Oddur Gretarsson og Sveinbjörn Pétursson stóðu fyrir sínu í dag
| | 19. október 2010 - Akureyri handboltafélag skrifarAkureyri sigraði HK í æsispennandi bikarleikAnnan leikinn í röð fór Akureyri með eins marks sigur eftir rafmagnaðan leik. Að þessu sinni var það lið HK sem var fórnarlambið og varð að sætta sig við tap, 28-29 en það var reyndar HK sem skoraði síðasta mark leiksins en fengu jafnframt tækifæri til að jafna í lokin en síðasta skot þeirra fór yfir markið.
Að þessu sinni byrjaði Akureyri vel í leiknum og komst í 1-4 áður en HK minnkaði muninn í 3-4. Akureyri hélt þó góðu frumkvæði fyrsta korterið og var yfir 7-9 en HK jafnaði og komst yfir í fyrsta sinn í stöðunni 11-10.
Sóknarleikur Akureyrar hikstaði á þessum tíma á sama tíma og HK náði upp fínum leik, sérstaklega þó Ólafur Bjarki Ragnarsson sem var yfirburðamaður í HK liðinu. HK náði mest þriggja marka forystu 14-11 en Geir Guðmundsson skoraði síðasta mark hálfleiksins þannig að forysta HK var einungis tvö mörk, 14-12 í hálfleik.
Akureyri byrjaði seinni hálfleikinn af krafti, jöfnuðu í 15-15 og komust loks yfir í stöðunni 17-18 eftir góða rispu. Akureyri náði frumkvæðinu í leiknum en HK jafnaði í 19-19 og næst í 23-23 en þá komu þrjú Akureyrarmörk í röð, staðan 23-26 og þann mun náði HK aldrei að jafna.
Síðustu mínuturnar voru ofurspennandi, HK náði alltaf að minnka muninn í eitt mark en þegar Oddur skoraði úr víti 27-29 og 90 sekúndur til leiksloka virtist sigurinn í höfn. En HK barðist áfram, Ólafur Bjarki skoraði 28-29 og Akureyri fékk á sig sóknarbrot í síðustu sókn þannig að HK fékk tækifæri til að jafna leikinn. Í hamaganginum í lokin fékk Guðmundur Hólmar sína þriðju brottvísun en sem betur fer fór lokaskot HK yfir markið og Akureyri komið áfram í bikarnum eftir vægast sagt erfiðan leik.
Mörk Akureyrar skoruðu: Oddur Gretarsson 10 (2 úr vítum), Bjarni Fritzson 7, Geir Guðmundsson 4, Guðmundur Hólmar Helgason 3, Heimir Örn Árnason 3, Guðlaugur Arnarsson 1 og Hörður Fannar Sigþórsson 1.
Sveinbjörn Pétursson varði 17 skot í leiknum.
Mörk HK: Ólafur Bjarki Ragnarsson 9, Bjarki Már Elíasson 5, Hörður Másson 4, Sigurjón Björnsson 3, Daníel Berg Grétarsson 3, Vilhelm Gauti Bergsveinsson 2, Atli Ævar Ingólfsson 2.
Okkar maður á leiknum kvað þá Sveinbjörn Pétursson og Odd Gretarsson hafa verið bestu menn Akureyrar liðsins að þessu sinni en valdi að lokum Sveinbjörn sem mann leiksins.
En það er stutt í næsta verkefni, Haukarnir koma norður á föstudaginn og miðað við spennuna og dramatíkina sem hefur verið í síðustu tveim leikjum Akureyrar geta stuðningsmenn farið að hlakka til æsilegara viðureignar í Höllinni.
Myndir frá leiknum, svo og umfjöllun er að finna á vef sport.is, smelltu hér til að skoða.
Bendum jafnframt á textalýsinguna frá leiknum hér á síðunni. |
Fréttir 
Þú flettir milli frétta með örvalyklunum eða smellir á bláu örvarnar!
Efst á síðu