Svekkjandi tap gegn Fram hjá körlunum

Það var enn einn hörkuleikurinn á milli Fram og Akureyrar í gær, laugardag þegar liðin mættust í Framhúsinu. Eftir að hafa náð að jafna í 2-2 náðu Framarar forystu 6-3 og náðu síðan að auka hana í 9-4, þá vöknuðu okkar strákar til lífsins og náðu með góðum leik að jafna leikinn í 12-12 og komast síðan yfir 13-14. Fram skorar síðan tvö síðustu mörk hálfleiksins og höfðu því forystu í hálfleik 15-14. Sveinbjörn var búinn að eiga feikna góðan leik og sömuleiðis þeir Magnús Stefánsson og Einar Logi Friðjónsson.

Framarar hófu síðari hálfleikinn betur og náðu að auka muninn í 18-14 áður en okkar menn komust á blað og minnkuðu muninn í tvö mörk sem hélst næstu mínútur eða þar til að Akureyri jafnar í stöðunni 24-24 og komust síðan yfir 24-25.

Það var svo sannkölluðu dramatík á síðustu mínútunum, í stöðunni 27-26 fyrir Fram fá þeir gefið aukakast og mótmæli þjálfara kosta brottvísun og í kjölfarið fékk Ási brottvísun fyrir að fá útrás fyrir svekkelsið á trébekknum utan vallarins, en Ási hafði komið sterkur inn leikinn. Tveimur færri urðu lokamínúturnar erfiðar og fór svo að Fram sigraði með tveim mörkum, 29-27. Menn voru að vonum svekktir í leikslok að tapa þessu því liðið lék lengst af mjög vel og spilaði fínan bolta.

Sveinbjörn átti stórleik í markinu og varði 26 skot. Heimildum ber ekki saman um markaskorunina en kemst væntanlega á hreint þegar við fáum afrit af leikskýrslunni.

Það skal tekið fram að vegna bilunar í tölvukerfi var vefur okkar óvirkur í gær, eins og raunar margir vefir hér á Akureyri og fyrir vikið gátum við ekki haldið úti beinni lýsingu frá leiknum.

Við birtum hér nokkrar myndir frá leiknum sem eru fengnar af fram.is þar glíma Andri Snær, Jónatan og Valdi við sinn gamla félaga Halldór Sigfússon. Á síðustu myndinni er hins vegar Friðrik Sæmundur að næla sér í gula spjaldið.