Warning: Undefined array key "frettanr" in /web/akhandadmin/public_html/index.php on line 15 Jafntefli niðurstaðan hjá Val og Akureyri - Akureyri Handboltafélag
Að venju töku fjölmiðlamenn viðtöl við leikmenn og þjálfara liðanna eftir leik. Hér er samantekt nokkurra þeirra. Byrjum á viðtölum Eiríks Stefáns Ásgeirssonar blaðamanns visir.is:
Guðmundur Hólmar: Stórleikur Begga skilaði stigi
„Við vorum komnir marki undir og næstum búnir að lenda tveimur undir þegar stutt var eftir. Það er því auðveldara að sætta sig við eitt stig úr því sem komið var,“ sagði Akureyringurinn Guðmundur Hólmar Helgason eftir leikinn í kvöld.
Akureyri byrjaði síðari hálfleikinn vel en Valsmenn komu sér aftur inn í leikinn með mikilli baráttu.
„Við fengum tvær dýrar brottvísanir á okkur og Valsmenn náðu að minnka muninn í tvö mörk. Það var kannski helst til klaufalegt af okkur. Við áttum svo í erfiðleikum með að leysa þeirra sóknarleik. Það er nokkuð ljóst að ef Beggi [Bergvin Þór] hefði ekki átt stórleik þá hefðum við ekki fengið eitt stig.“
Akureyringar hafa misst nokkra menn í meiðsli í vetur og því hefur reynt á aðra að fylla í skarð þeirra. Hreinn Þór Hauksson spilaði í horninu, Heimir Örn Árnason þjálfari á línunni og aðrir sóknarmenn voru duglegir að skipta með sér leikstöðum.
Hreinn og Guðmundur búnir að stöðva serbnesku skyttu Valsmanna. Mynd: Daníel/visir.is
„Við erum að gera það sem við getum með okkar mannskap. Menn eru að leggja sig alla fram og það hefur verið að koma vel út - Hreinsi er til dæmis frábær í horninu.“
Það ríkti mikil og góð stemning á varamannabekk Akureyrar í leiknum og Guðmundur segir að það hafi haft jákvæð áhrif.
„Við réðum sérstakan mann í það. Jón Heiðar, sem var farinn suður í skólann, var fenginn aftur til að halda uppi ákveðinni stemningu á bekknum. Það er allt annað, enda gefur það mikið fyrir liðið að hafa tryllta menn á bekknum - sama hvernig gengur. Menn eru í þessu til að hafa gaman.“
Guðmundur segir markmiðið einfalt - að komast í úrslitakeppnina. „Skakkaföllinn breyta engu um það. Við ætlum okkur í úrslitakeppnina og víkjum ekkert frá því.“
Patrekur: Þurfum að fá menn úr skelinni
Patrekur Jóhannesson, þjálfari Vals, segir að leikmenn sínir þurfi að stíga upp í næstu leikjum og sýna hvað í þeim búi.
„Það eru erfiðleikar hjá okkur og hafa verið í allan vetur. Nú erum við komnir með breiðari hóp sem er hið besta mál,“ sagði Patrekur eftir leikinn í kvöld.
„Nú þurfa menn aðeins að koma úr skelinni og leyfa sér að líða vel inn á vellinum. Þetta var pínulítið þrúgandi framan af.“
Eftir slæma byrjun í seinni hálfleik náðu Valsmenn að koma til baka og hleypa mikilli spennu í lokamínúturnar.
„Eftir að við skiptum yfir í framliggjandi vörn breyttist þetta aðeins. Við hefðum getað tekið tvö stig en líka tapað þeim báðum.“
Sóknarleikur Vals var oft á tíðum ágætur en inn á milli bar á agaleysi og ótímabærum skotum. „Við erum með ákveðið grunnskipulag í gangi en hlutirnir vilja vera oft aðeins þyngri þegar menn eru þarna niðri. Viljinn er þó góður og við unnum vel alla vikuna fyrir þennan leik. Við vissum alveg hvað við ætluðum að gera en náðum bara að sýna það á köflum. En eitt stig er ágætt úr því sem komið var.
Ástandið hjá okkur erfitt og ég vil að menn taki því og noti næstu leiki til að stíga fram og kalla fram ákveðna geðveiki í sinum leik,“ sagði Patrekur.
