Háspennujafntefli hjá Akureyri og FH - Akureyri Handboltafélag

Warning: Undefined array key "frettanr" in /web/akhandadmin/public_html/index.php on line 15
Háspennujafntefli hjá Akureyri og FH - Akureyri Handboltafélag


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Fyrri leiktímabil

Tímabilið 2012-13

Leikmenn meistarafl. karla

Ljósmyndir frá leiknum

Textalýsing frá leiknum

Tölfræði leiksins

		Akureyri - FH 23-23 (13-12)
		N1 deild karla
		Íþróttahöllin
		Mán 24. september 2012 klukkan: 19:00
		Dómarar: Ingvar Guðjónsson og Jónas Elíasson. Eftirlitsmaður Einar Sveinsson

Umfjöllun


Geir var drjúgur í seinni hálfleiknum		24. september 2012 - Akureyri handboltafélag skrifar Háspennujafntefli hjá Akureyri og FH Það er ekki hægt að segja annað en að áhorfendur hafi fengið spennandi leik í Höllinni þegar Akureyri og FH opnuðu N1 deildina að þessu sinni. Ragnar Jóhannsson FH-ingur skoraði fyrsta mark tímabilsins og hann átti heldur betur eftir að koma við sögu. Heimir jafnaði í 1 - 1 og segja má að það hafi verið gangur leiksins, jafnt á flestöllum tölum. FH hafði frumkvæðið í leiknum framan af en í stöðunni 7 – 7 náði Akureyri yfirhöndinni og leiddi með einu marki í hálfleik 13 – 12. Varnarleikur Akureyrar var ekki mjög sannfærandi en reyndar virtust dómarar leiksins þeir Jónas og Yngvar ótrúlega ákafir að dæma á varnartilburðina og fengu FH ingar sex vítaköst í fyrri hálfleik auk þess sem leikmenn Akureyrar voru fjórum sinnum reknir af velli í fyrri hálfleik. Ragnar Jóhannsson skoraði úr fjórum af þessum vítum, eitt varði Jovan með tilþrifum og annað fór í stöng. Sóknarleikur Akureyrar var frekar stirður og töpuðust býsna margir boltar. Bergvin Gíslason kom frískur inn í sóknarleikinn og skoraði þrjú mörk. Bergvin var öflugur í sókninni í dag Sami barningur hélt áfram í seinni hálfleik en Akureyri ávallt með frumkvæðið framan af. Um miðjan seinni hálfleikinn náði FH að komast yfir í 18 -19 og var það í fyrsta sinn síðan á upphafsmínútunum. Ragnar Jóhannsson var allt í öllu í sóknarleik FH og náði tveggja marka forystu fyrir FH 19-21 þegar hann skoraði sitt þrettánda mark og átta mínútur til leiksloka. Þá loksins var gengið almennilega út í Ragnar og þeir Bergvin og Geir sáu um að jafna leikinn í 21-21. Geir jafnaði enn og aftur í 23-23 þegar ein mínúta var eftir og svo sannarlega var dramatík þá mínútuna. Lítið gekk í sókninni hjá FH, þeir misstu boltann þegar tæpar 30 sekúndur voru eftir en fengu aukakast á silfurfati og tóku leikhlé. Í kjölfarið var Hreinn Hauksson rekinn af velli í þriðja sinn þegar 15 sekúndur voru til leiksloka en fengu dæmd á sig skref þegar átta sekúndur voru til leiksloka. Akureyri tók leikhlé en tíminn var of naumur til að komast í almennilegt færi og því lyktaði leiknum með jafntefli 23 -23. Vissulega var töluverður haustbragur á leik Akureyrar að þessu sinni, sóknarleikurinn var lengstum mjög hægur og liðið var ekki að skapa sér mörg opin færi. Bergvin Gíslason var einna sprækastur í sókninni og hefði að ósekju mátt spila meira í seinni hálfleik eftir fína frammistöðu í þeim fyrri. Varnarleikurinn var ekki nándar nærri beittur og ótrúlegt að skyttan, Ragnar Jóhannsson fengi nánast óáreittur að bomba á markið nánast allan leikinn. Markverðirnir voru svo sem ekki öfundsverðir af sínu hlutverki fyrir aftan vörnina en hefðu þó átt að gera betur í kvöld, fimm varðir boltar er ekki ásættanlegt. Mörk Akureyrar: Bjarni Fritzson 7 (4 víti), Bergvin Gíslason 5, Geir Guðmundsson 5, Guðmundur Hólmar Helgason 2, Oddur Gretarsson 2, Ásgeir Jónsson og Heimir Örn Árnason 1 mark hvor. Jovan Kukobat varði 4 skot, þar af 1 vítakast og Stefán Guðnason 1 skot. Mörk FH: Ragnar Jóhannsson 13 (4 víti), Ísak Rafnsson 5, Sigurður Ágústsson 4 og Einar Rafn Eiðsson 1 mark. Í markinu varði Daníel Freyr Andrésson 17 skot. Það er stutt í næsta leik, á fimmtudaginn mæta strákarnir Fram og fer leikurinn fram í Safamýrinni og hefst klukkan 18:00.


