Naumt tap eftir hörkuleik við topplið Vals - Akureyri Handboltafélag

Warning: Undefined array key "frettanr" in /web/akhandadmin/public_html/index.php on line 15
Naumt tap eftir hörkuleik við topplið Vals - Akureyri Handboltafélag


Fréttir - Leikir tímabilsins - Leikmenn - Stjórn - Saga og tölfræði - Höllin - Lagið - Myndir - Myndbönd - Tenglar
- Úrvalsdeild karla - Senda skilaboð - Vefur KA - Vefur Þór - Fréttaleit

Fyrri leiktímabil

Tímabilið 2015-16

Leikmenn meistarafl. karla

Myndband frá leiknum

Tölfræði leiksins

		Valur - Akureyri 26-23 (11-12)
		Olís deild karla
		Vodafone höllin
		Lau. 31. okt. 2015 klukkan: 16:00
		Dómarar: Arnar Sigurjónsson og Svavar Ólafur Pétursson

Umfjöllun


Strákarnir áttu skilið eitthvað úr leiknum en fengu ekkert		1. nóvember 2015 - Akureyri handboltafélag skrifar Naumt tap eftir hörkuleik við topplið Vals Akureyri sótti topplið Vals heim í Olís deildinni, bæði lið höfðu verið að leika vel að undanförnu en Valsarar á toppnum og þóttu líklegri aðilinn. Ólafur Stefánsson dró fram skóna og lék með Val í leiknum en hann hafði ekki leikið með Val síðan árið 1996. Hér má sjá svipmyndir úr leiknum sem teknar eru af RÚV. Ólafur Stefánsson sýndi strax í upphafi að hann hefur engu gleymt og skoraði fyrsta mark leiksins, en Akureyri svaraði með tveimur mörkum og hélt eftir það forystunni út fyrri hálfleikinn. Þegar flautað var til hálfleiks var staðan 12-11 fyrir Akureyri og liðið hafði verið að leika fínan leik. Síðari hálfleikurinn hófst alveg eins og sá fyrri, jafnt á nánast öllum tölum og erfitt að sjá hjá hvoru liðinu sigurinn myndi falla. Hinsvegar í stöðunni 20-20 og 10 mínútur eftir þá kom slakur kafli þar sem Valsmenn skoruðu þrjú næstu mörkin og kláruðu í raun leikinn. Akureyri fékk alls þrjár brottvísanir á lokakaflanum og það er einfaldlega of mikið gegn eins sterku liði og Valur hefur á að skipa. Lokatölur 26-23 og mjög svekkjandi að fá ekkert útúr leiknum en engu að síður margt jákvætt við leik okkar liðs. Hreiðar Levý Guðmundsson varði 17 skot í leiknum, þar af 2 víti, og var mjög góður fyrir aftan virkilega öfluga vörn okkar liðs. Sóknarleikurinn var sveiflukenndur en stóð fyrir sínu mestan part leiksins. Menn skiptu svolítið með sér að taka af skarið og leiða sóknarleikinn en liðið var hinsvegar með alltof mikið af töpuðum boltum sem skiluðu sér í þó nokkrum hraðaupphlaupum í bakið. Nú tekur við smá pása fram að næsta leik og vonandi að menn haldi áfram þeirri vinnu sem liðið hefur í að undanförnu. Það er allt annað að sjá til liðsins núna heldur en í fyrstu leikjum vetrarins og ljóst að með þessu áframhaldi er bara tímaspursmál hvenær liðið fer að klífa töfluna.


