
Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Fyrri leiktímabil

Tímabilið 2009-10

Úrslit leikja

Deild karla

Ljósmyndir frá leiknum

Textalýsing frá leiknum

Tölfræði leiksins

		Akureyri - Haukar 20-24 (7-15)
		N1 deild karla
		Íþróttahöllin
		Fim 10. des. 2009 klukkan: 19:00
		Dómarar: Jónas Elíasson og Ingvar Guðjónsson

Umfjöllun


Oddur stóð fyrir sínu í dag eins og yfirleitt		10. desember 2009 - Akureyri handboltafélag skrifar Magalending gegn frábæru Haukaliði Akureyri tapaði í kvöld 20-24 fyrir Haukum í Íþróttahöllinni. Í stuttu máli sagt var spilamennska Akureyrar í kvöld var ótrúlega slök og þá sérstaklega í fyrri hálfleik þar sem liðið var undir átta mörkum þegar gengið var til búningsklefa. Minnti þessi leikur óþægilega mikið á bikarleikinn gegn FH hér fyrir stuttu. Einhver Hafnarfjarðagrýla virðist hrjá okkar menn á heimavelli því ef undirritaður man rétt þá hefur Akureyri tapað síðustu þremur leikjum sínum á heimavelli gegn FH og síðustu tveimur fyrir Haukum. Fyrri hálfleikur hjá Akureyri var eins og áður sagði algjör hörmung og þá sér í lagi sóknarlega þar sem liðið átti akkúrat engin svör við frábærri vörn Hauka með reynsluboltann Birki Ívar Guðmundsson í banastuði í markinu. Einu mennirnir sem voru jafn slakir og Akureyringar á vellinum voru dómarar leiksins sem áttu vægast sagt dapran leik. Þeir hins vegar urðu alls ekki til þess að Akureyri tapaði leiknum. Sú staðreynd að Birkir Ívar varði 17 skot í fyrri hálfleik einum, segir meira en mörg orð um sóknarleik Akureyrar og varnarleik Hauka og var leik nánast lokið í hálfleik en þá var staðan 15-7 Haukum í vil. Framan af síðari hálfleik virtist sem engin breyting ætlaði að verða á, Haukar héldu áfram og juku forskotið mest í 10 mörk í stöðunni 17-7, 18-8 og 19-9. Eftir það fóru Akureyringar heldur að bíta frá sér en voru samt sem áður langt því frá að ógna forskoti Hauka að neinu ráði því Birkir Ívar einfaldlega varði, varði og varði meir. Alls 25 skot í leiknum og mörg þeirra úr dauðafærum. Allt Haukaliðið var reyndar að spila vel og voru þeir mjög vel að sigrinum komnir. Oddur Gretarsson var langbesti maður Akureyrar ásamt markverðinum Hafþóri Einarssyni, sem spilaði vel í síðari hálfleik. Oddur skoraði alls 7 mörk, þar af 2 úr vítum og Hafþór varði 11 skot síðustu 20 mínútur síðari hálfleiks. Gestirnir skoruðu einungis 4 mörk síðustu 18 mínútur leiksins, eftir að Hafþór tók að verja. Hins vegar varði Birkir eins og áður sagði ótrúlega í Haukamarkinu og því náðu Akureyringar aldrei að komast nær en í þann fjögurra marka mun sem leikurinn endaði í 24-20 fyrir Haukum. Leiðinlegt er að enda árið í deildinni á þessum nótum fyrir strákana okkar sem hafa spilað vel að undanförnu en nú tekur við langt hlé í deildinni, nánar tiltekið til 4. febrúar þegar Akureyringar sækja FH-inga heim í Hafnarfjörðinn. Akureyri spilar hins vegar í deildarbikarnum milli jóla og nýárs og vonandi kemst liðið aftur á beinu brautina þar. Mörk Akureyrar: Oddur Gretarsson 7 (3 úr vítum), Jónatan Magnússon 4, Geir Guðmundsson 2, Heimir Örn Árnason 2, Árni Þór Sigtryggsson 2, Andri Snær Stefánsson 1, Guðlaugur Arnarsson 1, Guðmundur H. Helgason 1. Varin skot: Hafþór Einarsson 11 og Hörður Flóki Ólafsson 8. Mörk Hauka: Elías Már Halldórsson 7, Björgvin Hólmgeirsson 6, Einar Örn Jónsson 2, Freyr Brynjarsson 2, Pétur Pálsson 2, Heimir Óli Heimisson 1, Stefán Rafn Sigurmannsson 1, Guðmundur Árni Ólafsson 1, Sigurbergur Sveinsson 1 mark úr víti. Varin skot: Birkir Ívar Guðmundsson 22 (þar af 2 víti) Umfjöllun: Jón Stefán Jónsson Akureyrarliðið stóð sig feiknavel í upphituninni en það er bara ekki nóg. Eins og sjá má var stúkan orðin þéttsetin löngu áður en leikurinn hófst. Og það fjölgaði stöðugt í húsinu, mesti fjöldi áhorfenda í vetur


