2. flokkur: Sigurgangan heldur áfram

Strákarnir í 2. flokki halda áfram á sömu braut og innbyrtu enn einn sigurinn í dag þegar þeir sigruðu Stjörnuna í miklum barningsleik í Síðuskólanum. Það vantaði reyndar nokkra öfluga pósta í liðið, Heiðar Þór, Atli Ævar og Anton Rúnarsson voru allir fyrir sunnan með meistaraflokki og reyndar einnig Geir Guðmundsson. Oddur Gretarsson var hins vegar með í dag auk þess sem Bjarni Jónasson er kominn til leiks á ný eftir meiðsli.
Akureyri hóf leikinn af miklum krafti og komst í 3-0 en Stjarnan komst fljótlega inn í leikinn og jafnaði í 6-6 og komst raunar yfir í 8-9 en það var raunar í eina skiptið sem Stjarnan var yfir í leiknum. Góður kafli á lokamínútum fyrri hálfleiks skilaði þriggja marka forystu Akureyrar í hálfleik 14-11.

Oddur var atkvæðamikill í fyrri hálfleiknum með góð mörk úr vinstra horninu og fyrir utan, alls sex mörk í hálfleiknum.
Stjarnan byrjaði seinni hálfleikinn betur, minnkaði muninn í 14-13 og eftir það hélst lengst af 1 til 2 marka munur, Akureyri í vil. Maður hafði allan tímann á tilfinningunni að Akureyri hefði örugg tök á leiknum en þeim tókst þó aldrei að hrista Stjörnuna almennilega af sér. Oft á tíðum var óðagot á mönnum, býsna mörg dauðafæri fóru í súginn og sendingar ónákvæmar en leiknum lauk með tveggja marka sigri 26-24 og tvö mikilvæg stig í höfn.
Í seinni hálfleiknum voru Hákon Stefánsson og Fannar Kristmannsson atkvæðamiklir í sókninni auk þess sem Elmar Kristjánsson var góður í markinu.

Gangur leiksins: 3-0, 5-4, 6-6, 8-9, 11-11, 14-11, 15-13, 18-18, 22-20, 25-22, 26-24.

Þessi leikur var í raun ekki ósvipaður leik liðanna í desember þegar þau mættust á sama stað í bikarkeppninni en þar fór Akureyri einnig með tveggja marka sigur eftir mikinn barning.
Mörk Akureyrar: Oddur Gretarsson 9 (4 víti), Hákon Stefánsson 6, Fannar Kristmannsson 5, Jón Þór Sigurðsson 2, Bjarni Jónasson, Halldór Árnason, Hlynur og Steinþór 1 mark hver.
Elmar Kristmannsson stóð í markinu allan tímann og átti fínan leik, sérstaklega í seinni hálfleiknum en hann varði 18 skot í leiknum.

Eftir leikinn er staðan í deildinni sem hér segir:

Nr.	Félag	Leik	U	J	T	Mörk	Nett	Stig
1.	Akureyri	11	11	0	0	379:277	102	22
2.	FH	10	9	0	1	355:259	96	18
3.	ÍR	10	6	0	4	286:278	8	12
4.	HK	11	5	1	5	334:319	15	11
5.	Afturelding	11	5	1	5	298:324	-26	11
6.	Valur	9	4	2	3	276:261	15	10
7.	Haukar	11	3	4	4	303:295	8	10
8.	Fram	11	4	0	7	311:331	-20	8
9.	Víkingur	10	3	2	5	280:265	15	8
10.	Selfoss	8	3	1	4	248:239	9	7
11.	Stjarnan	9	2	1	6	245:260	-15	5
12.	Fjölnir	11	0	0	11	213:420	-207	0

Á morgun fljúga strákarnir suður og leika við Fram í bikarkeppninni. Þar koma væntanlega meistaraflokksstrákarnir aftur til liðs við hópinn.

Fletta milli frétta

Til baka

Senda á Facebook

Efst á síðu

Umsjón og hönnun:
Stefán Jóhannsson og Ágúst Stefánsson