
Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Fyrri leiktímabil

Tímabilið 2010-11

Úrslit leikja

Deild karla

Ljósmyndir frá leiknum

Tölfræði leiksins

		FH - Akureyri 28-26 (15-14)
		Úrslit N1 deildar karla
		Kaplakriki
		Fös 29. apríl 2011 klukkan: 20:15
		Dómarar: Gísli Jóhannsson og Hafsteinn Ingibergsson, eftirlit: Guðjón L Sigurðsson

Umfjöllun


Oddur var frábær í leiknum í dag		29. apríl 2011 - Akureyri handboltafélag skrifar FH sigur í háspennuleik, upp á líf og dauða á sunnudaginn Það tekur á taugarnar að fylgjast með leikjum Akureyrar og FH þessa dagana en lukkudísirnar hafa verið með FH ingum á lokasekúndum fyrstu tveggja leikjanna og þeir því komnir í sömu stöðu og Valur gegn KA árið 2002. En þá komst Valur í forystu 2-0. En Atli Hilmarsson magnaði upp sína menn þá og þeir unnu síðustu þrjá leikina og stóðu uppi sem Íslandsmeistarar. Það verður því barist upp á líf og dauða í Íþróttahöllinni á sunnudaginn. Hér á eftir fer umfjöllun Vikudags um leikinn í kvöld, það er Þröstur Ernir Viðarsson sem hefur orðið: Oddur Gretarsson var magnaður í liði Akureyrar í kvöld og skoraði 12 mörk. FH er komið með pálmann í hendurnar eftir 28:26 sigur gegn Akureyri í öðrum leik liðanna í úrslitum um Íslandsmeistaratitilinn í handbolta karla í Kaplakrika í kvöld. FH hefur nú 2:0 forystu í einvíginu og vantar aðeins einn sigur í viðbót til þess að verða Íslandsmeistari. Næsti leikur verður á Akureyri á sunnudaginn kemur kl. 16:00 og þar verða Akureyringar að vinna til þess að halda sér á lífi í rimmunni. Leikurinn í Kaplakrika í kvöld var gríðarlega spennandi og líkt í fyrsta leiknum á Akureyri réðust úrslitin á lokasekúndunum. Oddur og Heimir í leiknum í kvöld. Mynd: Snorri Sturluson Oddur Gretarsson átti stórleik fyrir Akureyri með 12 mörk skoruð en það dugði skammt fyrir norðanmenn. Í liði FH var markvörðurinn Daníel Freyr Andrésson erfiður Akureyringum með 17 skot varin. FH-ingar fengu óskabyrjun. Þeir komust í 7:3 og virtust ætla að kafsigla Akureyringum í byrjun. Daníel Freyr hélt áfram þar sem frá var horfið í fyrsta leiknum og varði vel í marki FH en hinu megin var Sveinbjörn Pétursson lengi í gang. Akureyringar sneru hins vegar dæminu við. Sveinbjörn fór að verja og með frábærum kafla breyttu gestirnir stöðunni í 7:8 sér í vil og komst síðan þremur mörkum yfir, 12:9. FH jafnaði metin í 12:12 og eftir það var leikurinn jafn út hálfleikinn. Staðan í hálfleik, 15.14. FH byrjaði seinni háfleikinn betur og komst í 17:14 en Akureyri breytti stöðunni 20:21 sér í vil með góðum kafla. Jafnt var á tölum næstu mínúturnar eða þangað til að heimamenn náðu fjögurra marka forystu þegar tíu mínútur voru eftir, 25:21, og hlutirnir farnir að líta vel út fyrir heimamenn. Akureyringar voru ekki af baki dottnir og jöfnuðu metin í 25:25. Eftir æsispennandi lokamínútur voru það heimamenn sem voru sterkari á endasprettinum og Ólafur Gústafsson gulltryggði sigur FH með síðasta marki leiksins þegar tvær sekúndur voru eftir. Lokatölur, 28:26. Mörk Akureyrar: Oddur Gretarsson 12 (2 úr víti), Guðmundur Hólmar Helgason 4, Bjarni Fritzson 4, Heimir Örn Árnason 2, Guðlaugur Arnarsson 2, Daníel Einarsson 1, Hreinn Þór Hauksson 1. Varin skot: Sveinbjörn Pétursson 16. Mörk FH: Ásbjörn Friðriksson 7, Baldvin Þorsteinsson 6, Ólafur Guðmundsson 6, Atli Rúnar Steinþórsson 2, Ólafur Gústafsson 1, Örn Ingi Bjarkason1, Halldór Guðjónsson 1. Varin skot: Daníel Freyr Andrésson 17. Á sport.is eru komnar myndir og umfjöllun Snorra Sturlusonar, smelltu hér til að skoða.