Tengdar fréttir
Oddur lét mikið að sér kveða í leiknum		17. desember 2009 - Akureyri handboltafélag skrifar Myndir frá leik Akureyrar og Hauka - leikmenn í átökum Nú höfum við fengið í hús dágóðan slatta af myndum úr Haukaleiknum á fimmtudaginn. Eins og vanalega stendur Þórir Tryggvason ljósmyndavaktina og festir á filmu athyglisverð augnablik úr leiknum. Áður er búið að raða saman myndum af áhorfendum en hér kemur syrpa af leikmönnunum sjálfum í hita leiksins. Gulli gefur ekkert eftir í vörninni Smelltu hér til að sjá allar leikmannamyndirnar.


Stúkan full og rúmlega það		17. desember 2009 - Akureyri handboltafélag skrifar Frábærir áhorfendur - myndir af þeim frá Haukaleiknum Áhorfendur troðfylltu stúkuna í Íþróttahöllinni í síðustu viku og þurfti að bæta við stólum á gólfinu til að koma fólki fyrir. Þrátt fyrir að liðið næði ekki að sýna hvað í því býr þá sýndu áhorfendur frábæra takta og gerðu sitt til að hvetja liðið áfram. Enda ekki að undra þar sem í hlut eiga bestu stuðningsmenn á landinu og þeir eiga svo sannarlega sinn þátt í að skapa umgjörðina um leikina sem var einmitt viðurkennd í dag að væri sú besta á landinu. Hér er hægt að skoða fjöldan allan af myndum sem Þórir Tryggvason tók af áhorfendum í Haukaleiknum síðasta fimmtudag.


