Dómarar: Magnús Kári Jónsson og Ómar Ingi Sverrisson
Umfjöllun
Tengdar fréttir
Heimir skiljanlega ósáttur með gang mála
19. október 2014 - Akureyri handboltafélag skrifar
Viðtöl eftir leik Akureyrar og FH
Leikur Akureyrar og FH varð svo sannarlega ekki sú skemmtun sem menn höfðu vonast eftir, eiginlega algjör bömmer fyrir alla fylgjendur Akureyrarliðisins á meðan FH-ingar gátu verið kampakátir. Þetta kemur vel fram í þeim viðtölum sem tekin voru við þjálfara og leikmenn strax eftir leikinn. Byrjum á viðtölum Einars Sigtryggssonar við Heimi Örn Árnason þjálfara Akureyrar og Daníel Matthíasson leikmann FH.
Heimir Örn: Bara orðlaus
„Hvað get ég sagt? Ég er bara orðlaus. Það er skandall hjá okkur að bjóða upp á svona leiki. FH liðið er gott en við bara gátum ekki neitt. Sissi (Sigþór Árni Heimisson) náði sér ekki á strik í kvöld og þá erum við bara í vandræðum í sókninni. Það hlaut að koma að því. Hann getur ekki átt stórleik í hverjum leik. Við erum allt of tens hérna á heimavelli og erum ekki að sýna okkar réttu hliðar.“ Svo mörg voru þau orð en þótt Sigþór hafi ekki átt sinn besta dag þá voru aðrir útispilarar eins og ferðamenn að bíða eftir að sjá norðurljósin, algjörir farþegar.
Heimir og Sigurpáll Árni reyna að átta sig á hlutunum
Daníel: Pekingvörnin er orðin dálítið gömul
Daníel Matthíasson er tvítugur Akureyringur sem er nýr í herbúðum FH. Hann fékk samning við Fimleikapilta þegar hann hélt suður í háskólanám. Leiddist honum ekki í kvöld þegar FH rúllaði yfir lið Akureyringa í Olísdeild karla. Daníel er línumaður og hafði hann í nógu að snúast í leiknum.
„Við erum tveir að skipta línustöðunni á milli okkar. Mér gekk vel í kvöld og fékk því meiri spiltíma en vanalega. Það var gaman að koma á gamla heimavöllinn og mér var vel tekið af áhorfendum. Ég þekki liðsmenn Akureyrar vel en það var sérdeilis gaman að glíma við Sverre og Ingimund í þessum leik. Þeir eru reyndar orðnir aðeins eldri en á blómaskeiði Pekingvarnarinnar. Hún er satt að segja orðin dálítið gömul og menn eru komnir með lausnir gegn henni,“ sagði hinn kornungi Daníel hvergi banginn að skjóta á gömlu landsliðshetjurnar.
Daníel næstum sloppinn í gegnum Akureyrarvörnina
Birgir H. Stefánsson hjá visir.is ræddi einnig við Heimi Örn svo og Halldór Jóhann Sigfússon þjálfara FH og Ísak Rafnsson leikmann FH.
Heimir Örn: Gæti þurft að kalla á sálfræðing
„Menn virðast bara yfirspenntir á heimavelli,“ sagði Heimir Örn Árnason þjálfari Akureyrar allt annað en sáttur eftir leik. „Þetta gerðist aðeins líka á síðasta tímabili og þetta er eitthvað sem menn verða að vinna í, ég gæti þurft að kalla á sálfræðing. Við erum ekki sama lið á útivelli og heimavelli.“
Fjöldi sóknarmistaka hjá þínum mönnum fór langt með að klára leikinn „Ég veit ekki hvað við köstuðum oft í hendurnar á þeim, útaf og ég veit ekki hvað og hvað. Þetta á bara ekki að sjást í handboltaleik í október. Þetta væri hugsanlega í lagi á Opna Norðlenska í upphafi ágúst en þetta er ekki boðlegt.
Það er að koma einhverjum á óvart að Bergvin sé mættur aftur í liðið hjá Akureyri, er verið að taka áhættu með hann? „Nei, alls ekki. Hann er alveg heill en hann er bara ekki kominn með sinn kraft í öxlina eins og sást í dag. En hann skilaði samt sínu, átti stoðsendingar og mörk.“
Hvað með reynsluboltana í sóknarleik Akureyrar sem skila núll mörkum í dag? „Elli var frábær í síðasta leik, okkar besti maður en hann náði sér ekki á strik í dag. Svona er boltinn, stundum nær maður takti og stundum ekki en það voru svo margir aðrir sem voru lélegir. Maður var að bíða eftir því að einhver af þeim sem voru að koma inn færi að stíga upp en það voru bara eiginlega allir jafn lélegir.“
Halldór Jóhann: Þetta var sterkur sigur
„Það verður mjög skemmtilegt í rútunni á leiðinni heim,“ sagði Halldór Jóhann Sigfússon strax eftir leik.
