Warning: Undefined array key "frettanr" in /web/akhandadmin/public_html/index.php on line 15 Sveinbjörn tryggði Akureyri annan sigur á FH - Akureyri Handboltafélag
Dómarar: Gísli Jóhannsson og Hafsteinn Ingibergsson. Eftirlitsdómari: Kristján Halldórsson
Umfjöllun
Tengdar fréttir
Bjarni var valinn besti leikmaður Akureyrar í leiknum
20. febrúar 2011 - Akureyri handboltafélag skrifar
Myndasyrpa frá deildarleik Akureyrar og FH
Að vanda var Þórir Tryggvason vopnaður myndavélinni á fimmtudaginn þegar Akureyri lagði FH í æsispennandi leik. Eins og við var að búast var dúndurstemming innan sem utan vallar eins og myndirnar bera með sér. Nú er bara spurning hvernig fer í Kaplakrika þegar liðin mætast enn einu sinni á mánudagskvöldið.
Það er fullt starf að ræða við blaðmenn í tengslum við leiki Akureyrar og FH
19. febrúar 2011 - Akureyri handboltafélag skrifar
Hvað sögðu menn eftir fimmtudagsleik Akureyrar og FH?
Það var veisla hjá blaðamönnum á fimmtudagskvöldið eftir stórslag Akureyrar og FH. Þeir tóku leikmenn og þjálfara liðanna tali og eins og við er að búast voru menn ýmist í skýjunum eða sársvekktir enda lokasekúndur leiksins spennuþrungnar og dramatísk tilþrif Sveinbjörns Péturssonar og Ólafs Guðmundssonar enn ljóslifandi fyrir mönnum.
Sveinbjörn Pétursson: Fannst ég sjá svarta peysu
„Það var virkilega sætt að koma aftur inná undir lokin og klára leikinn fyrir okkur,“ sagði Sveinbjörn Pétursson, markvörður Akureyrar, í viðtali við Andra Yrkil Valsson hjá Morgunblaðinu, en hann var hetja sinna manna í sigri á FH, 25:24. Sveinbjörn varði glæsilega á síðustu sekúndu leiksins og tryggði sigurinn fyrir Akureyringa. „Þetta var frábær sigur en mér finnst ég bara hafa verið á pari í dag og ekkert meira en það, en það voru nokkur skot sem ég hefði viljað taka. Ég fór svo illa með eitt hraðaupphlaup fyrir okkur þar sem ég henti boltanum mjög klaufalega fram völlinn þar sem mér fannst ég sjá svarta treyju, en það hafa bara verið stuttbuxurnar hjá Ása. En það má ekki gleyma því að Stebbi gerði einnig mjög vel í markinu og var með flotta innkomu eins og hann hefur gert í allan vetur. Það er alltaf hægt að treysta á hann,“ sagði Sveinbjörn.
Sveinbjörn var ótrúlegur í leiknum
Hjalti Þór Hreinsson hjá Fréttablaðinu ræddi einnig við Sveinbjörn: Akureyringar hrósuðu sigri og geta þakkað Sveinbirni kærlega fyrir. Hann varði á ögurstundu en viðurkennir að hafa ekki hugmynd um hvernig hann varði. „Maður ver bara einn af hverjum tíu í svona færum. En hann gabbaði vörnina okkar upp úr skónum og þá þarf maður að redda rassgatinu á þeim,“ sagði Sveinbjörn brosmildur en hann hvíldi sig í nokkrar mínútur í seinni hálfleik en kom sjóðheitur aftur inn.
„Ég var pirraður, það er fínt að vera ákveðið reiður, en ég var kominn yfir það. Það var gott að setjast og Stebbi [Guðnason] kom inn og varði vel. Hann hefur hjálpað mér gríðarlega mikið í allan vetur og ég á honum mikið að þakka, það er gott að setjast aðeins og pæla í hvað er að,“ sagði Sveinbjörn.
Þröstur Ernir Viðarsson á Vikudegi spallaði sömuleiðis við Sveinbjörn hetju Akureyrarliðsins eftir að hann varði frá Ólafi Guðmundssyni leikmanni FH á síðustu sekúndunum leiksins. Sveinbjörn var hylltur af ungum æstum áhorfendum í leikslok sem hlupu inná völlinn og fögnuðu með hetjunni. Sveinbjörn var að vonum sáttur eftir leik en hann varði 20 skot í leiknum, þar af 14 í fyrri hálfleik.