Tengdar fréttir
Það var að vanda flott stemming hjá áhorfendum		25. september 2012 - Akureyri handboltafélag skrifar Myndir og viðtöl eftir leik Akureyrar og FH Þórir Tryggvason sendi okkur dágóðan myndapakka frá FH leiknum í gærkvöldi en Þórir hefur verið einn ötulasti ljósmyndari á flestum íþróttaviðburðum á Akureyri um margra ára skeið. Framlag Þóris til íþróttasögunnar verður seint fullþakkað en heimasíðan hefur átt því láni að fagna allt frá upphafi að eiga Þóri að. Bjarni Fritzson skorar úr hraðaupphlaupi Nýja stúkan skapar alveg nýja möguleika í Höllinni Guðmundur Hólmar sækir að FH markinu Geir og Ísak í slagsmálum um boltann Smelltu hér til að sjá allar myndir Þóris frá leiknum. Við reynum eins og kostur er að safna saman viðtölum við leikmenn og þjálfara úr öðrum fjölmiðlum og varpa þannig sem flestum sjónarhornum á leikinn. Byrjum á viðtölum Birgis Hrannar Stefánssonar sem birtust á Vísir.is: Heimir Örn: Of mikið stress á okkar mönnum „Það var bara of mikið stress á okkar mönnum, menn voru ekki að komast í gírinn. Við erum reyndar búnir að spila mjög fáa leiki þannig að það kom ekkert á óvart að þetta var ekki fallegur leikur,“ sagði Heimir Örn Árnason, annar þjálfara Akureyrar og leikmaður liðsins. „Ég var samt hrikalega óánægður með varnarleikinn í seinni hálfleik og Raggi var að fara illa með okkur, mjög illa. Þetta voru allt of auðveld mörk, þeir voru að koma inn fyrir punkta og bara hamra hann. Við vorum að vísu ekki að hjálpa markmönnum okkar mikið en auðvitað mættu þeir samt taka meira. Það kemur bara leikur eftir þennan leik. Það er erfiður útileikur á fimmtudaginn á móti Fram sem eru með mjög gott lið. Við verðum bara að vera fljótir að taka þetta stress úr okkur og hafa gaman af þessu. Hér var mikið af fólki í dag en við vorum ekkert að fagna með áhorfendum og það vantaði bara margt hjá okkur, mjög margt sem á að einkenna þetta lið. Við töpuðum hérna fyrsta leik á móti FH á síðasta tímabili þannig að þetta er skárri byrjun en í fyrra.“ Heimir og Jovan markvörður leggja í síðustu sóknina í leiknum Ragnar Jóhannsson: Þeir voru ekkert að snerta mig „Mér fannst við vera með þá hér í seinni hálfleiknum. Kannski ekki alveg hér undir lokin en við hefðum átt að klára þetta. Miðað við hvernig þetta spilaðist þá var þetta líklegast bara sanngjörn úrslit,“ sagði Ragnar FH-ingur sem fór á kostum. Ragnar virtist hreinlega ekki geta hætt að skora lengi vel í þessum leik en svo lokuðust aðeins flóðgáttirnar undir lokin. „Þeir fóru að taka mig út og vera aðeins ákveðnari á mig, þeir snertu mig ekki í fyrri hálfleik þannig að ég bara skaut og skaut. Þetta var líka svona aðeins í seinni hálfleiknum þannig að þá skýtur maður bara alltaf er það er ekki spiluð vörn á mann. Ég hef alltaf stefnt á það að spila vel í úrvalsdeildinni. Ég er búinn að æfa mjög vel í sumar og náð mér af þessum meiðslum þannig að vonandi bara að það heppnist í vetur að spila mjög vel.“ Ragnar skorar eitt af þrettán mörkum sínum í leiknum Einar Andri: Óvenju góður handbolti fyrir fyrstu umferð „Góð fyrirheit fyrir veturinn og óvenju góður handbolti fyrir fyrstu umferð. Bæði lið mæta klár í slaginn og ætla sér stóra hluti sýnist mér,“ sagði Einar Andri Einarsson, þjálfari FH. FH liðið kom norður án þess að vera með Ólaf Gústafsson og Baldvin Þorsteinsson með sér en það virtist ekki hafa of mikil áhrif á leik þeirra. „Við erum ekkert að velta því fyrir okkur hvort að það vanti einhvern. Þetta er langur vetur og við erum með marga leikmenn, ef það er einhver sem er ekki með þá þarf bara annar að stíga upp. Við erum búnir að vera að spila á mörgum leikmönnum allt undirbúningstímabilið og það hafa allir sín hlutverk. Ég er ánægður með liðsheildina og hvernig við lögðum okkur fram í leikinn. Ragnar frábær í sókninni og allir að skila sínu. Ég ætlast til þess að Daníel sé með háa prósentutölu í hverjum leik og hann stendur yfirleitt undir því.