati og verðum bara að mæta eins gíraðir í þann leik eins og þennan hérna í dag,“ sagði Hreiðar að lokum. Bjarni: Þú vinnur ekki leik með 28% skotnýtingu Bjarni Fritzson annar þjálfari ÍR-inga gat ekki útskýrt ástæðuna fyrir stóru tapi sinna manna hér í kvöld. „Við byrjum leikinn illa, með fjóra tapaða bolta á fyrstu sex mínútunum. Eftir það komumst við aðeins í takt við leikinn sóknarlega. Við erum að ná að spila okkur oft í gegn en nýtum ekki færin. Við erum með 28% skotnýtingu í leiknum, hvernig eigum við að vinna leikinn með þannig nýtingu? Það er greinilegt að Hreiðar er vel að þessu landsliðssæti kominn þar sem hann átti stjörnuleik hérna í kvöld. Við náðum síðan einhvern veginn engum takti varnarlega. Þegar illa gengur að nýta færin hinum megin dregur það sjálfstraustið úr mönnum og við missum hausinn varnarlega,“ sagði Bjarni Fritzson sem var markahæstur í ÍR-liðinu með sex mörk. Akureyri sem skoraði 32 mörk í þessum leik hefur verið gagnrýnt í byrjun móts fyrir slakan sóknarleik. Það var þó ekki að sjá hér í kvöld. Hins vegar komu gæði sóknarleiks Akureyrar Bjarna þó ekki á óvart. „Akureyri er með hörku lið, þetta eru flottir strákar sem hafa spilað flestir lengi saman. Þetta eru nánast sömu strákar og ég var að þjálfa hérna fyrir tveimur árum og mikil gæði í hópnum. Þegar þeir smella eins og þeir gerðu í kvöld er erfitt að eiga við þá. Þetta er hörku lið á góðum degi,“ sagði Bjarni. Bjarni var markahæstur ÍR inga með 6 mörk í leiknum ÍR á leik gegn Fjölni2 í bikarnum á laugardaginn og stefna ÍR-ingar langt í bikarnum og segir Bjarni þá ekki hafa efni á einhverju vanmati. „Við vorum ekki nægilega grimmir hérna í kvöld og við eigum mikið inni. Við náum því fram á laugardaginn. Við mætum með eins sterkt lið og við mögulega getum gegn Fjölni enda stefnum við eins langt og við komumst,“ sagði Bjarni að lokum.


Leikir liðanna hafa verið baráttuleikir		20. október 2015 - Akureyri handboltafélag skrifar Mikilvægur leikur gegn ÍR á fimmtudaginn Akureyri tekur á móti ÍR í KA-Heimilinu á fimmtudaginn en liðin mættust í hörkuleik í fyrstu umferð deildarinnar. Strákarnir eru klárir í slaginn og ætla sér aftur á sigurbrautina. Fjórir síðustu leikir Akureyrar síðastliðið vor voru einmitt gegn ÍR, síðasti leikurinn í deildarkeppninni og síðan þrír leikir í 8-liða úrslitunum. Allir voru þeir svakalegir spennuleikir. Deildarleikurinn var útileikur og þar vann Akureyri þriggja marka sigur, 27-30 þar sem Halldór Logi Árnason og Brynjar Hólm Grétarsson skoruðu sex mörk hvor. Brynjar var þarna að spila sinn fyrsta leik eftir langvarandi meiðsli. Heiðar Þór Aðalsteinsson fór mikinn í fyrsta leiknum í úrslitakeppninni og skoraði 11 mörk. Heiddi var öruggur á vítalínunni og skoraði úr átta vítaköstum af níu sem liðið fékk. Næsti leikur var heimaleikur þar sem Akureyri jafnaði metin í einvíginu. Í þeim leik var Kristján Orri Jóhannsson aðalmaðurinn og skoraði sömuleiðis 11 mörk, þar af fimm úr fimm vítum. Oddaleikurinn sem fór fram í Austurbergi var hreint út sagt rosalegur, liðin skiptust á að hafa forystuna en í lokin féll sigurinn ÍR megin, 24-22. Þetta var lokaleikur Heimis Arnar Árnasonar með liðinu og má svo sannarlega segja að Heimir hafi kvatt með stæl en hann var valinn maður Akureyrarliðsins í leiknum. Það stefnir því í mikla spennu í KA heimilinu á fimmtudaginn, þetta er leikur sem þú vilt ekki missa af, áfram Akureyri! Í upprifjun okkar á leikjum Akureyrar og ÍR rákumst við á upptöku af glæsilegu sirkusmarki Andra Snæs Stefánsson frá leik liðanna frá október 2012. Það er Jovan Kukobat markvörður sem á sendinguna á Andra. Eins og kom fram hjá okkur leikur Jovan núna í markinu hjá Hapoel Ramat Gan frá Ísrael sem lék tvo leiki gegn ÍBV um nýliðna helgi í Áskorendakeppni Evrópu. Jovan var besti leikmaður liðsins í leikjunum en ÍBV fór áfram í keppninni. Hér að neðan er markið hjá Andra, sjón er sögu ríkari:

Til baka Senda á Facebook

Umsjón og hönnun: Stefán Jóhannsson og Ágúst Stefánsson

web statistics