Tengdar fréttir
Beggi, Hörður og Hreiðar í viðtölum		2. nóvember 2015 - Akureyri handboltafélag skrifar Viðtöl eftir leik Vals og Akureyrar Þátttaka Ólafs Stefánssonar í leik Vals og Akureyrar hefur greinilega vakið verulega athygli fjölmiðla. Það sést best á því að óvenju mörg viðtöl eru við leikmenn og þjálfara liðanna eftir leik. Við kíkjum á það sem við höfum fundið. Byrjum á viðtölum Ívars Benediktssonar á mbl en viðtölin eru jafnframt á vídeóformi: Bergvin Gíslason: Ég er mjög svekktur „Við vorum þrisvar sinnum manni færri á lokakaflanum. Valsmenn eru það klókir að þeir nýta sér það,“ sagði Bergvin Þór Gíslason, leikmaður Akureyrar eftir tap liðsins fyrir Val, 26:23, í Olís-deild karla í Vodafonehöllinni í kvöld. „Ég er mjög svekktur og félagar mínir líka að hafa ekki fengið eitthvað út úr þessu leik,“ sagði Bergvin Þór. En nánar er rætt við Bergvin Þór á meðfylgjandi myndskeiði. Hlynur Morthens: Þetta er lélegt hjá okkur „Þetta var mesta basl hjá okkur. Við vorum í mestu erfiðleikum með Akureyringar svo að segja allan leikinn,“ sagði Hlynur Morthens, markvörður, sem var jafnbesti leikmaður Valsliðsins í sigrinum á Akureyri, 26:23, í Olís-deild karla í handknattleik í Vodafonehöllinni í kvöld. „Það er leiðinlegt að segja það en við höfum alls ekki leikið vel í síðustu leikjum en okkur hefur tekist að vinna. Ég vil sjá okkur leika mikið betur á næstunni. Við erum með mannskap til þess að leika betur. Þótt við séu að vinna leiki. Þá er þetta lélegt hjá okkur,“ sagði Hlynur ómyrkur máli. Hann þakkar fyrir að nú komi tveggja vikna hlé frá keppni. Hlynur sagði eina jákvæða við leikinn hafi verið að sjá Ólaf Stefánsson leik handbolta á nýjan leik. Ólafur Stefánsson: Þetta var bara gaman „Óskar þjálfari hringdi í mig og spurði hvort ég vildi vera með. Síðan hef ég eflaust eitthvað samviskubit eftir að ég yfirgaf klúbbinn minn í fyrra,“ sagði Ólafur Stefánsson eftir að hann lék sinn fyrsta leik fyrir meistaraflokk Vals í 19 ár í dag gegn Akureyri í Olís-deild karla í handknattleik. Ólafur dró fram keppnisskóna á nýjan leik og lék með nær frá upphafi til enda í 26:23 sigri Valsliðsins. „Strákarnir áttu það inni hjá mér að ég hjálpaði þeim. Aðalatriðið var samt að vinna. Ég var ekki viss um það fyrir leikinn að ég gæti hjálpað þeim. Það stóð helst í mér,“ sagði Ólafur sem lagði skóna á hilluna vorið 2013 en tók þá fram snemma á þessu ári og lék með KIF Kolding tvo leiki í Meistaradeild Evrópu. „Ég var svo allt í lagi þegar á hólminn var komið,“ sagði Ólafur sem heldur þeim möguleika opnum að leika fleiri leiki með Valsliðinu ef þörf verður á en Geir Guðmundsson er meiddur og eins hin örvhenta skytta Valsliðsins, Ómar Ingi Magnússon. Hann gæti orðið frá keppni í tvo til þrjá mánuði. „Ég hef aðeins verið að æfa með strákunum upp á síðkastið vegna meiðsla í hópnum,“ sagði Ólafur og ekki var annað sjá en hann hafi haft gaman af því að leik. „Þetta var bara gaman,“ sagði Ólafur. Blaðamaður Vísir.is, Kristinn Páll Teitsson ræddi við Hreiðar Levý Guðmundsson, markvörð Akureyrar, svo og Valsmennina Guðmund Hólmar Helgason og Ólaf Stefánsson: Hreiðar Levý: Ólafur er ennþá með hæfileikana „Það er mjög súrt að tapa en það er margt sem við getum tekið jákvætt úr þessu. Við vorum inn í leiknum allan tímann en það vantaði bara herslumuninn,“ sagði Hreiðar Levý Guðmundsson, markvörður Akureyrar, svekktur eftir leikinn. „Það vantar eitthvað örlítið upp á að við vinnum þennan leik. Við höfum verið að stíga upp undanfarnar vikur og þetta lið er á góðri leið. Við sýndum það að við getum keppt við öll liðin í þessari deild.“ Liðin skiptust á mörkum fyrstu fimmtíu mínútur leiksins en Valsmenn reyndust of sterkir á lokakaflanum. „Það var jafnt eftir fimmtíu mínútur en þá tekur Óli yfir leikinn og klárar hann. Við vorum óskynsamir gegn hörkuliði sem hefur trú á því að þeir muni klára svona leiki.