Warning: Undefined array key "frettanr" in /web/akhandadmin/public_html/index.php on line 15 Akureyri komið í úrslitaleik bikarkeppninnar - umfjöllun - Akureyri Handboltafélag
Dómarar: Ingvar Guðjónsson og Jónas Elíasson. Eftirlitsdómari er Kjartan Steinbach
Umfjöllun
Tengdar fréttir
Og fjörið heldur áfram næsta fimmtudag
15. febrúar 2011 - Akureyri handboltafélag skrifar
Hellingur af myndum frá leik Akureyrar og FH
Þórir Tryggvason sendi okkur dágóðan slatta af myndum frá atganginum í Höllinni í gær þar sem Akureyri tryggði sér sæti í bikarúrslitaleiknum. Hér eru 72 myndir og segja þær allt sem þarf um stemminguna og fjörið. Sem betur fer þá fáum við annan slag sömu liða á fimmtudaginn þannig að við getum látið okkur hlakka til enda verður baráttan örugglega ekki minni þá.
15. febrúar 2011 - Akureyri handboltafélag skrifar
Hvað sögðu menn eftir bikarleikinn gegn FH?
Það eru miklar tilfinningar í gangi í kringum undanúrslitaleikina í bikarnum enda stærsti draumur allra að komast í stærsta leik ársins og jafn óþolandi að tapa eftir að vera kominn þetta langt í keppninni. Þetta kemur að sjálfsögðu fram í viðtölum blaðamanna við þjálfara og leikmenn liðanna.
Þröstur Ernir Viðarsson, blaðamaður Vikudags ræddi við Heimi Örn Árnason sem var að vonum ánægður í leikslok:
Heimir Örn: Var orðinn stressaður
„Mér líður bara mjög vel,” sagði Heimir, vel sveittur í samtali við Vikudag eftir leik. Hann viðurkenndi þó að það var farið að fara um hann undir lokin þegar munurinn var aðeins eitt mark.
„Ég var reyndar orðinn mjög stressaður í lokin þegar þeir minnkuðu þetta niður í eitt mark. Það var eitthvern veginn allur kraftur farinn úr okkur síðasta korterið, enda vorum við búnir að nota rosalegan kraft allan tímann í þessa vörn hjá okkur. En við unnum þetta og mér alveg sama hvernig fórum að því,” sagði Heimir.
Heimir fór fyrir sínum mönnum, sannur fyrirliði
Andri Yrkill Valsson á Morgunblaðinu ræddi einnig við Heimi Örn:
Fjölmennum suður „Við munum fjölmenna suður í úrslitaleikinn, þetta verður bara skemmtiferð fyrir fjölskylduna, ekki spurning,“ sagði hinn síkáti Heimir Örn Árnason, leikmaður Akureyrar, eftir að liðið tryggði sér sæti í úrslitum Eimskipsbikarsins með sigri á FH fyrir norðan, 23:20, í gærkvöldi.
Heimir Örn var mjög ánægður með leik sinna manna þrátt fyrir að síðasti kaflinn hafi verið slæmur. Mikil orka fór í varnarleikinn „Þetta fór eins og til var ætlast fyrir utan síðasta korterið en við unnum leikinn með fyrri hálfleiknum og rosalegri vörn. Ég held að það hafi fyrst og fremst verið vegna þess hversu mikil orka fór í varnarleikinn að við slökuðum á undir lokin. Ég, Gummi og Höddi unnum mjög langt úti á móti sóknarmönnum FH en þeir vilja helst skjóta og því er kannski eðlilegt að síðustu mínúturnar hafi farið svona. Við hefðum kannski þurft að hafa einn eða tvo sóknarmenn í viðbót til að hvíla mannskapinn en það skiptir engu máli, við unnum,“ sagði Heimir Örn.
FH-ingar fá tækifæri til að hefna fyrir ósigurinn strax á fimmtudaginn en þá mætast liðin aftur fyrir norðan, í þetta sinn í deildinni. „Það er eflaust smá spennufall hjá okkur núna en við höfum þrjá daga til að jafna okkur fyrir næsta leik. Þeir munu auðvitað mæta alveg klikkaðir á fimmtudaginn og við verðum að vera viðbúnir því,“ sagði Heimir Örn.