„Ég er gríðarlega ánægður með varnarleikinn og sérstaklega í fyrri hálfleik þar sem við erum að spila frábæra vörn og fá aðeins átta mörk á okkur. Í heildina er það frábært að fá bara á sig tuttugu en það kom samt smá kafli í seinni hálfleik þar sem við gáfum aðeins eftir og það má bara ekki. Lið Akureyrar er frábært og þar eru reynslumenn sem vita að svona mun er hægt að vinna upp á stuttum tíma þannig að það var svolítið okkar hlutverk að halda mönnum á tánum og halda leikskipulaginu.“
Þið í raun og veru farið langt með að klára leikinn í fyrri hálfleik. „Já, við eigum góðan kafla þar og þá kemur hik á lið Akureyrar. Við setjum pressu á þá og þeir fara að tapa fullt af boltum en við erum samt líka klaufar varðandi fráköst og fleira, það eru ákveðnir þættir sem vantar að falla með okkur og þá jafnvel útaf reynsluleysi en það kemur vonandi með tímanum. Ég er í heildina mjög stoltur af strákunum í dag og þetta var sterkur sigur.“
Eitthvað er Halldór Jóhann ekki alveg sáttur á þessari stundu
Ísak Rafnsson: Skemmtileg rútuferð heim framundan
„Við spilum fyrst og fremst frábærlega sem lið,“ sagði Ísak Rafnsson eftir leik eftir að hafa tekið við verðlaunum sem maður leiksins. Ísak var með 100% skotnýtingu þangað til að hann tók síðasta skot leiksins rétt áður en leiktíminn rann út en þann bolta varði Tomas Olason. „Þetta skot þarna undir restina var bara af því að ég leit á klukkuna og sá hvað tíminn væri, ég var meira bara að klára leikinn.“
Þú fékkst pláss til að leika þér með í dag fyrir utan „Já, þeir gáfu mér tækifæri á því að skjóta. Þeir gáfu mér í raun skotleyfi og ég tek því frá hverjum sem er og skora bara.“
Þetta er frábær frammistaða hjá ykkur að landa svona öruggum sigri fyrir norðan, „Já algjörlega, það er alltaf gaman að vinna hér fyrir norðan. Frábær stemming í húsinu, geggjaðir áhorfendur og við fórum þetta langt á liðsheildinni í dag. Frábær vörn, agaður og góður sóknarleikur og það er aukalega gaman að taka tvö stigin hér því þá er skemmtileg rútuferð heim framundan.“
Ísak Rafnsson var valinn maður FH liðsins í leiknum
Á sport.is eru viðtöl Siguróla Magna Sigurðssonar við þjálfarana Heimi Örn og Halldór Jóhann
Heimir Örn: Niðurlæging á heimavelli
Heimir Örn Árnason, þjálfari Akureyringa, var allt annað en sáttur eftir stórt tap á heimavelli gegn FH í kvöld.
Halldór Jóhann: Vissum að þeir væru sterkir inn á miðjuna
Halldór Jóhann Sigfússon, þjálfari FH, var að vonum sáttur með að sækja tvö stig norður í land í sinn gamla heimabæ. Hann ræddi við sportvarpið eftir leik.
Kynningarefni frá HSÍ
16. október 2014 - Akureyri handboltafélag skrifar
Leikur dagsins: Akureyri - FH í Höllinni
Það er nóg að gera í boltanum í dag, fjórir leikir í Olís deildinni og viðbúið að spennustigið verði hátt í mörgum þeirra.
Leikir umferðarinnar eru sem hér segir: Akureyri – FH fimmtudaginn 16. október kl. 19:00 Íþróttahöllin á Akureyri HK - ÍR fimmtudaginn 16. október kl. 19:30 Digranesi Stjarnan - Fram fimmtudaginn 16. október kl. 19:30 TM-höllin Afturelding - Haukar fimmtudaginn 16. október kl. 19:30 N1-höllin Valur – ÍBV laugardaginn 18. október kl. 16:00 Vodafone-höllin
Eins og staðan er í augnablikinu verður ekki textalýsing frá leiknum á vegum heimasíðunnar en við munum í staðinn vísa á aðrar lýsingar frá leiknum þegar þar að kemur.
Ási í leik með Akureyri 9. febrúar 2008
13. október 2014 - Akureyri handboltafélag skrifar
FH - mótherji Akureyrar á fimmtudaginn
Það er heldur betur mikilvægur leikur á fimmtudaginn þegar Akureyri mætir FH í Íþróttahöllinni. Leikir liðanna hafa svo sannarlega verið dramatískir og skemmtilegir þannig að þetta er klárlega leikur sem enginn má missa af.
Undanfarin ár hefur FH liðið verið í toppbaráttu íslenska handboltans enda hefðin og kröfurnar miklar frá fornu fari. FH hefur leikið í úrvalsdeild síðastliðin sex ár, vorin 2009 og 2010 endaði FH í 5. sæti deildarinnar, en næstu þrjú ár, 2011-2013 í 2. sæti en síðasta vor hafnaði FH í fjórða sætið eftir mikla baráttu, einkum við Fram og ÍR um það sæti. Vorið 2011 varð FH Íslandsmeistari eftir spennandi einvígi við Akureyri.
