Frábær sigur Akureyrar á Val 29-25

Það var sannkölluð stórleikjastemming í Íþróttahöllinni í kvöld þegar Akureyri tók á móti Val. Áhorfendur fylltu stúkuna og strax í upphafi var ljóst að bæði leikmenn og áhorfendur voru vel með á nótunum. Valsmenn höfðu frumkvæði í leiknum til að byrja með en Akureyri jafnaði alltaf jafnharðan. Þannig var jafnt á nánast öllum tölum upp í 8-8

Eftir tuttugu mínútna leik náði Akureyri forystunni 9-8 og mestur varð munurinn 16-13 í fyrri hálfleik en norðanpilturinn Arnór Þór Gunnarsson í liði Vals minnkaði muninn í tvö mörk 16-14 úr vítakasti fyrir hálfleik.

Jónatan var atkvæðamikill í fyrri hálfleiknum

Hafþór Einarsson stóð í markinu í fyrri hálfleik, var seinn í gang en stóð sig vel seinni hluta hálfleiksins og varði þá vel. Í varnarleiknum gengu menn vasklega fram og uppskáru fjórar brottvísanir í fyrri hálfleik og þar að auki fengu Valsmenn sex vítaköst, sum hver fyrir litlar sakir. Í upphafi leiksins átti Akureyri fjölmörg skot í stangir og þverslá, trúlega smeykir við Hlyn í Valsmarkinu en sóknin small síðan vel saman og í heild fínn bragur á liðinu.

Valsmenn komu sterkir til seinni hálfleiks og náðu að jafna í 18-18 eftir tíu mínútna leik en þá kom frábær kafli hjá Akureyri sem sneri leiknum sér í hag og náði fimm marka forystu 25-20 og tíu mínútur til leiksloka.

Næstu mínútur tóku Valsmenn völdin og minnkuðu muninn í eitt mark, 26-25 og fór að fara um stuðningsmenn Akureyrar sem hafa fulloft upplifað dramatík á síðustu mínútunum. En Akureyri keyrði áfram af fullum krafti, Hörður Flóki múraði upp í markið það sem eftir var og átti eitraðar sendingar fram í hraðaupphlaup sem skiluðu frábærum fjögurra marka sigri 29-25.

Það var ósvikin sigurstemming í leikslok

Leikur Akureyrar var hreint út sagt frábær í dag, stemmingin í liðinu til fyrirmyndar og áhorfendur skemmtu sér konunglega allan tímann. Hörður Flóki kom í markið um miðjan seinni hálfleikinn og hrökk fljótlega í gírinn. Sigurinn í dag var þó fyrst og fremst sigur frábærrar liðsheildar og frábærrar stemmingar. Þrátt fyrir smáhökt undir lokin þegar Valur skoraði fjögur mörk í röð og minnkaði muninn í eitt mark var magnað að sjá að liðið brotnaði ekki heldur spýtti í lófana og kláraði leikinn með stæl.

Heimir Örn Árnason var valinn maður leiksins en hann var feikilega öflugur í dag bæði í sókn og ekki síður í vörninni.

Mörk Akureyrar í dag: Jónatan Magnússon 7 (1 víti), Oddur Grétarsson 6 , Heimir Örn Árnason 5, Árni Þór Sigtryggsson 4, Guðlaugur Arnarsson 3, Heiðar Þór Aðalsteinsson 2, Andri Snær Stefánsson 1 og Hörður Fannar Sigþórsson 1

Í markinu varði Hafþór Einarsson 10 skot og Hörður Flóki Ólafsson 8.

Hjá Val var Arnór Þór Gunnarsson markhæstur með 8 mörk, þar af 5 úr vítaköstum.

Dómarar leiksins voru þeir Anton Gylfi Pálsson og Hlynur Leifsson, yfirleitt bestu dómarar landsins en áttu ekki sinn besta dag að þessu sinni.

Að lokum verður að geta frábærra áhorfenda sem troðfylltu stúkuna og tóku virkan þátt í leiknum allan tímann og munar svo sannarlega um minna.

Hreint út sagt frábær stemming á pöllunum í kvöld

Það er því óhætt að fara að hlakka til næsta fimmtudags en þá verður annar og ekki minni baráttuleikur þegar efsta lið deildarinnar, Haukar mætir til leiks.

Eftir leiki kvöldsins er staðan í N1-deildinni þannig:

Nr.	Félag	Leikir	U	J	T	Mörk	Hlutfall	Stig		-
1.	Haukar	7	5	2	0	179 : 158	21	12	:	2
2.	Valur	8	5	1	2	203 : 187	16	11	:	5
3.	Akureyri	8	5	1	2	200 : 191	9	11	:	5
4.	FH	8	4	1	3	227 : 218	9	9	:	7
5.	Grótta	8	4	0	4	207 : 205	2	8	:	8
6.	HK	7	3	1	3	176 : 179	-3	7	:	7
7.	Stjarnan	8	1	0	7	172 : 205	-33	2	:	14
8.	Fram	8	1	0	7	201 : 222	-21	2	:	14

Fletta milli frétta

Til baka

Senda á Facebook

Efst á síðu

Umsjón og hönnun:
Stefán Jóhannsson og Ágúst Stefánsson