Warning: Undefined array key "frettanr" in /web/akhandadmin/public_html/index.php on line 15 Sigur á HK í fyrsta leik undanúrslitanna - Akureyri Handboltafélag
Dómarar: Ingvar Guðjónsson og Jónas Elíasson. Eftirlitsdómari: Kjartan K. Steinbach
Umfjöllun
Tengdar fréttir
Lokakafli Íslandsmótsins er kominn á fulla ferð hjá Heimi og félögum
15. apríl 2011 - Akureyri handboltafélag skrifar
Rýnt í ummæli manna eftir leik Akureyrar og HK
Þá er komið að því að rýna í skoðanir leikmanna og þjálfara eftir viðureign Akureyrar og HK í undanúrslitum N1-deildarinnar í gærkvöldi. Það er Andri Yrkill Valsson blaðamaður Morgunblaðsins sem á fyrsta skammtinn:
Heimir Örn: Svolítið seinir í gang
„Já þetta var gríðarlega mikilvægur sigur,“ sagði Heimir Örn Árnason, fyrirliði Akureyrar, eftir sigurinn á HK, 26:24.
„Við vorum svolítið lengi í gang, þá sérstaklega varnarlega, en það verður ekki af þeim tekið hvað þeir skutu rosalega vel. Þeir voru óhræddir við að skjóta langt fyrir utan á móti besta markmanni landsins og það var allt inni, en það var náttúrulega mikið til okkur að kenna. En þetta kom hjá okkur í síðari hálfleik, ég fann fyrir miklu öryggi í síðari hálfleik og fannst við alltaf vera með þetta á þeim tíma.“
Ólafur Bjarki Ragnarsson, leikmaður HK, fór á kostum í fyrri hálfleik og segir Heimir að liðið hafi gert ráðstafanir til þess að stoppa hann í hálfleik. „Við endurskipulögðum okkur svolítið í hálfleik, Ólafur Bjarki hafði fengið að leika lausum hala og við ætluðum okkur að taka hann úr umferð. Við vissum svo sem að hann myndi ekki skjóta svona vel allan tímann, það hefði hreinlega verið ómannlegt, en við lögðum samt upp með að stoppa hann. Við tókum einnig aðeins betri sénsa í sókninni en ég var alls ekki nógu ánægður með ákvarðanirnar í sóknarleiknum hjá okkur. Við skoruðum 26 mörk sem er alveg í lagi en samt voru ákvarðanirnar ekki nægilega góðar, bæði hjá mér og Gumma, en það kom ekki að sök.“
Heimir segir liðið ákveðið að tryggja sér sæti í úrslitaeinvíginu þegar liðin mætast öðru sinni á laugardaginn. “Ekki spurning, við höfum oft spilað þarna fyrir sunnan og gengið alveg ágætlega hingað til svo það er engin ástæða til að breyta því. En HK er með hörku lið og þeir sýndu það í þessum leik, þeir áttu fullan séns í okkur og ef við slökum á í augnablik þá fara hlutirnir illa fyrir okkur eins og hefur sést í vetur. En hreint yfir var þetta frábær sigur og því horfum við bara bjartsýnir á framhaldið.“
Guðlaugur Arnarsson: Bara hálfleikur í einvíginu, megum ekkert slaka á
„Það er bara hálfleikur í einvíginu og næsti leikur er 0:0 frá fyrstu mínútu svo það má ekkert slaka á þrátt fyrir góðan sigur,“ sagði varnarjaxlinn Guðlaugur Arnarsson, leikmaður Akureyrar, eftir sigurinn á HK.