“ Þeir Einar Sigtryggsson og Andri Yrkill Valsson önnuðust viðtöl og skrif fyrir Morgunblaðið, hér ræða þeir við þá Heimi Örn Árnason og einnig fylgir skemmtilegt viðtal við Stefán Guðnason sem eins og oft áður er engum líkur: Heimir: Hljótum að hafa gert eitthvað rétt „Þetta var svo sem þokkalegt en ég er ekki ánægður með leikinn. Við vorum ekki góðir í vörn og allt of hægir í sókninni. Markvarslan var því miður ekki nægilega góð en Jovan fékk á sig erfið skot þar sem við í vörninni hjálpuðum ekki nóg. Jovan er góður markmaður og ver venjulega þessi skot úr þrengri færunum. Við reyndum að taka Ragnar út en þá fóru bara hinir í gang svo þetta var helvíti erfitt. Við hljótum samt að hafa verið að gera eitthvað rétt fyrst við höldum þeim í 23 mörkum. Ég er helst ánægður með ungu strákana okkar. Þeir stóðu sig vel og Bergvin er með frábærar hreyfingar. Við treystum þessum strákum og þeir eiga eftir að spila helling,“ sagði Heimir Örn. Þess má geta að um 1000 manns mættu á leikinn. Stefán: Hann er hress og kolruglaður „Það er að koma yfir mig sátt. Hefðirðu talað við mig fyrir fimm mínútum hefði ég drullað yfir allt og alla,“ sagði Stefán Guðnason, hinn litríki markvörður Akureyrar, í samtali við mbl.is eftir leik Akureyrar og FH fyrir norðan. „Við spiluðum ekki okkar besta leik og við eigum nóg inni. Mér fannst þetta bara týpískur leikur við FH, við erum búnir að spila þrjátíu sinnum við þetta lið síðustu tvö ár og þeir eru allir svona. Svo jafntefli er kannski bara fín úrslit,“ sagði Stefán, en lokatölur voru 23:23 í miklum spennuleik. Stefán hefur verið í miklu uppáhaldi hjá stuðningsmönnum Akureyrar þrátt fyrir að hlutverk hans á vellinum hafi oft verið meira, en hann var varamaður fyrir Sveinbjörn Pétursson undanfarin ár, sem nú er farinn til Þýskalands. En var Stefán hræddur um að þurfa að taka við keflinu? „Ég er orðinn alltof gamall í svoleiðis rugl. Auðvitað er söknuður að Bubba, bæði innan vallar sem og í klefanum. Toppnáungi í alla staði. Það þurfti því að fá einhvern annan, við enduðum svo reyndar með tvo þar sem við fengum ungan Dana inn nokkuð óvænt. Hann er flottur, aðeins minni en ég að vísu. Við erum búnir að mæla bak í bak - munar hálfum,“ sagði Stefán, sem er með hávaxnari mönnum í bransanum. Það stendur því nýr maður í marki Akureyrar í vetur, Serbinn Jovan Kukobat. Hann átti þó erfitt uppdráttar í leiknum. „Já, hann Kexi, hann er flottur. Kolruglaður Serbi, þetta er einn af þessum nýju Serbum svo hann er ekki alveg jafn geðveikur og þeir gömlu. Það er mjög gaman að honum, þetta er mjög hress strákur en alveg kolruglaður líka,“ sagði Stefán og hló. En hvernig mun samstarfið ganga? „Við erum ennþá að finna taktinn í samvinnunni þar sem er pínu ruglingur hér og þar eins og gengur og gerist. Hann talar fína ensku og talar jafnvel betri íslensku líka en margir af yngri strákunum í liðinu. Sumir af þessum strákum eru ekki talandi á íslensku fyrir villum svo hann er fljótur að ná þeim. Hann verður orðinn altalandi hérna þegar fer að vora,“ sagði Stefán og hló áfram. Stefán stendur í ströngu í leiknum Spurður um markmið liðsins fyrir komandi tímabil segir Stefán þau sömu og hjá öllum. „Það er sama klassíska tuggan, við förum í alla leiki til að vinna þá. Þetta er alveg ótrúlega leiðinleg setning til að láta hafa eftir sér, en svona er það,“ sagði Stefán Guðnason, markvörður Akureyrar, laufléttur sem fyrr. Vídeóviðtöl Við endum þessa samantekt á vídeóviðtölum Hákonar Þórissonar við þjálfarana, Bjarna Fritzson og Einar Andra en þau birtust á handbolti.org Bjarni Fritzson: Erum á réttri leið Einar Andri: Sáttur með jafnteflið Og tvö til viðbótar frá Sport.is Heimir: Ekki alls kostar sáttur Einar Andri: Getum leikið betur