Andri Yrkill Valsson á Morgunblaðinu ræddi við varnartröllið Guðlaug Arnarsson:
Guðlaugur: Vörnin og markvarslan gerðu gæfumuninn
„Þetta var hörkuleikur en það má ekki gefa neitt eftir á móti FH-ingum þar sem þeir eru með rosalega gott lið. En við gáfum eftir undir lokin, kannski vegna þreytu þar sem við vorum að keyra mikið á sama liðinu, en vörnin og markvarslan hélt okkur inni í leiknum,“ sagði varnartröllið Guðlaugur Arnarsson, leikmaður Akureyrar, eftir sigurinn gegn FH, 23:20, í undanúrslitum Eimskipsbikarsins í handknattleik karla á Akureyri í kvöld.
Guðlaugur var skiljanlega rámur í leikslok eftir að hafa stjórnað sínum mönnum í vörninni. „Það er ekki hægt að mæta í undanúrslit bikarsins og reyna að verja unnið forskot. Undir lokin áttum við í erfiðleikum með að skora þar sem vörnin small hjá þeim, markmaðurinn fór að verja og þeir svara með hraðaupphlaupum.“
Með sigrinum er Akureyri komið í úrslit bikarsins í fyrsta sinn í sögu félagsins. „Það er auðvitað bara frábært. Stuðningurinn er náttúrulega geðveikur og þú hlýtur að upplifa gæsahúðina sjálfur yfir því að vera með þessu fólki,“ og getur blaðamaður ekki neitað þeirri staðhæfingu Guðlaugs.
„Þetta er frábær hópur og liðið á allt hrós skilið. Við erum í þessu saman, allir eru að berjast og liðsheildin er að skila þessum góða árangri.“
FH-ingar fá tækifæri til að hefna fyrir ósigurinn strax á fimmtudaginn en þá mætast liðin aftur fyrir norðan, í þetta sinn í deildinni.
„Við fögnum í kvöld en svo tekur undirbúningur fyrir næsta leik við enda verður algjört stríð á fimmtudaginn. Þeir munu mæta brjálaðir til leiks og við munum svara því enda ætlum við okkur að vera áfram á toppi deildarinnar. Við þurfum því að gróa hratt og vera klárir, fá röddina aftur fyrir fimmtudaginn,“ sagði Guðlaugur Arnarsson, leikmaður Akureyrar handboltafélags.
Gulli fagnar með sínum mönnum
Atli Hilmarsson, þjálfari Akureyrar, var hress og kátur í viðtali við Henry Birgis á Fréttablaðinu, enda kominn í fyrsta skipti í úrslit með karlalið í bikarnum. Hann náði því ekki á sínum tíma með KA, sem hann gerði reyndar að Íslandsmeisturum.
Atli Hilmarsson: Stuðningurinn úr stúkunni frábær
„Þetta var virkilega sanngjarn sigur að mínu mati. Það hefði verið agalegt að tapa leiknum eftir það sem á undan var gengið. Þeir náðu að minnka í eitt mark en þá stigu Sveinbjörn og Bjarni upp aftur. Þessir strákar eru algjör hvalreki fyrir þetta félag,“ sagði Atli kátur.
„Munurinn á liðunum lá í vörn og markvörslu. Við gerðum þeim erfitt fyrir, létum þá taka erfið skot og fengum oft hraðar sóknir fyrir vikið. Einnig var stuðningurinn úr stúkunni frábær og við erum þakklátir fyrir hann,“ sagði Atli en hann viðurkenndi að dregið hefði verulega af hans mönnum undir lokin er FH kom til baka.
„Við héldum samt út og það var fyrir öllu. Nú er það Valur í úrslitum og það verður erfitt. Valsmenn hafa mikla reynslu úr þessum leikjum. Þeir spila skynsamlega og gefast aldrei upp eins og mátti sjá í leiknum gegn Fram. Það verður svakalega erfiður leikur.“
Atli Hilmarsson fagnar með sínum mönnum
Gleðin var skiljanlega ekki sú sama í herbúðum FH liðsins eftir leikinn, Þröstur Ernir, blaðmaður Vikudags ræddi við Kristján Arason annan þjálfara FH:
Kristján Arason: Of margir lykilmenn að klikka
Kristján Arason þjálfari FH var vitaskuld sár og svekktur í leikslok, enda voru gestirnir ansi nálægt því að jafna metin undir lokin og knýja fram í það minnsta framlengingu. Kristján var sérstaklega óánægður með sóknarleikinn, enda komust FH-ingar lítt áleiðis gegn sterkum varnarmúr Akureyrar.