„Það var alveg frábært að vinna þennan leik og mjög mikilvægt að komast yfir í einvíginu. Við byrjuðum ekki nægilega vel og fórum ef til vill heldur rólegir inn í leikinn, kannski var spenningurinn of mikill. Þeir eru með hávaxna menn í vörninni og það sagði til sín í sóknarleiknum hjá okkur í byrjun. En við náðum loks að finna leið framhjá því og um leið lokuðum við vörninni sem var þó ágæt mestallan leikinn fannst mér.“
Guðlaugur segir að erfitt hafi verið að eiga við Ólaf Bjarka í sóknarleik HK. „Ólafur Bjarki var mjög góður hjá þeim, við misstum hann reyndar í svolítið einföld skot fyrir utan en það skiptir ekki máli. Hann er alveg gríðarlega góður leikmaður, mjög fjölhæfur sem gerir það mjög erfitt að eiga við hann og hann er að mínu mati besti sóknarmaðurinn í þessari deild.“
Guðlaugur segir ekkert annað koma til greina en að tryggja sér sæti í úrslitaeinvíginu þegar liðin mætast öðru sinni fyrir sunnan á laugardaginn.„Að sjálfsögðu stefnum við á að vinna leikinn á laugardaginn, það er bara þannig. Þetta er langt frá því að vera öruggt og því má ekkert slaka á,“ sagði Guðlaugur.
Ólafur Bjarki Ragnarsson: Hefðum átt að vinna
„Við hefðum átt að vinna þetta að mínu mati en við tökum leikinn á laugardaginn í staðinn,“ sagði Ólafur Bjarki Ragnarsson, leikmaður HK, eftir ósigurinn.
„Við klúðruðum þessu í lokin þar sem við fórum illa með nokkrar mikilvægar sóknir og á móti var smá hikst í vörninni. En leikurinn var gríðarlega jafn allan tímann og bæði lið áttu möguleika fram á síðustu mínútu. En nú það þýðir ekki neitt annað en að stilla okkur saman og vinna þetta á laugardaginn, það kemur ekkert annað til greina.“
Ólafur Bjarki var yfirburðamaður í HK liðinu
Ólafur Bjarki fór fyrir sínum mönnum í leiknum, var langmarkahæstur með 10 mörk og sýndi oft á tíðum mjög góð tilþrif. Hann lék sem kunnugt er með ASG Ahlen síðasta vetur og virðist óðum vera að finna sitt gamla form eftir meiðsli. „Ég kom aftur heim einfaldlega út af meiðslum þar sem ég var frá í nokkra mánuði. Mér fannst því tilgangslaust að vera þarna úti bara til þess að vera þar svo ég ákvað að koma heim og reyna að finna gamla formið hér. Svo er hægt að sjá til hvernig fer á næstu árum hvort eitthvað spennandi komi upp á borðið.“
Erlingur Richardsson: Úrslitin langt frá því að vera ráðin
„Nú er einungis kominn hálfleikur í þessu einvígi og úrslitin langt frá því að vera ráðin,“ sagði Erlingur Birgir Richardsson, þjálfari HK, eftir ósigurinn gegn Akureyri.
„Við byrjuðum leikinn vel eins og við lögðum upp með til að eiga sem mestan séns gegn sterku liði Akureyrar. Það gekk ágætlega en spilamennskan hjá okkur í síðari hálfleik var svolítið einkennileg. Mikið var af brottvísunum sem ég skildi ekki og stöðugleikinn var minni fyrir vikið. Við þurftum því að eyða smá tíma í að ná upp stöðugleikanum á ný en þá höfðu þeir gengið á lagið og komnir með þriggja marka forskot sem er erfitt að ná upp.“
Erlingur í miklum rökræðum við Kjartan eftirlitsdómara
Hann segir ekkert annað koma til greina en að vinna næsta leik á laugardaginn, en tölfræðin er ekki með liði HK þar sem Akureyringar hafa unnið allar viðureignir liðanna í vetur. „Við komum einbeittir til leiks á laugardaginn, það er gríðarlega gaman að vera komnir í fjögurra liða úrslit og við ætlum að njóta þess að vera komnir svona langt. Við eigum eftir að leggja Akureyringa að velli í vetur og það er komið að síðasta séns til þess.“
Atli Ævar Ingólfsson: Vorum hálfgerðir klaufar
„Þetta var hörku leikur og mjög jafn frá upphafi til enda en svona er boltinn, stundum falla hlutirnir með manni og stundum ekki,“ sagði Atli Ævar Ingólfsson, leikmaður HK.
