Warning: Undefined array key "frettanr" in /web/akhandadmin/public_html/index.php on line 15 Háspenna og dramatík í tapi fyrir Val í kvöld - Akureyri Handboltafélag
Dómarar: Gísli H. Jóhannsson og Hafsteinn Ingibergsson.
Umfjöllun
Tengdar fréttir
Sverre glaður með margt í leiknum
3. október 2014 - Akureyri handboltafélag skrifar
Hvað sögðu menn eftir leik Akureyrar og Vals?
Eftir æsilegan leik í gærkvöldi voru þjálfarar og leikmenn að venju teknir í viðtöl við fjölmiðla. Við reynum að draga þau saman eins og vant er og erum komin með viðtöl af visir.is, mbl.is og sport.is sem fylgja hér að neðan.
Byrjum á viðtölum Birgis H. Stefánssonar við Heimi Örn Árnason, Geir Guðmundsson leikmann Vals og Jón Kristjánsson þjálfara Vals:
Heimir: Alveg hræðilegt frákast
„Valsarar voru að spila mjög vel,“ sagði Heimir Örn Árnason nokkuð þungur á brún eftir leik. „Við vorum alltaf að narta í hælana og svo var þetta allt að koma en þá tókum við alveg hræðilegt frákast þegar við vorum komnir loksins yfir og þeir skoruðu agalega mikilvægt mark. Ég held að ef við hefðum getað klárað þetta ef við hefðum náð þeim bolta, það er stutt á milli og þess vegna er þetta ennþá meira svekkjandi.“
Það kom kafli frá 20. mínútu fyrri hálfleiks og fram að 14. mínútu seinni hálfleiks þar sem markmenn ykkar náðu ekki að verja eitt skot. „Hann átti ekki góðan leik í dag. Hann tók nokkra bolta og það var ekkert að því en það voru nokkur skot þar sem hann virkaði aðeins yfirspenntur kallinn. Hann er búinn að eiga frábær leiki hingað til en við getum ekki búist við tuttugu boltum í hverjum leik.“
Heimir fylgist með sínum mönnum
Geir Guðmundsson: Þýðir ekkert að toppa of snemma
„Þetta var mjög erfið fæðing,“ sagði Geir Guðmundsson strax eftir leik. „Þetta var bara hrikalega erfiður leikur. Mér fannst við vera með smá forskot en þeir voru alltaf strax komnir aftur, erfiður leikur að spila og stemming í húsinu.“
Það eru komnir núna tveir sigrar í röð hjá Valsmönnum sem hafa þó þurft að hafa mikið fyrir þeim. „Já, svona er þetta bara. Þetta er jöfn og erfið deild, öll lið eru góð. Það eru einnig ákveðnar breytingar hjá okkur sem eru að „kicka-inn“ núna. Við erum að læra nýja hluti sem eru að smella saman, þetta er ekki eins og hjá Óla og við erum að aðlagast. Mikill og góður stígandi í þessu, þýðir ekkert að toppa í byrjun.“
Þetta er nokkuð vegleg matarkarfa sem þú fékkst fyrir að vera maður leiksins, hún kemur sér væntanlega vel? „Þetta kemur sér alveg ofboðslega vel og mikill fengur fyrir piparsveinaíbúðina - ég þarf ekki að fara í Bónus á morgun.“
Geir með körfuna frá Norðlenska fyrir að vera besti leikmaður Valsliðsins
Jón Kristjánsson: Eigum enn nokkuð í land
„Mér fannst við vera með leikinn að mestu,“ sagði Jón Ríkharð Kristjánsson strax eftir leik. „Við missum svo tvo menn útaf og þeir ná að taka smá sprett en við náðum sem betur fer að klára þetta undir lokin. Í svona 45 til 50 mínútur þá vorum við með nokkuð góða stjórn og hefðum ekki átt að missa þetta svona niður.