„Sóknin brást bara og of mikið af lykilmönnum sem finna sig ekki í dag. Strákar eins og Ási og Óli (Ásbjörn Friðriksson og Ólafur Guðmundsson) sem hafa staðið sig vel finna sig ekki í kvöld,“ sagði Kristján við Vikudag eftir leik.
„Við erum allan tímann í eltingarleik sem er erfitt. Við spiluðum þó ágætan seinni hálfleik en það kom tíu mínútna kafli sem gerði út um leikinn þegar við misstum þá sjö mörkum frá okkur. Það var of mikið en svona fór þetta og ég vil bara óska Akureyri til hamingju,“ sagði Kristján.
Hinn þjálfari FH liðsins, Einar Andri Einarsson ræddi við Andra Yrkil Valsson hjá Morgunblaðinu:
Einar Andri: Okkar eigin klaufaskapur
„Við börðumst vel og gáfumst aldrei upp en fyrir okkar eigin klaufaskap náðum við ekki að vinna leikinn,“ sagði Einar Andri Einarsson, þjálfari FH, eftir ósigurinn gegn Akureyri fyrir norðan, 23:20.
„Bæði lið spiluðu frábæra vörn og við fundum ekki lausn á varnarleiknum hjá þeim auk þess sem Sveinbjörn varði mjög vel í markinu.“
Liðin mætast aftur næstkomandi fimmtudag, í þetta sinn í deildinni, og segir Einar að FH-ingar mun hefna fyrir ósigurinn í þeim leik. „Þetta var alveg ekta bikarslagur og hlutirnir féllu bara með Akureyri í dag. Við stefnum á að svara fyrir okkur núna á fimmtudaginn og munum klára leikinn þá.“
Hjörtur Hinriksson leikmaður FH meiddist snemma leiks og þurfti að fara útaf. Hann hlaut mikla aðhlynningu og var svo borinn úr húsi af sjúkraflutningamönnum rétt fyrir hálfleik. Aðspurður um meiðslin segir Einar: „Ég veit ekkert með vissu en hann meiddist í hásin,“ og því er ljóst að Hjörtur gæti verið lengi frá keppni.
Þjálfarar FH, Kristján og Einar ræða málin við Kjartan Steinbach eftirlitsdómara
Henry Birgis á Fréttablaðinu ræddi við Pálmar Pétursson markvörð FH sem var að vonum hundsvekktur í leikslok:
Pálmar Pétursson: Töpuðum fyrir betra liði
„Við skitum á okkur í 45 mínútur og það er ekki hægt gegn svona góðu liði. Það gekk fátt upp hjá okkur og þeir stýrðu leiknum. Það verður að viðurkennast að við töpuðum fyrir betra liði í þessum leik,“ sagði Pálmar Pétursson, markvörður FH, hundsvekktur eftir leik.
Pálmar í leik gegn Akureyri fyrir ári síðan, hann var líka svekktur þá í leikslok
Reynsluboltinn Guðlaugur verður á sínum stað
14. febrúar 2011 - Akureyri handboltafélag skrifar
Leikur dagsins: Akureyri – FH í beinni textalýsingu
Í kvöld fer fram einn stærsti leikur í sögu Akureyrar Handboltafélags, sæti í úrslitaleik Bikarkeppninnar er í húfi og það yrði í fyrsta sinn í sögu félagsins sem þeim áfanga yrði náð. Að sjálfsögðu vonumst við til að bæjarbúar flykkist í Höllina og styðji sína menn til sigurs, það er varla hægt að hugsa sér betri skemmtun fyrir alla fjölskylduna.
Fyrir þá stuðningsmenn sem ekki eiga heimangengt bendum við á beina textalýsingu hér á heimasíðunni. Eins og vant er þá opnast hún í sérstökum glugga og uppfærist sjálfvirkt með 15 sekúndna millibili. Smelltu hér til að fylgjast með textalýsingunni!
Einnig hyggst SportTV.is vera með beina útsendingu frá leiknum og ætti að vera hægt að fylgjast með útsendingu þeirra með því að smella hér.