„Við höfðum frumkvæðið framan af fyrri hálfleik en þeir ná að jafna fyrir leikhlé og það sýnir hvað leikurinn var jafn og spennandi. Við vorum hins vegar bara hálfgerðir klaufar að klára þetta ekki. En það er ekkert annað í stöðunni en að vinna leikinn á laugardaginn og tryggja okkur oddaleik hérna fyrir norðan, það er gaman að spila hérna og gaman að geta spilað hérna aftur.“
Atli Ævar í baráttu við Guðlaug Arnarsson
Nokkrir stuðningsmenn HK lögðu leið sína í Höllina á Akureyri og segir Atli að skipta miklu. „Það munaði öllu að finna stuðninginn við bakið á okkur og það er frábært að fólk hafi lagt á sig að koma að sunnan til að hvetja okkur, það gerir gæfumuninn.“
Þröstur Ernir Viðarsson blaðamaður Vikudags ræddi við nafnana Atla Hilmarsson og Atla Ævar Ingólfsson:
Atli Hilmarsson: Frábært að byrja með sigri
Atli Hilmarsson þjálfari Akureyrar var ánægður með sína menn eftir sigurleikinn gegn HK í Höllinni á Akureyri í kvöld í fyrsta leik liðanna í undanúrslitum N1-deildar karla í handbolta. Eftir að hafa verið undir nánast allan fyrri hálfleikinn komu norðanmenn sterkir inn í seinni hálfleikinn og unnu að lokum tveggja marka sigur, 26:24, og hafa 1:0 yfir rimmunni.
„Það er frábært að byrja með sigri og það skiptir ekki máli hvernig þú vinnur leikinn. Það þarf að klára sigurinn. Það var ýmislegt sem var ekki í lagi í fyrri hálfleik, sérstaklega í varnarleiknum. Við bættum hana í seinni hálfleik þar sem hún var mjög góð. Við lentum líka í brottvísa vandræðum í seinni hálfleik og vorum mikið manni færri sem var erfitt. Þetta var góður sigur og verður bara stríð og gefur fyrirheit um það sem koma skal,“ sagði Atli.
Liðin mætast að nýju í Digranesi í Kópavogi á laugardaginn kemur kl. 16:00 og vinni Akureyri þann leik eru þeir komnir í úrslit. „Við ætlum auðvitað að reyna að klára þetta á laugardaginn. Mér líst vel á að mæta þeim í Kópavogi, við unnum þar þrisvar í vetur og þetta hús virðist hentar okkur vel. Það verður vonandi sama upp á teningnum þar og hér. Þetta verður erfitt og er bara blóðugt stríð,“ sagði Atli.
Atli Ævar: Ætlum að koma aftur norður
Atli Ævar Ingólfsson línumaður í liði HK bar sig ágætlega eftir leikinn þrátt fyrir tap í kvöld. „Þetta var hörkuleikur og svekkjandi að tapa svona leik. Það var frábær stemmning í Höllinni í kvöld og það er alltaf gaman að spila hérna. Það gekk allt þokkalega upp í fyrri hálfleik sem við lögðum upp með en svo fannst mér við slútta sóknunum svolítið snemma í seinni hálfleik og þetta bara féll með Akureyringum í kvöld,“ sagði Atli Ævar.
Leikurinn á laugardaginn verður upp á líf og dauða fyrir HK en með tapi er liðið úr leik. „Við verðum bara að vinna á laugardaginn. Þá er bara nýr leikur og það dugir ekkert nema sigur þar til þess að halda okkur inn í þessu. Við ætlum klárlega að fara í þrjá leiki. Við munum keyra á þá og sækja sigur á heimavelli og svo mætum við aftur norður,“ sagði Atli Ævar.