Tengdar fréttir
Atli hefur séð þessa stöðu áður og hefur ekki lagt árar í bát		30. apríl 2011 - Akureyri handboltafélag skrifar Viðtöl og myndbönd eftir leik FH og Akureyrar Eftir leik númer tvö í Hafnarfirðinum eru nokkur viðtöl í fjölmiðlunum, reyndar eru einungis stuttar útgáfur á textaformi en einnig fylgja lengri vídeóútgáfur. Stefán Árni Pálsson blaðamaður visir.is ræddi við Atla Hilmarsson og Akureyringana í liði FH þá Ásbjörn Friðriksson og Baldvin Þorsteinsson: Atli Hilmarsson: Ég verð að fara í gamlar æfingabækur „Þetta er alls ekki staðan sem við vildum vera í eftir tvo leiki. Þetta er stundum bara stöngin út stöngin inn og það er hreinlega bara munurinn á þessum liðum í dag, en ég er samt hrikalega ánægður með mitt lið í kvöld. Við börðumst alveg eins og ljón allan tíman og gáfumst aldrei upp“. Atli Hilmarsson þekkir þessa stöðu vel en árið 2002 lenti KA 2-0 undir gegn Val undir hans stjórn, en urðu á endanum Íslandsmeistarar. „Ég sagði við liðið árið 2002, eftir leik tvö, að þetta væri alveg hægt og menn þyrftu bara að hafa trú á verkefninu, en það er það nákvæmlega sama og ég sagði við strákana inn í klefa áðan,“ sagði Atli Hilmarsson. Sjá vídeóviðtal. Atli heilsar upp á þjálfara FH fyrir leikinn Ásbjörn Friðriksson: Þægilegt, en alls ekki búið „Það er virkilega þægilegt að vera komnir í 2-0 í einvíginu. Við þurfum enn að fá einn sigur í viðbót til þess að lyfta titlinum. Leikurinn í kvöld var hraður og virkilega skemmtilegur, en það eru nokkur atriði sem við verðum að skoða fyrir næsta leik. „Við vitum alveg að þetta Akureyrarlið er stórhættulegt og því verðum við að mæta klárir í næsta leik,“ sagði Ásbjörn. Sjá vídeóviðtal. Ási var markahæstur FH inga. Mynd: Snorri Sturluson sport.is Baldvin Þorsteinsson: Þetta getur verið hættuleg staða „Þetta var góður sigur hjá okkur og liðheildin var sterk í kvöld. Við börðumst allan tíman alveg eins og vitleysingar og það fór langt með þennan sigur“. Baldvin Þorsteinsson var í liði KA-mann árið 2002 þegar þeir lentu 2-0 undir gegn Val í úrslitaeinvíginu en náðu að vinna þrjá næstu leiki og hampa Íslandsmeistaratitlinum. „Þetta er dálítið hættuleg staða og við verðum að átta okkur á því að þetta er langt frá því að vera búið. Þetta hafa verið hörkuleikir og það munar voðalega litlu á þessum liðum, því getur Akureyri alveg unnið næstu þrjá leiki“. Sjá vídeóviðtal. Baldvin skoraði sex mörk í leiknum. Mynd: Snorri Sturluson sport.is Ívar Benediktsson blaðamaður mbl ræddi sömuleiðis við Atla Hilmarsson og Ásbjörn: Atli Hilmarsson: Þessu er langt frá því lokið Atli Hilmarsson, þjálfari Akureyrar, segir einvígið við FH langt frá því vera lokið af hálfu Akureyrar þótt liðið sé undir, 2:0, í leikjum talið. Atli var í sömu stöðu með KA fyrir níu árum og tókst að snúa við taflinu og verða Íslandsmeistari. Atli segist vera ánægður með spilamennsku sinna manna lengst af þessum leik. Liðið hafi reyndar gert helst til of mörg tækimistök í fyrri hálfleik sem hafi fært FH nokkur hraðaupphlaup. Það hafi verið lagfært í síðari hálfleik sem hafi verið góður af hálfu Akureyrarliðsins sem hafi á köflum verið manni færra. Atli hrósar mjög dugnaði og baráttu sinna manna að jafna metin undir lokin eftir að hafa lent fjórum mörkum undir, 25:21. „Sú staðreynd sýnir að það býr heilmikið í þessu liði,“ segir Atli. FH vantar einn sigur upp á að hampa Íslandsbikarnum. Atli segir það ekki koma til greina að FH vinni leikinn á sunnudag og taki við Íslandsbikarnum á heimavelli Akureyrar. „Við munum gefa allt sem eigum í leikinn á sunnudag og ég vona bara að Íþróttahöllinn verði full og stemningin góð,“ segir Atli Hilmarsson, þjálfari Akureyrar. Sjá vídeóviðtal. Ásbjörn Friðriksson: Eins og boltinn væri „heitur“ Ásbjörn Friðriksson segir að heilt yfir hafi leikur FH verið ágætu en þó hafi komið tveir slæmir kaflar þar sem engu var líkara en boltinn væri „heitur“ og menn misst hann klaufalega frá sér með þeim afleiðingum að Akureyringar hafi fengið hraðaupphlaup og í bæði skiptin komist inn í leikinn á nýjan leik. „Við verðum að skoða aðeins hvað við vorum að gera á þessum köflum í leiknum áður en að viðureigninni á sunnudaginn kemur,“ segir Ásbjörn sem er Akureyringur að upplagi en hefur síðustu árin leikið með FH. „Ég hefði ekkert á móti því að taka móti bikarnum fyrir norðan á sunnudaginn. Auðvitað stefnum við á sigur. Við förum í alla leiki til þess að vinna þá,“ segir Ásbjörn Friðriksson, leikstjórnandi FH og markahæsti leikmaður liðsins í kvöld með átta mörk. Sjá vídeóviðtal. Vídeóviðtöl Snorra Sturlusonar á Sport.is Viðtal við Atla Hilmarsson. Viðtal við Einar Andra Einarsson.


