
Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Fyrri leiktímabil

Tímabilið 2012-13

Úrslit leikja

Deild karla

Ljósmyndir frá leiknum

Textalýsing frá leiknum

Tölfræði leiksins

		Akureyri - Valur 23-27 (12-14)
		N1 deild karla
		Íþróttahöllin
		Fim 8. nóvember 2012 klukkan: 19:00
		Dómarar: Gísli H. Jóhannsson og Hafsteinn Ingibergsson

Umfjöllun

Bergvin var valinn maður Akureyrarliðsins í kvöld

8. nóvember 2012 - Akureyri handboltafélag skrifar

Tap á lokamínútunum gegn Val

Valsmenn fóru heim með tvö stig í Íþróttahöllinni í dag eftir leik sem lengst af var verulega spennandi. Fyrir leikinn sýndu fjórar stúlkur frá POINT Dansstúdíói skemmtilegan dans sem var með ýmsar tilvísanir í handboltann og fá þær bestu þakkir fyrir skemmtilega sýningu.

Glæsileg sýning hjá stelpunum. Smelltu á myndina til að sjá fleiri myndir.

En það voru Valsmenn sem byrjuðu betur og skoruðu fyrstu fjögur mörk leiksins. Það var fyrst og fremst markvörður þeirra Hlynur Morthens sem átti heiðurinn af því en hann byrjaði með látum. Hlynur þurfti að yfirgefa völlinn eftir að hafa fengið þrumuskot frá Bjarna Fritzssyni í andlitið.

Það var Guðmundur Hólmar sem braut loks ísinn fyrir heimamenn en Valur hélt þó fjögurra marka forskoti 4 – 8. Þá kom góður kafli Akureyrarliðsins, vörnin vann boltann hvað eftir annað og í kjölfarið fylgdu fimm norðan-mörk í röð og Akureyri með forystu 9-8 í fyrsta sinn í leiknum. Valsarar lögðu þó ekki árar í bát og sigu framúr á ný og leiddu með tveim mörkum í hálfleik 12-14.

Akureyri byrjaði seinni hálfleikinn vel, Andri Snær jafnaði leikinn með tveim mörkum í röð og Bergvin bætti við því þriðja og Akureyri yfir á nýjan leik. Allt var þó í járnum og jafn á flestum tölum upp í 22-22 þegar tíu mínútur voru eftir af leiknum.

Þessar tíu mínútur gekk ekkert upp hjá Akureyrarliðinu sem skoraði aðeins eitt mark gegn fimm mörkum Valsmanna sem fögnuðu langþráðum sigri.

Eins og svo oft í vetur þá lá munurinn á liðunum fyrst og fremst í markvörslunni, Hlynur Morthens fór hamförum í Valsmarkinu með 24 skot varin og þar á meðal ófá úr dauðafærum. Ákafur varnarleikur Valsmanna virtist slá heimamenn dálítið út af laginu og var sóknarleikurinn oft á tíðum ansi hægur og jafnvel ráðvilltur á köflum. Þó verður það ekki af liðinu tekið að oft á tíðum fengust fín færi en þá var það fyrrnefndur Hlynur sem stóð í veginum.

Liðið saknaði greinilega Odds Gretarssonar, ekki síst sem leikstjórnanda auk þess sem Bjarni Fritzsson er greinilega ekki búinn að ná sér að fullu af sínum meiðslum. Það var þó ekki svo að ekki mætti sjá jákvæða hluti í leik liðsins. Bergvin Gíslason átti fína spretti og Guðmundur Hólmar og Geir Guðmundsson komu með nokkur glæsimörk sem gefa góð fyrirheit.

Bergvin Gíslason átti fínan leik.

Mörk Akureyrar: Bjarni Fritzsson 6 (2 úr vítum), Guðmundur Hólmar Helgason 5, Bergvin Gíslason 4, Geir Guðmundsson 4, Andri Snær Stefánsson 2, Friðrik Svavarsson og Valþór Guðrúnarson 1 mark hvor.
Í markinu varði Jovan Kukobat 10 skot og Stefán Guðnason 2, þar af 1 víti.

Hjá Val var Þorgrímur Ólafsson markahæstur með 8 mörk, Valdimar Fannar Þórsson 7 (1 víti), Finnur Ingi Stefánsson 4 (1 víti), Sveinn Aron Sveinsson og Vignir Stefánsson 3 mörk hvor, Atli Már Báruson og Hjálmar Arnarsson 1 mark hvor.
Í markinu varði Hlynur Morthens 24 skot eins og áður segir og Lárus Helgi Ólafsson 2 (þar af 1 víti).

Í leikslok voru Bergvin Gíslason og Hlynur Morthens valdir bestu menn sinna liða og fengu að launum glæsilega matarkörfu frá Norðlenska.

Sjá myndasyrpu frá danssýningunni

Sjá myndasyrpu frá leiknum.


