Warning: Undefined array key "frettanr" in /web/akhandadmin/public_html/index.php on line 15 Margt frábært og leiðinlegt að tapa fyrir Haukum - Akureyri Handboltafélag
Blaðamaður Fréttablaðsins, Hjalti Þór Hreinsson, hrósar okkur Akureyringum fyrir umgjörð leiksins. Hann skrifar gestapistil á bloggsíðu Henrys Birgis Gunnarssonar, umsjónarmanns íþróttasíðu Fréttablaðsins.
Hjalti Þór segir þar: Akureyringar fá heldur betur plús í kladdann fyrir umgjörðina í kringum leikinn gegn Haukum í kvöld. Ég náði ekki að skrifa gagnrýni síðast en þá var hún svona lala, núna kvað aftur á móti við annan tón. Ég mætti 25 mínútum fyrir leik og þá var búið að þurrka af borðum, raða upp stólum og setja skýrslur við hvern stól. Síðast, og allt síðasta tímabil reyndar, voru frekar lélegir stólar í boði en nú hefur verið gerð bragabót á. Fínir stólar en útsýnið er reyndar ekki alveg fullkomið. En það sleppur nú svo sem alveg. Ég spurði um þráðlaust net sem var á staðnum. Ég komst ekki inn á það strax, frekar en Stefán sem sér um heimasíðuna, en hann var ekki lengi að kippa því í liðinn fyrir okkur. Auk þess sem hið margrómaða KA-heimiliskaffi var á boðstólnum að venju. Óhollur var hann og ég átti fullt í fangi með að standast freistingar á freistingar ofan. Gestur Einar mætti galvaskur að venju en hæstu einkunnina fær þó vallarkynnirinn. Sá er toppmaður og fagmaður fram í fingurgóma. Alltaf allur að vilja gerður og sér til að allt sé í góðu. Á milli þess öskrar hann fólk áfram og hvetur sína menn. Í kvöld var vaskur hópur krakka úr MA, að mér skilst, sem klæddi sig í hvíta boli, sat saman og hélt stemmningunni uppi. Var það mjög vel heppnað og stuðningurinn var frábær. Kalla eftir þessum krökkum í hvern einasta leik, þau stóðu sig með sóma og drifu áhorfendur áfram. Umgjörðin var alveg frábær og eiga Akureyringar hrós skilið fyrir kvöldið. Endilega haldið þessu áfram. Umgjörð: 4 og hálf stjarna af 5 Aðstaða blaðamanna: 5 stjörnur af 5 Hjalti Þór Hreinsson Sjá bloggið með myndum
Margt jákvætt í leik liðsins í gær
5. október 2007 - Akureyri handboltafélag skrifar
Rúnar Sigtryggsson: Fleiri þurfa að bera uppi sóknina
"Menn lögðu sig fram, allir sem einn – það verður ekki af þeim tekið, en vandamálið var að of fáir leikmenn báru sóknarleikinn uppi," sagði Rúnar Sigtryggsson þjálfari og leikmaður Akureyrarliðsins við Heimasíðuna í morgun, um leikinn gegn Haukum í gærkvöldi.
"Vörnin var mjög góð hjá okkur og Sveinbjörn auðvitað. Í sókninni leysti Andri Snær sína erfiðu stöðu frábærlega," sagði Rúnar – en Andri lék allan tímann í hægra horninu. Er vanur að vera hinum megin, þar sem Heiðar Þór var núna og báðir léku þeir gríðarlega vel. "Goran skilaði sínu hlutverki mjög vel, bar uppi sóknarleikinn og eina ógnunin fyrir utan var raunverulega af honum. Jónatan var reyndar góður og stjórnaði sóknarleiknum vel og Björn Óli er liðinu mjög mikilvægur, kemur sterkur inn og hjálpar liðinu mikið. Leysir margar stöður. En aðal skytturnar okkar brugðust."
Einar Logi gerði ekki eitt einasta mark í gær og Magnús Stefánsson aðeins eitt og það eftir hraðaupphlaup. "Þetta háði okkur auðvitað, leikkerfin snúast mörg um það að hjálpa skyttunum; að búa til pláss fyrir þær, og það tókst en þeir nýttu sér það ekki. Við verðum að fá meira út úr þeim," sagði Rúnar.