„Það er oft stutt á milli á að vera hetja eða skúrkur en ég var hetjan í dag,” sagði Sveinbjörn við Vikudag eftir leik. „Það er samt ekkert hægt að eigna þessari einu markvörslu sigurinn. Við vorum yfir frá fyrstu mínútu en vorum oft klaufar í sókninni og hentum boltanum oft frá okkur. En með mikilli heppni náðum við að klára þetta í kvöld,” sagði Sveinbjörn. Sveinbjörn hafði helstu skyttu FH, Ólaf Guðmundsson, algjörlega í vasanum í kvöld og lét Ólaf líta ansi illa út á köflum. „Hann er svona leikmaður sem skorar stundum 12-13 mörk í leik en aðra leiki er hann ekki að hitta. Ég bara vinn mína heimavinnu og það skilar nokkrum fínum boltum,” sagði Sveinbjörn.
Aðspurður hvort Akureyri sé með betra lið en FH segir Sveinbjörn: „Samkvæmt úrslitum síðustu tveggja leikja erum við betri. Við höfum allavega verið með þá í vasanum hingað til í vetur og ætlum okkur að vera með þá út veturinn.”
Oddur Gretarsson: Verðum bara að halda áfram
Oddur Gretarsson sneri sig á ökkla í leiknum gegn FH í kvöld en það skyggði ekki á gleðina eftir eins marks sigur. Hann verður klár í næsta leik.
Oddur ræddi við Hjalta Þór Hreinsson á Fréttablaðinu: „Þetta var týpískur þreytuleikur. Það fór mikil orka í bikarleikinn og bæði lið gerðu mikið af mistökum. Við ætluðum ekkert að slaka á eftir bikarsigurinn og mættum bara ákveðnir til leiks, það var frábært að ná sex marka forystu. Þeir fundu svo loksins lausn á sókninni sinni en Sveinbjörn er gríðarlegur sigurvegari og það var frábært að sjá hann verja síðasta boltann. Þetta var leiðinlegt fyrir Óla auðvitað en svona er þetta,“ sagði Oddur.
„Við erum núna búnir að slíta okkur aðeins frá pakkanum en það þýðir ekkert að vera með kæruleysi núna, við verðum bara að halda áfram,“ sagði hornamaðurinn, eldhress.
Oddur fær fyrstu aðhlynningu eftir meiðslin
Atli Hilmarsson: Afsönnuðum kenninguna
„Einhvertímann hefði verið sagt að lið sem vinnur í bikarslag og mætir sama liði þremur dögum seinna mundi tapa þeim leik með glans, en við afsönnuðum það,“ sagði Atli Hilmarsson, þjálfari Akureyrar, við Andra Yrkil Valsson blaðamann Morgunblaðsins, eftir að hans menn höfðu unnið tæpan sigur á FH fyrir norðan.
Akureyringar misstu Odd Gretarsson meiddan af velli og sagði það til sín undir restina. „Við misstum Odd út sem kom illa við okkur þar sem við getum notað hann í allar stöður. Ég ætlaði að fara að hvíla menn þegar hann meiddist og þurfti því að keyra heldur mikið á sömu leikmönnunum undir lokin,“ sagði Atli Hilmarsson. Þrátt fyrir tæpan sigur var hann ánægður með sína menn. „Við vorum að spila við frábært lið og erum mjög ánægðir með að hafa innbyrt þennan sigur og tryggt stöðu okkar á toppnum. Við vorum alltaf líklegir og mér fannst frábært að ná svona góðu forskoti í síðari hálfleik þótt við höfum tapað því niður. Liðið er að finna sig alltaf betur og betur þar sem menn eru farnir að kunna mjög vel hver inn á annan. Ég er mjög ánægður með að halda efsta sætinu og að hafa lagt FH tvisvar að velli á svona stuttum tíma.“
Atli hafði einhverja skoðun á dómgæslunni í leiknum
Hjalti Þór Hreinsson á Fréttablaðinu ræddi líka við Atla Hilmarsson sem segir karakter liðsins hafa skipt öllu máli. „Það er oft þannig að þegar lið mætast í bæði bikar og deild að þá er seinni leikurinn erfiðari fyrir sigurliðið. Ég bjóst við því. Ég vildi ná stærra forskoti, við vorum kærulausir, en að ná sex marka forystu var frábært og ég er mjög ánægður. Við vorum að spila við frábært lið. Auðvitað komu þeir til baka og það er gott fyrir þá að eiga mann eins og Ólaf inni. Sveinbjörn varði vel undir restina og reddaði þessu en ég er ánægðastur með að vera áfram á beinu brautinni,“ sagði Atli.