“ Hreiðar mætti í dag Ólafi Stefánssyni en þeir voru saman í íslenska landsliðinu um árabil. „Það var gaman, það er alltaf gaman að sjá hann inn á handboltavellinum og hann er ennþá alveg með þetta. Hann er mjúkur og flottur, kann þetta og þetta gleymist ekki. Honum nægir að mæta bara í leikina virðist vera,“ sagði Hreiðar og bætti við: „Við könnumst vel við hann en það ekki auðvelt að stöðva hann og hefur aldrei verið, sama með hvaða liði hann spilar. Við höfum horft á hann en hann er einfaldlega svo flinkur handboltamaður.“ Guðmundur: Stoltur af því að fá að spila með einum af bestu handboltamönnum sögunnar „Ég veit ekki hvað ég á að segja um þennan leik, við vorum ekki góðir og hefðum við ekki haft Ólaf er ég ekki viss um hvernig þetta hefði farið,“ sagði Guðmundur Hólmar Helgason, leikmaður Vals, hreinskilinn eftir leikinn. Mikið var gert úr því að Ólafur Stefánsson væri að snúa aftur í Valstreyjuna í kvöld eftir nítján ára fjarveru en Ólafur er einn besti handboltamaður sem Ísland hefur átt. „Þetta er bara einn af bestu handboltamönnum sögunnar mættur og maður skyldi að það væri áhugi fyrir þessu. Þetta er eitthvað sem fer í bækurnar hjá manni, að hafa spilað með Ólafi og sem betur fer unnum við leikinn. Það hefði verið súrt að fá að spila með Ólafi og tapa og hann átti stóran hlut í því.“ Valsmenn unnu áttunda leikinn í röð í kvöld og tróna á toppi Olís-deildarinnar. „Við höfum verið að klára leiki þótt að við séum ekki að spila okkar besta bolta. Það er mikið um meiðsli en við getum ekki skýlt okkur á bak við það. Þeir voru að berja á okkur í dag og við vorum ekki nægilega tilbúnir til að takast á við það, hvorki í vörn né sókn,“ sagði Guðmundur sem hreifst af spilamennsku fyrrum liðsfélaga sinna. „Þeir voru að spila með menn sem voru á öðrum fætinum vegna meiðsla en þeir eru að koma aftur núna. Menn eins og Bergvin, Sigþór og Hreiðar voru allir að berjast við meiðsli en það er allt annað að sjá til liðsins núna.“ Guðmundur Hólmar ræðst að Akureyrarvörninni Ólafur: Handboltinn er í frumunum og það er erfitt að neita líkamanum „Þetta var bara nokkuð gaman. Ég var svolítið stressaður, maður er orðinn töluvert lélegri en maður var hérna á árum áður,“ sagði Ólafur Stefánsson, handboltagoðsögnin, eftir leikinn í dag en hann sneri aftur í Valstreyjuna eftir nítján ára fjarveru í þriggja marka sigri á Akureyri. „Ég var hræddur um að klúðra þessu fyrir strákunum sem hafa verið á góðu skriði undanfarnar vikur. Það er heiður að fá að spila með þessum strákum og þeir eiga alveg eitthvað inni hjá mér eftir að ég skyldi þá eftir í þjálfuninni.“ Ólafur var ekki lengi að stimpla sig inn í leikinn en hann skoraði fyrsta mark leiksins eftir aðeins 25 sekúndur. „Ég átti ekki von á því en það fór bara eitthvað í gang. Ég ætlaði að reyna að halda mér til haga og spila boltanum en það fór eitthvað af stað,“ sagði Ólafur sem hefur tekið einstaka æfingar með liðinu í vetur. „Ég hef ekki neitt beint verið að æfa í vetur. Ég tók mataræðið í gegn og tók út draslið sem fólk er að dæla í sig daglega og það kom mér hálfa leið. Svo hefur maður eitthvað verið að sprikla með strákunum.“ Ólafur sagðist ekki vera tilbúinn að svara fyrir um hvort hann tæki fleiri leiki með liðinu í vetur. „Ég veit það ekki, hugmyndin var að gefa Geiri og Ómari aukinn tíma og við sjáum hvernig það þróast. Ég er að fara að þjálfa með landsliðinu næstu vikum og við sjáum svo til. Það klæjar alltaf að kíkja aðeins í handbolta, þetta er í frumunum og það er erfitt að neita líkamanum um þetta.“ Á vefnum fimmeinn.is ræddi Lúther Gestsson við Hörð Másson og Hreiðar Levý og fulltrúi Vals er Ólafur Stefánsson. Hörður Másson: Leist betur á að sjá Óla þarna en Ómar Inga Hægri skytta Akureyrar Hörður Másson kom til liðsins frá Selfoss í sumar og hefur verið drjúgur með Akureyringum í vetur og gert 31 mark í vetur. Hann var að vonum ósáttur með tapið á móti Val í gærkvöldi og sagði að Akureyringum hefðu svo sannarlega langað í meira en ekkert úr þessum leik. Þeir hefðu gefið eftir undir lokin og hætt að spila eins og lagt var upp með undir lok leiksins. Liðið væri stigandi í síðust leikjum en þeir þyrftu að fara að klára þessa leiki. Aðspurður um hvort mönnum hefði brugðið við að sjá Ólaf