Rúnar var gríðarlega ánægður með stemmninguna í húsinu. "Hún hefur aldrei verið svona góð síðan við byrjuðum. Það var alveg frábært að taka þátt í leiknum við svona aðstæður og ég vona að þessir áhorfendur sýni okkur örlitla þolinmæði og komi aftur; ég held við séum á réttri leið. Viðsnúningurinn er kominn."
Hann sagði ólíku saman að jafna þegar stemmningin er jafn góð og í gær eða þegar áhorfendur taka lítinn þátt í leiknum. "Menn voru ákveðnir í að gera sitt besta eins og alltaf og þegar stemmningin var svona góð efldust menn mjög. Og þegar strákarnir gerðu góða hluti varð stemmningin sífellt meiri og leikmennirnir efldust enn frekar. Liðið og áhorfendur spiluðu mjög vel saman í gær," sagði Rúnar.
Sveinbjörn og Jonni stappa stálinu í hvorn annan
5. október 2007 - Akureyri handboltafélag skrifar
Hvað sögðu blöðin í morgun?
Fulltrúar fjölmiðlanna voru ákaflega ánægðir með leikinn í gærkvöldi, enda vart annað hægt. Fréttablaðið og Morgunblaðið höfðu orð á frábærri stemmningu.
hbh skrifar um leikinn í Fréttablaðið og er greinin svohljóðandi: Haukar unnu Akureyri á gríðarlega erfiðum útivelli í gær 27-22 í N1-deild karla í handbolta. Lokatölurnar gefa þó ekki rétta mynd af leiknum sem var hraður og góð skemmtun í frábærri umgjörð.
Bæði lið gerðu sig sek um aragrúa af mistökum í upphafi leiks. Fjölmargir boltar töpuðust vegna ónákvæmra sendinga en á bakvið þéttar varnir voru markmenn liðanna í banastuði, sérstaklega Sveinbjörn í marki Akureyrar. Það var því lítið skorað í kaflaskiptum fyrri hálfleik. Haukar komust í 2-0 en Akureyri sótti síðan í sig veðrið og komst í 5-3. Haukarnir skoruðu þá sex mörk gegn einu en þá kom aftur slæmur kafli hjá gestunum sem leiddu þó 10-11 í hálfleik.
Það var stál í stál í síðari hálfleik og jafnt var á flestum tölum. Bæði lið léku betur en í fyrri hálfleik og þegar skammt lifi leiks var staðan 22-22. Haukar sýndu þá allar sínar bestu hliðar og skoruðu tvö góð mörk á meðan Akureyringum fannst halla á sig í dómgæslunni. Akureyringar fengu nokkur tækifæri til að minnka muninn í eitt mark, síðast þegar rúm mínúta lifði leiks en það tókst þeim ekki. Þess í stað kláruðu Haukar hið krefjandi verkefni norðan heiða og eru því áfram í efsta sæti deildarinnar ásamt Fram. Þjálfarinn Aron Kristjánsson var brosmildur í leikslok.
"Fyrst og fremst var þetta góð liðsheild og baráttuandinn var frábær. Við gerðum sjálfum okkur þetta mjög erfitt. Það er alltaf gaman að koma á Akureyri, hér er góð umgjörð og svona er skemmtilegast að vinna. Við vissum að okkar biði sært dýr eftir tap þeirra á heimavelli og svo stórt tap gegn HK. Þeir eru með fínt lið og við erum mjög ánægðir með sigurinn," sagði Aron. Haukar eru með sjö stig eftir fjóra leiki og eru enn án taps. "Við höfum byrjað mjög vel. Við vissum að það yrði erfitt að rétta við Haukaskútuna eftir margra ára velgengni en þetta gengur vel. Liðsheildin er mjög góð og það er allt að smella innan sem utan vallar," sagði Aron.
Rúnar Sigtryggsson, annar þjálfari Akureyrar, var mjög ósáttur með dómgæsluna í leiknum. "Þáttur dómaranna er ótrúlegur hérna. Ég er á því að Haukarnir fái ítrekað endurtekin tækifæri í sókninni upp úr þurru undir lokin. Ég vona að þessir dómarar verði settir niður um deild, það er ekki hægt að spila undir þessu. Leikurinn var skref í rétta átt hjá okkur en það er erfitt að spila við níu manns frá Reykjavík," sagði Rúnar.
