Breyttar leikreglur í handboltanum - kynning

Nú þegar styttist í að N1 deildin byrjar er rétt að vekja athygli handboltaáhugamanna á því að búið er að gera ýmsar breytingar á handboltareglunum. Í æfingamótunum í haust hafa dómarar, leikmenn og aðstandendur liðanna verið að prófa nýju reglurnar sem vissulega hafa ákveðnar breytingar í för með sér.

Skýringar á breytingum á leikreglum

1. júlí síðastliðin gerði alþjóða handknattleikssambandið (IHF) breytingar á leikreglunum sem miða að því að vernda leikmenn enn frekar og gera alla ákvarðanatöku dómara skýrari gagnvart þátttakendum. Stærstu breytingarnar eru á reglum 8, um brot og óíþróttamannslega framkomu, og 16, um refsingar, sem var breytt að stórum hluta og ný hugmyndafræði við mat á ákvörðunum tekin inn. Í leiðinni voru gerðar ýmsar aðrar lagfæringar á reglunum sem verða missýnilegar hjá áhorfendum. Það sem helst ber að nefna er;

• Brottvikning (krossinn) er ekki lengur notuð en nú eru útilokanir (rautt spjald) ýmist með eða án skýrslu eftir alvarleika brotsins.
• Skýrari framsetning er á eðli brota og óíþróttamannslegri framkomu og hvernig ber að taka á henni.
• Strangar er tekið á baráttu línumanns og varnarmanns og skoðuð sérstaklega notkun olnboga og barátta um svæði.
• Túlkun á varist innan markteigs er orðin skýrari og nú nægir ekki að varnarmaður standi á markteigslínu til að sóknarmaður fái víti heldur þarf hann að vera allur innan markteigs.
• Markverðir fá nú útilokun ef þeir fara út úr markteig til að ná bolta, t.d. í hraðaupphlaupum, og valda með því árekstri við sóknarmann.
• Búið er að afmarka ákveðið þjálfarasvæði fyrir framan og aftan skiptibekki, þar sem þjálfarar verða að starfa innan auk þess sem búið er að færa bekkina 3,5m frá miðlínu.

Síðustu ár hefur borið á ákveðnu agaleysi á skiptimannasvæði en nú verður lögð áhersla á að koma í veg fyrir það þar sem reglum um skiptisvæði verður fylgt strangt eftir. Við höfum leyft tveimur starfsmönnum að standa og stjórna liði sínu á skiptisvæði en nú verður aðeins einum leyft að gera það, þegar það á við, eins og reglur segja til um.

Smelltu hér til að nálgast reglurnar í heild sinni