Basti þjálfar Selfyssinga en leikur trúlega ekki með á morgun
| | 8. nóvember 2008 - Akureyri handboltafélag skrifarAkureyri 2 mætir Selfyssingum í bikarnum á sunnudagÁ morgun, sunnudag er sannkallaður bikardagur hjá Akureyri Handboltafélagi, það er ekki nóg með að Rúnar Sigtryggsson fari með sitt lið í Hafnarfjörðinn til að leika við FH heldur leggur Akureyri 2 einnig land undir fót og heldur á Selfoss til að berjast við heimamenn. Sá leikur átti upphaflega að fara fram á Akureyri en það varð að samkomulagi að færa leikinn á Selfoss að þessu sinni.
Selfyssingar eru á mikilli siglingu í 1. deildinni núna og eru í efsta sæti eftir góðan sigur á ungmennaliði Hauka í gær 33-21. Eftir sjö leiki hafa þeir einungis tapað einum leik, gegn ÍR en unnið hina sex.
Þjálfari Selfyssinga er hinn góðkunni markvörður, Sebastian Alexandersson. Aðstoðarþjálfari Selfoss er enginn annar en Akureyringurinn Arnar Gunnarsson (Addi Gunn) sem lék síðast með Þór en hafði áður orðið Íslandsmeistari með yngri flokkum KA. Addi er jafnframt á leikmannalista þeirra, skráður sem línumaður.
Í áðurnefndum leik gegn ungmennaliði Hauka voru atkvæðamestir stórskyttan Atli Kristinsson og hornamaðurinn Guðmundur Ólafsson auk þess sem markvörður þeirra, Birkir Bragason fór á kostum. Það er því ljóst að Akureyri 2 þarf að taka á öllu sínu í ljónagryfjunni á Selfossi á morgun en Selfyssingar hafa fengið góðan stuðning frá tryggum áhorfendum í gegnum tíðina, þannig voru um 400 manns mættir hjá þeim í gær.
Liðsmenn Akureyrar 2 fara akandi í leikinn og verður lagt af stað frá KA heimilinu klukkan 9:00 í fyrramálið. |
Fréttir 
Þú flettir milli frétta með örvalyklunum eða smellir á bláu örvarnar!
Efst á síðu