Guðmundur Hólmar kom heldur betur við sögu í lok leiksins
| | 27. apríl 2011 - Akureyri handboltafélag skrifarFH vann fyrsta leikinn eftir spennuþrungnar lokasekúndurÞað vantaði ekkert upp á dramatíkina í fyrsta leik Akureyrar og FH í kvöld. FH ingar komu gríðarlega sterkir til leiks og skoruðu fyrstu þrjú mörk leiksins áður en Akureyri komst á blað. Sóknarleikur Akureyrar var ákaflega máttlítill í upphafi og áttu menn afar erfitt með að koma boltanum fram hjá Daníel markverði FH. Mestur varð munurinn fjögur mörk 4-8 þegar 19 mínútur voru liðnar af leiknum.
Þá komu þrjú Akureyrarmörk í röð og leikurinn orðinn hörkuspennandi. FH hélt þó góðum tökum á leiknum en á síðustu sekúndu fékk Bjarni Fritzson kjörið tækifæri til að minnka muninn í eitt mark en Daníel kórónaði markvörslu sína með því að verja vítakastið og því fór FH með tveggja marka forskot í hálfleik, 9-11.
Akureyri hóf seinni hálfleikinn vel og jafnaði í 11-11. FH svaraði fyrir sig og komst í 12-15 en Akureyri jafnaði aftur í 15-15. Eftir þetta má segja að leikurinn hafi verið í járnum og jafnt á nánast öllum tölum en FH þó alltaf með frumkvæðið. Akureyri fékk þó nokkur tækifæri til að komast yfir en tókst þó aldrei.
Lokamínútan var æsileg, Ólafur Guðmundsson kom FH í 20-21 þegar 25 sekúndur voru til leiksloka en Hörður Fannar jafnaði leikinn þegar 10 sekúndur voru til leiksloka og allt virtist stefna í framlengingu. Guðmundur Hólmar stöðvaði Örn Inga Bjarkason langt út á velli og fékk beint rautt spjald að launum og einungis 4 sekúndur til leiksloka.
Þær voru reyndar býsna lengi að líða og FH tókst að koma boltanum inn á Atla Rúnar sem var frír á línunni og hann skoraði sigurmark FH inga um leið og leiktíminn rann út.
Að sjálfsögðu voru skiptar skoðanir á þessum lokasekúndum, og súrt að tapa leiknum á þennan hátt. En leikurinn var æsispennandi og fólk fékk svo sannarlega eitthvað fyrir peninginn og nóg til að ræða og diskútera í framhaldinu.
Akureyrarliðið náði sér aldrei almennilega af stað í leiknum og var því í stöðugum eltingaleik. Sóknarleikurinn gekk illa lengi framanaf en vissulega komu góðir sprettir sérstaklega í seinni hálfleiknum. Sveinbjörn Pétursson var eiginlega eini maðurinn sem virkilega komst vel frá leiknum en hann varði oft á tíðum meistaralega og virtist vera búinn að lesa stórskyttur FH inga býsna vel.
Mörk Akureyrar: Bjarni Fritzson 7 (2 úr vítum), Oddur Gretarsson 5, Heimir Örn Árnason 3, Guðmundur Hólmar Helgason 2, Hörður Fannar Sigþórsson 2, Bergvin Gíslason 1 og Daníel Einarsson 1.
Sveinbjörn stóð í markinu allan leikinn og varði 16 bolta.
Hjá FH var hornamaðurinn Ari Magnús Þorgeirsson markahæstur með 7 mörk og Ólafur Guðmundsson með 5 mörk. Besti maður FH liðsins var þó markvörðuinn Daníel Freyr Andrésson sem varði 19 skot.
Liðin mætast næst í Kaplakrika á föstudaginn klukkan 20:15 og þriðji leikurinn verður hér í Íþróttahöllinni sunnudaginn 1. maí klukkan 16:00 og nú þarf bara að spýta í lófana og komast á sigurbrautina, akureyskir handboltamenn hafa séð það svartara fyrr, baráttan er bara rétt að byrja.
Verður Guðmundur Hólmar í banni í næsta leik?
Nánast allir fjölmiðlar hafa fullyrt að vegna rauða spjaldsins sem Guðmundur Hólmar fékk undir lok leiksins verði hann í leikbanni á föstudaginn. En það er engan veginn víst. Dómarar leiksins, þeir Anton Gylfi Pálsson og Hlynur Leifsson sáu ekki ástæðu til að skila inn dómaraskýrslu um atvikið. Staðreyndin er sú að í lögum og reglugerð HSÍ er ekki lengur til neitt sem heitir sjálfkrafa leikbann heldur verður ávallt að fylgja leikskýrslunni sérstök skýrsla dómara um slík atvik og viðkomandi leikmaður þá úrskurðaður í bann á grundvelli hennar. Eftir viðtal við eftirlitsdómara leiksins og starfsmann HSÍ eru því allar horfur á að Guðmundur Hólmar sé gjaldgengur í næsta leik á föstudaginn. |
Fréttir 
Þú flettir milli frétta með örvalyklunum eða smellir á bláu örvarnar!
Efst á síðu