Guðmundur Egill Gunnarsson, fréttamaður sport.is tók Atla sömuleiðis tali eftir leik: „Við vorum náttúrulega að spila við hörku gott handboltalið og ég er mjög ánægður með að hafa unnið þennan leik. Það kom í ljós enn einusinni að við vorum orðnir þreyttir, reyndar eins og þeir, en ég er mjög ánægður með hvernig við klárum þetta. Að hafa komist 6 mörkum yfir í seinni hálfleik var auðvitað mjög gott en það var óþarfti að hleypa þeim svona nálægt í restina.“
Atli hefur ekki rúllað mikið á mannskapnum í vetur enda ekki kannski með jafn breiðan hóp og mörg lið í deildinni. Fleiri leikmenn fengu þó tækifæri í leiknum í kvöld en það kom ekki bara til af góðu því Oddur Gretarsson þurfti að fara útaf meiddur í síðari hálfleik. „Já ég rúllaði meira á liðinu en við þurftum reyndar líka að gera það vegna meiðsla. Við misstum Odd náttúrulega út en þetta er orðið mjög erfitt. Það er búið að vera mikið álag á leikmönnum, svo eigum við leik á mánudaginn sem passar engan veginn inn í skipulagið því við erum svo að fara í bikarúrslitin á laugardaginn en við þurfum bara að halda áfram á okkar sigurbraut og vinna í því að halda okkur á toppnum.“
Á mánudaginn mætast þessi lið í þriðja skipti á 8 dögum sem minnir helst á úrslitakeppni og segir Atli það erfitt að mæta svona sterku liði í þremur leikjum í röð á skömmum tíma. „Mér finnst þetta alltof mikið, það er bara mjög erfitt fyrir þessi tvö lið að mætast einusinni enn. Svona eru bara reglurnar og við verðum bara að taka því. Það verður hinsvegar aftur hörkuleikur og við verðum bara að sjá hvað setur“ sagði Atli kátur að lokum.
Þá er komið að því að kynnast sjónarhorni FH inga eftir leikinn.
Einar Andri: Létum þá ráða ferðinni
„Þegar við loksins þorðum að sækja á markið þá fóru hlutirnir að gerast fyrir okkur,“ sagði Einar Andri Einarsson, þjálfari FH við Andra Yrkil Valsson eftir ósigurinn. „Við byrjuðum leikinn mjög illa þar sem við létum þá ráða ferðinni framan af. En þegar við fórum að gera hlutina af krafti þá fundum við leiðina. Við fáum ótal færi í síðari hálfleik til að koma okkur nær þeim og vorum grátlega nærri því að fá eitthvað út úr leiknum. Við erum búnir að spila tvo leiki í þessari viku hérna fyrir norðan og tapa báðum. Við spiluðum misvel í þessum leikjum á mjög erfiðum útivelli en núna munum við gefa í fyrir síðustu leikina og klára þá,“ sagði Einar Andri.
Einar Andri hvetur sína menn áfram
Einar Andri Einarsson aðstoðarþjálfari FH hélt áfram að lýsa vonbrigðum sínum í spjalli við Þröst Erni Viðarsson blaðamann Vikudags og fannst að sitt lið hefði átt að hirða annað stigið. „Við byrjuðum leikinn mjög illa, fyrsta korterið var skelfilegt. Við erum ragir í sókninni og hræddir til að byrja með og létum þá lemja okkur út úr leiknum. Við fórum hins vegar að taka á móti þegar það fór að líða á. Við spiluðum vel í seinni hálfleik og gáfumst aldrei upp en við vorum klaufar í lokin að fá ekki stig,“ sagði Einar, sem var ekki sáttur við dómarana undir lok leiksins. „Við áttum að fá ruðning þegar Guðmundur (Hólmar Helgason) skoraði næst síðasta eða síðasta markið. Svo fá Akureyringar víti þegar það er brotið á punktalínu. Þessi litlu atriði voru að falla á móti okkur og það vantaði herslu muninn,“ sagði Einar.