Rúnar, Oddur og Jonni voru ekki sérlega kátir eftir leikinn		11. desember 2009 - Akureyri handboltafélag skrifar Hvað sögðu menn eftir Haukaleikinn í gær? Þjálfarar og leikmenn liðanna voru teknir tali af ýmsum fréttamönnum eftir leikinn og að sjálfsögðu var misjafnt í þeim hljóðið. Kíkjum á nokkur viðtalanna. Rúnar Sigtryggsson, þjálfari Akureyrar var tekinn í viðtal af Hilmari Þórlindssyni þuli hjá Sporttv.is eftir leik og var mjög ósáttur. „Þetta var stórleikur hjá Birki Ívari í markinu og áhorfendum okkar á pöllunum, þeir voru frábærir en því miður vorum við langt því frá að vera jafn góðir og þeir,“ sagði Rúnar. Aðspurður um ástæðuna fyrir svona lélegum leik síns liðs sagði Rúnar að leikmenn virkuðu yfirspenntir og langt því frá að vera rétt stemmdir fyrir leik sem þennan. „Þeir virðast ekki höndla þá umgjörð sem er um þessa leiki og svífa einhversstaðar á bleiku skýi í stað þess að einbeita sér að leiknum,“ sagði Rúnar orðrétt og augljóslega sársvekktur. Í lok viðtalsins barst spjallið að dómgæslunni í leiknum sem var vægast slök að mati undirritaðs og hallaði verulega á Akureyri eins og reyndar nokkrum sinnum áður í vetur í Höllinni. Rúnar sagði eitthvað á þá leið að dómgæslan hafi sannarlega ekki haft úrslitaáhrif í leiknum en sjá og heyra mátti á honum í viðtalinu að hann var verulega ósáttur við dómgæsluna. Oddur Gretarsson, sem var bestur útispilara Akureyringa, sagði í samtali við Einar Sigtryggsson á mbl.is að allir nema markverðir liðsins hefðu verið langt frá sínu besta. En hvaða skýringar hafði Oddur á þessum hörmungum í upphafi leiks? „Við vorum alls ekki mættir. Kannski voru menn eitthvað stressaðir enda margir áhorfendur á leiknum. Þetta á ekki að vera svona en kannski hefur þetta eitthvað með reynsluna að gera. Haukarnir eru búnir að spila miklu fleiri alvöru stórleiki en við svo það hjálpar þeim eflaust. Ef við ætlum að kalla okkur topplið þá eigum við að vera tilbúnir í svona leik. Við lærum af þessu og komum sterkir til leiks í deildabikarnum og á næsta ári," sagði Oddur. Jónatan Magnússon,fyrirliði Akureyrar talaði við Hjalta Þór Hreinsson á visir.is. „Þetta eru vonbrigði fyrir okkur og alla þá sem mættu. Ég ætlaði bara ekki að trúa stöðunni og holningunni á liðinu þegar þetta byrjaði. Við vorum bara á hælunum frá byrjun fyrir framan fullt af fólki. Verkefnið var bara of stórt. Við vorum því miður ekki með fullan fókus á leikinn. Við létum dómarana fara alltof mikið í taugarnar á okkur. Dómgæslan fannst mér hræðileg í leiknum, af því maður var svo pirraður. Núna þegar leikurinn er búinn var örugglega ekkert að henni. Við pirruðum okkur á hverjum einasta dómi og orkan sem átti að fara í að rífa sig upp af rassgatinu fór í pirring. Þetta var ein allsherjar krísa. Þó að það sé reynsla í þessu liði lentum við í því að fara að gera alltof mikið sjálfir þegar illa gekk, við fórum að stytta sóknirnar í staðinn fyrir að lengja þær og við fórum að skjóta verr sem Birkir átti ekki í erfiðleikum með. Þeir þrykktu okkur aftur niður á jörðina. Ég var búinn að segja það einhversstaðar að þetta yrði prófsteinn á liðið og við þurfum að fara í upptökupróf. Munurinn á liðunum er sá að þeir höndla greinilega stærri leikina, þeir eru vanari þessu. Hjá okkur er greinilega of langt síðan menn voru undir einhverri pressu, það er ljótt að segja það. En vonandi höldum við áfram að vinna í deildinni til að fá fleiri svona leiki,“ sagði Jónatan. Aron Kristjánsson, þjálfari Hauka, var virkilega ánægður með sína menn í viðtali við Einar Sigtryggsson á mbl.is: „Þær áherslur sem við lögðum upp fyrir þennan leik gengu upp. Við vitum að Akureyringarnir eru með reynslumikla og klóka leikmenn en þeir eru ekkert sérlega hraðir. Vörnin náði að stöðva þessa menn og taka bitið úr sókninni. Í seinni hálfleiknum slaknaði aðeins á þessu en það er bara eðlilegt. Við spiluðum erfiðan leik á sunnudaginn og það var kannski smá þreyta í okkur í restina. Það hefur gengið vel hjá okkur núna. Við erum taplausir í deildinni, áfram í bikarnum og í Evrópukeppninni svo ég get ekki kvartað. Næst er það HK í deildinni, frestaður leikur og sá síðasti fyrir jól.“ Einar spurði Aron um deildabikarinn sem verður á milli jóla og nýárs. „Við erum ekkert farnir að spá í þá keppni. Við hugsum bara um næsta leik og það hefur gengið hjá okkur hingað til. Við missum okkur ekkert í einhverjum skýjaborgum. Við beinum sjónum okkar bara að næsta leik því það er hann sem skiptir mestu máli". Að lokum vildi Aron hrósa Akureyringum fyrir frábæra umgjörð í kringum leikinn og magnaðan stuðning áhorfenda þótt þeir rúmlega þúsund manns sem voru í Íþróttahöllinni hafi nær allir verið á bandi heimamanna. Hjalti Þór Hreinsson á visir.is ræddi við Elías Má Halldórsson leikmann Hauka: „Við vorum skrefinu á undan alveg frá byrjun,“ sagði Elías. „Við leggjum grunninn að sigrinum í fyrri hálfleik. Mér fannst þeir mæta óvenju fúlir og pirraðir til leiks og við bara nýttum okkur það. Við keyrðum bara á þá og vorum ekkert að pirra okkur á dómurunum eða neinu slíku. Mér fannst við spila mjög vel í fyrri hálfleik en svo verða menn pínu værukærir þegar við erum komnir með gott forskot. Við hefðum átt að vinna þennan leik með sjö eða átta marka mun. Við gáfum eftir síðustu tíu mínúturnar, það er kannski eðlilegt. En við löndum tveimur stigum hérna á Akureyri sem ekki mörg lið gera. Ég bjóst við Akureyringum sterkari, ég verð að viðurkenna það. Ég átti von á brjáluðum leik, en þetta var auðveldara en ég átti von á,“ sagði Elías. Og þjálfarinn Aron Kristjánsson tók í sama streng er hann ræddi við Hjalta: „Ég verð að segja að ég bjóst við þeim sterkari. Þeir eru með flott lið og hafa verið að spila vel en við áttum ágætis leik í dag. Við erum ánægðir með okkar leik og sigurinn,“ sagði Aron.