Reynsluboltinn Heimir er klár í slaginn
14. febrúar 2011 - Akureyri handboltafélag skrifar
Leikur dagsins: Heimir Örn fullur tilhlökkunar fyrir FH leikinn
Það er heldur betur von á skemmtun og látum í Íþróttahöllinni í kvöld þegar Akureyri og FH eigast við í undandúrslitum Eimskipsbikarsins. Sigurvegarinn mætir Valsmönnum sem tryggðu sér sæti í úrslitaleiknum með sigri á Fram í gær.
Heimir Örn Árnason leikstjórnandi og fyrirliði Akureyrar er fullur tilhlökkunar fyrir leikinn gegn FH í kvöld í undanúrslitum Eimskipsbikarsins í handknattleik karla. Hann segir að Akureyri þurfi að varast skytturnar hjá FH. Þetta kemur m.a. fram í spjalli Heimis við Ólaf Má Þórisson, blaðamann mbl.is í dag.
„Þetta verður án efa hrikalega skemmtilegur leikur. Mér líst mjög vel á hann. Við þurfum að ganga vel út í skytturnar hjá FH, þeir eru búnir að vera hrikalega heitir. Svo má náttúrulega ekki gleyma Baldvini (Þorsteinssyni) og fleirum.“
Sigurvegarinn úr þessum leik mætir Val í úrslitaleiknum en þeir unnu Fram í gær í framlengdum leik. Heimir býst einnig við löngu kvöldi fyrir norðan.
„Ég er að búa mig undir eins leik og var í gær. Það kemur mér ekki á óvart ef þetta fer í framlengingu í kvöld. Ég veit ekki af hverju en ég er eiginlega alveg viss um að þetta verði þannig leikur.“
Heimir brýst gegnum FH vörnina í leik liðanna í fyrstu umferð
Heimir Örn er búinn að spila marga úrslitaleikina og hefur reynsluna sem annars ungt lið Akureyrar hefur e.t.v. ekki. Hann kemur því til með að nýtast liðinu vel. „Það þarf að vera sterkur andlega og svo er heppnin einnig stór þáttur í þessu líka. Ég held samt að allir þessir 14 sem eru inná vellinum verði alveg tilbúnir, ég hef enga trú á öðru.
Stemmningin er hrikalega góð og við skrifum sögu Akureyrar með hverjum leiknum sem við vinnum. Við fórum í úrslit í Deildabikarnum og vonandi förum við í úrslit í bikarnum líka. Svo þurfum við að fara að taka einhvern af þessum stóru titlum.“
Ástandið á Akureyrar-liðinu er gott ef undan eru skildir Geir Guðmundsson og Hreinn Hauksson. Þeir eru meiddir og verða ekki með í kvöld. Spurður um hvernig Heimir undirbýr sig fyrir leikinn segist hann halda sömu dagskrá og fyrir aðra heimaleiki. „Ég fer og fæ mér hádegismat, síðan á fótboltaæfingu með drenginn minn og svo bara niður í höll. Ég get bara ekki beðið eftir að klukkan verði sjö.“
Akureyri hefur slegið út tvö lið úr N1-deildinni í leið sinni að undanúrslitunum. Leikurinn í kvöld sem hefst klukkan 19:00 verður annar heimaleikur Akureyrar í keppninni. Leið liðsins má sjá hér að neðan. 32-liða úrslit: HK - Akureyri, 28:29 16-liða úrslit: Akureyri - Afturelding, 30:20 8-liða úrslit: Víkingur - Akureyri, 18:34.
Það mun mikið mæða á þjálfurum liðanna í kvöld
Leikir við FH hafa alltaf verið dramatískir
11. febrúar 2011 - Akureyri handboltafélag skrifar
Bikarslagur gegn FH í Höllinni á mánudaginn
Nú dregur heldur betur til tíðinda í Eimskipsbikarnum, því á mánudaginn kemur í ljós hvort það verður Akureyri eða FH sem tekur þátt í úrslitaleik bikarkeppninnar. Leikurinn verður í Íþróttahöllinni og hefst klukkan 19:00.
Í bikarkeppninni kemur ekkert nema sigur til greina, tap þýðir einfaldlega að þátttöku í keppninni er lokið. Akureyri á harma að hefna gegn FH í bikarnum en undanfarin tvö ár tapaði liðið fyrir þeim þannig að nú er vissulega kominn tími á að hefna fyrir þær ófarir.
FH liðinu var spáð góðu gengi í upphafi tímabilsins og virðist vera komið á gott skrið þessa stundina eftir að hafa misstígið sig dálítið í N1-deildinni. Þannig unnu FH ingar stórsigur á Val, 34-24 í gær og þar á undan gerðu þeir jafntefli við Fram.
