Warning: Undefined array key "frettanr" in /web/akhandadmin/public_html/index.php on line 15 Magnaður sigur á Fram á útivelli - Akureyri Handboltafélag
Jonni og Rúnar voru býsna sáttir eftir leikinn í gær
20. nóvember 2009 - Akureyri handboltafélag skrifar
Hvað sögðu menn eftir Fram leikinn í gær? - myndir
Jónatan Þór Magnússon var kátur eftir leikinn, skoðum hvað hann sagði í viðtali við blaðamann Morgunblaðsins: „Svei mér þá. Ég held að ég hafi skorað jafnmörg mörk í þessum leik og í öllum hinum leikjunum í vetur,“ sagði Jónatan Þór, skælbrosandi, við Morgunblaðið eftir leikinn en þessi skemmtilegi leikstjórnandi skoraði 13 mörk í öllum regnbogans litum. „Það tók okkur smátíma að hitna en þegar neistinn var kominn í liðið varð ekki aftur snúið. Við vorum ekkert að æsa okkur yfir því að hlutirnir gengu ekki sem skyldi til að byrja með en um leið og vörnin small saman og Flóki fór að verja tókum við völdin. Í heild var þetta flottur leikur af okkar hálfu. Við gerum þá kröfu á okkur sjálfa að við ætlum að vera með í toppbaráttunni í vetur og þessi sigur gefur okkur byr undir báða vængi,“ sagði Jónatan en Akureyringar lönduðu sínum þriðja sigri í N1-deildinni í röð.
Rúnar Sigtryggsson þjálfari var að sjálfsögðu ánægður í viðtali við Vísi.is „Markvarslan og varnarleikurinn hjá okkur var mjög góður. Hraðaupphlaupin voru ágæt en það er enn margt sem við getum bætt í sóknarleiknum okkar. Það er eins og okkur takist ekki að gera í leikjum það sem við höfum æft á æfingum. En það hlýtur að fara að koma að því.“ „Ég er ekki efins um að það býr enn meira í þessu liði en við höfum sýnt, sérstaklega í sóknarleiknum. Það er enn stígandi í liðinu.“
Halldór Jóhann Sigfússon leikmaður Fram var ekki eins kátur í viðtali við Morgunblaðið: „Það er erfitt að útskýra okkar frammistöðu. Það gengur hreinlega ekkert upp hjá okkur og ef þetta heldur svona áfram þá erum við að fara að berjast um að halda sæti okkar í deildinni,“ sagði Halldór Jóhann Sigfússon eftir leikinn.
Hreinn Hauksson fer fram hjá Halldóri í vörninni og skorar af öryggi
Það verður efalaust mikill slagur í Framhúsinu í dag
19. nóvember 2009 - Akureyri handboltafélag skrifar
Leikur dagsins: Fram - Akureyri í beinni á SportTV og Greifanum
Í dag halda strákarnir suður og mæta Fram liðinu á heimavelli þeirra. Leikurinn verður í beinni útsendingu hjá SportTV.is og hefst leikurinn klukkan 18:30 en útsendingin væntanlega tíu mínútum fyrr. Stuðningsmenn Akureyrar ætla að koma saman og horfa á útsendinguna á veitingahúsinu Greifanum og gæða sér á pizzum með.
Það skal ítrekað að útsendingin er á neðri hæð Greifans í sal sem kallast Stássið og skal bent á að gengið er inn í Stássið Glerárgötumegin (syðri dyrnar), en ekki um aðalinngang Greifans. Eins og áður segir felst aðgangseyrinn í því að kaupa pizzuhlaðborðið (1200 kr fyrir 12 ára og eldri en 500 fyrir 6-12 ára).
Minnum á að með Fram-liðinu leika þrír Akureyringar, Halldór Jóhann Sigfússon leikstjórnandi, Magnús, stórskytta Stefánsson frá Fagraskógi og í haust bættist bróðir hans, Hákon Stefánsson í hópinn en hann var einmitt fyrirliði 2. flokks Akureyrar síðasta tímabil.
Við fundum þessar fínu myndir af þeim á heimasíðu Fram en það er athyglisvert hvað þeir hafa elst mikið við það koma í herbúðir Frammara, prófið að smella á myndirnar til að sjá fæðingardag þeirra!