Árni Freyr Helgason á handbolti.org ræddi við Heimi Örn og Orra Frey, leikmann Vals
Heimir Örn: Töpuð stig sem gætu reynst dýrkeypt
Heimir Örn Árnason, leikmaður og annar þjálfara liðs Akureyrar í úrvalsdeild karla, var léttur í skapi að loknum leik síns liðs við Val sem fram fór á Hlíðarenda í kvöld, en liðin skildu jöfn 24-24. Aðspurður hvort að jafntefli í leiknum hefði verið sanngjörn niðurstaða svaraði Heimir: „Svona já og nei, við vorum komnir einhverjum fjórum-fimm mörkum yfir en þá skiptu þeir yfir í aðra vörn og eftir það áttum við í smá basli. Þeir komust síðan yfir í lokin en mér fannst við samt hafa átt að taka þetta.“
Bergvin Þór Gíslason átti stórleik fyrir Akureyri í kvöld og var langatkvæðamestur með 10 mörk. Heimir Örn var að vonum sáttur með frammistöðu skyttunnar ungu, og taldi hann hafa verið það besta við leik Akureyrar í kvöld.
„Ég var langánægðastur með Bergvin Þór. Hann leiddi liðið okkar áfram í sóknarleiknum og var sjóðandi heitur.“
En hvað skyldi hafa gert það að verkum að Akureyringar náðu ekki að landa sigri?
„Það voru fráköst. Ég held að það hafi verið einhver sex fráköst í seinni hálfleik sem að við misstum frá okkur. Þar af komu tvö eftir víti og önnur eftir hornaskot. Og þetta voru fráköst sem að kostuðu okkur mörk, fimm sinnum eða jafnvel oftar. Það var mjög sorglegt.“
Akureyringar sitja eftir leiki kvöldsins í 6. sæti deildarinnar með 12 stig, jafnmörg stig og HK sem vann góðan sigur á HK í kvöld. Heimir Örn telur að töpuð stig í leikjum gegn botnliðunum geti og muni mögulega kosta Akureyringa sæti í úrslitakeppninni í vor, en fyrr í vetur töpuðu norðanmenn meðal annars á móti bæði Val og Aftureldingu á heimavelli.
„Það er ekki spurning. Við höfum tapað sjö stigum á móti Aftureldingu og Val og það er okkur mjög dýrkeypt. Ég skil ekki alveg af hverju við spilum verr á móti þeim, þó að þeir séu reyndar með hörkulið í dag. Reyndin var sú að þetta var gott útistig í dag á móti sterku Valsliði en þetta er sárt, og þá sérstaklega fyrir áramót.“
En hvað skyldi Heimi hafa fundist um sína eigin frammistöðu í leiknum?
„Ég var bara ágætur í vörninni, held ég. Náði að verja nokkra bolta og eitthvað. Bara ágætur á línunni, ég gerði nú ekki mikið – einhverjar tvær stoðsendingar og eitt mark. Það var fínt, held ég,“ sagði Heimir, léttur í bragði.
Heimir tekinn kverkataki í fyrri leik liðanna í vetur
En hvað skyldi vera framundan hjá Akureyringum á næstunni?
„Við þurfum aldeilis að berja okkur saman eftir mikil meiðsli, en það eina sem ég vil almennilega bæta er þessi heimavöllur okkar. Þetta er bara skammarlegt, og það er ekkert grín að labba um bæinn á Akureyri. Það er bara vandræðalegt hvað við erum lélegir á heimavelli,“ sagði Heimir Örn að lokum.
Orri Freyr: Við vorum ömurlegir í þessum leik
Orri Freyr Gíslason, línumaðurinn knái í liði Vals, var svekktur að loknum leik Vals og Akureyrar sem fram fór að Hlíðarenda í kvöld. Orri var á báðum áttum með það hvort að jafntefli hefðu verið sanngjörn úrslit, en var þó fyrst og fremst afar ósáttur með frammistöðu sinna manna.
„Í fyrsta lagi þá vorum við ömurlegir í þessum leik, en við komum samt til baka sem er mjög jákvætt. Þegar við erum komnir tveimur mörkum yfir í lokin þá eigum við að klára þetta, eins og í síðasta leik.“
En hvað skyldi hafa verið að klikka hjá Valsmönnum?
„Við erum engan veginn í takt í sókninni, erum bara illa lélegir þar. Varnarleikurinn er allt í lagi á köflum en við þurfum bara einfaldlega að fara að stíga upp. Það er bara eitthvað að hrjá okkur og við þurfum að ræða það, og þá munum við laga þetta.“
Valsmenn hafa ekki unnið í síðustu sjö deildarleikjum og hafa einungis hirt tvö stig úr þeim leikjum. En er kominn skjálfti í lið Vals?