Leikurinn er í beinni útsendingu sjónvarpsins		29. apríl 2011 - Akureyri handboltafélag skrifar Leikur dagsins: FH – Akureyri (úrslitaleikur 2) Úrslitaeinvígi Akureyrar og FH heldur áfram í kvöld klukkan 20:15 en að þessu sinni verður leikið í Kaplakrika, heimavelli FH. Akureyrarliðið er staðráðið í að jafna stöðuna í einvíginu og hvetjum við alla stuðningsmenn sem verða staddir í nágrenni Hafnarfjarðar til að fjölmenna á leikinn og taka virkan þátt í baráttunni. „Það er fín stemmning í hópnum hjá okkur. Við erum búnir að fara yfir leikinn á þriðjudaginn og við látum þetta tap ekkert á okkur fá. Það er fullt eftir ennþá og við ætlum að halda áfram á fullum krafti,“ segir Atli Hilmarsson þjálfari Akureyrar í viðtali við Vikudag. Hann játar því að það hafi verið nokkuð erfitt að rífa menn upp eftir svekkjandi tap í fyrsta leiknum á heimavelli. „Það var ekkert auðvelt að rífa menn upp en við sáum það að við vorum ekki að spila vel og við eigum heilmikið inni en náðum samt að hanga í þeim. Með því sýndum við að við eigum fullt erindi í þessa rimmu. Við þurfum hins vegar að fá sóknarleikinn betur í gang í kvöld.“ Mikið fjölmiðlafár hefur verið í kringum rauða spjaldið sem Guðmundur Hólmar Helgason leikmaður Akureyrar fékk á lokasekúndum í leiknum á þriðjudaginn. Ýmsir hafa verið stórorðir og fullyrt að Guðmundur hefði átt að fá leikbann en þeim verður ekki að ósk sinni og Guðmundur verður með í kvöld. Atli segir allt þetta fár ekki trufla þá fyrir leikinn í kvöld. „Alls ekki. Þetta er bara hluti af þessu og við leiðum þetta algjörlega hjá okkur,“ segir hann. Leikurinn verður í beinni útsendingu RÚV en fyrir þá sem verða í Kaplakrika þá skal bent á að stuðningsmönnum Akureyrar er ætlað að ganga til sæta í stúkunni vinstra megin þegar gengið er í salinn.