Magnús Stefánsson
Hákon Stefánsson
Halldór Jóhann Sigfússon
Athugið að þetta er síðasti útileikur Akureyrar á árinu, næstu þrír leikir verða heimaleikir!
Greifinn og SportTV.is bjóða upp á leikinn í beinni
17. nóvember 2009 - Akureyri handboltafélag skrifar
Fram - Akureyri í beinni útsendingu á Greifanum
Leikur Fram og Akureyrar verður í beinni útsendingu á SportTV.is á fimmtudaginn. Stuðningsmenn Akureyrar ætla að koma saman og horfa á leikinn á Greifanum. Leikurinn sjálfur hefst eins og aðrir útileikir okkar klukkan 18:30 og því tilvalið að slá saman leiknum og pizzuhlaðborði Greifans.
Líkt og síðast verður leikurinn sýndur á neðri hæð Greifans í sal sem kallast Stássið og skal bent á að gengið er inn í Stássið Glerárgötumegin (syðri dyrnar), en ekki um aðalinngang Greifans.
Aðgangseyririnn felst í því að áhorfendur kaupa í raun pizzuhlaðborð á afar hóflegu verði: leikurinn ásamt pizzahlaðborði og 0,5 lítra gosglasi á kr 1.200 fyrir 12 ára og eldri, 500 kr fyrir 6-12 ára og frítt fyrir 5 ára og yngri.
Ef leikmenn Akureyrar leika með hjartanu og af sama krafti og þeir sýndu í seinni hálfleik gegn FH í síðustu viku getum við lofað því að það verður frábært að fylgjast með leiknum. Hópurinn veit að nú er kominn tími á að sýna karakter og stemmingu heilan leik og ætlar klárlega að bæta fyrir vonbrigðin í bikarnum. Við skulum því hlakka til að fylgjast með leiknum, Áfram Akureyri!
Fram liðið á eftir að springa út í vetur
17. nóvember 2009 - Akureyri handboltafélag skrifar
Árni Stefánsson um næstu andstæðinga Akureyrar
Næstkomandi fimmtudag leikur Akureyri gegn Fram í N1 deildinni og verður leikið í Framheimilinu. Þær fréttir hafa borist að SportTV.is ætli að sýna beint frá leiknum þannig að við förum að setja okkur í stellingar til að fylgjast með útsendingunni.
Það sem af er tímabilinu hefur Fram liðinu ekki gengið eins og menn bjuggust við en liðið er óútreiknanlegt og getur hrokkið í gírinn hvenær sem er. Það er því ljóst að Akureyrarliðið verður að leika með hjartanu og sýna þá baráttu sem það sýndi í seinni hálfleik gegn FH ef ekki á illa að fara.
Með Fram-liðinu leika nokkrir góðkunningjar okkar Akureyringa, eins og Halldór Jóhann Sigfússon leikstjórnandi, Magnús, stórskytta Stefánsson frá Fagraskógi og í haust bættist bróðir hans, Hákon Stefánsson í hópinn en hann var einmitt fyrirliði 2. flokks Akureyrar síðasta tímabil.
Þar á móti hefur Akureyringurinn Guðmundur Freyr Hermannsson yfirgefið Fram og fór fyrir liði Víkings sem komst einmitt í 8-liða úrslit Eimskipsbikarsins með sigri á Aftureldingu í gær.
Það var æsingur í Halldóri Sigfússyni í leik liðanna í fyrra
Lítum á hvað Árni Stefánsson sagði um Fram liðið í upphafi leiktímabilsins. Fram hefur misst nokkra mjög sterka leikmenn fyrir átökin í vetur. Örvhentu skytturnar Rúnar Kárason og Jóhann Gunnar Einarsson eru horfnar á braut og einnig hornamaðurinn knái Guðjón Drengsson. Fram lék vel á síðasta keppnistímabili og hafnaði í fjórða sæti. Þeir koma til með að vera á svipuðu róli í vetur vegna þess að þau lið sem Viggó Sigurðsson þjálfar eru alltaf líkleg til afreka. Þeir spila góða vörn og agaðan sóknarleik sem getur skilað góðum árangri. Breiddin í leikmannahópnum er ekki mikil en þeir eiga unga og bráðefnilega leikmenn sem eru að koma upp. Fram er með það góðan mannskap að þeir geta strítt öllum hinum liðunum á góðum degi en verða líklega um miðja deild.