Stefánsson taka á móti þeim á vellinum sagði Hörður að þeir hefðu eitthvað verið farnir að heyra af þessu en sjálfum hefði honum litist betur á þetta en að hafa Ómar á móti sér. Hreiðar Levý: Ég tók tvö víti frá Óla Hreiðar Levý Guðmundsson markvörður Akureyrar var að vonum svekktur með tap á móti Valsmönnum en sagði þó að mikill stígandi væri í leik sinna manna. Hreiðar sagði að hann væri yfir heildina sáttur með leik sinna manna og þeir hefðu gefið Valsmönnum hörkuleik. Valsmenn hefðu kannski verið aðeins klókari undir lokin. Varnarleikurinn hjá hans mönnum hefði verið til fyrirmyndar allan leikinn. Aðspurður um hvað hefði flogið um hugann þegar hann sá Óla gamla félaga sinn úr landsliðinu komin til baka sagði Hreiðar að það væri einfaldlega alltaf gaman að sjá Óla á vellinum. Óli Stef: Hefði verið sáttur með svona leik fyrir 19 árum Ólafur Stefánsson var að spila sinn fyrsta deildarleik með Val í 19 ár og átti flottan leik, gerði 6 mörk. Hann sagðist sáttur með sinn leik, en fannst kannski varnarleikurinn lélegur hjá liðinu. Ólafur sagðist ekki gruna að hann myndi þurfa að skjóta mikið en það hefði þó tekist. hvað framhaldið varðaði vissi hann ekki betur en að Geir myndi koma til baka fyrir næstu umferð en sagðist þó ekki afskrifa það að hann tæki annan leik. Að lokum kíkjum við á sport.is þar sem rætt er við Hreiðar Levý, Óskar Bjarna þjálfara Vals og líkt og hjá öllum öðrum fjölmiðlum við Ólaf Stefánsson. Hreiðar Levý: Erum á réttri leið „Þetta var mjög svekkjandi í lokin. Við gáfum þeim hörkuleik en þeir voru klókari og aðeins betri í lokin,“ sagði Hreiðar eftir leikinn og bætti við. „Við erum samt á réttu róli miðað við spilamennskuna í dag.“ Þá hrósaði hann Valsmönnum. „Valsmenn eru með frábært lið og svo er ekki ónýtt að fá bara Óla Stef lánaðan svona þegar það eru meiðsli.' Hreiðar mætir svo á landsliðsæfingu á mánudag. „Ég er mjög spenntur fyrir því og þarf bara að hringja í Ingu sjúkranuddara og fá hana til að kíkja á mig á morgun og koma skrokknum í lag.' Óskar Bjarni: Eigum ekki breik gegn Haukum ef við spilum svona Óskar Bjarni Óskarsson, þjálfari Vals, var ánægður með sigurinn gegn Akureyri í dag. Hann segir þó að liðið geti gert betur. „Þetta var erfitt en við undirbjuggum okkur alla vikuna fyrir erfiðan leik. Akureyringar hafa bætt sig mikið með hverjum leik,“ sagði Óskar Bjarni eftir leikinn. „Þeir voru örlítið þéttari en við í dag. Hreiðar var góður í markinu hjá þeim og við vorum að pirra okkur. Orkan var þeirra megin í 48 mínútur.“ Valsarar kláruðu svo leikinn á sigurhefðinni „Þegar lið eru búin að vinna marga leiki myndast ákveðin sigurhefð. Um leið og við komumst tveimur mörkum yfir vorum við með þetta.“ Þá segir hann að liðið verði að spila betur í næsta leik. „Við eigum samt ekki breik í Hauka ef við spilum eins og í dag.“ Ólafur Stefánsson var nokkuð óvænt í liði Vals í dag og stóð sig vel. „Óli er búinn að vera að æfa með okkur eftir að Geir meiddist. Svo þegar Ómar fór í aðgerð í gær ákvað ég að tékka á Óla og hann er svo mikill stríðsmaður að þetta blundaði í honum,“ segir Óskar og heldur áfram. „Hann var frábær. Þegar þú ert með einn besta íþróttamann sögunnar þá kann hann þetta allt. Við vorum að fá hann inn svo Geiri fái lengri tíma til að jafna sig, á meðan Óli hefur gaman af þessu og fjölskyldan leyfir þá kemur það alveg til greina. Hann stjórnar þessu algjörlega.“ „Það eru bara forréttindi fyrir liðið, mig, Val og þjóðina að hann skuli hafa hjálpað okkur í dag.“ Óli Stef: Duttu niður á mitt tempó Ólafur Stefánsson var mættur í lið Vals gegn Akureyri í Olís-deildinni í handbolta í kvöld. Ólafur skoraði sex mörk í leiknum og ræddi við okkur í leikslok. „Við fórum að skjóta aðeins betur og náðum að þétta vörnina aðeins,“ segir Ólafur aðspurður um hvað Valur hafi haft fram yfir Akureyri í restina og bætti við. „Akureyringar eru búnir að vera á rönni og það var fínt að ná að stoppa það.“ Þá sló hann á létta strengi þegar við ræddum um frammistöðu Vals í leiknum. „Ætli þeir hafi ekki bara dottið niður á mitt tempó.“


