Dómarar: Arnar Sigurjónsson og Svavar Ólafur Pétursson
Umfjöllun
Tengdar fréttir
Valli vissi upp á sig sökina með rauða spjaldið í lok leiksins
19. október 2013 - Akureyri handboltafélag skrifar
Viðtöl við leikmenn og þjálfara eftir Valsleikinn
Hér er búið að taka saman helstu viðtöl eftir leik Vals og Akureyrar í gær. Skiljanlega eru menn missáttir en athyglisvert er að blaðamenn og aðstandendur beggja liða setja spurningamerki við dómgæsluna í leiknum og á þann hátt að verulega hafi hallað á Akureyrarliðið. Byrjum á Vísi þar sem Guðmundur Marinó Ingvarsson ræðir við Heimi Örn Árnason og Ólaf Stefánsson.
Heimir: Þessi dómur í lokin var rosalegur
„Ég ætla að taka það fram að mér fannst þeir dæma allt í lagi. Þeir héldu sinni línu og bæði lið fengu sín víti sem er tíska í dag en þessi dómur í lokin var rosalegur,“ sagði Heimir Örn Árnason allt annað en sáttur við það þegar Þrándur Gíslason fékk dýrar tvær mínútur þegar sex mínútur voru eftir að leiknum og staðan 21-20.
„Við vorum búnir að vera í vörn í tvær mínútur, brjáluð barátta og búið að stoppa tímann fjórum sinnum til að þurrka gólfið. Svo fáum við tvær mínútur fyrir algjört bull. Þegar það er lítið skorað í lokin þá skiptir þetta öllu máli. Það er bara þannig.
Það var aftan í útaf og hinum megin ekki. Samræmið var svo sem allt í lagi í heildina. Mér fannst þetta ekki sanngjarn fimm marka sigur,“ sagði Heimir sem beit í tunguna á sér.
„Mér fannst við með þá. Þetta var kjaftæði í lokin. Bæði við og utanaðkomandi aðstæður sem við stjórnum ekki. Við fáum nokkur aula mörk á okkur þar sem við stöndum vörn í tvær mínútur en ég trúi ekki að við höfum tapað. Við ætluðum að vinna þennan leik og mér fannst við eiga það skilið. Ég skil ekki hvað fór úrskeiðis á síðustu tíu.“
Heimir leggur á ráðin með sínum mönnum. Mynd: Andri Marinó sport.is
Ólafur: Heppnir að stórum hluta
„Þau leyna á sér þessi stig víst, það er eitthvað sem þau gera. Það er bara það og þetta síðasta korter sem við getum horft jákvæðum augum á,“ sagði Ólafur Stefánsson þjálfari Vals eftir leikinn.
„Við breyttum aðeins útaf í vörn og það er gott að við getum verið með plan b sem við getum byggt á. Hitt var alls ekki að virka og ég get tekið það á mig sem þjálfara. Þetta er búið að vera aðeins of mikið fyrir strákana. Þeir eru duglegir og allir af vilja gerðir en það er svolítið mikil spenna í þessu hjá okkur.
Það er mikil tregða í þessu sóknarlega og við skorum tvö, þrjú mörk sem ég myndi segja að væru mjúk mörk. Allt hitt er rosalega erfitt. Eins og við séum að spóla á svelli.
Strákarnir sýndu karakter. Við vorum við það að kokksa allir. Þrír tapleikir plús það að hlutirnir voru ekki að virka á 45 mínútu.
Við vorum heppnir líka í lokin. Við vorum heppnir að fá fráköst, heppnir að fá sum vítin þegar við skorum ekki á línunni og fáum víti. Þeir hefðu getað sleppt því að dæma. Við vorum heppnir með dóma líka og Akureyringar eru skiljanlega eitthvað leiðir yfir því. Ég greindi skiljanlega pirring yfir því.
Heppnir að stórum hluta en auðvitað líka smá karakter og vilji,“ sagði Ólafur sem skipti ekki eins miklu á fimmtán mínútna fresti og í fyrstu leikjum tímabilsins.