Mestu virðist muna að varnarleikurinn hjá liðinu hefur batnað og þeir skora mikið úr hraðaupphlaupum líkt og Akureyrarliðið. Með liðinu spila tveir Akureyringar, Ásbjörn Friðriksson og Baldvin Þorsteinsson. Ásbjörn hefur verið þeirra albesti og stöðugasti leikmaður í vetur og var t.d. markahæstur FH inga gegn Val í gær. Hornamaðurinn Baldvin Þorsteinsson gekk til liðs við FH skömmu fyrir jól og er svo sannarlega betri en enginn, jafnt í sókn sem vörn.
Þá hefur stórskyttan Ólafur Guðmundsson loks fundið sig í síðustu leikjum og skorað grimmt.
Ásbjörn hafði eftirfarandi að segja um leik FH liðsins og væntingar til komandi leikja við Akureyri, en hann ræddi við blaðamann Morgunblaðsins eftir Valsleikinn:
„Við þurftum nú að hafa fyrir þessum sigri en við spiluðum hrikalega góða vörn og hún lagði grunninn að þessum góða sigri,“ sagði Ásbjörn Friðriksson leikmaður FH við mbl.is eftir tíu marka sigur FH-inga á Valsmönnum í kvöld. „Sóknarleikurinn var allt í lagi en vörnin var frábær og við náðum mörgum hraðaupphlaupum vegna hennar,“ sagði Ásbjörn sem átti mjög góðan leik og var markahæstur í FH-liðinu með 9 mörk. „Það hefur gengið vel hjá mér upp á síðkastið og vonandi heldur það bara áfram. Við eigum tvo leiki í röð á móti Akureyri á útivelli og það verður gaman að mæta þeim. Akureyringarnir eru búnir að spila best í vetur og það er ljóst að okkar bíður hörkuleikur. Vonandi tekst okkur að vinna báða leikina en ef ég ætti að velja annan þá myndi ég velja bikarleikinn,“ sagði Ásbjörn.
Ólafur Guðmundsson hafði þetta að segja: „Þetta var mjög góður leikur hjá okkur allan leiktímann, við byrjuðum þetta rólega en spiluðum góða vörn og fína sókn. Þetta var bara klassa leikur. Við vorum allir saman og það er frábært að ná tíu marka sigri gegn Val.
Þeir reyndu að brjóta þetta upp og ég veit ekki hvað þeir prófuðu ekki. En vörnin okkar var klassi og við spiluðum okkar bolta og það skilaði sér,“ sagði Ólafur sem skoraði átta mörk í leiknum.
„Við sýndum núna hvað við getum. Svona eigum við að spila alltaf. Ef við höldum þessu áfram vinnum við öll lið í deildinni. Það var allt gott í kvöld.“
Það má sem sé eiga von á hörkuspennu og dramatík í Höllinni á mánudaginn og nú ríður á að stuðningsmenn flykkist í Höllina og við berjumst fyrir því að komast í úrslitaleik bikarkeppninnar.
Hafa verður í huga að ársmiðahafar og stuðningsmannaskírteini gilda ekki á bikarleiki en að sjálfsögðu verða veitingar fyrir handhafa stuðningsmannaskírteina eins og vant er. Aðgangseyrir á leikinn er 1.000 krónur fyrir fullorðna en 300 fyrir yngri en 15 ára.
Úrvalsdeild karla
Senda skilaboð
Vefur KA
Vefur Þór
Fréttaleit
Ljósmyndir frá leiknum
Textalýsing frá leiknum
Tölfræði leiksins 
Einnig hyggst SportTV.is vera með beina útsendingu frá leiknum og ætti að vera hægt að fylgjast með útsendingu þeirra með því að 
„Við þurftum nú að hafa fyrir þessum sigri en við spiluðum hrikalega góða vörn og hún lagði grunninn að þessum góða sigri,“ sagði Ásbjörn Friðriksson leikmaður FH við mbl.is eftir tíu marka sigur FH-inga á Valsmönnum í kvöld.
„Þetta var mjög góður leikur hjá okkur allan leiktímann, við byrjuðum þetta rólega en spiluðum góða vörn og fína sókn. Þetta var bara klassa leikur. Við vorum allir saman og það er frábært að ná tíu marka sigri gegn Val.
Senda á Facebook