Tengdar fréttir
Það er ljóst að Oddur er ekki með í hóp í dag		8. nóvember 2012 - Akureyri handboltafélag skrifar Leikur dagsins í beinni textalýsingu Þá er komið að heimaleik þar sem gestir okkar eru Valsmenn. Leikurinn hefst að vanda klukkan 19:00 í Íþróttahöllinni og nú reynir á okkar menn og stuðningsmenn að sýna sínar bestu hliðar til að ná fram hagstæðum úrslitum. Heimasíðan verður að venju með beina textalýsingu frá leiknum bæði er hægt að fylgjast með lýsingunni í sjálfstæðum glugga með ítarlegum upplýsingum um allan gang leiksins auk þess sem staðan og það allra nýjasta uppfærist á forsíðunni einnig og sama gildir um farsímavefinn okkar, þar uppfærist staðan einnig. Smelltu hér til að opna lýsingarsíðuna. Leikurinn hefst eins og áður segir klukkan 19:00 en fyrir leikinn er handhöfum Gullkorta boðið upp á heitan mat. Líkt og á undanförnum leikjum verður maturinn framreiddur í nýstækkaðri aðstöðu félagsins sem er við anddyri Hallarinnar (á vinstri hönd þegar gengið er inn). Maturinn verður framreiddur upp úr klukkan 18:00. Fyrir leik verður danssýning frá POINT Dansstúdíói þannig að það er um að gera að mæta nokkuð tímanlega til að fylgjast með sýningunni þeirra. Gaman fyrir börnin Á síðustu heimaleikju hefur verið opið sérstakt leiksvæði fyrir börn, í gamla stuðningsmannaherberginu. Þar eru sett upp nokkur lítil mörk og margir mjúkboltar þar sem krakkarnir geta leikið sér af hjartans list. Að sjálfsögðu er gæsla í herberginu en þessi nýbreytni hefur mælst ákaflega vel fyrir.


Alltaf líf og fjör í kringum heimaleikina		6. nóvember 2012 - Akureyri handboltafélag skrifar Danssýning fyrir leik Akureyrar og Vals Það verður ýmislegt til gamans gert í tengslum við leik Akureyrar og Vals á fimmtudaginn. Áður en leikurinn hefst verður danssýning frá POINT Dansstúdíó. POINT dansstúdíóið er með kennslu í Þrekhöllinni og eru nemendur á ýmsum aldri þannig að þetta verður örugglega mjög skemmtilegt. Einnig minnum við á leikherbergið fyrir krakka sem nýtur mikilla vinsælda. Það er í gamla stuðningsmannaherberginu en þar er komið fyrir litlum handboltamörkum og mjúkboltum þannig að þar er mikið líf og fjör. Að sjálfsögðu er gæslufólk sem fylgist með allt fari vel fram. Að vanda verður heitur matur í boðið fyrir handhafa Gullkortanna og ekki um annað að ræða en skella sér í Höllina og styðja við sína menn.

Í þessum leik verður ekkert gefið eftir

6. nóvember 2012 - Akureyri handboltafélag skrifar

Heimaleikur gegn Val á fimmtudaginn

Eftir býsna langt hlé er loksins komið að heimaleik Akureyrar Handboltafélags og að þessu sinni eru andstæðingarnir hinir fornu erkifjendur úr Val. Liðin hafa ávallt boðið upp á jafna og spennandi leiki og öruggt að þar verður engin breyting á að þessu sinni.

Akureyri freistar þess að komast á sigurbraut á ný eftir tvo tapleiki í röð og þrátt fyrir ýmiss skakkaföll í undanförnum leikjum er klárt að liðið mætir af fullum krafti til leiks.

Valsmenn hafa leikið vel í deildinni en úrslit leikja hafa ekki fallið með þeim en að loknum sex umferðum eru þeir með einn unninn leik og tvö jafntefli.

Nokkrar breytingar hafa orðið hjá Valsmönnum frá því í fyrravetur. Stærsta breytingin er líkast sú að nú er nýr þjálfari í brúnni, enginn annar en landsliðsþjálfari Austurríkis, Patrekur Jóhannesson. Patti er einn af helstu reynsluboltum íslensks handbolta og þarf væntanlega ekki að kynna frekar fyrir áhugamönnum um handboltann.

Valsmenn misstu nokkra leikmenn í sumar, þar á meðal Sturlu Ásgeirsson sem nú leikur með ÍR, Anton Rúnarsson og Orri Gíslason leika í Danaveldi í vetur. En Valsmenn fengu líka menn til baka eins og markvörðinn Lárus Helga Ólafsson og Þorgrím Ólafsson sem báðir komu úr Gróttu og Vigni Stefánsson úr ÍBV.

Þegar litið er yfir Valsliðið eru þar nokkrir gamalreyndir og frábærir leikmenn sem alltaf skila sínu. Galdramaðurinn Valdimar Fannar Þórsson er einn mikilvægasti leikmaður liðsins, skorar mikið og skapar mikið fyrir aðra leikmenn. Finnur Ingi Stefánsson er þeirra markahæstur með 26 mörk, Þorgrímur Ólafsson með 18 og Agnar Smári með 15.

Valdimar Fannar í kunnuglegri stöðu

Í hjarta Valsvarnarinnar eru síðan Gunnar Harðarson og hinn síungi Sigfús Sigurðsson.

Enn er þó ótalinn einhver mikilvægasti leikmaður Valsliðsins sem er markvörðurinn Hlynur Morthens. Hlynur hefur í gegnum tíðina verið besti leikmaður liðsins og þegar hann er í ham getur hann unnið leikina upp á eigin spýtur. Lárus Helgi hefur einnig komið sterkur til leiks í vetur þannig að markvarslan er einn af sterkustu þáttum Valsliðsins.

Það er mikið undir í þessum leik fyrir bæði lið og hægt að lofa því að það verður fjör í Höllinni. Við hvetjum stuðningsmenn til að fjölmenna í stúkuna og taka virkan þátt í baráttunni, það skiptir ótrúlega miklu máli fyrir leikmenn að finna kraftinn og stuðninginn frá áhorfendum.

Til baka Senda á Facebook

Umsjón og hönnun: Stefán Jóhannsson og Ágúst Stefánsson

Tap á lokamínútunum gegn Val

Leikur dagsins í beinni textalýsingu

Danssýning fyrir leik Akureyrar og Vals

Heimaleikur gegn Val á fimmtudaginn