Ólafur hugsi yfir gangi leiksins. Mynd: Andri Marinó sport.is
„Það var nokkuð stór skipting í fyrri hálfleik en í seinni hálfleik héldum við nokkurn vegin okkar. Ég er kannski að afsala mér svolítið ábyrgð með því að segja bara korter, korter. Mitt hlutverk er að skynja leikmenn, hvernig þeim líður og hvernig þeir eru að spila. Ég vil að allir spili og það verður áfram málið en ég geri engum greiða ef honum líður ekki vel og er að stressast upp og er þá ekki að hjálpa til.
Ég er líka að læra og er að sjá karakterana og hvernig þetta rúllar.
Þetta snýst um að hafa sem flesta aktíva. Það er sú speki. Ef allir eru góðir og með sjálfstraust þá getum við haldið því og við viljum reyna að halda því sem jafnast og allur hópurinn gangi nokkuð sáttur af velli en ekki bara einhverjir sjö,“ sagði Ólafur.
Frá Morgunblaðinu fáum við myndbandsviðtöl Ívars Benediktssonar við Þránd Gíslason og Orra Frey Gíslason.
Þrándur: Alveg hundsvekktur
„Mér fannst við eiga eitthvað skilið úr þessum leik," sagði Þrándur Gíslason, leikmaður Akureyringar vonsvikinn eftir tap fyrir Val, 26:21, í Olísdeild karla í handknattleik í Vodafonehöllinni í kvöld.
„Við börðum vel og Jovan varði eins skepna en við náðum lítið af fráköstum. Við mættum vel stemmndir og vorum lengi vel með leikinn í okkar höndum. Síðan fórum við að taka slæmar ákvarðanir í sóknarleiknum auk þess sem við fengum á okkur umdeilanlega brottrekstra. En vafalaust hafa einhverjir verið orðnir þreyttir hjá okkur. Ég er bara hundsvekktur," sagði Þrándur Gíslason, leikmaður Akureyrar. Nánar er rætt við Þránd á meðfylgjandi myndskeiði.
Orri: Við erum rólegir
„Við eru fyrst og fremst ánægðir með að hafa unnið þennan leik, en við lékum alls ekki vel," sagði Orri Freyr Gíslason, línumaður Valsmanna, eftir að þeir unnu Akureyringa, 26:21, á heimavelli í kvöld í Olís-deild karla í handknattleik.
Sigurinn var torsóttur en lokakaflinn var Valsmanna sem skoruðu níu mörk gegn einu á síðustu 14 mínútunum.
„Síðustu 10 mínúturnar voru góðar en við eigum mikið inni. Við erum rólegir," sagði Orri Freyr en nánar er rætt við hann á meðfylgjandi myndskeiði.
Á handbolti.org eru eftirfarandi myndbandsviðtöl sem Sonja Björg Jónsdóttir tók eftir leikinn.
Gunnar Malmquist: Skemmtileg dómgæsla
Guðmundur Hólmar: Svolítið súrsæt tilfinning að vinna þennan leik
Ólafur Stefánsson: Við vorum heppnir með dóma og fráköst
Að endingu fylgja þrjú myndbandsviðtöl sem Lúther Gestsson hjá sport.is tók við leikmenn.Valþór: Ég missti stjórn á mér undir lokinVaþór Guðrúnarsson átti fínan leik í kvöld með liði Akureyrar og skoraði fimm mörk. Hann fékk þó rauða spjaldið undir lokin en sagði það engum nema sjálfum sér að kenna.
Guðmundur Hólmar: Dómararnir hafa átt betri dag
Guðmundur Hólmar var að mæta sínum gömlu félögum að norðan í kvöld og reyndist þeim erfiður og skoraði sjö mörk.
Finnur Ingi: Það er verið að forrita okkur
Finnur Ingi viðurkenndi að leikur Vals hefði ekki verið góður í kvöld þrátt fyrir sigur.
Heimir og Bjarni eiga stórverkefni fyrir höndum
18. október 2013 - Akureyri handboltafélag skrifar
Mótherjar Akureyrar í dag – Valur
Akureyri heimsækir handboltastórveldið Val á föstudagskvöldið. Það er óhætt að segja að verkefnið sé stórt enda miklar væntingar til afreka hjá Valsmönnum á tímabilinu. Ekki að ástæðulausu að forráðamenn liðanna spá Valsliðinu meistaratitli heldur leit Valsliðið afar vel út á undirbúningstímabilinu en þeir unnu t.d. Opna Norðlenska mótið og Reykjavíkurmótið.
