Warning: Undefined array key "frettanr" in /web/akhandadmin/public_html/index.php on line 15
Slakur fyrri hálfleikur varð Akureyri að falli gegn HK - Akureyri Handboltafélag
  Fréttir  -  Leikir tímabilsins  -  Leikmenn  -  Stjórn  -  Saga og tölfræði  -  Höllin  -  Lagið  -  Myndir  -  Myndbönd  -  Tenglar
  - Úrvalsdeild karla - Senda skilaboð - Vefur KA - Vefur Þór - Fréttaleit
Fyrri leiktímabil

Tímabilið 2012-13

Leikmenn meistarafl. karla
Úrslit leikja
Deild karla
Ljósmyndir frá leiknum     Myndband frá leiknum      Textalýsing frá leiknum     Tölfræði leiksins 
    Akureyri - HK  23-26 (8-15)
N1 deild karla
Íþróttahöllin
Fim 6. desember 2012 klukkan: 19:15
Dómarar: Jón Karl Björnsson og Þorleifur Árni Björnsson. Eftirlitsdómari er Kristján Halldórsson
Umfjöllun

Tómas kom sterkur í seinni hálfleikinn

7. desember 2012 - Akureyri handboltafélag skrifar

Slakur fyrri hálfleikur varð Akureyri að falli gegn HK

Það var ekki mikil stemming yfir leikmönnum Akureyrar eða stuðningsmönnum í leikslok í gær. Fyrir leik benti allt til þess að þetta yrði frábært kvöld, dýrindis veisla fyrir stuðningsmannaklúbbinn og Ingó Hansen tók tvö lög af geisladiski sínum fyrir áhorfendur.

Leikurinn byrjaði reyndar ágætlega, Akureyri með fyrstu tvö mörkin og leikurinn í járnum fyrsta korterið en að því loknu var staðan 7-7. Jovan með fína markvörslu á þeim tíma en þar með var líka draumurinn úti. Seinna korterið gekk bókstaflega ekki neitt hjá Akureyrarliðinu. Vörn HK tók nánast hvert einasta skot og þau fáu sem sluppu í gegn varði Arnór markvörður þeirra auðveldlega. Í kjölfarið fékk Bjarki Már Elísson hvert hraðaupphlaupið á fætur öðru og skilaði þeim örugglega í netið. Þessar seinni fimmtán mínútur hálfleiksins vann HK með átta mörkum gegn einu og leiddu í hálfleik 8 – 15.

Í seinni hálfleiknum fékk Tomas Olason að spreyta sig í markinu og ekki hægt að segja annað en hann hafi átt fína innkomu. Framan af gekk þó lítið að saxa niður forskot HK manna sem reyndar varð mest átta mörk 10 – 18 en með fjórum mörkum í röð kviknaði smávon hjá heimamönnum sem minnkuðu muninn í 14 – 18 og nokkru seinna í þrjú mörk 20 - 23.

HK spýtti í aftur og jók forskotið í fimm mörk 20 – 25. Akureyri barðist áfram og minnkuðu muninn í tvö mörk 23 – 25 en það var bara of seint og Bjarki Már Elísson innsiglaði sigur HK manna með síðasta marki leiksins, 23 – 26.

Þessi skelfilegi kafli í fyrri hálfleik fór gjörsamlega með leikinn og ljóst að honum vilja menn gleyma en vonandi verður hann mönnum víti til varnaðar um að láta slíkt ekki gerast aftur. Nú verða menn að hrista af sér vonbrigðin í næsta leik, sem er útileikur gegn Aftureldingu til að menn fari sæmilega sáttir í áramótahléið og eigi jafnframt von í að komast í deildarbikarinn.

Mörk Akureyrar: Bjarni Fritzson 7 (2 úr vítum), Guðmundur Hólmar Helgason 6, Bergvin Þór Gíslason 3, Geir Guðmundsson 2, Hreinn Þór Hauksson 2, Andri Snær Stefánsson 1, Friðrik Svavarsson 1 og Heiðar Þór Aðalsteinsson 1.

Tomas Olason varði 7 skot í markinu og var valinn maður liðsins. Jovan Kukobat varði 5 skot í fyrri hálfleiknum.

Mörk HK: Bjarki Már Elísson 9 (1 úr víti), Atli Karl Bachmann 7, Garðar Svavarsson 6 og Ólafur Víðir Ólafsson 4.
Í markinu hjá HK átti Arnór Freyr Stefánsson flottan leik en hann var með 14 skot varin.