Ásbjörn Friðriksson: Klúðruðum þessu í fyrri
„Við klúðruðum of mikið af færum í fyrri hálfleik, bæði í þessum leik og í bikarleiknum um daginn. Þeir spila frábæra vörn og ná miklu forskoti í báðum leikjunum og það er of erfitt að koma til baka í þeirri stöðu gegn Akureyri á þeirra heimavelli,“ sagði Ásbjörn Friðriksson, í viðtali við Andra Yrkil. „Við sýnum fínan karakter með að komast inn í leikinn aftur og áttum fínan séns síðustu mínúturnar. En síðan kom Bubbi [Sveinbjörn Pétursson] aftur í markið hjá þeim og klárar þetta fyrir þá. En það taka við fleiri leikir og við förum í þá alla til að vinna eins og við höfum gert í allan vetur og við munum ekki dvelja lengi við þennan leik,“ sagði Ásbjörn Friðriksson.
Ási er einn traustasti leikmaður FH liðsins
Ásbjörn hélt áfram í viðtali við Hjalta Þór Hreinsson og að vonum heldur svekktur með úrslitin: „Það er svekkjandi að spila svona illa tvo leiki í röð gegn Akureyri. Við vorum á hælunum allan fyrri hálfleikinn og í byrjun seinni hálfleiks. Við spilum í raun ekki af eðlilegri getu nema í 20 mínútur.
Það dugir ekkert gegn Akureyri. Sóknin okkar var ekki góð, við skutum illa á Sveinbjörn og skutum hann í gang. Hann ver vel í fyrri hálfleik og það má ekkert gegn Akureyri á útivelli. Vörnin þeirra var þó góð líka.
Við hlupum hraðaupphlaupin illa en þetta var svekkjandi undir lokin. Það er ekkert hægt að taka bara síðasta skotið út, við fórum með fullt af öðrum færum sem við áttum að nýta,“ sagði Ásbjörn.
Kristján Arason: Þetta var mjög svekkjandi
Kristján Arason, þjálfari FH-inga, var að vonum sársvekktur með naumt eins marks tap liðsins eins og kemur fram í spjalli hans við Guðmund Egill Gunnarsson hjá sport.is. „Þetta var mjög svekkjandi, sóknin í byrjun leiks var alls ekki nógu góð, hún var hikandi og það lá við of mikilli virðingu. Þeir gengu á lagið en við gáfumst aldrei upp. Það var mjög svekkjandi að taka ekki eitt stig hérna í dag, strákarnir áttu það fyllilega skilið en svona er þetta“
FH liðið byrjaði leikinn mjög illa, líkt og leikinn á mánudaginn, og sóknin var eins og bitlaus hnífur. Varnarleikurinn var í þolanlegu standi en það þarf að eiga toppleik á öllum vígstöðvum til þess að leggja Akureyri á útivelli. Akureyri náði á tímabili 7 marka forustu í leiknum og það bil var erfitt fyrir FH-inga að brúa.
„Fyrst og fremst þá voru skotin okkar léleg, við vorum mjög hikandi og hann (Sveinbjörn) ver skotin okkar auðveldlega og keyra í bakið á okkur. Við vorum með þá í varnarleiknum á meðan sóknarleikurinn var slakur. Svo kom hann inn í lokin og þá var enginn munur á þessum tveimur liðum. Í síðari hálfleik vorum við betri aðilinn en forskotið var einfaldlega of mikið.“
Liðin mætast í þriðja sinn á átta dögum í Kaplakrika á mánudaginn og verður það að teljast ansi mikið þegar ekki er komið inn í úrslitakeppnina. Kristjáni leiðist þó ekki að mæta Akureyringum og hlakkar til viðureignarinnar.
„Þetta eru hörkuleikir og gaman að spila á móti góðum liðum eins og Akureyri. Við höldum bara áfram og ætlum ekki að missa neina fram úr okkur. Úrslitakeppnin er framundan en við verðum að byrja betur í leikjunum en á því töpum við báðum þessum leikjum.“
Kristján hafði í ýmsu að snúast á bekknum
Kristján Arason bætti síðan við er hann ræddi við Hjalta Þór Hreinsson á Fréttablaðinu: „Það var allt annað að sjá Ólaf [Guðmundsson] eftir að hann kom aftur inn, hann hafði valdið okkur miklum vonbrigðum. En svona er þetta, það er stutt á milli í þessu og síðasta skotið var gott en vel varið líka,“ sagði Kristján súr í broti.