Einar Sigtryggsson segir í Morgunblaðinu að leikurinn hafi verið frábær skemmtun, "hörkuspennandi og bauð upp á sviptingar og heimsklassa markvörslu. Jafnt var nánast á öllum tölum allt þar til í blálokin er Haukar skoruðu fimm mörk á meðan Akureyringar klúðruðu sínum sóknum. Lokatölur urðu 22:27 og gefa þær alls ekki rétta mynd af leiknum."
Einar segir, eftir að hafa rætt við Aron Haukaþjálfara: "Sem fyrr segir var leikurinn æsispennandi og varnarleikur í fyrirrúmi hjá báðum liðum. Athygli vakti markvarsla heimamannsins Sveinbjörns Péturssonar – Bubba, eins og hann er kallaður af félögum sínum. Hann varði hvorki fleiri né færri en 26 skot, þar af 13 þar sem Haukarnir voru í sannkölluðum úrvals færum. "Úff! Þetta var grátlegt, fimm marka tap eftir svona leik. Maður verður bara að halda áfram," sagði Bubbi, en hann var tvímælalaust besti maður leiksins. Andri Snær Stefánsson tók undir þessi orð. "Með svona markvörslu og varnarleik eigum við ekki að tapa leikjum. Við verðum að slípa sóknarleikinn og seinni bylgjuna." Hverju orði sannara hjá stálmús þeirra Akureyringa en sóknarleikur liðsins var allt of stirður og skytturnar voru varla með í leiknum. Tólf markanna komu úr hornum eða hraðaupphlaupum og voru það einu björtu punktarnir í sóknarleik norðanmanna. Haukarnir voru svo sem ekkert mikið betri í sínum sóknarleik en þeirra besti sóknarmaður var Andri Stefan sem skoraði mikilvæg mörk og spilaði félaga sína uppi. Aðrir áttu flestir sínar rispur en Arnar Jón Agnarsson stórskytta má muna sinn fífil fegurri enda orðinn allt of þungur. Ekki má svo gleyma markvörðum Haukaliðsins, Gísla Guðmundssyni og Aroni Rafni Eðvarðssyni, sem báðir vörðu vel, samtals sextán skot."
Ekki missa af leiknum í dag
4. október 2007 - Akureyri handboltafélag skrifar
Bein lýsing: Akureyri - Haukar
Það verður væntanlega hörkuleikur í kvöld þegar strákarnir okkar taka á móti Haukum úr Hafnarfirði en leikurinn byrjar klukkan 19:00. Heimasíðan býður upp á beina textalýsingu af leiknum sem hún hvetur fólk til að fylgjast með en að sjálfsögðu eru allir bæjarbúar hvattir til að mæta á staðinn og hvetja okkar menn.
Það er virkilega auðvelt að fylgjast með leiknum í gegnum Beinu Lýsinguna.
Beina Lýsingin opnast í nýjum glugga sem uppfærist af sjálfu sér á 15 sekúndna fresti. Það er því ekkert mál að fylgjast með. Leikurinn hefst eins og fyrr kom fram klukkan 19:00 og við hvetjum alla til að fylgjast vel með.
Það voru sannkallaðir hörkuleikir gegn Haukunum í fyrra
4. október 2007 - Akureyri handboltafélag skrifar
Mótherjarnir í kvöld – Haukarnir hafa byrjað vel
Haukar hafa byrjað N1 deildina vel. Þeir sigruðu Val í fyrsta leiknum á útivelli, 23:20, burstuðu síðan Eyjamenn 37:21 og gerðu loks jafntefli við Fram í þriðju umferðinni á útivelli, 29:29. Hafnarfjarðarliðið er þar með komið með fimm stig eftir þrjá leiki og er í þriðja sæti fyrir leik kvöldsins.