„Nei, langt frá því. Við bara höldum okkar striki. Það eru sjö leikir eftir núna, fjórtán stig í pottinum og markmiðið er bara að ná í þau. Hjá okkur er enginn skjálfti, það er ekki til hérna á Hlíðarenda. Það er bara þannig.“
Orri Freyr, sem spilaði með Viborg í Danmörku fyrir áramót, var nokkuð sáttur með frammistöðu sína í leiknum.
„Ég byrjaði leikinn vel, var hins vegar lélegur í seinni hálfleik en ég reif mig upp varnarlega þannig að ég er ágætlega sáttur. Maður þarf hins vegar að spila vel í 60 mínútur.“
Orri Freyr (nr 8) í vörninni gegn Geir Guðmundssyni. Mynd: Daníel/visir.is
En hvernig skyldi Orra Frey lítast á framhaldið hjá Val?
„Mér líst bara mjög vel á. Við erum að spila flott á æfingum, þótt það sjáist kannski ekki í leikjunum. Við þurfum bara að fá það fram í leikjum. Við erum með lið í þetta. Það er eitthvað pikkelsi í gangi, en við þurfum bara að finna út úr því og það er bara gaman.“
Vídeóviðtöl
Við endum þessa viðtalasyrpu með nokkurm vídeóviðtölum af sport.is og mbl.is
Bjarni Fritzson: Við hefðum átt að taka þetta
Patrekur Jóhannesson: Verðum að finna gleði og öryggi inná vellinum
Bergvin Gíslason: Við vorum með leikinn í höndunum Bergvin Þór Gíslason átti stórleik með Akureyringum í kvöld þegar þeir gerðu jafntefli við Valsmenn, 24:24, í N1-deildinni í handknattleik að Hlíðarenda.
„Ég er ekki sáttur. Úr því sem komið var áttum við að vinna. Við vorum með leikinn í höndunum en Valdimar náði að jafna metin fyrir Val með góðu marki,“ sagði Bergvin við mbl.is en hann skoraði 10 mörk í leiknum og réðu Valsmenn ekkert við hann.
Patrekur: Þurfum að hugsa um okkur sjálfa Lærisveinar Patreks Jóhannessonar náðu að innbyrða mikilvægt stig í botnbaráttu N1-deildarinnar í handknattleik í kvöld en Valur og Akureyri skildu jöfn, 24:24, að Hlíðarenda.
„Þetta er fjórða jafnteflið hjá okkur á heimavelli í vetur. Þetta hefði alveg geta farið svo að við fengjum ekki neitt út úr leiknum og við hefðum líka geta farið með sigur af hólmi. En við fengum eitt stig og maður verður bara að vera sáttur við það enda langt síðan við fengum stig,“ sagði Patrekur við mbl.is en nánar er rætt við hann í myndbandinu.
Bergvin er klár í slaginn gegn Val
7. febrúar 2013 - Akureyri handboltafélag skrifar
Leikur dagsins: Valur – Akureyri í beinni textalýsingu
Eftir langt hlé í N1 deildinni er stutt á milli leikja núna því í dag mætast Valur og Akureyri í Vodafonehöllinni. Leikurinn skiptir gríðarlega miklu máli fyrir bæði liðin. Akureyri þarf á sigri að halda til að eiga möguleika á að komast í 3. eða 4. sæti deildarinnar en þá þarf líka að treysta á að Fram og ÍR vinni ekki bæði sína leiki.
Akureyrarliðið vill klárlega hefna fyrir tapið gegn Val hér í Höllinni en sá leikur var hörkuspennandi allt þar til í lokin að Valsmönnum gekk allt í haginn og innbyrtu fjögurra marka sigur, 23 - 27. Það er því ástæða til að hvetja alla stuðningsmenn Akureyrar sem eiga þess kost að mæta á leikinn og berjast fyrir sigri.
Valsmenn leggja líka örugglega allt í sölurnar til að reyna að komast úr botnsæti deildarinnar enda hafa þeir styrkt lið sitt verulega á síðustu vikum.
Leikurinn hefst klukkan 18:00 og verður okkar maður á staðnum með beina texalýsingu sem opnast hér á síðunni þegar líður á daginn.
Úrvalsdeild karla
Senda skilaboð
Vefur KA
Vefur Þór
Fréttaleit
Ljósmyndir frá leiknum
Textalýsing frá leiknum
Tölfræði leiksins 
Senda á Facebook