Tengdar fréttir

Heimir hefur áður fengist við HK liðið

6. desember 2012 - Akureyri handboltafélag skrifar

Leikur dagsins: Heimaleikur gegn Íslandsmeisturum HK

Þá er komið að síðasta tækifærinu til að sjá Akureyrarliðið á heimavelli á þessu ári. Mótherjarnir eru engir aðrir en Íslandsmeistarar HK og það er til mikils að vinna í dag. Til viðbótar hve baráttan er hörð í deildinni þá er einnig í húfi þátttökuréttur í deildarbikarkeppni efstu fjögurra liða N1 deildarinnar að aflokinni 12. umferð.

Athugið að leikurinn byrjar klukkan 19:15, fimmtán mínútum síðar en vanalega. Heimasíðan verður að sjálfsögðu með beina textalýsingu frá leiknum eins og vanalega.

Glæsileg veisla fyrir handhafa Gullkortsins fyrir leik og í hálfleik
Í fyrravetur var tekið upp á þeirri nýbreytni að hafa tvisvar á tímabilinu sérstaklega glæsilega veislu fyrir stuðningsmannaklúbbinn. Nú er einmitt komið að fyrri glæsiveislu vetrarins og rétt að minna handhafa Gullkortanna á að hafa þau meðferðis í dag.

Kennsludiskur í handknattleik forsölutilboð á leiknum
Nú er að koma út kennsludiskurinn Frá byrjanda til landsliðsmanns og verður diskurinn kynntur og seldur á sérstöku forsölutilboð á leiknum í dag. Þar verður diskurinn seldur á 2.500 krónur en almennt verð í verslunum verður trúlega um 3.600 krónur.

Glæsilegur vinningur fyrir spámann 11. umferðar
Í tilefni af leiknum og útgáfu kennsludisksins Frá byrjanda til landsliðsmanns ætlar heimasíðan að veita spámanni 11. umferðar verðlaun, sem verða einmitt eintak af diskinum.
Smelltu hér til að taka þátt í spáleiknum.


Það hafa alltaf verið hörkuleikir þegar HK kemur í Höllina

4. desember 2012 - Akureyri handboltafélag skrifar

Síðasti heimaleikur ársins á fimmtudaginn

Það dregur til tíðinda í N1 deildinni á fimmtudaginn þegar leikin verður 11. umferð N1-deildar karla. Akureyri tekur þá á móti ríkjandi Íslandsmeisturum HK. Sem fyrr þá er harður slagur í deildinni, Haukar langefstir en síðan eru Akureyri, ÍR og FH öll jöfn að stigum í 2. – 4. sæti þar sem Akureyri stendur reyndar best að vígi vegna árangurs í innbyrðis leikjum.

Efstu fjögur liðin í deildinni að lokinni 12. umferð keppa í deildarbikarnum sem fram fer rétt fyrir jólin að þessu sinni og að sjálfsögðu ætlar Akureyri að vera með á því móti. Þess vegna kemur ekkert nema sigur til greina á fimmtudaginn.

HK liðið er óútreiknanlegt, liðið hefur leikið frábærlega, t.d. eina liðið sem hefur tekið stig af Haukum en átt slaka leiki inn á milli. Liðið hefur glímt við nokkur meiðsli en eins og þjálfari þeirra, Kristinn Guðmundsson segir þá skiptir það bara engu máli, þeir sem spila hverju sinni kunna alveg að spila handbolta og verða bara að leggja sig fram.

Með HK leikur í dag fyrrum leikmaður Akureyrar Handboltafélags en það er hægri hornamaðurinn Daníel Einarsson sem lék hér síðastliðin tvö tímabil.

Burðarásar liðsins í vetur eru t.d. hornamaðurinn Bjarki Már Elísson sem er þeirra markahæsti maður með 69 mörk í deildinni. Þá skal nefna skyttuna ungu, Eyþór Magnússon með 32 mörk og skyttuna Atla Karl Bachmann með 29 mörk. Reynsluboltarnir Ólafur Víðir Ólafsson og Vilhelm Gauti Bergsveinsson eru ótrúlega drjúgir fyrir liðið og markverðirnir Arnór Freyr Stefánsson og Björn Ingi Friðjónsson voru frábærir í úrslitakeppninni síðasta vor og lögðu líklega grunninn að meistaratitlinum.


Daníel, Bjarki Már og Eyþór


Atli Karl, Ólafur Víðir og Vilhelm Gauti

Það eru sem sé síðustu forvöð að sjá Akureyrarliðið á heimavelli á þessu ári. Við verðum með sérstaklega glæsilega veislu fyrir handhafa Gullkortsins fyrir leik og í hálfleik.

Þá verður sérstakt forsölutilboð á kennsludiskinum Frá byrjanda til landsliðsmanns þar sem diskurinn verður seldur á 2.500 krónur en almennt verð í verslunum verður trúlega um 3.600 krónur.
Sjá sérstaka frétt um diskinn.

Til baka    Senda á Facebook

Umsjón og hönnun: Stefán Jóhannsson og Ágúst Stefánsson