Heimasíðan
 Fréttir  -   Úrslit  -   Næstu leikir  -   Deildin

    Fréttir                       Þú flettir milli frétta með örvalyklunum eða smellir á bláu örvarnar! 

Þetta eru liðin sem leika í deildarbikarnum í ár







14. desember 2009 - Akureyri handboltafélag skrifar

Deildarbikarinn milli jóla og nýárs – Endanleg röð liða

Eftir leik Vals og FH í dag er ljóst að það verða Haukar, FH, Valur og Akureyri sem leika í keppninni. Í sjónvarpsfréttum í kvöld var því ranglega haldið fram að HK myndi með sigri á Haukum ýta Akureyri í 5. sætið en það er einfaldlega rangt.

Ef HK sigrar Hauka (sem getur hæglega gerst) verða Haukar eftir sem áður efstir í deildinni með 14 stig og þar með öruggir í deildarbikarinn. FH, Valur, Akureyri og HK verða hins vegar öll jöfn með 11 stig hvert félag. Til að raða þeim í sæti þá er litið til innbyrðis leikja þeirra.

Þar stendur FH best að vígi með tvo sigra á Val, sigur á Akureyri og jafntefli gegn HK eða 7 stig.

Valur sigraði Akureyri og Valur sigraði einnig HK og er því með 4 stig.

Akureyri er einnig með 4 stig eftir sigur á Val og HK.

HK hefur 3 stig út úr innbyrðis viðureignum þessara liða, jafntefli og sigur á FH en þeir töpuðu fyrir bæði Val og Akureyri.

Akureyri og Valur eru jöfn að stigum, en eins og sést í 3. tölulið 20. greinar hér á eftir skal þá líta til markamunar í innbyrðisleikjum þesara liða. Akureyri er með -2 mörk í leikjum þessara fjögurra liða en Valur -6 og því raðast Akureyri ofar en Valur.

Röð efstu fjögurra liða er því og verður: 1. Haukar, 2. FH, 3. Akureyri, 4. Valur.

Deildarbikarinn verður leikinn dagana 27. og 28. desember en staðsetningin hefur ekki enn verið ákveðin.

Í reglugerð HSÍ um Handknattleiksmót er fjallað um það í 20. grein hvernig röð liða í mótum er ákvörðuð. 20. greinin er svohljóðandi:

20.gr. Vinningsröð liða

Vinningsröð liða í keppnum á vegum HSÍ ákvarðast á eftirfarandi hátt.

Raða skal liðum til úrslita eftir keppni í riðlum, milliriðlum og deildum, þar sem ekki skal leikið til þrautar, í öllum flokkum, sem hér segir:

  1. Samanlagður stigafjöldi úr öllum leikjum.
    Unninn leikur 2 stig
    Jafntefli 1 stig
    Tapaður leikur 0 stig
  2. Stigafjöldi úr innbyrðis leikjum viðkomandi liða.
  3. Markamunur úr innbyrðis leikjum.
  4. Fleiri skoruð mörk í innbyrðis leikjum.
  5. Markamunur úr öllum leikjum viðkomandi liða í keppninni.
  6. Fleiri skoruð mörk úr öllum leikjum viðkomandi liða í keppninni.
  7. Hlutkesti.
Í 22. grein sömu reglugerðar segir svo um deildarbikarkeppnina:

Deildarbikarkeppni HSÍ
Leikin skal útsláttarkeppni um deildarbikar og skal hún leikin milli jóla og nýárs.

Skal hún leikin þannig að liðið sem er í 1. sæti leikur gegn því liði sem er í 4. sæti og 2. sæti gegn 3. sæti. Skal miða við stöðu liðanna eftir síðustu umferð fyrir jól og að liðin hafi leikið jafn marga leiki. Leikið skal á sama stað. Sigurvegarar úr þessum leikjum skulu leika til úrslita og skulu úrslitaleikir karla og kvenna fara fram sama dag. Sigurvegari keppninnar er Deildarbikarmeistari.

HSÍ sér um umgjörð leikjanna og ber allan kostnað og fær allar tekjur af leikjunum.

Deildarbikarmeistari öðlast rétt til þátttöku í Evrópukeppni félagsliða (EHF cup), en verði það lið einnig Íslandsmeistari fær lið nr. 2 þátttökurétt í Evrópukeppni félagsliða, en öðlist það lið þátttökurétt í Evrópukeppni Bikarmeistara (Cupwinners cup) fær lið nr. 3 þátttökurétt í Evrópukeppni félagsliða.

Það er því ljóst að fyrri daginn leika Haukar og Valur annars vegar og síðan FH og Akureyri. Sigurvegar í þessum leikjum leika síðan til úrslita um deildarmeistaratitilinn seinni daginn.

Hér er hægt að skoða alla reglugerð HSÍ um handknattleiksmót.

Fletta milli frétta Til baka    Senda á Facebook

Efst á síðu

Umsjón og hönnun:
Stefán Jóhannsson og Ágúst Stefánsson