Nokkrar breytingar urðu hjá FH-ingum fyrir þetta tímabil. Einar Andri Einarsson þjálfari til margra ára fór og þjálfar nú topplið Aftureldingar. Í hans stað er kominn á hliðarlínuna Akureyringurinn Halldór Jóhann Sigfússon sem varð Íslandsmeistari með KA 1997 og 2002 en hélt síðan til Þýskalands. Við heimkomuna gekk Halldór til liðs við Fram en lagði keppnisskóna á hilluna vorið 2012. Halldór sagði þó ekki skilið við handboltann og tók við þjálfun meistaraflokks kvenna hjá Fram. Framstúlkur urðu Íslandsmeistarar vorið 2013 undir stjórn Halldórs og hann þjálfaði Framliðið einnig síðasta tímabil.
Halldór Jóhann ræðir við sína menn í hálfleik
Nokkrir leikmenn fóru frá FH í lok síðasta tímabils. Markvörðurinn Daníel Freyr Andrésson, sem var kominn í landsliðshópinn fór til Danmerkur, hornamaðurinn Einar Rafn Eiðsson til Noregs og sömuleiðis Halldór Guðjónsson. Þá eru línumennirnir Atli Rúnar Steinþórsson og Sigurður Ágústsson hættir svo og galdramaðurinn Valdimar Fannar Þórsson. Raunar gengur nú orðrómur um að Valdimar Fannar hafi sést á æfingum hjá Fram síðustu daga en allavega er hann ekki lengur í herbúðum FH.
FH hefur fengið í þeirra stað unglingalandsliðsmarkvörðinn Brynjar Darra Baldursson frá Stjörnunni. Frá Akureyri fengu FH ingar Daníel Matthíasson sem er ungur og gríðarlega hraustur línumaður.
Daníel (nr 3) tók fullan þátt í baráttu Akureyrar gegn FH í Höllinni í fyrra
Frá Selfossi fengu FH ingar hægri hornamanninn Andra Hrafn Hallsson auk þess sem nokkrir leikmenn færðu sig frá 1. deildarliði ÍH yfir til FH.
Burðarásar FH liðsins eru svo reynslumiklir kappar, þar nefnum við fyrstan leikstjórnandann Ásbjörn Friðriksson, fyrrum leikmann Akureyrar en Ási hefur verið einn almikilvægasti leikmaður FH liðsins undanfarin ár.
Ásbjörn í leik FH og Aftureldingar
Sömu sögu má segja af skyttunum Ragnari Jóhannssyni og Magnúsi Óla Magnússyni auk þess sem Ísak Rafnsson hefur komið sterkur inn í skyttuhlutverkið.
Magnús Óli skorar í leik FH og Aftureldingar. Myndir: Björgvin Franz fimmeinn.is
Markahæstu leikmenn FH það sem af er Olís deildinni eru: Ragnar Jóhannsson með 33 mörk, Ásbjörn Friðriksson með 29, Magnús Óli Magnússon 24 og hinn eldfljóti hornamaður Benedikt Reynir Kristinsson með 23 mörk.
Markverðir FH eru báðir ungir en gríðarlega flottir, Ágúst Elí Björgvinsson fékk heldur betur eldskírn í deildinni í fyrravetur þegar Daníel, aðalmarkvörður liðsins meiddist og leysti Ágúst markvarðarstöðuna stóran hluta mótsins, og fram í úrslitakeppnina.
FH og Akureyri mættust tvisvar í Höllinni í fyrravetur, fyrst í bikarkeppninni í sannkölluðum háspennuleik sem fór í framlengingu og þá hafði FH betur 30-32. Þrem dögum seinna mættust liðin aftur í Höllinni, sá leikur var í Olís deildinni og þá fór Akureyri með eins marks sigur 24-23 með marki sjö sekúndum fyrir leikslok.
Akureyri var í mikilli baráttu í fyrravor um að sleppa við umspil um að halda sæti í deildinni en FH á sama tíma í baráttu um að komast í fjögurra liða úrslitin. Liðin mættust í Hafnarfirði í þriðju síðustu umferð deildarinnar og þar vann Akureyri gríðarlega mikilvægan sigur 26-28 og tvö stig sem heldur betur komu sér vel í lok deildarinnar.
Það er því óhætt að gera ráð fyrir frábærri skemmtun í Höllinni klukkan 19:00 á fimmtudaginn.
Úrvalsdeild karla
Senda skilaboð
Vefur KA
Vefur Þór
Fréttaleit
Ljósmyndir frá leiknum
Tölfræði leiksins 
Heimir og Sigurpáll Árni reyna að átta sig á hlutunum
Daníel næstum sloppinn í gegnum Akureyrarvörnina
Eitthvað er Halldór Jóhann ekki alveg sáttur á þessari stundu
Ísak Rafnsson var valinn maður FH liðsins í leiknum
Senda á Facebook