Greinilegt að það verður barist til þrautar í kvöld
17. febrúar 2011 - Akureyri handboltafélag skrifar
Leikur dagsins: Stemming meðal leikmanna
Sveinbjörn Pétursson markvörðurinn snjalli í liði Akureyrar reiknar með erfiðum leik gegn FH-ingum í N1-deildinni í kvöld en liðin eigast við öðru sinni á þremur dögum og gætu mæst þriðja leikinn í röð í Kaplakrika á mánudaginn. Heil umferð fer fram í deildinni í kvöld.
Akureyri sló FH út í undanúrslitum bikarkeppninnar á mánudagskvöldið með 23:20 sigri og hefndu þar með ófaranna frá því í úrslitum deildarbikarkeppninnar þar sem FH hafði betur í úrslitaleik.
„Ég held að leikurinn við FH í kvöld verði hörkuslagur. Ég býst við FH-ingunum mjög grimmum enda trúi ég ekki öðru en að þeir séu hundfúlir eftir tapið á móti okkur á mánudaginn. Okkar bíður því verðugt verkefni í kvöld. Við erum komnir niður á jörðina. Það var gaman á mánudaginn en strax á þriðjudaginn hófst undirbúningurinn undir leikinn í kvöld. Þó svo að við séum með þriggja stiga forskot á toppnum þá er ekkert í höfn ennþá. Hlutirnir geta verið fljótir að breytast og við getum ekki leyft okkur að slaka neitt á. Við ætlum að reyna að bæta okkar leik og taka eitt skref í einu,“ sagði Sveinbjörn við mbl.is.
„Það er fínt veganesti fyrir leikinn í kvöld að hafa unnið þá í bikarnum,” segir Atli Hilmarsson þjálfari Akureyrar í viðtalið við Vikudag.
Sömuleiðis hefur Vikudagur eftir Ólafi Guðmundssyni leikmanni FH að tapið í bikarnum sl. mánudag muni ekki sitja í FH-ingum í kvöld. „Þetta er nýr leikur og allt önnur keppni,“ segir Ólafur.
Leikir þessra félaga eru klárlega skemmtilegustu leikir tímabilsins
17. febrúar 2011 - Akureyri handboltafélag skrifar
Leikur dagsins: Akureyri – FH í beinni textalýsingu
Í kvöld verður fram haldið baráttu Akureyrar og FH en leikur dagsins er liður í N1 deildinni. Það má búast við stríðsástandi á vellinum, FH ingar mæta brjálaðir til leiks eftir tapið í bikarkeppninni á mánudaginn en Akureyri ætlar að sjálfsögðu að viðhalda forskoti sínu á toppi deildarinnar.
Leikurinn hefst klukkan 19:00 og að sjálfsögðu vonumst við til að bæjarbúar flykkist í Höllina og styðji sína menn til sigurs, eins og við sáum á mánudaginn þá er varla hægt að hugsa sér betri skemmtun fyrir alla fjölskylduna.
Fyrir þá stuðningsmenn sem ekki eiga heimangengt bendum við á beina textalýsingu hér á heimasíðunni. Eins og vant er þá opnast hún í sérstökum glugga og uppfærist sjálfvirkt með 15 sekúndna millibili.
15. febrúar 2011 - Akureyri handboltafélag skrifar
Stund milli stríða: Annar leikur gegn FH á fimmtudaginn
Það var mikill hasar og brjáluð stemming í Höllinni á mánudaginn þegar Akureyri sló FH út úr bikarnum. Akureyringar eru hvergi nærri hættir og ætla sér ekkert nema sigur og ekki þarf að efast um fyrirætlanir FH inga.
„Það verður algjört stríð á fimmtudaginn. FH ingarnir munu mæta brjálaðir til leiks og við munum svara því enda ætlum við okkur að vera áfram á toppi deildarinnar. Við þurfum því að gróa hratt og vera klárir, fá röddina aftur fyrir fimmtudaginn,“ sagði Guðlaugur Arnarsson, leikmaður Akureyrar handboltafélags.
Úrvalsdeild karla
Senda skilaboð
Vefur KA
Vefur Þór
Fréttaleit
Ljósmyndir frá leiknum
Textalýsing frá leiknum
Tölfræði leiksins 
Sömuleiðis hefur Vikudagur eftir Ólafi Guðmundssyni leikmanni FH að tapið í bikarnum sl. mánudag muni ekki sitja í FH-ingum í kvöld. „Þetta er nýr leikur og allt önnur keppni,“ segir Ólafur.
Senda á Facebook