Að lokum sjáum við hvað Atli Hilmarsson sagði við Eirík Stefán Ásgeirsson blaðamann Fréttablaðsins:
Atli Hilmarsson: Ánægður með sigurinn
„Ég er ánægður með sigurinn, við unnum og það er fyrir öllu. Þetta var hörkuleikur enda ekki við öðru að búast í úrslitakeppninni. Svona verður þetta alltaf.“
HK komst 4-1 yfir snemma leiks og var með undirtökin lengst af í fyrri hálfleik. Akureyri komst svo yfir í upphafi þess síðari og lét forystuna aldrei af hendi eftir það. „Þetta var í fyrsta sinn sem við lendum undir á móti þeim. Yfirleitt höfum við leitt nokkuð örugglega í þessum leikjum, sem hafa þó flestir verið spennandi. Við vorum frekar ósáttir við fyrri hálfleikinn og vildum að vörnin tæki fleiri bolta. Það lagaðist í seinni hálfleik, sem skóp í raun þennan sigur. Það er það sem við þurfum að laga fyrir næsta leik - að loka vörninni betur og fá fleiri mörk úr hraðaupphlaupum. Í því erum við bestir,“ sagði Atli en næsti leikur liðanna verður í Digranesinu á morgun.
Stór dagur hjá Atla og félögum í dag
14. apríl 2011 - Akureyri handboltafélag skrifar
Leikur dagsins: Akureyri - HK klukkan 19:30
Í kvöld er komið að fyrstu viðureigninni í úrslitakeppninnar um Íslandsmeistaratitilinn. Akureyri og HK mætast í Höllinni klukkan 19:30 og nú má enginn láta sitt eftir liggja. Mætum á leikinn og tökum sem flesta með til að hjálpa strákunum í baráttunni.
„Mér líst mjög vel á þessa rimmu og það skiptir í raun engu máli hvaða lið maður hefði mætt því þetta eru allt góð lið sem eru komin í undanúrslitin“ segir Atli Hilmarsson þjálfari Akureyrar. „Úrslitin í deildinni í vetur hafa sýnt það að maður þarf að hafa fyrir öllum sigrum og þó að við höfum unnið HK fjórum sinnum í vetur að þá voru þrjár af þessum viðureignum mjög jafnar. Þannig að ég býst við hörkuleikjum. Það getur verið gríðarlega mikilvægt að hafa heimaleikjaréttinn þegar upp er staðið og það er mjög mikið atriði að byrja einvígið vel," segir Atli Hilmarsson í viðtali við Vikudag.
Eftir viðburðaríka deildarkeppni í handboltanum hefst nú úrslitakeppnin með allri sinni spennu og dramatík. Í fjögurra liða viðureignunum eigast annars vegar við Akureyri og HK og hins vegar FH og Fram. Fyrstu leikirnir eru klukkan 19:30 á fimmtudagskvöldið en þá mætast Akureyri og HK hér í Íþróttahöllinni en FH og Fram í Kaplakrika.
Liðin mætast síðan aftur á laugardaginn klukkan 16:00 en þá heldur Akureyrarliðið í Digranesið í Kópavogi. Tvo sigra þarf til að vinna þessi einvígi og ef liðin verða jöfn eftir leikina tvo þá verður lokaleikurinn í Íþróttahöllinni mánudaginn 18. apríl klukkan 19:30.
Akureyri og HK hafa mæst fjórum sinnum í vetur, Akureyri vann stóran sigur í fyrsta leiknum en hinir þrír voru vægast sagt háspennuleikir, Akureyri vann tvo þeirra með einu marki en þann síðasta með þremur mörkum eftir ótrúlega sveiflukenndan leik.
Það er því engin ástæða til annars en að reikna með spennandi leik þar sem ekkert verður gefið eftir. HK mun klárlega leggja allt í sölurnar til að sanna fyrir sjálfum sér og öðrum að þeir geti unnið Akureyri og á sama hátt er algjörlega ljóst að Akureyri má ekkert slaka á því HK er gríðarlegt stemmingslið sem á harma að hefna.
Þrír leikmenn HK hafa borið uppi sóknarleik og markaskorun HK liðsins í deildinni í vetur. Þar fer fremstur skyttan Ólafur Bjarki Ragnarsson með 147 mörk en Ólafur er án alls vafa einn albesti leikmaður N1 deildarinnar. Hornamaðurinn Bjarki Már Elísson er næstmarkahæstur með 137 og línumaðurinn, Akureyringurinn Atli Ævar Ingólfsson hefur skorað 116 mörk, meira en nokkur annar línumaður í deildinni.