Akureyri þarf að fara í gegnum Stjörnuna til að komast áfram í bikarnum		1. nóvember 2015 - Akureyri handboltafélag skrifar Akureyri fékk útileik gegn Stjörnunni í bikarnum Í gær var dregið í 16 liða úrslit í Coca-Cola bikarnum og fékk Akureyri útileik gegn Stjörnunni. Stjarnan er með fullt hús stiga á toppi 1. deildarinnar og má því búast við hörkuleik gegn Garðbæingum. Stefnt er að leikir umferðarinnar fari fram dagana 29. og 30. nóvember. Af þessum 8 viðureignum eru 3 milli úrvalsdeildarliða og því ljóst að sterkir kandídatar munu ekki komast áfram í næstu umferð en svona lítur 16-liða úrslitin út: Fjölnir - Selfoss Grótta - FH ÍBV 2 - Valur HK - ÍBV Afturelding - Víkingur Stjarnan - Akureyri Þróttur Vogum - Fram Haukar - ÍR


Valsmenn eru með feikisterkt lið		31. október 2015 - Akureyri handboltafélag skrifar Leikur dagsins: Sjónvarpsleikur gegn Val Akureyri sækir topplið Vals heim í dag í Vodafone Höllinni að Hlíðarenda klukkan 16:00. Leikurinn verður sýndur beint á RÚV og hvetjum við alla sem ekki komast á leikinn til að fylgjast með gangi mála í sjónvarpinu enda ekki á hverjum degi sem Akureyri fær sjónvarpsleik. Einhverjir orðrómar hafa verið uppi um að Ólafur Stefánsson muni leika með Val í dag en hann átti félagaskipti í gær og er því löglegur með liði Vals. Hvort hann komi beint inn í leikmannahópinn og leiki í dag er spurning en vissulega óvæntar fregnir enda er lið Vals á toppi deildarinnar og er ógnarsterkt fyrir. Bæði lið þurfa á sigri að halda, Akureyri vill að sjálfsögðu halda áfram að hala inn stigum eftir erfiða byrjun á meðan Valsarar vilja að sjálfsögðu halda sigurgöngu sinni áfram á toppnum. Ekki missa af þessum leik, áfram Akureyri!