Bjarni Fritzson er sáttur með leikmannahópinn		24. september 2012 - Akureyri handboltafélag skrifar Leikur dagsins: Akureyri – FH bein textalýsing Fyrsti leikdagur runninn upp og ekkert nema eftirvænting í loftinu. Við hér á heimasíðunni höldum okkar striki og verðum með beina textalýsingu hér á síðunni. Sú nýung er á textalýsingunni hjá okkur að skömmu fyrir leik birtist staðan í leiknum og uppfærist sjálfvirkt hér á fréttasíðunni. Þeir sem vilja hafa lýsinguna í sérstökum glugga og ítarlegra yfirlit yfir gang leiksins geta auðveldlega valið slíka útgáfu. Fylgjast með beinu textalýsingunni. Viðtal við Bjarna Fritzson á handbolti.org Við grípum hér niður í viðtal sem handbolti.org átti við Bjarna Fritzson um leikinn í dag, fyrst er Bjarni spurður um undirbúning liðsins: „Undirbúningurinn hefur gengið vel, sérstaklega þegar ég horfi til þess vinnuframlags sem leikmenn liðsins hafa boðið upp á. Við höfum verið að mestu lausir við meiðsli sem er jákvætt. En auðvitað hefði ég verið til í að spila aðeins fleiri æfingaleiki.“ Fyrsti leikur liðsins er gegn fyrrum félögum Bjarna í FH, hvernig ætli honum lítist á leikinn og hvað skyldi hann hafa að segja um liðið? „Mjög vel. FH liðið lítur virkilega vel út, eru gríðarlega vel mannaðir og með heitasta leikmanninn (Óla Gúst) í liðinu sínu.“ Þá er Bjarni spurður út í nýtt hlutverk, nú sem þjálfari liðsins ásamt því að vera leikmaður. Ætli hans nýja staða sé búin að breyta einhverju fyrir hann? „Augljóslega hefur staða mín breyst því nú er ég þjálfari og leikmaður en áður var ég bara leikmaður. Hingað til hefur það gengið ágætlega og verður spennandi að sjá hvernig mér tekst að tvinna þetta saman í vetur.“ Akureyrarliðið missti sterka leikmenn eftir síðustu leiktíð og ber þar helst að nefna Hörð Fannar, Sveinbjörn Pétursson og svo Guðlaug Arnarsson sem lagði skóna á hilluna. En skyldi Bjarni vera sáttur með leikmannahópinn? „Ég gæti ekki verið ánægðari með leikmannahópinn. Auðvitað misstum við sterka leikmenn og skemmtilega liðsmenn. En mér finnst við með frábæran hóp í höndunum, vinnusaman – samheldinn og skemmtilegan.“ Að margra mati eru það fleiri lið nú í ár sem geta blandað sér í baráttuna um sæti í úrslitakeppninni. En hvernig skyldi honum lítast á veturinn? „Virkilega vel, deildin er svaðalega spennandi og jöfn, viss um að þetta verði frábær handboltavetur. Svo eru komnir bekkir við völlinn þannig að við getum skartað alvöru gryfju í vetur og þurfum ekki lengur að fela bestu stuðningsmenn í deildinni upp í stúku.“ Markmið liðsins hljóta að vera skýr eins og undanfarin ár? En ætli spilandi þjálfarinn eigi sér sín persónulegu markmið einnig? „Markmið Akureyrar er það sama og alltaf, að mæta í alla leiki til þess að vinna. Mitt persónulegu markmið er líklega það að spila í núinu. Velta mér ekki upp úr hlutum sem eru búnir né hlutum sem eiga eftir að gerast. Heldur bara vera trylltur á æfingunni eða leiknum sem er í dag,“sagði Bjarni Fritzson í samtali við Handbolti.org.