"Við viljum gjarnan vera með í baráttunni á toppnum. Við stefnum að því að vera á meðal fjögurra efstu liðanna og ég tel að við séum með leikmannahóp sem geti náð því markmiði. Við erum með marga nýja leikmenn og það getur tekið smátíma að slípa liðið saman því við erum að leggja áherslu á aðra hluti en gert var í fyrra. En þetta var óneitanlega góð byrjun", sagði Aron Kristjánsson í samtali við Morgunblaðið að loknum fyrsta leiknum um daginn, sigri gegn Val. Lærisveinar Arons höfðu frumkvæðið nánast allan tímann í leiknum gegn Val. Vörn liðsins var mjög öflug með Eyjamennina, Gunnar Berg Viktorsson og Arnar Pétursson, fyrir miðju en enginn sérstakur meistarabragur þótti á sóknarleik liðsins. Gunnar Berg og örvhenta skyttan Arnar Jón Agnarsson áttu erfitt uppdráttar en það var gamla brýnið Halldór Ingólfsson sem var maður leiksins; kom af varamannabekknum og sýndi gömul og alþekkt klókindi sem skiptu sköpum. Í leiknum gegn Fram í síðustu umferð sýndu Haukar mikla þrautseigju. Leikurinn var nánast tapaður þegar skyttan unga, Sigurbergur Sveinsson, jafnaði 29:29 tveimur sekúndum fyrir leikslok. Haukarnir gáfu allt sitt í leikinn, sem var hin besta skemmtun með miklum hraða, krafti og baráttuvilja svo að áhorfendur fengu nóg fyrir aurana sína eins og Mogginn orðaði það.
Fram var yfir, 29:27, þegar rúmar tvær mínútur voru eftir en Halldór Ingólfsson minnkaði muninn í eitt. Í næstu sókn Fram varði gamla brýnið, Magnús Sigmundsson, markvörður Hauka þegar 1 mínútur og 20 sekúndur voru eftir en hinum megin var varið frá Halldóri í opnu færi 50 sekúndum fyrir leikslok. Fram fór í sókn en þegar 8 sekúndur voru eftir varði Magnús aftur vel. Tíminn var síðan stöðvaður þegar einn Framarinn var rekinn út af fyrir að koma í veg fyrir að Magnús gæti kastað boltanum Fram og Haukar notuðu vel þær sekúndur sem eftir lifðu leiksins og Sigurbergur braust í gegn til að jafna.
Miklar breytingar urðu á Haukaliðinu í sumar, Árni Þór Sigtryggsson hvarf m.a. á braut, en nokkrir leikmenn gengu til liðs við félagið. Þjálfari er Aron Kristjánsson, sem snéri heim frá Danmörku í sumar. Magnús markvörður hefur staðið sig mjög vel í haust og varnarleikur liðsins getur verið gríðarlega sterkur. Sóknarleikurinn á eftir að slípast en Haukar hafa á að skipa góðum leikmönnum sem eru til alls líklegir. Akureyringar verða því að mæta vel stemmdir til leiks í kvöld.
Haukur stóð sig flott í síðustu þraut
4. október 2007 - Akureyri handboltafélag skrifar
Vinnur einhver áhorfenda 10 þúsund króna úttekt?
Einhver áhorfandi leiksins gegn Haukum í kvöld getur unnið sér inn 10 þúsund króna úttekt í Bónus. Eins og í fyrsta heimaleiknum gefst einhverjum tækifæri til þess að spreyta sig á þraut sem Geir Kristinn Aðalsteinsson skipuleggur.
Haukur Ármannsson, oft kenndur við Toyta á Akureyri, gerði sér lítið fyrir og vann sér inn forláta farsíma frá Vodafone síðast og spennandi verður að sjá í kvöld hvort einhver tryggir sér og fjölskyldunni ókeypis mat alla helgina - og jafnvel lengur.
Næsti heimaleikur strákanna er gegn Haukum
3. október 2007 - Akureyri handboltafélag skrifar
Leikurinn gegn Haukum hefst klukkan 19:00 á fimmtudaginn
HSÍ hefur gert breytingu á upphaflegri tímastetningu leiks Akureyrar og Hauka sem fram fer fimmtudaginn 4. október.
Athugið að leikurinn hefst klukkan 19:00 en ekki 20:00 eins og áður hafði verið auglýst.
Athugið jafnframt að í Dagskránni sem kemur út á morgun, miðvikudag er einnig auglýst röng tímasetning.
Það skal því enn og aftur ítrekað að leikurinn verður klukkan 19:00 á fimmtudagskvölið í KA-heimilinu.
Hvetjum alla til að mæta og taka nú virkilega vel á með strákunum. Í fyrra léku liðin þrjá háspennuleiki í deildinni, fyrstu tveim leikjunum lauk með jafntefli en síðasta leikinn vann Akureyri á eftirminnilegan hátt í Hafnarfirði.
Úrvalsdeild karla
Senda skilaboð
Vefur KA
Vefur Þór
Fréttaleit
Textalýsing frá leiknum
Tölfræði leiksins 
Senda á Facebook