Sveinbjörn mætir galvaskur í Krikann á föstudaginn

28. apríl 2011 - Akureyri handboltafélag skrifar

Leikur 2: FH – Akureyri í Kaplakrika kl. 20:15 á föstudag

Það verður ekkert gefið eftir þegar Akureyri mætir til leiks í Kaplakrikanum á föstudagskvöldið klukkan 20:15. Strákarnir eru staðráðnir í að kvitta fyrir naumt tap í fyrsta leiknum og komast þannig á byrjunarreit í einvíginu á nýjan leik.

Við hvetjum alla stuðningsmenn sem hafa nokkur tök á að fjölmenna á leikinn og styðja strákana til sigurs í leiknum. Þeir sem ekki eiga tök á því að vera á leiknum geta glaðst yfir því að RÚV mun sýna leikinn í beinni útsendingu.

FH ingar ætla að sýna allar sýnar bestu hliðar við undirbúning leiksins og hafa úthlutað stuðningsmönnum Akureyrar sérstakt svæði í stúkunni og samkvæmt upplýsingum frá þeim eiga Akureyrarstuðningsmenn að ganga til sæta vinstra megin þegar gengið er í salinn.

Miðasala á leikinn hefst klukkan 17:00 og sérstök upphitun hefst klukkan 19:00. Auglýst verð á leikinn í Krikanum er kr. 1.500 en frítt fyrir 15 ára og yngri. Auk þess verða grillaðir hamborgarar í boði fyrir leikinn.

Leikur númer þrjú

Í leiðinni minnum við á að þriðji leikurinn verður í Íþróttahöllinni á Akureyri klukkan 16:00, sunnudaginn 1. maí og ljóst að það er lykilleikur í einvíginu og af honum má enginn missa.

Til baka Senda á Facebook

Umsjón og hönnun: Stefán Jóhannsson og Ágúst Stefánsson

FH sigur í háspennuleik, upp á líf og dauða á sunnudaginn

Viðtöl og myndbönd eftir leik FH og Akureyrar

Atli Hilmarsson: Ég verð að fara í gamlar æfingabækur

Ásbjörn Friðriksson: Þægilegt, en alls ekki búið

Baldvin Þorsteinsson: Þetta getur verið hættuleg staða

Atli Hilmarsson: Þessu er langt frá því lokið

Ásbjörn Friðriksson: Eins og boltinn væri „heitur“

Vídeóviðtöl Snorra Sturlusonar á Sport.is

Leikur dagsins: FH – Akureyri (úrslitaleikur 2)

Leikur 2: FH – Akureyri í Kaplakrika kl. 20:15 á föstudag

Leikur númer þrjú