Styrkleikar Helsti styrkleiki Fram er jafnt og agað lið sem spilar skynsaman sóknarleik. Andri Berg Haraldsson, Stefán Stefánsson, Magnús Stefánsson, Halldór Sigfússon og Haraldur Þorvarðarson eru allir góðir leikmenn og munu bera leik liðsins uppi. Liðið getur spilað góða vörn og Magnús Erlendsson markvörður er sterkur þar fyrir aftan. Liðið hefur undanfarin ár skorað mikið úr hraðaupphlaupum og þarf á þeim mörkum að halda í vetur.
Veikleikar Fram er með ágætt byrjunarlið en litla breidd og ljóst er að það má ekkert út af bregða hjá burðarásum liðsins. Sérstaklega skiptir miklu máli að Magnús í markinu verði heill , ef hann meiðist þá verða þeir í vandræðum. Ef liðið nær sér ekki á strik í varnarleiknum mun það eiga erfitt uppdráttar.
Lykilmaður Andri Berg Haraldsson verður lykilmaður hjá Fram í vetur. Andri er öflugur sóknarmaður sem skorar mikið af mörkum en er einnig ágætur varnarmaður og mun mikið mæða á honum í vetur. Halldór hefur átt við meiðsli að stríða en ef hann heldur sér heilum er hann mikill styrkur, því það eru fáir betri í leikstjórnandastöðunni en hann. Stefán er öflugur í vinstra horninu, Haraldur mikill baráttujaxl á línunni og Magnús er mjög mikilvægur í markinu.
Þjálfarinn segir... Viggó Sigurðsson, þjálfari Fram, stefnir ótrauður í hæstu hæðir með sína menn, þrátt fyrir að sterkir leikmenn haf horfið á braut. „Við höfum missti mjög mikilvæga pósta úr okkar liði og eina alvöru viðbótin sem við sóttum í staðinn er rúmenski markmaðurinn (sem nú hefur reyndar verið sendur heim aftur). Það jákvæða í þessu er kannski það að við erum ekkert einir í þeirri stöðu að missa sterka leikmenn og eigum í okkar hópi nokkra mjög góða leikmenn sem koma til með að bera þetta uppi í vetur. Við erum að taka stráka upp úr 2. flokki, mjög efnilega stráka, og þeir eiga eftir að fá fullt af sénsum“, segir Viggó.
„Við komum til með að spila þetta mjög svipað og í fyrra“, segir Viggó þegar hann er spurður út í það hvort mannabreytingar kalli á breytingar á leikskipulaginu. Lið undir stjórn Viggós hafa í gegnum tíðina verið þekkt fyrir það að spila agaðan og sterkan varnarleik og beita skynsemi og þolinmæði í sókninni. „Þetta breytist lítillega, aðallega í vörninni, en sóknarleikurinn verður settur upp á svipaðan hátt. Við komum væntanlega til með að stilla meira upp í 5-1 og 3-3 í vörninni.“
„Við stefnum á það að berjast um titla“, segir Viggó um vonir og væntingar vetrarins. „Deildin verður jafnari en mörg undanfarin ár, það þýðir ekkert að horfa framhjá þeirri staðreynd að hún veikist, en það er hins vegar jákvætt að brotthvarf allra þessara leikmanna gefur ungum leikmönnum pláss og tækifæri. Við stöndum vel að því leyti að reynsluboltarnir okkar eru hörkugóðir leikmenn. Þeir eiga eftir að vega þungt í þessari baráttu“, segir Viggó Sigurðsson, þjálfari Fram.
Viggó átti ýmislegt vantalað við dómarana í Höllinni í fyrra
Úrvalsdeild karla
Senda skilaboð
Vefur KA
Vefur Þór
Fréttaleit
Ljósmyndir frá leiknum
Tölfræði leiksins 
Senda á Facebook