Leikstjórnandinn Daníel Berg Grétarsson er stórhættulegur og gamla brýnið Vilhelm Gauti Bergsveinsson kann öll trixin í bókinni en þeir félagar skora jafnan slatta af mörkum.
Ólafur Bjarki, Atli Ævar, Bjarki Már og Daníel Berg
Þá hefur markvörðurinn Björn Ingi Friðþjófsson átt frábært tímabil og ljóst að HK er andstæðingur sem þarf að taka alvarlega.
Í síðustu umferð N1 deildarinnar lék HK við FH og máttu FH ingar teljast heppnir að taka bæði stigin í þeim leik en í þeim leik lenti HK nokkuð undir en eins og svo oft áður þá gáfust þeir aldrei upp og voru í raun óheppnir að fá ekki stig í leiknum. Í þeim leik var Daníel Berg markahæstur með 6 mörk en Ólafur Bjarki og Atli Ævar skoruðu 5 mörk hvor.
Þar á undan valtaði HK gjörsamlega yfir Fram liðið með níu marka mun, 26-35 (nákvæmlega sömu tölur og í leik Akureyrar og Fram) þar sem Fram átti aldrei möguleika. Í þeim leik átti Bjarki Már Elísson stórleik með 10 mörk og því næst komu þeir félagar Ólafur Bjarki og Atli Ævar með 8 og 7 mörk.
Bjarki Már var sömuleiðis markahæstur HK inga þegar Akureyri vann þá í Digranesi á dögunum í einhverjum sveiflukenndasta leik tímabilsins þar sem Akureyri leiddi með tíu mörkum í hálfleik en hafði að lokum þriggja marka sigur.
Þegar Akureyri og HK mættust í Höllinni í vetur var hreint út sagt mögnuð stemming og troðfullt hús.
Frá leik Akureyrar og HK í Höllinni í vetur
Nú ríður á að stuðningsmenn endurtaki leikinn og fylli Íþróttahöllina. Í gegnum tíðina höfum við einungis leikið einn heimaleik í úrslitakeppninni þannig ekki er að efa að margir stuðningsmenn bíða í ofvæni eftir að upplifa gamlar og notalegar minningar frá fyrri árum. Hinir sem yngri eru fá hinsvegar kærkomið tækifæri til að sannreyna allar sögusagnirnar um stemminguna sem fylgir úrslitakeppninni.
Stuðningsmannakortin og ársmiðar gilda ekki á þennan leik, fremur en aðra í úrslitakeppninni. Allir þurfa því að greiða aðgangseyri, fullorðnir greiða 1.000 krónur en fimmtán ára og yngri greiða 300 krónur. Stuðningsmannaherbergið verður þó að sjálfsögðu opið og þar verða kaffiveitingar í boði.
Úrvalsdeild karla
Senda skilaboð
Vefur KA
Vefur Þór
Fréttaleit
Ljósmyndir frá leiknum
Textalýsing frá leiknum
Tölfræði leiksins 
„Það er bara hálfleikur í einvíginu og næsti leikur er 0:0 frá fyrstu mínútu svo það má ekkert slaka á þrátt fyrir góðan sigur,“ sagði varnarjaxlinn Guðlaugur Arnarsson, leikmaður Akureyrar, eftir sigurinn á HK.
Atli Hilmarsson þjálfari Akureyrar var ánægður með sína menn eftir sigurleikinn gegn HK í Höllinni á Akureyri í kvöld í fyrsta leik liðanna í undanúrslitum N1-deildar karla í handbolta. Eftir að hafa verið undir nánast allan fyrri hálfleikinn komu norðanmenn sterkir inn í seinni hálfleikinn og unnu að lokum tveggja marka sigur, 26:24, og hafa 1:0 yfir rimmunni. 
Senda á Facebook