Hafþór var í miklu stuði í leiknum gegn Val
| | 8. október 2009 - Akureyri handboltafélag skrifarTap gegn Val í hörkuspennandi leikÞað var sannkölluð háspenna á Hlíðarenda þegar Akureyri Handboltafélag var þar í heimsókn hjá Valsmönnum í fyrstu umferð N1 deildarinnar. Lið Akureyrar saknaði fyrirliða síns Jónatans Magnússonar sem glímir við ökklameiðsl, sömuleiðis vantaði ungu stórskyttuna Guðmund Hólmar Helgason sem lá veikur heima.
Leikurinn var hörkuspennandi og skemmtilegur frá upphafi, jafnt á flestum tölum en Akureyri með frumkvæðið yfirleitt í fyrri hálfleik. Aðeins einu sinni munaði tveim mörkum en það var í stöðunni 4-6 fyrir Akureyri. Markverðir liðanna voru í miklum ham og varði Hafþór Einarsson 11 skot í fyrri hálfleik, þar af eitt vítakast. Akureyri átti síðustu sóknina í fyrri hálfleik og lauk henni með því að Guðlaugur Arnarsson skoraði mark sem síðar var dæmt af og því var jafnt 12-12 í hálfleik.
Valsmenn skoruðu fyrstu tvö mörk seinni hálfleiks en Árni Sigtryggsson jafnaði með tveim góðum mörkum og náði Akureyri í kjölfarið tveggja marka forystu 15-17. Valur jafnar og áfram var jafnt 18-18 og 19-19. Á lokamínútunum brást sóknarleikur Akureyrar og það voru Valsmenn sem skoruðu síðustu fjögur mörk leiksins og fóru því með óþarflega stóran sigur 23-19.
Vörn Akureyrar var mjög öflug og Hafþór í miklum ham fyrir aftan hana og án efa besti maður liðsins með 18 skot varin, þar af 2 vítaköst.
Sóknarleikurinn gekk þokkalega í fyrri hálfleik en miklu lakar í seinni hálfleik og virtust menn eiginlega fara á taugum gegn Hlyni Morteins, markverði Vals sem komst í mikinn ham eftir því sem á leikinn leið. Lítið kom út úr hornunum og þrátt fyrir góða vörn náðist ekki eitt einasta hraðaupphlaup í seinni hálfleik. Hins vegar má segja að heppnin hafi gengið í lið með Val undir lokin þegar þrumuskot Valdimars og skömmu síðar frá Geir skullu í stöngum Valsmarksins.
Árni Sigtryggsson og Guðlaugur Arnarsson hafa gætur á Valsaranum Ólafi Sigurjónssyni. Mynd: Morgunblaðið
Árni Sigtryggsson og Hörður Fannar í átökum við Valsvörnina.
Mynd: Guðmundur Lúðvíksson Sport.is
Þrátt fyrir þessi úrslit var margt mjög jákvætt í leiknum og ljóst að liðið hefur alla burði til að slást á toppi deildarinnar í vetur.
Mörk Akureyrar skoruðu: Árni Sigtryggsson 8, Oddur Gretarsson 3 (1 víti), Andri Snær Stefánsson, Heiðar Þór Aðalsteinsson, Heimir Örn Árnason og Hörður Fannar Sigþórsson 2 mörk hver.
Í liði Vals var Hlynur Morteins markvörður yfirburðamaður með 26 skot varin en einnig gekk illa að hemja Erni Hrafn Arnarsson sem skoraði 7 mörk fyrir Val.
Leikurinn var sýndur beint á sporttv.is og var boðið upp á að fylgjast með leiknum á stórum tjöldum á Greifanum. Mætingin á Greifann fór fram úr björtustu vonum og voru á milli 80 og 90 manns þar samankomnir og fín stemming. Það vakti hins vegar athygli hversu fáir áhorfendur voru mættir í Vodafone höllinni og var haft á orði að hópurinn á Greifanum væri jafnvel fjölmennari.
Að lokum er ástæða til að koma sérstöku þakklæti til forráðamanna sporttv.is fyrir útsendinguna. |
Fréttir 
Þú flettir milli frétta með örvalyklunum eða smellir á bláu örvarnar!
Efst á síðu