2. flokkur: Deildarmeistarar eftir ótrúlegan sigur á ÍR

Það var ekki laust við dramatík í Breiðholtinu í dag þegar ÍR tók á móti Akureyri í Austurberginu. Með sigri gat Akureyri gulltryggt deildarmeistaratitilinn en baráttuglaðir ÍR-ingar voru ekkert á þeim buxunum að láta Akureyrarstrákana fagna titli á þeirra heimavelli.

ÍR mættu gríðarvel stemmdir og náðu mest sjö marka forystu í fyrri hálfleik en Akureyri náði að klóra í bakkann en ÍR hélt öruggri þriggja marka forystu í hálfleik, 23-20.

Seinni hálfleikur spilaðist á svipaðan hátt, ÍR mun sterkari aðilinn og náðu mest sex marka forystu en með seiglu tókst Akureyrarliðinu að saxa niður forskotið og náðu að jafna í lokin og áttu síðustu sóknina í leiknum, henni lauk með því að Akureyri fékk aukakast í sömu mund og flautað var til leiksloka.

Anton Rúnarsson tók aukakastið og að sögn sjónarvotta minnti það helst á sögufrægt aukakast Guðjóns Vals Sigurðssonar í KA heimilinu um árið sem tryggði KA aðra framlengingu gegn Aftureldingu og síðar eins marks sigur 29-28 í apríl 2001.

Anton skoraði sem sé úr aukakastinu og tryggði Akureyri sigur í leiknum 35-36 og þar með deildarmeistaratitilinn, fyrsta titilinn í sögu félagsins og óskum við strákunum til hamingju með frábæran áfanga þrátt fyrir að einni umferð sé enn ólokið!

Reyndar má segja að heppnin hafi verið með strákunum í dag en hún er jú oft hliðholl þeim bestu og við sláum ekki hendinni á móti henni á svona stundum.

Staðan í deildinni er nú sem hér segir:

Nr.	Félag	Leik	U	J	T	Mörk	Nett	Stig
1.	Akureyri	21	17	1	3	702:594	108	35
2.	FH	20	15	0	5	674:538	136	30
3.	Selfoss	19	13	1	5	633:540	93	27
4.	Víkingur	20	12	2	6	589:516	73	26
5.	Haukar	20	9	5	6	558:526	32	23
6.	Valur	19	8	3	8	556:564	-8	19
7.	ÍR	20	9	1	10	590:577	13	19
8.	Afturelding	18	8	1	9	491:522	-31	17
9.	HK	18	7	1	10	563:537	26	15
10.	Fram	20	6	0	14	582:638	-56	12
11.	Stjarnan	19	5	1	13	495:543	-48	11
12.	Fjölnir	20	0	0	20	413:751	-338	0

Hér er sjónarhorn Guðjóns Vals í markinu fræga en
boltinn hafnaði í fjarstönginni og inn - ótrúlegt!

Fletta milli frétta

Til baka

Senda á Facebook

Efst á síðu

Umsjón og hönnun:
Stefán Jóhannsson og Ágúst Stefánsson