Þessi leikur var að mörgu leiti öðruvísi en hinir þrír sem við höfum spilað, þar hefur vörnin og markvarsla verið traust á meðan sóknin hefur hikstað aðeins. Þetta var í raun öfugt í raun en við eigum svolítið í land með að slípa saman liðið og það er verkefnið framundan.“
Þið hafið ekki haft mikinn tíma til að koma með ykkar áherslur? „Nei, þetta voru þrjár æfingar fyrir fyrsta leik. Við erum að koma því inn sem við viljum gera og ég vona að það skili sér hægt og rólega.“
Gísli dómari leiksins þarf aðeins að ræða við Jón Kristsjánsson og Óskar Bjarna þjálfara Valsliðsins
Þá er komið að viðtölum Einars Sigtryggssonar blaðamanns Morgunblaðsins en hann ræddi við Sverre Jakobsson og Guðmund Hólmar Helgason, leikmann Vals.
Sverre: Ótrúlega glaður og þakklátur
Valsmenn voru yfir í leiknum lengstum en með góðum kafla náðu heimamenn í Akureyri að komast yfir þegar skammt var eftir. Ekki dugði það því Valsmenn unnu 30:27 þegar liðin mættust í Pepsi-deild karla í handbolta í kvöld. Sverre hafði þetta að segja um leikinn og framhaldið í deildinni. „Það fór mikil orka í það hjá okkur að ná þeim og því miður náðum við ekki að fylgja því eftir að komast marki yfir. Við fengum alveg færin til að skora fleiri mörk en nýttum þau ekki á meðan Valsmenn nýtti sín.
Heilt yfir þá vorum við bara ekki nógu góðir. Við börðumst þó allan leikinn og gáfumst aldrei upp þrátt fyrir að vera undir. Það voru lítil atriði og augnablik sem réðu úrslitunum, ögn af einbeitingarleysi og smá óheppni með. Það var samt margt jákvætt, fleiri menn að sýna sig og vörnin var flott á löngum köflum. Ég er ótrúlega glaður og þakklátur að finna hvað fólk hefur mikla trú á okkur og er að mæta vel á leikina til að styðja liðið. Auðvitað vill það sjá okkur sigra en leikirnir hafa verið skemmtilegir og spennandi svo ég vona að fólkið haldi áfram að koma til að styðja okkur. Það er stutt í næsta leik og þar ætlum við okkur tvo punkta, ekki spurning“ sagði hinn tröllvaxni Sverre glaðbeittur að vanda.
Sverre og Heimir fara yfir málin í leikhléi
Guðmundur: Ætla að stela pylsum frá Geira
Guðmundur Hólmar Helgason var að öðrum ólöstuðum besti leikmaður Vals þegar lið hans bar sigurorð af Akureyringum í Olís-deild karla í handknattleik á Akureyri í kvöld, 30:27. Hann tók af skarið þegar á þurfti að halda og leiddi sína menn jafnt í vörn sem sókn. Frændi hans, Geir Guðmundsson, átti einnig góðan leik. Þeir félagar eru frændur og léku saman með Akureyringum áður en haldið var suður til að spila með Val.
Guðmundur hafði frá mörgu að segja að leik loknum. „Ég ætla að vona að þetta hafi verið ágætis skemmtun. Ég er ekkert fúll þótt litli frændi minn (Geir Guðmundsson) hafi verið valinn bestur hjá okkur og unnið gjafakörfuna frá Norðlenska. Hann var mjög góður í leiknum. Ég ætla samt að stela pylsum frá honum.
Við náðum ágætis forskoti tvisvar í leiknum en þeir komu óðara til baka. Þetta var svakalega spennandi í restina og sem betur fer komumst við aftur fram úr og Bubbi lokaði á þá í blálokin. Jú, það fór örlítið um mig þegar þeir komust yfir og áhorfendur voru komnir í stuð. Þetta var því enn mikilvægara og sætara.
Maður er náttúrulega í þessu fyrir svona augnablik og mér fannst frábært að koma á gamla heimavöllinn og spila við þessar aðstæður. Þetta er samt alltaf jafn skrýtið, að vera andstæðingurinn. Mér finnst alltaf æðislegt að koma hingað i ferska fjallaloftið og er að reyna að segja strákunum í liðinu að það sé himnaríki á jörð að búa hérna fyrir norðan. Þeir eru ekki að kaupa það.