Þetta var síðasta mark Jonna fyrir Akureyri		28. október 2015 - Akureyri handboltafélag skrifar Þegar Jonni jafnaði gegn Val á lokasekúndunni Í tilefni leiks Vals og Akureyrar á laugardaginn ætlum við að rifja upp skemmtilegt atvik. Valur og Akureyri mættust í undanúrslitum Íslandsmótsins í handbolta tímabilið 2009-2010. Liðin höfðu unnið sitthvorn leikinn og mættust í svakalegum oddaleik þann 26. apríl 2010. Þegar 8 sekúndur lifðu leiks voru Akureyringar með boltann marki undir og reyndu að tryggja framlengingu. Það tókst eftir áhugaverða sókn þar sem Árni Þór Sigtryggsson sendi á Heimi Örn Árnason, sem sendi á Hrein Hauksson sem kom boltanum í hendur Jónatans Þórs Magnússonar sem hafði komið sér fyrir á línunni og skoraði af öryggi. Valsmenn reyndust hinsvegar sterkari í framlengingunni og fóru áfram í úrslitin. Þetta var síðasta mark Jónatans fyrir Akureyri en hann yfirgaf liðið og gekk í raðir Kristiansunds í Noregi.


597 dagar liðu á milli sjónvarpsleikja Akureyrar		27. október 2015 - Akureyri handboltafélag skrifar Leikur Vals og Akureyrar sýndur á RÚV! Laugardaginn 31. október mætir Akureyri toppliði Vals á Hlíðarenda. RÚV (Ríkissjónvarpið) hefur nú gefið út að þeir munu sýna leikinn í beinni útsendingu sem er frábært enda flestir stuðningsmenn Akureyrar staðsettir á Akureyri og hafa því ekki tök á að mæta á leikinn. Virkilega ánægjulegar fréttir en Akureyri hefur ekki beint fengið marga sjónvarpsleiki undanfarin ár en þetta verður fyrsti sjónvarpsleikur félagsins síðan 13. mars 2014 þegar liðið mætti Fram. Við hvetjum ykkur því til að fylgjast grannt með gangi mála í sjónvarpinu á laugardaginn og sýna að Akureyri tryggi áhorf þegar leikir félagsins eru sýndir í sjónvarpinu.

Til baka Senda á Facebook

Umsjón og hönnun: Stefán Jóhannsson og Ágúst Stefánsson

web statistics