Miklar breytingar hafa orðið á högum Valsmanna frá síðasta tímabili, fyrir það fyrsta þá var goðsögnin Ólafur Stefánsson ráðinn þjálfari liðsins og með honum fyrrum landsliðsmaðurinn Ragnar Óskarsson sem hafði leikið síðustu ár í Frakklandi. Það er ekkert launungamál að tilkoma þeirra í þjálfarateymið varð til að auðvelda Val að fá til sín sterka leikmenn fyrir tímabilið. Þar skal fyrst telja góðkunningja okkar Akureyringa, frændurna Geir Guðmundsson og Guðmund Hólmar Helgason sem eru reyndar á láni hjá Val frá Akureyri.
Geir og Guðmundur hafa heldur betur sett mark sitt á Valsliðið og verið langatkvæðamestu sóknarmenn liðsins, jafnt á undirbúningstímanum svo og það sem af er deildinni.
Geir í leik Vals gegn ÍR. Mynd Björgvin Franz Björgvinsson handbolti.org
Guðmundur Hólmar í leik Vals gegn ÍR. Mynd Björgvin Franz Björgvinsson handbolti.org
Skyttan Elvar Friðriksson sneri aftur heim á Hlíðarenda eftir atvinnumennsku erlendis og línutröllið og varnarjaxlinn Ægir Hrafn Jónsson sneri sömuleiðis heim en hann varð Íslandsmeistari með Fram á síðasta tímabili. Til viðbótar fengu Valsmenn leikmennina Ásbjörn Stefánsson frá FH og Júlíus Þóri Stefánsson frá Gróttu.
En það fóru reyndar menn líka, Gunnar Malmquist Þórsson gekk í raðir Akureyrar og Valdimar Fannar Þórsson gekk til liðs við FH. Agnar Smári Jónsson fór til ÍBV og Ágúst Birgisson til Aftureldingar. Þá hafa Gunnar Harðarson, Fannar Örn Þorbjörnsson og Sigfús Sigurðsson lagt skóna á hilluna og Nikola Dokic er farinn af landi brott.
Þegar skoðuð er tölfræði Valsliðsins í fyrstu fjórum umferðum Olís-deildarinnar kemur í ljós það sem áður var sagt að Geir og Guðmundur hafa farið mikinn en Geir hefur skorað 20 mörk og Guðmundur Hólmar 17. Þar á eftir koma Elvar Friðriksson með 13 mörk og Finnur Ingi Stefánsson með 12 mörk. Þar næstir eru Orri Freyr Gíslason og Þorgrímur Smári Ólafsson með 6 mörk. Þá skildi enginn gleyma markvarðaparinu Hlyni Morthens og Lárus Helgi Ólafsson en þeir eru ákaflega stabilir og oftar en ekki í aðalhlutverkum hjá liðinu.
Leikur Vals og Akureyrar verður klukkan 18:00 á föstudaginn í Vodafonehöllinni og má búast við fjölmenni á leiknum enda hafa viðureignir Akureyrarliða og Vals verið einhverjar þær mögnuðustu í íslensku handboltasögunni.
Leikurinn verður í beinni textalýsingu hér á síðunni.
Hörkuleikur framundan
14. október 2013 - Akureyri handboltafélag skrifar
Akureyri mætir Val í Vodafone höllinni á föstudaginn
Akureyri fær annan útileik í næstu umferð Olís-deildarinnar en á föstudaginn halda strákarnir á Hlíðarenda. Þar mæta þeir góðkunningum okkar þeim Guðmundi Hólmari Helgasyni og Geir Guðmundssyni sem leika undir stjórn Ólafs Stefánssonar. Ekki þarf að efa að þar verður tekist vel á enda hafa leikir liðanna ávallt verið jafnir og spennandi.
Leiktíminn er dálítið óvenjulegur eða klukkan 18:00 á föstudegi. Við hvetjum alla sem vettlingi geta valdið til að fjölmenna í Vodafone höll Valsmanna og styðja sína menn með öllum tiltækum ráðum!
Úrvalsdeild karla
Senda skilaboð
Vefur KA
Vefur Þór
Fréttaleit
Textalýsing frá leiknum
Tölfræði leiksins 
Senda á Facebook