Það hafa allaf verið hörkuleikir á milli Akureyrar og FH		21. september 2012 - Akureyri handboltafélag skrifar Risaleikur Akureyrar og FH á mánudaginn klukkan 19:00 Það má gera ráð fyrir hörkuleik á mánudagskvöldið þegar Akureyri tekur á móti FH í fyrsta leik N1 deildar karla þetta tímabilið. Undanfarin ár hafa þessi lið trúlega mæst oftast af öllum liðum deildarinnar og undantekningarlítið hafa leikir þeirra verið jafnir og spennandi. Nokkrar breytingar hafa orðið á leikmannahópi beggja liða frá því í fyrra. Hjá Akureyri eru þær helstar að Sveinbjörn Pétursson, markvörður er farinn til EHV Aue í Þýskalandi, Hörður Fannar Sigþórsson leikur nú með Kyndil í Færeyjum auk þess sem Guðlaugur Arnarsson lagði skóna á hilluna. Aðrir leikmenn sem fóru eru Daníel Örn Einarsson sem fór til HK, Jón Heiðar Sigurðsson til Gróttu, Halldór Tryggvason til FH og Hlynur Elmar Matthíasson til Víkings. Akureyri hefur hins vegar fengið tvo markverði, Jovan Kukobat frá Serbíu og Tomas Olason sem kemur frá Danmörku. Auk þess hefur liðið endurheimt Andra Snæ Stefánsson og Hrein Hauksson sem báðir komu reyndar lítillega við sögu síðasta vetur. Þar fyrir utan eru nokkrir gríðarlega öflugir strákar úr Íslandsmeistaraliði 2. flokks sem munu berjast um sæti í liðinu. Leikmannahópur Akureyrar 2012-2013 FH hefur misst nokkra öfluga leikmenn ens og línumanninn Atla Rúnar Steinþórsson og markvörðinn Pálmar Pétursson en báðir eru hættir. Skyttan Örn Ingi Bjarkason er genginn til liðs við Aftureldingu og skyttan Hjalti Pálmason hefur tekið sér hlé frá boltanum. FH hefur fengið þrjá leikmenn frá Fram, hornamanninn Einar Rafn Eiðsson, Jóhann Karl Reynisson og Arnar Birkir Hálfdánsson. Auk þess sem okkar maður Halldór Tryggvason er kominn á línuna hjá þeim eins og áður segir. Í viðtali við Vikudag segir Heimir Örn Árnason, annar þjálfari Akureyrar að veturinn leggist vel í sig. „Það er alltaf sett stefnan á að vinna þá titla sem í boði eru, annars væri maður ekkert í þessu“, segir Heimir sem segist mjög sáttur við leikmannahópinn og að liðið sé klárt í slaginn. Það er nokkuð ljóst að N1 deildin verður óvenju jöfn í vetur og því verður hver leikur geysilega mikilvægur. FH liðið er öflugt, því er spáð 2. sæti í deildinni þannig að nú dugar ekkert annað en að byrja af fullum krafti, jafnt leikmenn sem stuðningsmenn. Frá leik liðanna í fyrravor, Geir Guðmundsson klínir boltanum upp í samskeytin Það má búast við miklu fjölmenni í Höllinni og því hvetjum við áhorfendur til að mæta tímanlega og rétt að benda á að miðasalan gengur mun hraðar ef greitt er með peningum en að sjálfsögðu er einnig tekið á móti greiðslukortum.

Til baka Senda á Facebook

Umsjón og hönnun: Stefán Jóhannsson og Ágúst Stefánsson

web statistics