Nú förum við bara í mat til mömmu hans Geira, mömmur okkar hafa skiptst á að elda fyrir liðið þegar við spilum hérna fyrir norðan. Maður fær því alltaf háspennuleik og frábæran mat í þessum ferðum“ sagði Guðmundur Hólmar og heyra mátti að hann hlakkaði til máltíðarinnar.
Guðmundur óvenju grimmur á svip þó hann brosti í leikslok
Á sport.is eru vídeóviðtöl Siguróla Magna Sigurðssonar við þá Heimi Örn og Guðmund Hólmar Helgason. Guðmundur Hólmar að sjálfsögðu alsæll að vera kominn á heimaslóðir og ekki spillti fyrir að framundan var stórveisla hjá mæðrum þeirra frændanna.
Heimir Örn: Maður er hundsvekktur
Guðmundur Hólmar: Tilfinningin er sæt
Heimir Örn hefur í nógu að snúast þessa dagana
2. október 2014 - Akureyri handboltafélag skrifar
Leikur dagsins: Akureyri - Valur í Höllinni
Það hefur vonandi ekki farið framhjá neinum að það er stórleikur í Höllinni í dag. Akureyri mætir þar Val og rétt að ítreka óvenjulegan leiktíma en leikurinn hefst klukkan 18:00. Leikir liðanna hafa verið frábær skemmtun í gegnum árin og við vonumst eftir því að sjá sem flesta á pöllunum í dag og treystum á að stemmingin verði mögnuð!
Í leiðinni er rétt að minna á að það er stutt í næsta leik, strax á sunnudaginn, klukkan 15:00 mæta Íslandsmeistararnir í ÍBV í Höllina og þar á Akureyri svo sannarlega harma að hefna frá síðasta ári.
En það er fleira framundan fyrir handboltaáhugamenn, á föstudaginn klukkan 19:00 er leikur hjá 2. flokki Akureyrar gegn Fram en leikurinn er liður í forkeppni um röðun liða í deildir fyrir veturinn.
Á laugardaginn klukkan 14:00 er leikur í Olís-deild kvenna þar sem KA/Þór fær Hauka í heimsókn. Sá leikur verður í KA-heimilinu.
Á sunnudaginn eru síðan tveir leikir í Höllinni, klukkan 13:00 mætast Hamrarnir og ÍH í 1. deild karla og þar á eftir, klukkan 15:00 er leikur Akureyrar og ÍBV eins og áður segir.
Það eru sem sé sannkallaðir handboltadagar á Akureyri framundan - byrjum í Höllinni í dag og rétt að minna þá sem ekki hafa náð sér í Gullkort (stuðningsmannaskírteini) að koma tímanlega til að ná sér í kort.
Eitt sögufrægasta handboltafélag landsins
30. september 2014 - Akureyri handboltafélag skrifar
Valsmenn koma sterkir til leiks á fimmtudaginn
Það er sterkt lið Valsmanna sem heimsækir Akureyri næstkomandi fimmtudag. Valsmenn voru ekki langt frá því að fara alla leið í deildinni í fyrravetur en féllu úr leik í fjögurra liða úrslitunum gegn ÍBV í dramatísku fimm leikja einvígi. Eins og menn muna héldu Vestmannaeyingar áfram og enduðu sem Íslandsmeistarar.
En það gekk mikið á hjá Val í fyrra, Ólafur Stefánsson var ráðinn þjálfari og fjölmargir leikmenn gengu til liðs við Val, ekki síst til að njóta handleiðslu Ólafs. Þar á meðal voru frændurnir Guðmundur Hólmar Helgason og Geir Guðmundsson sem Valsmenn höfðu að láni í fyrra vetur. Nú er sá lánssamningur útrunninn og þeir orðnir formlegir liðsmenn Vals.
Guðmundur og Geir í leiknum gegn Aftureldingu
Fleiri komu til Valsmanna í fyrrasumar t.d. sneri Elvar Friðriksson heim eftir að hafa leikið í Þýskalandi.