Hörður Fannar er klár í leikinn í kvöld

10. desember 2009 - Akureyri handboltafélag skrifar

Leikur dagsins: Akureyri – Haukar klukkan 19:00 (lýsing)

Það er komið að síðasta leik ársins í N1 deildinni hjá Akureyri Handboltafélagi. Andstæðingar okkar manna í dag eru engir aðrir en Íslandsmeistarar Hauka sem jafnframt eru efstir í deildinni fyrir leikinn. Með sigri í dag tekur Akureyri hins vegar toppsætið og það má öllum vera ljóst að alt verður lagt í sölurnar til að það verði.

Leikurinn hefst eins og vanalega klukkan 19:00 en við brýnum fyrir fólki að koma tímanlega þar sem reikna má með fjölmenni. Forsala aðgöngumiða verður á Glerártorgi í dag frá klukkan 14:00- 17:30.

Við verðum með beina textalýsingu frá leiknum eins og vanalega fyrir þá sem ekki eiga heimangengt. Þú smellir hér til að fylgjast með beinu textalýsingunni sem opnast í sérstökum glugga og uppfærist sjálfkrafa á 20 sekúndna fresti.

Einnig ætlar SportTV. is að vera með beina útsendingu á netinu frá leiknum. Þeir félagar hafa verið til mikillar fyrirmyndar í vetur. Til að fylgjast með útsendingu SportTV.is skaltu smella hér eða á merkið hér við hliðina.

Stóra spurningin er svo hvort að RÚV sjái ástæðu til að mynda leikinn eða hvort afskiptaleysið verði eins æpandi og í síðasta viku þegar Akureyri lék gegn Val?


Það má búast við því að verði þröng á þingi í Höllinni		9. desember 2009 - Akureyri handboltafélag skrifar Forsala á leikinn gegn Haukum og happdrætti Þar sem búast má við miklum fjölda áhorfenda á fimmtudaginn og þröng á þingi í Höllinni hefur verið ákveðið að hafa forsölu á aðgöngumiðum. Miðasala verður á Glerártorgi í grennd við Nettóbúðina í dag, miðvikudag og fimmtudag frá klukkan 14:00 – 17:30 báða dagana. Miðaverð er að vanda 1.000 krónur fyrir fullorðna og 300 krónur fyrir 15 ára og yngri. Jafnframt verða í boði bolir merktir Akureyri handboltafélagi á 2.500 krónur. Glæsileg módel í bolunum góðu Á leiknum sjálfum verður dreginn út heppinn stuðningsmaður Akureyrar handboltafélags, en stuðningsmannaskírteinin eru númeruð og fær sá heppni veglegan vinning. Sjáumst í Höllinni á fimmtudaginn – Áfram Akureyri!