Fyrir núverandi tímabil héldu Valsmenn áfram að styrkja leikmannahópinn. Línumaður íslenska landsliðsins, Kári Kristjánsson sneri heim til Íslands og gekk að endingu til liðs við Val. Þá klófestu Valsmenn danska markvörðinn Stephen Nielsen frá Fram. Einnig náðu þeir í ungan og efnilegan Selfyssing, Ómar Inga Magnússon og Daða Gautason frá Gróttu.
Kári Kristjánsson er vígalegur á velli
En á móti fóru nokkrir leikmenn frá Val, línumaðurinn og varnartröllið Ægir Hrafn Jónsson fór til Víkings og markvörðurinn Lárus Helgi Ólafsson fór ásamt bróður sínum Þorgrími Smára til HK.
En það dró til tíðinda hjá Valsmönnum viku fyrir upphaf keppni í Olís-deildinni þegar tilkynnt var mjög óvænt að Ólafur Stefánsson hefði dregið sig í hlé sem þjálfari, allavega fram til áramóta. Aðstoðarþjálfari Vals í fyrra, Ragnar Óskarsson lét af störfum í sumar og flutti til Frakklands.
Núverandi þjálfarar Vals eru Óskar Bjarni Óskarsson sem hefur reyndar áður komið við sögu sem þjálfari Vals og með honum starfar Jón Ríkharður Kristjánsson sem lengi lék með Val og þjálfaði fyrir nokkrum árum m.a. ÍR. En Jón er þó norðanmaður að upplagi, fyrir þá sem ekki vita þá er Jón bróðir Erlings Kristjánssonar og saman léku þeir bræður handbolta með KA og urðu raunar Íslandsmeistarar með KA í knattspyrnu 1989.
Þjálfararnir, Jón Kristjánsson og Óskar Bjarni
Eftir þrjár umferðir er Valur með þrjú stig, gerðu jafntefli við ÍR í fyrstu umferð, töpuðu á heimavelli fyrir Aftureldingu en unnu HK í síðustu umferð. Eftir þessa þrjá leiki er Guðmundur Hólmar Helgason markahæstur með 12 mörk, Finnur Ingi Stefánsson og Vignir Stefánsson 11 mörk. Elvar Friðriksson með 7 en línumennirnir Kári Kristjánsson og Orri Freyr Gíslason 6 mörk hvor. Geir Guðmundsson hefur haft fremur hægt um sig, er með 5 mörk eftir þrjá leiki.
Valsliðið er gríðarlega vel mannað og er vænst mikils af liðinu. Í síðasta leik þeirra, gegn HK hrökk markvörðurinn Hlynur Morthens heldur betur í gang og var að öðrum ólöstuðum maðurinn á bak við sigur Vals. Hlynur, eða Bubbi eins og hann er kallaður hefur oftar en ekki verið besti leikmaður Vals þegar þeir koma hingað norður og undantekningarlítið fengið matarkörfu Valsliðsins. Reyndar var það Geir Guðmundsson sem fékk körfuna síðast þegar liðin mættust en þá fór Geir á kostum og sá til þess að Valur náði jafntefli úr þeim leik.
Hlynur Morthens er klárlega einn öflugasti markvörður deildarinnar
Síðasta leik liðanna lauk sem sé með jafntefli en leikir liðanna hafa yfirleitt verið spennuþrungnir og ekki að efa að það verður mikið fjör í Íþróttahöllinni á fimmtudaginn. Leiktíminn er dálítið óvenjulegur en leikurinn hefst klukkan 18:00 og rétt að minna þá sem ekki hafa náð sér í Gullkort (stuðningsmannaskírteini) að koma tímanlega til að ná sér í kort.
Úrvalsdeild karla
Senda skilaboð
Vefur KA
Vefur Þór
Fréttaleit
Ljósmyndir frá leiknum
Textalýsing frá leiknum
Tölfræði leiksins 
Byrjum á viðtölum Birgis H. Stefánssonar við Heimi Örn Árnason, Geir Guðmundsson leikmann Vals og Jón Kristjánsson þjálfara Vals:
Þá er komið að viðtölum Einars Sigtryggssonar blaðamanns Morgunblaðsins en hann ræddi við Sverre Jakobsson og Guðmund Hólmar Helgason, leikmann Vals.
Senda á Facebook