Það er kominn tími á að taka tvö stig af Haukunum		8. desember 2009 - Akureyri handboltafélag skrifar Síðasti leikur ársins á fimmtudaginn – Haukar Það er ekkert lát á stórleikjunum í Íþróttahöllinni þessa dagana. Í síðustu viku sátu Valsmenn á toppi N1-deildarinnar en Akureyri sigraði þá með frábærum leik. Núna eru það Íslandsmeistarar Hauka sem eru á toppi deildarinnar og það eru einmitt þeir sem leikmenn Akureyrar keppa við á fimmtudaginn. Haukar eru með ótrúlega seigt lið og engin tilviljun að þeir sitja á toppi deildarinnar. Hjá Haukaliðinu er mikil reynsla og sigurhefð þannig að þó að liðið lendi í vandræðum í leikjum sínum, koma leikmenn alltaf til baka og ná að gera það sem þarf á lokaandartökum leikjanna. Þetta kom skírt fram í maraþonleik liðsins gegn FH í Eimskipsbikarnum á sunnudaginn en þar náðu þeir í framlengingu í leik sem virtist tapaður og fóru að lokum með eins marks sigur eftir tvíframlengdan leik. Það sem af er N1 deildinni hafa Haukar ekki tapað leik en gert tvö jafntefli. Það fyrra var einmitt á heimavelli sínum gegn liði Akureyrar og síðan í Vodafonehöllinni gegn Valsmönnum. Í báðum þessum leikjum var heppnin eða kannski hefðin með Haukunum á lokasekúndunum sem tryggði þeim jafnteflin. Þrátt fyrir að hafa misst leikmenn frá síðasta tímabili er Haukaliðið vel mannað. Í markinu er það Birkir Ívar Guðmundsson sem sjaldan bregst og ungur piltur, Aron Rafn Eðvarðsson hefur einnig fengið að spreyta sig í vetur og staðið sig með sóma. Markverðirnir Birkir Ívar og Aron Rafn Helstu skyttur Haukanna eru þeir Sigurbergur Sveinsson og Björgvin Hólmgeirsson sem á góðum degi eru allt í öllu í sóknarleik þeirra. Elías Már Halldórsson leikur oft í hægri skyttunni þrátt fyrir að vera hornamaður að upplagi og er baneitraður sem slíkur. Skytturnar þrjár: Sigurbergur, Björgvin og Elías Mar Hornamenn Haukanna, þeir Freyr Brynjarsson og Einar Örn Jónsson hafa í síðustu leikjum tryggt Haukunum hagstæð úrslit í háspennuleikjum enda reynsluboltar sem aldrei klikka. Í miðju varnarinnar stendur svo einn reynsluboltinn enn, Gunnar Berg Viktorsson sem af og til bregður sér í sóknarleikinn líka. Hornamennirnir, Freyr og Einar Örn ásamt varnarjaxlinum Gunnari Berg Liðinu stjórna svo karlarnir Aron Kristjánsson og Óskar Þór Ármannsson sem þekkja varla annað en vinna titla þannig að það má ljóst vera að Haukaliðið er firnaöflugt og á þeim bænum er ávallt krafist sigurs. Þjálfarateymið, Aron og Óskar Ármannsson Liði Akureyrar hefur heldur betur vaxið ásmegin eftir því sem liðið hefur á mótið. Þrátt fyrir að hiksta í fyrstu leikjunum máttu Haukar þakka fyrir jafntefli í Hafnarfirði eins og áður er getið. Liðið hefur fundið sig betur og betur og hefur unnið síðustu fimm leiki og aldrei leikið betur en í sigurleiknum gegn Val í síðustu viku. Stemmingin og baráttan sem einkenndi þann leik, bæði innan vallar og meðal áhorfenda var til fyrirmyndar og ef sami andi verður til staðar á fimmtudaginn verður örugglega gaman í Íþróttahöllinni. Þetta er jafnframt síðasti deildarleikur Akureyrarliðsins á þessu ári en við tekur langt hlé vegna þátttöku Íslenska landsliðsins á Evrópumeistaramótinu í janúar. Næstu leikir verða ekki fyrr en í febrúar, nánar tiltekið útileikur gegn FH þann 4. febrúar og síðan heimaleikur gegn Gróttu þann 8. febrúar. Það er því ekkert annað í stöðunni en að leggja allt í sölurnar gegn Haukunum og fara síðan í langt jólafrí með sigurbros á vör.